(ဃ)-အရန်ဆန်ဝယ်ယူသိုလှောင် ထားခြင်း၏ ရည်ရွယ်ချက် နှင့် စပ်လျဉ်းသည့်မေးခွန်း

နိုင်ငံတော်မှ အရန်ဆန်ဝယ်ယူထားရှိ ခြင်းသည် ဆန်ဈေးတက်ပါက ဈေးကွက်အတွင်း ရောင်းချခြင်းဖြင့် ဈေးနှုန်းပြန်လည်ထိန်းညှိရန် ရည် ရွယ်ပါသလား။ ပို့ကုန်အတွက် ရည်ရွယ်ပါသလား။ သိလိုပါကြောင်း မေးမြန်းခြင်းအပေါ် ပြန်လည် ရှင်းလင်းတင်ပြသွားမှာဖြစ်ပါတယ်။ ကျွန်တော်တို့ရဲ့ ဝန်ကြီးဌာနကို ရောက်ရှိခဲ့တဲ့ ဦးကြည်မြင့်ရဲ့ မေးမြန်းချက်က ဤမျှသာဖြစ်ပါတယ်။ ဒါကြောင့်မို့လို့ ဒီနေ့လွှတ်တော်ထဲမှာမေးမြန်းထားတဲ့ တချို့ အချက်များမှာ ကျွန်တော်ရဲ့အဖြေမှာ မကာမိရင်တော့ ကျွန်တော့်ကို ခွင့်လွှတ်ပေးဖို့ မေတ္တာရပ်ခံလိုပါ တယ်။ ကျွန်တော်တို့ ဆန်စပါးဟာ မြန်မာနိုင်ငံရဲ့အဓိကစားသုံးသီးနှံ (Staple Food) ဖြစ်ပြီးတော့ မြန်မာနိုင်ငံဟာ ကမ္ဘာမှာစားသုံးမှုနှုန်း အများဆုံးနိုင်ငံထဲမှာပါဝင်တာဖြစ်ပါတယ်။ သို့ဖြစ်ပါ၍ ဆန်ဈေး နှုန်းအလွန်အမင်းမြင့်တက်ခြင်းဟာ စားသုံးသူပြည်သူလူထုအတွက် ဝန်ထုပ်ဝန်ပိုးဖြစ်ပေါ်လာနိုင်တဲ့ နည်းတူ ဆန်ဈေးနှုန်းအလွန်အမင်းကျဆင်းခြင်းဟာလည်း စိုက်ပျိုးထုတ်လုပ်တဲ့တောင်သူလယ်သမား များတွတ်ခြေကိုက်မှုမရှိဘဲ စိုက်ပျိုးထုတ်လုပ်မှုပမာဏများ လျော့နည်းသွားမှာဖြစ်ပါတယ်။

          ပြည်ထောင်စုသမ္မတမြန်မာနိုင်ငံ ဖွဲ့စည်းပုံအခြေခံဥပဒေ ၂၀၀၈ ခုနှစ်မှာ နိုင်ငံတော်သည် တောင်သူလယ်သမားများရဲ့ အခွင့်အရေးများကာကွယ်စောင့်ရှောက်ရန် လိုအပ်သည့်ဥပဒေများ ပြဋ္ဌာန်းဆောင်ရွက်မည်ဖြစ်ကြောင်းနှင့် တောင်သူလယ်သမားများ စိုက်ပျိုးထုတ်လုပ်သည့် ကောက်ပဲ သီးနှံများသင့်တင့်မျှတသည့် တန်ဖိုးရရှိရန် ကူညီဆောင်ရွက်မည်ဖြစ်ကြောင်း တောင်သူလယ်သမား များနှင့်စပ်လျဉ်းသည့် အခြေခံရမည့်မူများချမှတ်ခဲ့ပါတယ်။ သို့ဖြစ်ပါ၍ ဖွဲ့စည်းပုံအခြေခံဥပဒေပါ အ‌ွခေခံရမည့်မူများနှင့်အညီ စိုက်ပျိုးထုတ်လုပ်သူတောင်သူလယ်သမားများ သင့်တင့်မျှတတဲ့ အကျိုးအမြတ်ရရှိရန် ပြည်သူများစိတ်လက်ချမ်းသာစွာ ဝယ်ယူစားသုံးနိုင်ရန် နိုင်ငံတော်အတွင်း အရေးပေါ်အခြေအနေများ ပေါ်ပေါက်လာပါက လိုအပ်သလို ထုတ်နှုတ်သုံးစွဲနိုင်ရန်အတွက် နိုင်ငံတော်အရန်ဆန်ဝယ်ယူရေးအစီအစဉ်များ ချမှတ်ဆောင်ရွက်ခဲ့ပါတယ်။ နိုင်ငံတော်သမ္မတကြီးမှ ၂၀၁၁ ခုနှစ်၊ သြဂုတ်လ ၁၇ ရက်နေ့မှာ စီးပွားရေး၊ လူမှုရေးနယ်ပယ်အသီးသီး၊ အသင်းအဖွဲ့ အသီးသီးမှ တာဝန်ရှိသူများနှင့်တွေ့ဆုံပွဲမှာ စပါးပေါ်ချိန်မှာ တောင်သူလယ်သမားများ အရှုံးမပေါ် စေရအောင် အစိုးရနှင့်ဆန်ကုန်သည်ကြီးများ ဖက်စပ်ငွေကြေးစိုက်ထုတ်ကာ အခြေခံဈေးနှုန်းတစ်ခု အဖြစ်သတ်မှတ်ဝယ်ယူပြီး နိုင်ငံတော်အရန်ဆန်အဖြစ်ထားရှိသွားရန်ဟု လမ်းညွှန်ခဲ့ပါတယ်။ နိုင်ငံတော်သမ္မတကြီးလမ်းညွှန်ချက်နှင့်အညီ နိုင်ငံတော်မှ ငွေကျပ် ၁၀ ဘီလီယံ၊ ဗဟိုသမဝါယမ အသင်းမှ ငွေကျပ် ၁၀ ဘီလီယံ၊ မြန်မာနိုင်ငံဆန်စပါးလုပ်ငန်းအသင်းမှ ငွေကျပ် ၁၀ ဘီလီယံ၊ စုစုပေါင်းငွေကျပ် ၃၀ ဘီလီယံ ထည့်ဝင်စေရန်လျာထားပြီး နိုင်ငံတော်အရန်ဆန်ထားရှိရေး ကြီးကြပ်မှု ကော်မတီဖွဲ့စည်းပြီးတော့ စပါးများဝယ်ယူပေးခဲ့ပါတယ်။ မိုးစပါးကို တင်း ၁၀၀ မှာ ၃၃၀၀၀၀ ကျပ် နှုန်း၊ နွေစပါးကို တင်း ၁၀၀ မှာ ၃၂၀၀၀၀ ကျပ်နှုန်းများနဲ့ဝယ်ယူပေးခဲ့ပါတယ်။ အရန်ဆန်ထားရှိ ရေးကြီးကြပ်မှုကော်မတီရဲ့ စာရင်းဇယားများအရ ၂၀၁၂ ခုနှစ်၊ ဇူလိုင်လ ၂ ရက်နေ့အထိ မိုးစပါး   တင်း ၁၃ သိန်းကျော် ဝယ်ယူရရှိပြီးဖြစ်ပါတယ်။ မိုးစပါးနှင့် နွေစပါးမှာ စုစုပေါင်း ဆန်တန်ချိန်အနေနဲ့ ၃၃၀၀၀ ကျော် ကြိတ်ခွဲရရှိပြီးဖြစ်ပါတယ်။ အရန်ထားရှိခြင်းရဲ့ မူလရည်ရွယ်ချက်အရ တောင်သူ လယ်သမားများ၏အကျိုး၊ စားသုံးသူပြည်သူများ၏အကျိုးကို ရည်ရွယ်ထားရှိခြင်းဖြစ်ရာ လွှတ်တော် ကိုယ်စားလှယ်ကြီး ဦးကြည်မြင်‌့ရဲ့ မေးခွန်းမှာပါရှိတဲ့အတိုင်း ရာသီဥတုအခြေအနေအရသော် လည်းကောင်း သဘာဝဘေးအန္တရာယ်များအပါအဝင် အခြားမမျှော်မှန်းနိုင်သော အရေးပေါ်အခြေ အနေများကြောင့်လည်းကောင်း စားသုံးသူဈေးကွက်အတွင်းမှာ ဆန်ပြတ်လပ်မှုများဖြစ်ပေါ်ပါက ပြည်တွင်းစားသုံးမှုအဆင်ပြေစေရေးအတွက် အရန်ဆန်များအား ဈေးကွက်အတွင်းမှာ ဖြန့်ဖြူး ရောင်းချပေးသွားမှာဖြစ်ပါတယ်။ အကယ်၍ ပြည်တွင်းဖြန့်ဖြူးမှုအတွက် မလိုအပ်တဲ့အချိန်မျိုးမှာ ပိုလျှံတဲ့အရန်ဆန်များကိုတော့ ပြည်ပသို့တင်ပို့ရောင်းချသွားရန် ရည်ရွယ်ထားပါကြောင်း ရှင်းလင်း ဖြေကြားပါသည်။