(ခ)-စားအုန်းဆီ တင်သွင်းခြင်းနှင့်စပ်လျဉ်းသည့် မေးခွန်း

မြန်မာနိုင်ငံရဲ့ လက်ရှိလူဦးရေအရ စားအုန်းဆီပြည်တွင်းဝယ်လိုအားနဲ့ ရောင်းလိုအား Supply and Demand ကိုတွက်ချက်ကြည့်မယ်ဆိုရင် လူတစ်ဦးလျှင် တစ်နှစ်စားသုံးမှု ဆီ ၆.၂၅ ပိဿာနှုန်းနဲ့ လူဦးရေ သန်း ၆၀ ရဲ့ တစ်နှစ်စားသုံးမှုဆီတန်ချိန် ‌ြခောက်သိန်းဖြစ်ပြီးတော့ လုပ်ငန်းသုံးနဲ့ စားသောက် ဆိုင်သုံးဆီတန်ချိန် သုံးသိန်းဖြစ်တာကြောင့် စုစုပေါင်းစားသုံးဆီ တစ်နှစ်လိုအပ်ချက်တန်ချိန် ကိုးသိန်း ဖြစ်ပါတယ်။ ပြည်တွင်းထုတ်လုပ်နိုင်မှုကိုကြည့်ရင် မြေပဲ၊ နှမ်း၊ နေကြာနဲ့ အခြားဆီထွက်သီးနှံများကနေ တစ်နှစ်ကို ဆီတန်ချိန် ၅.၉ သိန်းပဲရှိတာကြောင့် တစ်နှစ်ကို ဆီတန်ချိန် ၃.၁ သိန်း၊ တစ်လကို ဆီတန်ချိန် ၂၅၈၀၀ ကျော်ထပ်မံလိုအပ်ကြောင်း တွက်ချက်ရရှိပါတယ်။ ဒီလိုအပ်ချက်ရှိနေတာကို ပြည်ပက စားအုန်းဆီ တင်သွင်းခြင်းဖြင့် ပြည်တွင်းစားသုံးဆီ လုံလောက်မှုရှိရန်နဲ့ ပြည်တွင်းစားသုံးဆီ ဈေးနှုန်းများတည်ငြိမ်မှုရှိအောင်ဆောင်ရွက်ပေးရတာဖြစ်ပါတယ်။ စီးပွားရေးနှင့်ကူးသန်းရောင်းဝယ် ရေးဝန်ကြီးဌာနမှထုတ်ပြန်ထားတဲ့ ပြည်ပသို့တင်ပို့ခွင့်မပြုတဲ့ ကုန်ပစ္စည်းများအထဲမှာ ဆီကြိတ်ရာ၌ အသုံးပြုသည့် နှမ်းနီ၊ နှမ်းညို၊ နှမ်းဆီ၊ မြေပဲနှင့် မြေပဲဆီများထည်‌့သွင်းသတ်မှတ်ထားခြင်းကို ၂၀၁၁ ခုနှစ်၊ သြဂုတ်လ ၂၉ ရက်နေ့မှာ ကင်းလွတ်ခွင့်ပြုလျက် ပြည်ပသို့တင်ပို့ခွင့်ပြုပြီးဖြစ်ပါတယ်။

          ယခင်က ပြည်တွင်းစားသုံးမှုဖူလုံစေမှုကို ရှေးရှုပြီး ဆီကြိတ်နှမ်းများဖြစ်တဲ့ နှမ်းနီ၊ နှမ်းညို၊ နှမ်းဆီ၊ မြေပဲ၊ မြေပဲဆီများကို ပြည်ပတင်ပို့ ခွင့်မပြုဘဲ ကန့်သတ်ထားခဲ့ပါတယ်။ ဒီလိုကန့်သတ်ချက်ရဲ့ အကျိုးဆက်အနေနဲ့ မြေပဲ၊ နှမ်းနီ၊ နှမ်းညိုများကို တရားမဝင်နည်းလမ်းဖြင့် ပြည်ပသို့ တင်ပို့ခြင်း၊ စိုက်ပျိုးထုတ်လုပ်မှုအပိုင်းမှာလည်း အခြားပြည်ပပို့ကုန်သီးနှံများသာ တိုးချဲ့စိုက်ပျိုးထုတ်လုပ်ကြတဲ့ အတွက်ဆီထွက်သီးနှံများ အထွက်ပမာဏကျဆင်းလာခြင်း၊ သီးနှံအရည်အသွေးများကျဆင်းလာခြင်း စတဲ့ အကျိုးဆက်များဖြစ်ပေါ်လာခဲ့ပါတယ်။ ယခုနှစ်မှာ ရာသီဥတုအခြေအနေဟာ နှမ်းအကြိုက် ရာသီဥတုအခြေအနေဖြစ်တဲ့အတွက် နှမ်းအထွက် ပိုမိုလာခြင်း၊ နှမ်းများပေါ်ဦးစအခြေအနေမှာ နှမ်းဈေးများကျဆင်းလာပြီး တောင်သူများတွက်ခြေမကိုက်မှု ဖြစ်လာနိုင်ခြင်းများကြောင့် စိုက်ပျိုး ထုတ်လုပ်သူတောင်သူများနှင်‌့ ပြည်ပပို့ကုန်လုပ်ငန်းရှင်များ၏ တင်ပြချက်အရ ဆီကြိတ်နှမ်းများဖြစ်တဲ့ နှမ်းနီ၊ နှမ်းညိုနှင့် မြေပဲ၊ နှမ်းဆီ၊ ‌ြမေပဲဆီများကို ပြည်ပသို့တင်ပို့ခွင်‌့ပြုခဲ့တာဖြစ်ပါတယ်။ အဲဒီလို တင်ပို့ခွင့်ပြုခဲ့တာကြောင့် နှမ်းနီ၊ နှမ်းညို ဈေးဟာ ယခင်တင်ပို့ခွင့်မပြုခင်က တစ်တန်ကို ကျပ် ၇၀၀၀၀၀ ဝန်းကျင်သာရှိခဲ့ရာမှ တင်ပို့ခွင့်ပြုပြီး နောက် ကျပ် ၈၈၀၀၀၀ ဝန်းကျင်သို့ သိသိသာသာ တက်လာတာကိုတွေ့ရပါတယ်။ ဒါကြောင့် စိုက်ပျိုးထုတ်လုပ်သူများ ပိုမိုအကျိုးကျေးဇူးဖြစ်ထွန်းခဲ့တာ ဖြစ်ပါတယ်။

ဒါ့အပြင် နှမ်း၊ မြေပဲများသာမက မြေပဲဆီ၊ နှမ်းဆီများကို တင်ပို့ခွင့်ပြုထားတာဖြစ်တဲ့အတွက် ဆီစက်လုပ်ငန်းရှင်များလည်း ပြည်ပတင်ပို့ဖို့အခွင့်အလမ်းရရှိစေပါတယ်။ သို့သော် နိုင်ငံတကာ အဆင့်မီဈေးကွက်အကြိုက် ထုတ်လုပ်တင်ပို့နိုင်ဖို့ကို ကြိုးစားရမှာဖြစ်ပါတယ်။ ဒီလိုတင်ပို့ခွင့်ပြုခြင်း အားဖြင့် စိုက်ပျိုးထုတ်လုပ်သူ တောင်သူများအတွက် အကျိုးဖြစ်ထွန်းမှုများ ရရှိလာမှာဖြစ်သလို ဆီစက်များအနေနဲ့လည်း နှမ်းဆီ၊ မြေပဲဆီများအဖြစ် ကြိတ်ခွဲထုတ်လုပ်ပြီး ပြည်ပကိုတင်ပို့နိုင်ပြီ ဖြစ်တာကြောင့် ဆီစက်လုပ်သားများအတွက် အလုပ်အကိုင်အခွင့်အလမ်းများ ပိုမိုရရှိလာနိုင်တော့မှာ ဖြစ်ပါတယ်။ ဆီအဖြစ်ကြိတ်ခွဲထုတ်လုပ်တင်ပို့နိုင်ခြင်းကြောင့် မွေးမြူရေးအစာဖြစ်တဲ့ ပဲဖတ်၊ နှမ်းဖတ် စတာများလည်း ပေါပေါများများထွက်ရှိလာနိုင်မှာဖြစ်ပါတယ်။ နှမ်းနီ၊ နှမ်းညို၊ နှမ်းဆီ၊ ‌ြမေပဲဆန်နဲ့ မြေပဲဆီများ ပြည်ပဈေးကွက် တိုးမြှင့်ရှာဖွေနိုင်ရေးအတွက် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနအနေနဲ့ သက်ဆိုင်ရာကုန်သည်အသင်းအဖွဲ့များနဲ့ ပူးပေါင်းညှိနှိုင်းပြီး ဆောင်ရွက်ပေးသွား မှာဖြစ်ပါတယ်။ ယခု စားအုန်းဆီတင်သွင်းမှုပမာဏဟာ လွန်ခဲ့သောနှစ်များကာလအတွင်း တစ်နှစ် တင်သွင်းခဲ့တဲ့ ပမာဏကိုတွက်ချက်ပြီး ပြည်ပမှတင်သွင်းခွင့်ပြုခဲ့တာဖြစ်ပါတယ်။ စားအုန်းဆီ တင်သွင်းရာမှာလည်း အရည်အသွေးနှင့် ပြည်တွင်းဖြန့်ဖြူးရောင်းချတဲ့ဈေးနှုန်းများကို အကောင်းဆုံး နှင့် အသက်သာဆုံးဖြစ်အောင် ညှိနှိုင်းစီမံဆောင်ရွက်ခဲ့ပါတယ်။ ၂၀၁၁ ခုနှစ်၊ ဧပြီလမှ စက်တင်ဘာလ အထိခြောက်လခန့်ကာလအတွင်း ပြည်ပမှတင်သွင်းခဲ့မှုပမာဏဟာ ၁၂၃၄၁၄ မက်ထရစ်တန်ဖြစ်ပါ တယ်။ တစ်လပျမ်းမျှ ၂၁၇၀၀ တန်ခန့်ဖြစ်ပါတယ်။

ပထမအဆင့်အနေနဲ့ ပြည်ပမှတင်သွင်းဖြန့်ဖြူးရောင်းချတဲ့ စားအုန်းဆီလက်လီဈေးကွက်မှာ ဈေးနှုန်းကျဆင်းတည်ငြိမ်လာပြီးနောက် ပြည်တွင်း ပြည်သူလူထုစားသုံးရာ ကျန်းမာရေးနှင့် ပိုမိုညီ ညွတ်တဲ့ အရည်အသွေးမြင့် စားအုန်းဆီများကို တင်သွင်းရောင်းချဖို့စီမံဆောင်ရွက်ထားပြီး ဖြစ်ပါတယ်။ ပြည်ပပို့ကုန် လယ်ယာထွက်ကုန်သီးနှံများရဲ့ အခြေအနေကို တင်ပြရလျှင် ပဲမျိုးစုံ တင်ပို့မှုဟာ ဈေးကွက်အကန့်အသတ်ရှိတာကြောင့် ပို့ကုန်ပဲမျိုးစုံရဲ့ ဈေးနှုန်းကောင်းမွန်တည်ငြိမ်မှု ရှိစေပြီး ရောင်းသူဈေးကွက် ဖန်တီးနိုင်ဖို့လည်း အရေးကြီးပါတယ်။ လယ်ယာထွက်ကုန်သီးနှံအချို့ ပြည်ပဈေးကွက်မှာ အကန့်အသတ်ဖြင့်ရွေးချယ်ဝယ်ယူမှုတွေနှင့် ရင်ဆိုင်ရတဲ့အခါ ပို့ကုန်လုပ်ငန်းရှင် များ အရှုံးပေါ်ခြင်းကတစ်ဆင့် တောင်သူများထုတ်လုပ်မှုစရိတ် မကာမိတဲ့ဈေးနှုန်းများအထိ ကျဆင်းခဲ့ ရတာ‌တွေ့ရှိရပါတယ်။ ဒါကြောင့် အခြားသောလယ်ယာထွက်ကုန်သီးနှံမျိုးစုံကို ပြည်ပဈေးကွက်သို့ ရှာဖွေတင်ပို့ရေးဟာ လိုအပ်ချက်တစ်ရပ် ဖြစ်လာပါတယ်။ ကုန်သွယ်မှုမှာ ကိုယ့်တစ်နိုင်ငံတည်း၊ ကိုယ်‌့ဒေသတစ်ခုတည်း အခြေအနေကိုသာမက အပြည်ပြည်ဆိုင်ရာနယ်ပယ်အထိ ကုန်သွယ် ဆက်ဆံမှုတွေကို လိုက်လျောညီထွေ ဆောင်ရွက်နေခြင်းဖြစ်ပါတယ်။ တစ်ချိန်မှာ မြန်မာနိုင်ငံရဲ့ ပို့ကုန်ပစ္စည်းများထဲမှာ မြေပဲ၊ နှမ်းစတဲ့ ဆီထွက်သီးနှံများနဲ့ ပဲဆီ၊ နှမ်းဆီစသည်တို့ဟာ အဓိကနေရာမှာ ရှိလာနိုင်ဖို့အတွက် အခြေအနေကို ဖန်တီးနေရခြင်း ဖြစ်ပါတယ်။ ဒါကြောင့် ဈေးကွက်ချိတ်ဆက်မှု သဘောများအရလည်း ကြိုတင်မျှော်တွေး ဆောင်ရွက်ရတာဖြစ်ပါတယ်။ ပြည်ပမှတင်သွင်းတဲ့ စားအုန်းဆီများကြောင့် ပြည်တွင်းစိုက်ပျိုးထုတ်လုပ်သူများ၊ လုပ်ငန်းရှင်များ အကျိုးထိခိုက်မှုများ ကြီးကြီးမားမားဖြစ်ပေါ်လာရင် ကာကွယ်တားဆီးနိုင်မယ့် ကမ္ဘာ့ကုန်သွယ်ရေးအဖွဲ့ WTO ရဲ့ စည်းမျဉ်းစည်းကမ်း သဘောတူညီချက်များကိုလည်း လိုအပ်ရင် အသုံးချကာကွယ်နိုင်မှာဖြစ်ကြောင်း ရှင်းလင်းတင်ပြလိုပါတယ်။ ထို့ကြောင့် ဦးကိုကြီးရဲ့မေးခွန်းနှင်‌့ပတ်သက်၍ စိုက်ပျိုးထုတ်လုပ်တဲ့ တောင်သူလယ်သမားများအတွက်လည်းကောင်း၊ ပြည်တွင်း၌ ကြိတ်ခွဲထုတ်လုပ်သော ဆီစက်များ အတွက်လည်းကောင်း၊ ဆီစက်လုပ်သားများ ပုံမှန်အလုပ်ရရှိရေးအတွက်လည်းကောင်း၊ တိရစ္ဆာန် အစားအစာအတွက် ပေါများခြင်းအကျိုးကိုလည်းကောင်း၊ စားသုံးသူလူထုကျန်းမာရေးနှင့် ညီညွတ် သောစားသုံးဆီများကို သင်‌့တင့်သောဈေးနှုန်းနှင့် စားသုံးနိုင်ခြင်း အကျိုးများရရှိနိုင်ရေးအတွက် လည်းကောင်း စနစ်တကျစိစစ်တွက်ချက် ဆောင်ရွက်ပေးလျက်ရှိပါကြောင်းနဲ့ တစ်ဖက်ကလည်း ပြည်ပက စားအုန်းဆီများတင်သွင်းခြင်းကို စိစစ်ဆောင်ရွက်သွားမှာဖြစ်ပါကြောင်း ဖြေကြားပါသည်။