(င)-မြန်အောင်မြို့နယ်တွင်တပ်မတော်ခလရ(၅၁)မှ သိမ်းယူထားသော မြန်အောင်မြို့အဝင်လမ်းဘေးရှိ လယ်ဧက(၂၀) နှင့်ထန်းပင်(၁၃၀)ကိုမူလပိုင် ရှင်တောင်သူလယ်သမားများထံသို့ ပြန်လည်ပေးရန် အစီအစဉ် ရှိ၊ မရှိ နှင့်စပ်လျဉ်းသည့် မေးခွန်း

အဆိုပါ မြေနေရာသည် ၁၉၈၀ ခုနှစ် ပြည်သူ့ကောင်စီက စိုက်ပျိုး/မွေးမြူရေး သင်တန်းကျောင်းဖွင့်လှစ်ရန် သိမ်းယူထားသော မြေ ၁၉.၂၇ ဧက ဖြစ်ပြီး ၁၉၈၈ နောက်ပိုင်းတွင် အမှတ်(၅၁) ခြေလျင်တပ်ရင်းက လွှဲပြောင်းရယူထားခြင်း ဖြစ်ပါကြောင်း၊ လယ်မြေကို အခြားနည်းဖြင့် အသုံးပြုခွင့်  ရပြီးမြေ ငါးကန် ၄.၄၈ ဧကနှင့် လယ်မြေ ၁၄.၇၉ ဧက ပါဝင်သည်ကို တွေ့ရှိရပါကြောင်း၊

ဟင်္သာတခရိုင်အထွေထွေအုပ်ချုပ်ရေးဦးစီးဌာန၏ စစ်ဆေးတွေ့ရှိချက် သဘောထားအကြံပြုချက်များအရ ဧရာဝတီတိုင်းဒေသကြီးအစိုးရအဖွဲ့၏ ၂၀၁၅ ခုနှစ်၊ ဇန်နဝါရီလ ၇ ရက်နေ့တွင် ပြုလုပ်သော စီမံခန့်ခွဲရေး ကော်မတီ အစည်းအဝေး(၁/၂၀၁၅) မှ အမှတ်(၅၁)ခြေလျင်တပ်ရင်း ပိုင်မြေအဖြစ် မိုးစပါးစိုက်ပျိုးခဲ့သည့် ၁၄.၇၉ ဧကကို စိုက်ပျိုး/မွေးမြူရေး သင်တန်းကျောင်းမြေအဖြစ် သိမ်းဆည်းခြင်းမပြုခင်က လုပ်ကိုင်ခွင့်ရရှိသူ ဦးသာအောင်(ပါ) ရှစ်ဦးအား မူလပိုင်ဆိုင်မှုအရ သို့မဟုတ် ညှိနှိုင်းမှုဖြင့် ခွဲဝေချထားပေးနိုင်ရေး ညှိနှိုင်း ဆောင်ရွက်ပေးရန်  ဆုံးဖြတ်ချက်ပါရှိပါကြောင်း၊  အဆိုပါမြေသည် တပ်မှတိုက်ရိုက်သိမ်းယူ ထားသော မြေမဟုတ်ခြင်း၊ တိုင်းဒေသကြီးအစိုးရအဖွဲ့မှလည်း ငါးကန်မြေ ၄.၄၈ ဧကကို ချန်လှပ်ပြီး ကျန်မြေ ၁၄.၇၉ ဧကအား ပြန်လည်စွန်လွှတ်ပေးစေလိုခြင်းတို့ကြောင့် ၁၄.၇၉ ဧကအား ပြန်လည် စွန့်လွှတ် ပေးသွားမည်ဖြစ်ပါကြောင်း၊

ထန်းပင် ၁၃၀ ပင်နှင့်စပ်လျဉ်း၍ လယ်မြေ ၁၄.၇၉ ဧကပေါ်ရှိ ထန်းပင် ၈၉ ပင်နှင့် ငါးကန်မြေ ၄.၄၈ ဧကရှိ ဘောင်ပေါ်တွင် ထန်းပင် ၂၈ ပင်ရှိပြီး စုစုပေါင်း ထန်းပင် ၁၁၇ ပင်ရှိသဖြင့် တပ်မှရင်းနှီးငွေဖြင့် လက်ရှိဆောင်ရွက် လျက်ရှိသော ငါးကန်မြေ ၄.၄၈ ဧကအား စွန့်လွှတ်ပေးခြင်းမပြုဘဲ ကျန်လယ်မြေ ၁၄.၇၉ ဧကနှင့် ထန်းပင် ၈၉ ပင်တို့အား ပြန်လည်စွန်လွှတ်ပေး သွားမည်ဖြစ် ပါကြောင်း ပြန်လည်ဖြေကြားပါသည်။