မေးခွန်း အကြောင်းအရာ မြစ်သားမြို့နယ်၏ အမှတ်(၄)ခရိုင် ပတ်လမ်းသည် ခရိုင်ချင်းဆက်လမ်းအမှတ်(၂)နှင့် သပြေ တောင်ရွာသာလမ်းတို့ကို ချိတ်ဆက်ထားသည့် Class(A)ဝင်လမ်းဖြစ်ပါကြောင်း၊ ခရိုင်ချင်းဆက် အမှတ်(၂)လမ်းသည် ကျောက်ဆည်ခရိုင်နှင့် မိတ္ထီလာခရိုင်ကို ချိတ်ဆက်ထားပြီး ကျောက်ဆည် မြို့နယ်၊ မြစ်သားမြို့နယ်၊ ဝမ်းတွင်းမြို့နယ်၊ သာစည်မြို့နယ်အထိ သွားလာနိုင်သည့်လမ်း ဖြစ်ပါ ကြောင်း၊ သပြေတောင်-ရွာသာလမ်းသည် မြစ်သားမြို့နယ်မှ ရွာများသာမက ဝမ်းတွင်း မြို့နယ်ရှိ ရွာအများစုအတွက်ပါ အရေးပါသည့်လမ်းဖြစ်ပါကြောင်း၊ ထို့ကြောင့် အဆိုပါလမ်းနှစ်လမ်းကို ချိတ်ဆက်ပေးမည့် ခရိုင်ပတ် လမ်းအမှတ်(၄)ကို အဆင့်မြင့်ပေးနိုင်မည်ဆိုပါက တိုက်ရိုက် အကျိုးပြုအိမ်ခြေ ၁၅၀၀၊ လူဦးရေ ၇၀၀၀ ကျော်နှင့် ကျောက်ဆည်မြို့နယ်၊ မြစ်သားမြို့နယ်နှင့် ဝမ်းတွင်းမြို့နယ်က ရွာများပါ အကျိုးရှိမည်ဖြစ်ပါကြောင်း၊ ထို့ကြောင့် မြစ်သားမြို့နယ်အမှတ်(၄) ခရိုင်ပတ်လမ်းအား ကတ္တရာလမ်းအဖြစ် အဆင့်တိုးမြှင့်ပေးရန် အစီအစဉ် ရှိ/မရှိ သိရှိလိုပါကြောင်းမေးမြန်းပါသည်။
ဖြေကြားချက် အမှတ်(၄)ခရိုင်ပတ်လမ်းသည် ဆောက်လုပ်ရေး ဝန်ကြီးဌာနပိုင် မြစ်သား-ရွာသာ-သပြေတောင်လမ်းနှင့် ခရိုင်ချင်းဆက်လမ်း အမှတ်(၂)တို့ကို ဆက်သွယ်ထားသောလမ်း ဖြစ်ပါကြောင်း၊ လမ်းအရှည် လေးမိုင် (၄)ဖာလုံရှိပြီး ၂၀၀၈-၂၀၀၉ ဘဏ္ဍာရေး နှစ်တွင် တစ်မိုင် (၄)ဖာလုံ၊ ၂၀၁၄-၂၀၁၅ ဘဏ္ဍာရေးနှစ်တွင် သုံးမိုင်တို့ကို အမာခံကျောက်ချော လမ်းအဖြစ် ဆောင်ရွက်ပေးခဲ့ပါကြောင်း၊ ကတ္တရာလမ်းအဖြစ် အဆင့်မြှင့်တင် ဆောင်ရွက်မည်ဆိုပါက ခန့်မှန်းကုန်ကျငွေ ၈၆၁ သန်း ကုန်ကျမည်ဖြစ်ပြီး Box Culvert တစ်စင်းပြုပြင်ရန် လိုအပ်မည်ဖြစ်ပါကြောင်း၊ အဆိုပါလုပ်ငန်းအတွက် Box Culver အတွက်ကုန်ကျငွေ ၈.၁ သန်းဖြစ်ပြီး လမ်း၊ တံတား စုစုပေါင်းခန့်မှန်းကုန်ကျငွေ ၈၆၉.၇၉ သန်း ဖြစ်ပါကြောင်း၊ အဆိုပါ ကုန်ကျငွေများကို ၂၀၁၈-၂၀၁၉ ဘဏ္ဍာရေးနှစ်မှာ ထည့်သွင်း လျာထားမည်ဖြစ်ပြီးရန်ပုံငွေရရှိပါက ဆောင်ရွက်ပေးသွားမည်ဖြစ်ပါကြောင်း ပြန်လည်ရှင်းလင်းဖြေကြားပါသည်။