(ဂ)-တာမွေမြို့နယ်၊ နတ်မောက်ရပ်ကွက်ရှိ အလုပ်သမားဆေးရုံကြီး၏ ဆေးကုသဆောင်များအား အမိုးလုံခြုံစေရန်နှင့် လူနာနားနေဆောင်များ၊ ဟောင်းနွမ်းပျက်စီးနေသော ဝန်ထမ်းလိုင်းခန်းများအား အသစ်ပြန်လည်တည်ဆောက်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

တာမွေမြို့နယ်၊ နတ်မောက်ရပ်ကွက်ရှိ အလုပ်သမားဆေးရုံကြီးတွင် ဝန်ထမ်းအိမ်ရာ နှစ်ထပ်သစ်သား ဆောင်များ ကာလရှည်လျားစွာ ကြာမြင့်သည့်အတွက် ပျက်စီးပြီး ဘေးတွင်သွပ်ပြားများဖြင့် ဖြစ်သလို ကာရံထားပြီး ဆွေးမြည်‌့နေပါကြောင်း၊ ၎င်းဝန်ထမ်းအိမ်ရာများ၏ အရှေ့ဘက်တွင် အခြေများပြတ်ပြီး လူနေထိုင်၍ု မရတော့သည့် အခန်းများရှိပါကြောင်း၊ အထွေထွေလုပ်သား ခြောက်ခန်းတွဲအိမ်ရာ အခြေအနေမှာ အမိုးများကအစ ကိုယ်ထူကိုယ်ထ တာလပတ်များဖြင့် မိုးပြီးနေရပါကြောင်း၊ အဆိုပါ ခြောက်ခန်းတွဲများ၏ အတွင်းခန်းများတွင် ကြယ်မြင်၊ လမြင်၊ ရေဝင်၊ လေဝင်အခြေအနေများကို တွေ့ရပါကြောင်း၊ သူနာပြုများနေထိုင်ရာ အဆောင်မျက်နှာစာ၏ Sunshade အမိုးသည် ဆွေးမြည့် နေသည့်အတွက် သစ်သားဖြင့်ထောက်ခံ ထားရပြီး Sunshade အမိုးအန္တရာယ်ရှိ၍ အဝင်/အထွက်များ သတိပြုပါဆိုသည့် စာပါကပ်ထားရပြီး ၎င်းအဆောက်အဦ၏ အနောက်ဘက်တွင် လူထွက်ပေါက် ရှိသော်လည်း ဟောင်းနွမ်းပျက်စီးနေသော မိလ္လာပိုက်များ မိလ္လာရေလျှံပြီး အနံ့အသက်များဖြင့် ဝန်ထမ်းများ ဆိုးရွားစွာနေထိုင်နေရပါကြောင်း၊

ထို့ကြောင့် လူမှုဖူလုံရေးရန်ပုံငွေများနှင့် နိုင်ငံတော်မှထုတ်ပေးသည့် ရန်ပုံငွေများ နှစ်ခုပေါင်းပြီး ဝန်ထမ်းများနှင့် အလုပ်သမားများအတွက် ဆောင်ရွက်ပေးနေသော Human Resources အလွန်အရေးကြီးသော လူသားအရင်းအမြစ်များကို ကာကွယ်စောင့်ရှောက် ပေးနေသည်ကိုလည်း သိရှိပါကြောင်း၊ သို့သော် လိုအပ်နေသော ဝန်ထမ်းများ၏ အဆောက်အဦများကလည်း ပိုမိုအရေးကြီး ပါကြောင်း၊ ၎င်းတို့စိတ်ချမ်းမြေ့စွာဖြင့် Duty များထမ်းဆောင်နိုင်မှ မိမိတို့အလုပ်သမားများကို ရွှင်ရွှင်ပျပျနှင့် ကာကွယ်ပေးနိုင်မည် ဖြစ်ပါကြောင်း၊ ထို့ကြောင့် အဆိုပါအိမ်ရာများကို မည်သို့ ဆောင်ရွက်ပေးပြီး ဆောက်လုပ်ပေးမည်ကို သိလိုပါကြောင်း၊ တာမွေမြို့နယ်ရှိ အလုပ်သမား ဆေးရုံကြီးသည် တနင်္လာ၊ ဗုဒ္ဓဟူး၊ သောကြာနေ့တိုင်း ပြင်ပလူနာများ နေ့စဉ် ၂၀၀ ကျော်ပြသကြပြီး ကိုယ်ဝန်ဆောင်မိခင်များ ၁၀၀ ကျော်ပြသနေသည့် ဆေးရုံကြီးလည်း ဖြစ်ပါကြောင်း၊ ဆေးရုံတက်သည့် လူနာများနေ့စဉ် ၈၀ နီးပါးရှိပြီး ၎င်းဆေးရုံကြီး၏ ခွဲစိတ်ခန်းများ၊ ခေါင်မိုးများလည်း အမိုးများယိုစိမ့် နေသည့်အတွက် ဝန်ကြီးဌာနအနေဖြင့် အမြန်ဆုံးပြုပြင် ဆောင်ရွက်နိုင်ရန်နှင့် ပြင်ပ လူနာများအတွက် Toilet များ အရေးတကြီး လိုအပ်နေပါကြောင်း၊ ထို့ကြောင့် အသစ်ပြန်လည် ဆောက်လုပ်ခြင်းနှင့် ဝန်ထမ်းအိမ်ရာများအပြင် ပြင်ပလူနာနားနေဆောင်များ၊ ပြင်ပလူနာများ၏ ကျန်းမာရေးအရ Toilet များကိုပါ ဆောက်လုပ်ပေးရန် လိုအပ်နေသည့် အခြေအနေအပေါ် ဝန်ကြီးဌာနအနေဖြင့် မည်ကဲ့သို့ဖြေရှင်းကူညီ ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။