(က)-ရန်ကုန်-နေပြည်တော်-မန္တလေး အမြန်လမ်းမကြီးတစ်လျှောက် လိုအပ်နေသော အဆင့်မီ ဖြည့်စွက်ထောက်ပံ့အင်္ဂါရပ်များ (Road Furniture and facilities) ဖြည့်ဆည်းကာ စည်းကမ်းအားနည်းချက်များလည်း ပြုပြင်ထိန်းသိမ်း ဆောင်ရွက်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ရန်ကုန်-မန္တလေး အမြန်လမ်းမကြီးကို လမ်းအပိုင်းအလိုက် ဖွင့်လှစ်ခဲ့ရာ ရန်ကုန်-နေပြည်တော်-မန္တလေးလမ်း အပိုင်းအား ၂၅-၃-၂၀၀၉ ရက်နေ့တွင် လည်းကောင်း၊ နေပြည်တော်-စကားအင်းလမ်း အပိုင်းအား ၂၉-၁၂-၂၀၁၀ ရက်နေ့တွင်လည်းကောင်း၊ စကားအင်း-တံခွန်တိုင်လမ်းအပိုင်းအား ၂၃-၁၂-၂၀၁၁ ရက်နေ့တွင်လည်းကောင်း အသီးသီးဖွင့်လှစ်ခဲ့ပြီး ယခုအခါ အမြန်လမ်းမကြီးကို Master Plan အရ နိုင်ငံတကာအဆင့်မီ အမြန်လမ်းမကြီးအဖြစ် တိုးချဲ့ဖောက်လုပ်သွားရန် ရည်ရွယ်၍ စီမံချက်များချမှတ် ဆောင်ရွက်လျက်ရှိပါကြောင်း၊ အမြန်လမ်းမကြီး တစ်လျှောက်တွင် ခရီးသွားပြည်သူများအား အဆင်ပြေချောမွေ့စွာ သွားလာနိုင်ရေး၊ ယာဉ်အန္တရာယ်ကင်းရှင်းရေးနှင့် လမ်းခရီးတွင် အပန်းဖြေနားနေစားသောက်နိုင်ရေးစသည့် အချက်များအားရည်ရွယ်၍ မိုင် ၄၀ တွင် ဘောနတ်ကြီးယာဉ်ရပ်နားစခန်း၊ ၁၁၅ တွင် ဖြူးယာဉ်ရပ်နားစခန်း၊ မိုင်တိုင် ၂၀၁ တွင် နေပြည်တော် ယာဉ်ရပ်နားစခန်း၊ မိုင်တိုင် ၂၈၅ တွင် သီးကုန်းယာဉ်ရပ်နားစခန်းနှင့် မိုင်တိုင် ၃၅၂ တွင် စကားအင်း ယာဉ်ရပ်နား စခန်းတို့ကို တည်ဆောက်ဖွင့်လှစ်ခဲ့ပါကြောင်း၊ ၎င်းအပြင် မိုင် ၄၀ (အပြန်လမ်း)၊ ၁၅၈ မိုင် ၄ ဖာလုံ (အသွား/အပြန်လမ်း) နှင့် ၃၁၇ မိုင် ၂ ဖာလုံ (အသွားအပြန်လမ်း)၊ ၃၅၂ မိုင် ၂ ဖာလုံ (အပြန်လမ်း) တို့မှာ ယာယီသန့်စင်ခန်းများကိုလည်း လမ်းဦးစီးဌာန၏ အစီအစဉ်ဖြင့် ဒေသခံလုပ်ငန်းရှင်များအား လေလံခေါ်ယူ၍ လုပ်ဆောင်စေလျက်ရှိပါကြောင်း၊

အဆိုပါယာယီ သန့်စင်ခန်းများကို ခရီးသွားပြည်သူလူထုကို ငဲ့ညာသည့်အနေဖြင့် ခရီးသွား ရာသီအတွင်း၌သာ ဆက်လက်ဆောင်ရွက်စေမည်ဖြစ်ပြီး ၁-၅-၂၀၁၈ ရက်နေ့ကစပြီး လုပ်ငန်းများရပ်စဲရန်အတွက် လေလံအောင်မြင်ထားသူများအား အသိပေးအကြောင်းကြားထားပြီး ဖြစ်ပါကြောင်း၊ ယာယီသန့်စင်ခန်းများအား ၇၆ မိုင် Mini Rest Camp ကဲ့သို့ တည်ဆောက်ဖွင့်လှစ်ပြီး ပါက ခရီးသွားပြည်သူများ အပန်းဖြေနားနေ စားသုံးနိုင်ရန်အတွက် ဆက်လက်စီမံ ဆောင်ရွက်သွားမည် ဖြစ်ပါကြောင်း၊

ရန်ကုန်-မန္တလေးအမြန်လမ်းမကြီးအား အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေး အဖွဲ့အနေဖြင့် ပြုပြင်ထိန်းသိမ်းခြင်း၊ တိုးချဲ့ဖောက်လုပ်ခြင်းများအပြင် သန့်ရှင်းသာယာလှပရေး လုပ်ငန်းများကိုလည်း အမြန်လမ်းမကြီး မိတ်ဘက်အဖွဲ့အစည်းများဖြစ်သည့် အမြန်လမ်းရဲတပ်ဖွဲ့၊ ကြက်ခြေနီတပ်ဖွဲ့၊ မီးသတ်တပ်ဖွဲ့တို့ဖြင့် ပူးပေါင်း၍ လစဉ်နောက်ဆုံးပတ် (သောကြာနေ့) တိုင်း အမှိုက်ကောက် (Campaign) အား ဆောင်ရွက်လျက်ရှိသည့်အပြင် လမ်းပိုင်းအလိုက် အင်ဂျင်နီယာများနှင့် တိုးလ်ဂိတ်ဝန်ထမ်းများဖြင့်လည်း စွန့်ပစ်အမှိုက်များ သိမ်းဆည်းခြင်း၊ သန့်ရှင်းရေးပြုလုပ်ခြင်းများကို နေ့စဉ်ဆောင်ရွက်လျက်ရှိသည့်အပြင် အမြန်လမ်းမကြီးပေါ် အသုံးပြုသွားလာလျက်ရှိသည့် ခရီးသွားပြည်သူများကိုလည်း ကားပေါ်တွင် ပါလာသောအမှိုက်များကို Rest Camp ရောက်မှသာလျှင် အမှိုက်ပုံးအတွင်းသို့ စွန့်ပစ်ပါရန်၊ အမှိုက်မပစ်ရ အသိပေးကြေညာချက်များကိုလည်း ဒေါ်ခင်စန်းလှိုင် အကြံပေးသည့်အတွက် မိုင် ၂၀ ကြား ဆိုင်းဘုတ်တစ်ခုစီ စိုက်ထူအသိပေးထားရှိခဲ့ပါကြောင်း၊ အဆိုပါဆိုင်းဘုတ်များအပြင် တိုးလ်ဂိတ်များ၊ Rest Camp များ၊ ယာယီသန့်စင်ခန်းများနှင့် အရိပ်ရအပင်ကြီးများအောက်တွင်လည်း ခရီးသွား ပြည်သူများ လွယ်ကူစွာ အမှိုက်စွန့်ပစ်နိုင်ရန် အမှိုက်ပုံးများထားရှိပေးခြင်း၊ အသိပေး၊ သတိပေး၊ ပညာပေးဆိုင်းဘုတ်များစိုက်ထူခြင်း၊ အခါအားလျော်စွာ ခရီးသွားပြည်သူများ သိရှိနိုင်ရန် လက်ကမ်းစာစောင်များဖြန့်ဝေပေးခြင်း စသည်တို့ကိုလည်း စဉ်ဆက်မပြတ် ဆောင်ရွက်လျက်ရှိပါကြောင်း၊ ၇၆ မိုင် Mini Rest Camp ဆောက်လုပ်ထားခြင်း နှင့်ပတ်သက်၍ နိုင်ငံခြားသားခရီးသည်များနှင့် ပြည်တွင်းခရီးသွားများအတွက် ဈေးနှုန်းချိုသာစွာ အဆင့်တန်းမြင့်မြင့် အပန်းဖြေနားနေ စားသောက်နိုင်ရန်ရည်ရွယ်၍ ဆောက်လုပ်ရေးဝန်ကြီးဌာန ပြည်ထောင်စုဝန်ကြီး၏ လမ်းညွှန်ချက်အရ အမြန်လမ်းမကြီး နယ်နိမိတ်ဖြစ်သည့် ပေ ၄၀၀ အတွင်း အမြန်လမ်းမကြီး ဥပဒေနှင့်အညီ ဆောက်လုပ်ရေးဝန်ကြီးဌာန၏ စီမံခန့်ခွဲပိုင်ခွင့်ဖြင့် ၁-၁-၂၀၁၇ ရက်နေ့မှ စတင်တည်ဆောက်ခဲ့ပြီး ၂၆-၈-၂၀၁၇ ရက်နေ့တွင် ဆောက်လုပ်ရေးဝန်ကြီးဌာန ပြည်ထောင်စုဝန်ကြီးနှင့် ပဲခူးတိုင်းဒေသကြီး ဝန်ကြီးချုပ်တို့မှ ဖွင့်လှစ်ပေးခဲ့ပါကြောင်း၊

Mini Rest Camp ပင်မအဆောက်အဦသည် လမ်းလယ်ကျွန်းအလယ်မှ စုစုပေါင်းပေ ၁၀၀ အကွာတွင် တည်ဆောက်ထားခြင်းဖြစ်ပါကြောင်း၊ အဆောက်အဦ၏ ရှေ့တွင် ၁၂.၅ ပေအကျယ် လမ်းလေးလမ်း စုစုပေါင်း ပေ ၅၀ အကျယ် ကတ္တရာကွန်ကရစ်လမ်းခင်းထားပြီး Buffer Zone အဖြစ် Land Scaping အပါအဝင် ၃၅ ပေချန်လှပ်ထားပါကြောင်း၊ ဆိုလိုသည်မှာ နောင်တစ်ချိန်တွင် Fully Access Control လမ်းမကြီးဖြစ်လာပါက ထိုလေးလမ်းသွား၏ အပြင်ဘက်ကို ခြံစည်းရိုးခတ်ထားလျှင် အဆိုပါ Rest Camp သည် ခြံစည်းရိုး၏ အပြင်ဘက် ရောက်ရှိနေပါကြောင်း၊ ရန်ကုန်မှ မိုင် ၉၀ နှင့် ၁၁၀ အတွင်း ယခင်အခါက ယာဉ်အန္တရာယ်ဖြစ်စဉ်များအား သုံးသပ်ကြည့်ရာတွင် ယာဉ်မောင်းသူများအနေဖြင့် ခရီးသွားကြာချိန် နှစ်နာရီခွဲခန့် မောင်းနှင်ရသဖြင့် Fatigue မောပန်းနွမ်းနယ်ပြီး Accident ဖြစ်ပွားမှုအရေအတွက် များခဲ့ပါကြောင်း၊ ယခု ၇၆ မိုင် Mini Rest Camp တည်ဆောက်ပြီးသည့် နောက်ပိုင်း အဆိုပါဖြစ်စဉ်များအား ပြန်လည်သုံးသပ်ရာတွင် ယာဉ်မောင်းသူများအနေဖြင့် ခေတ္တအနားယူပြီးမှ ပြန်လည်ခရီးဆက်ရသည့်အတွက် ယာဉ်မတော်တဆ ဖြစ်ပွားမှုနှုန်းများ သိသိသာသာလျော့နည်း ကျသွားခဲ့ကြောင်း စိစစ်တွေ့ရှိရပါကြောင်း၊

ရန်ကုန်မှ ဘောနတ်ကြီးအထိ မိုင် ၄၀ အပိုင်းကို ADB ချေးငွေဖြင့် နိုင်ငံတကာအဆင့်မီ Expressway အဖြစ် အပြည်ပြည်ဆိုင်ရာစံသတ်မှတ်ချက်များနှင့် ကိုက်ညီသောလမ်းမကြီးဖြစ်ရန် ADB ချေးငွေဖြင့် AC ခင်းခြင်း၊ Raised Median မှ Depressed Median ပြောင်းလဲပြီး ၂.၅ မီတာရှိ အတွင်း/အပြင်လမ်း ပုခုံးပြုလုပ်ခြင်း၊ ခြံစည်းရိုးခတ်ခြင်း၊ Guard Rail များတပ်ဆင်ခြင်းတို့ဖြင့် လက်ရှိ လေးလမ်းသွား လမ်းမကြီးအား နိုင်ငံတကာ အဆင့်မီလမ်းမကြီးအဆင့်ဖြစ်အောင် ဆောင်ရွက်သွားမည် ဖြစ်ပါကြောင်း၊ ၎င်းအပြင် လမ်းတစ်လျှောက် ရန်ကုန်မှနေပြည်တော်၊ မန္တလေးအထိ အမြန်လမ်းမကြီးတစ်လျှောက် Road Furniture များကိုလည်း လိုအပ်သလို ထပ်မံ၍ ဆောင်ရွက်သွားမည် ဖြစ်ပါကြောင်းနှင့် အပြည်ပြည်ဆိုင်ရာ Standard ဖြစ်သည့် Fast Comfortable နှင့် Safety များပါဝင်သော Fully Access Control လမ်းမကြီးအဖြစ် အဆိုပါလမ်းပိုင်းများအား တစ်ဆင့်ပြီးတစ်ဆင့် အဆင့်မြှင့်တင်ဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။

ဒေါ်ခင်စန်းလှိုင် (ပုလဲမဲဆန္ဒနယ်) ကဆက်စပ် မေးခွန်းမေးမြန်းပါသည်။

မိမိတို့ Toll Gate များတွင် အလိုအလျောက် ငွေသွားခံသည့်စနစ်ကို စမ်းသပ် နေသည်မှာ ကြာပြီဖြစ်ပါကြောင်း၊ ပြည်သူတွေသွားရေးလာရေး လွယ်ကူစေရန်နှင့် ယာဉ်ကျပ်တည်းမှုများကို ပပျောက်စေရန်အတွက် ထိုစနစ်ကို စတင်ကျင့်သုံးရန်အတွက် အစီအစဉ်ရှိ/မရှိနှင့် မိမိတို့ ရန်ကုန်မှ နေပြည်တော်ကို လာသည့်အခါ အမြန်လမ်းမှ နေပြည်တော်ဝင်သည့်နေရာ အင်မတန်မှ မှောင်ပါကြောင်း၊  ထို့ကြောင့် ဝန်ကြီးဌာနအနေဖြင့် နေပြည်တော်အဝင်လမ်းကို မြင်သာအောင် မီးတိုင်အမြင့်ကြီးများ တပ်ဆင်ပေးရန်အတွက် အစီအစဉ်ရှိ/မရှိကို ဆက်စပ်မေးခွန်းမေးမြန်းပါသည်။

ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးကျော်လင်း

Toll Gate  များတွင် ETC ခေါ်သည့် အလိုအလျောက် ပိုက်ဆံပေးသည့် စနစ်ကိုတပ်ရန် အစီအစဉ်ရှိသည့်အတွက် ပြီးခဲ့သောနှစ်က အလိုအလျောက် ETC စနစ်အတွက် ရန်ပုံငွေဘတ်ဂျက်ရှိသည့်အတွက် တင်ဒါခေါ်ခဲ့ပါကြောင်း၊ တင်ဒါခေါ်သည့်အချိန်တွင် ကုမ္ပဏီများ အပြိုင်အဆိုင်ဖြစ်လာပြီး အခကြေးငွေလုံးဝမယူဘဲ ကြော်ငြာသဘောမျိုးဖြင့် တပ်မည့်ကုမ္ပဏီပေါ် လာပါကြောင်း၊ မိမိတို့နိုင်ငံတော်က ပိုက်ဆံပေးစရာမလိုဘဲ ဒေါ်လာ ၁ သန်းခန့် အကုန်ခံပြီး ကြော်ငြာသဘောမျိုး တပ်မည့်ကုမ္ပဏီပေါ်လာသည့်အတွက် MZ4 လို့ခေါ် ကုမ္ပဏီကို စမ်းသပ်ကာလအနေဖြင့် တပ်ထားပါကြောင်း၊ ယခုလာမည့် ဧပြီလဆန်းကစပြီး ပြည်သူများကို မိမိတို့ကတ်ပြားများအား ဆောက်လုပ်ရေးဝန်ကြီးဌာနက ရောင်းချပေးသွားပြီး၊ ပိုက်ဆံသွင်းပြီး အလိုအလျောက် မောင်းတံမဲ့စနစ်၊ ETC စနစ်ကို စတင်ကျင့်သုံးသွားမည် ဖြစ်ပါကြောင်း၊ နောက်တစ်ခုက နေပြည်တော်အဝင်လမ်းမှောင်နေသည့် ကိစ္စနှင့်ပတ်သက်ပြီး နေပြည်တော်ဥက္ကဋ္ဌကြီး ဒေါက်တာမျိုးအောင်ကလည်း ကျွန်တော်တို့နှင့်ညှိနှိုင်းပြီး ၎င်းလမ်းပိုင်းဆိုင်ရာကို နေပြည်တော်ကောင်စီကို လွဲပေးပါ။ နေပြည်တော်ကနေပြီး ဒါကို ထိန်းသိမ်းသွားမည်ဆိုလျှင် မီးကိစ္စများ ညှိနှိုင်းဆောင်ရွက်ပေးသွားမည် ဖြစ်ပါကြောင်းနှင့် နေပြည်တော်ကောင်စီနှင့်လည်း ညှိနှိုင်းပြီး ဆောင်ရွက်ပေးသွားမည်ဖြစ်ပါကြောင်း ရှင်းလင်းဖြေကြားပါသည်။