(က)-နိုင်ငံကျော်စာရေးဆရာကြီး ရွှေဥဒေါင်းစာအုပ်များ ထုတ်ဝေမှု၊ စာမူများထိန်းသိမ်းထားမှု၊ စာမူခများ ရရှိမှုပမာဏနှင့် ရွှေဥဒေါင်းစာပေဆုချီးမြှင့်ရန် မည်သို့စီမံဆောင်ရွက်နေသည်ကို သိလိုခြင်းနှင့် စပ်လျဉ်းသည့်မေးခွန်း

စာရေးဆရာကြီး ဦးဖေသိန်း (ကလောင်အမည် ရွှေဥဒေါင်း) သည် ၁၉၇၃ ခုနှစ်တွင် ကွယ်ကွန်ခဲ့ပါကြောင်း၊ ကွယ်လွန်ပြီးနောက် ဆရာကြီး၏ စာအုပ်စာပေများကို စီမံခန့်ခွဲခြင်းနှင့် ပတ်သက်၍ ဆရာကြီးရွှေဥဒေါင်း စာမူထိန်းသိမ်းရေး ကော်မတီက ဆောင်ရွက်နေသည့် အကြောင်းကို သိရှိခဲ့ရပါကြောင်း၊ အဆိုပါကိစ္စနှင့်ပတ်သက်ပြီး သက်ဆိုင်သူတစ်ဦးဖြစ်သည့် ဆရာမကြီး လူထုဒေါ်အမာ၏ သား ဦးငြိမ်းချမ်း (စာရေးဆရာညီပုလေး) ကို ဆက်သွယ်မေးမြန်း သည့်အခါ ဆရာကစာဖြင့် ယခုကဲ့သို့ ပြန်ကြားလာပါကြောင်း၊ ဆရာကြီးရွှေဥဒေါင်း ကွယ်လွန်သည့်အခါ ဇနီးဖြစ်သူ ဒေါ်ကြီးစိုးကျန်ရစ်ခဲ့ပါကြောင်း၊ ဒေါ်ကြီးစိုးက ဆရာကြီးရွှေဥဒေါင်း၏ စာမူများကို ထိန်းသိမ်းရန် ဒါရိုက်တာစာရေဆရာ ဦးသုခ၊ လူထုဦးလှ၊ လူထုဒေါ်အမာ၊ ဆရာသော်တာဆွေနှင့် ဆရာဟံသာဝတီ ဆရာဦးဝင်းတင်တို့ကို လွှဲအပ်တာဝန်ပေးခဲ့ပါကြောင်း၊

ဖော်ပြပါပုဂ္ဂိုလ်များ ထိန်းသိမ်းလာခဲ့ရာမှ တစ်ဦးပြီးတစ်ဦးကွယ်လွန် သွားခဲ့ကြပြီးနောက် နောက်ဆုံးကျန်ရစ်သည့် ဆရာဟံသာဝတီဦးဝင်းတင်က လူထုမိသားစုနှင့် ဆရာကြီးရွှေဥဒေါင်း၏ တူဖြစ်သူ ဆရာလူထု ဦးစိန်ဝင်းတို့ကို ဆက်လက်လွှဲပြောင်း ထိန်းသိမ်းစေခဲ့ပါကြောင်း၊ ဆရာလူထုဦးစိန်ဝင်း ကွယ်လွန်သွားသည့်အခါ လူထုမိသားစုနှင့် ဆရာကြီး ရွှေဥဒေါင်း၏မြေး ဦးသန်းအေး (အင်ဂျင်နီယာ) နှင့် အထက်မြန်မာနိုင်ငံ စာရေးဆရာအသင်းတို့ ဆရာကြီး၏ စာမူများကို ဆက်လက်ထိန်းသိမ်းလာခဲ့ရာ ယနေ့ထက်တိုင် ဖြစ်ပါကြောင်း၊ ဆရာကြီးရွှေဥဒေါင်း၏ စာမူခများတွင် ယခုအခါ ကျပ်ငွေသိန်း ၁၀၈၉ သိန်းကျပ်ရှိပြီး မန္တလေးမြို့ရှိ မြန်မာ့စီးပွားရေး ဘဏ်အမှတ်-၂၊ စာရင်းအမှတ် SDA၊ စာရင်းအမျိုး အစား S၊ ငွေစာရင်းအမှတ် SC004088 တွင် စာရင်းသွင်းစုဆောင်း ထားရှိပါကြောင်း၊ ဖော်ပြပါစုဆောင်းငွေများကို ဆရာကြီးရွှေဥဒေါင်း၏ ဇာတိ စစ်ကိုင်းတိုင်းဒေသကြီး၊ ရွှေဘိုခရိုင်၊ ဝက်လက်မြို့နယ် မန်ကျည်းတုံရွာရှိ ရွှေဥဒေါင်းစာကြည့်နှင့် အခြေခံပညာ အထက်တန်းကျောင်းသို့ လှူဒါန်းရန်အတွက် ဆရာကြီးရွှေဥဒေါင်း ဆွေမျိုးများနှင့် ရွာမိရွာဖများ ပါဝင်သော အဖွဲ့ကို ပေးအပ်လှူဒါန်းရန် ပြောဆိုတိုင်ပင်ထားပြီး ဖြစ်ပါကြောင်း၊ ပြန်ကြားရေးဝန်ကြီးဌာန အနေဖြင့်လည်း ၂၀၁၈ ခုနှစ်၊ ဒီဇင်ဘာလတွင် စာပေဗိမာန်က ထုတ်ဝေခဲ့သော မြန်မာဂန္ထဝင်အတွဲ ၁၀၀ စာစဉ်၊ ဝတ္ထုရှည်စာစဉ် အတွဲ (၂) တွင် ဆရာကြီး၏ ရတနာပုံဝတ္ထုကို ထည့်သွင်းထုတ်ဝေခဲ့ပြီး ယင်းအတွက် မူပိုင်ခွင့်တောင်းခံခြင်းနှင့် ဉာဏ်ပူဇော်ခ ချီးမြှင့်ခြင်းတို့ကို စာစဉ်ထုတ်ဝေရေး ကော်မတီက ဆရာကြီးရွှေဥဒေါင်း စာမူထိန်းသိမ်းရေး ကော်မတီမှ စာရေးဆရာညီပုလေးနှင့် ဆက်သွယ်ဆောင်ရွက်ခဲ့ပါကြောင်း၊ ရွှေဥဒေါင်းစာပေဆု ချီးမြှင့်ခြင်းနှင့် ပတ်သက်၍ ပြန်ကြားရေးဝန်ကြီးဌာနနှင့် ဆရာကြီးရွှေဥဒေါင်းစာမူ ထိန်းသိမ်းရေး ကော်မတီတို့တွင် လတ်တလောအစီအစဉ် မရှိသေးပါကြောင်း ရှင်းလင်းဖြေကြားပါသည်။

ဦးမောင်မောင် (ထီးချိုင့်မဲဆန္ဒနယ်) က ဆက်စပ်မေးခွန်း မေးမြန်းပါသည်။

ယခုကဲ့သို့ ဆရာကြီး၏ဇာတိတွင် ဆရာကြီးရွှေဥဒေါင်း၏ နာမည်ဖြင့် လှူမည့်သူရှိသည့် အတွက်လည်း ကာယကံရှင်များအနေဖြင့် ဝမ်းသာမည် ဖြစ်ပါကြောင်း၊ ဆရာကြီးရွှေဥဒေါင်း၏ စာမူများကို နောက်ဆုံးပိုင်ဆိုင်ခဲ့သည်မှာ အဖွားဒေါ်ကြီးစိုး ဖြစ်ပါကြောင်း၊ အဖွားဒေါ်ကြီးစိုးက လွှဲအပ်ခဲ့သည့်အခါ တူမလေး မမြင့်မြင့်ကလည်း ပါရှိခဲ့ပါကြောင်း၊ နောက်ဆုံး ကာယကံရှင်၏ ဆန္ဒက တာဝန်ရှိသည့် ရွှေဥဒေါင်းစာပေဆု ထာဝစဉ်တည်တံ့ရေးအတွက် ဆရာကြီး၏ စာမူအားလုံးကို နိုင်ငံတော်ကို အပြီးအပြတ်လှူမည်ဟု ပြောပါကြောင်း၊ တစ်ချိန်တွင် နိုင်ငံတော်ကတစ်ဆင့် ဆုပေးသည့်အခါ ဆရာကြီးရွှေဥဒေါင်း၏ မျိုးဆက်ဆက်ခံသူ တစ်ယောက်အနေဖြင့် အဘွားဒေါ်ကြီးစိုး၏ ကိုယ်စားဆုပေးပွဲများတွင် တက်ရောက်ဆုပေးခွင့်ပေးရန် တောင်းဆိုပါကြောင်း၊ ဒါကိုလည်း ရွှေဥဒေါင်းစာပေဆုအတွက် ထိန်းသိမ်းရေးကော်မတီ အခြေအနေ မည်ကဲ့သို့ချမှတ်မည်၊ ကာယကံရှင်၏ မေတ္တာရပ်ခံချက်ကို မည်ကဲ့သို့ လက်ခံနိုင်မည် ဆိုသည်ကို မည်ကဲ့သို့ လက်ခံနိုင်မည် ဆိုသည့်အပေါ် ဝန်ကြီးဌာနအနေဖြင့် ဖြေကြားနိုင်ခြင်းရှိ/မရှိ သိရှိလိုပါကြောင်း မေးမြန်းပါသည်။

ပြန်ကြားရေးဝန်ကြီးဌာန၊ ဒုတိယဝန်ကြီး ဦးအောင်လှထွန်း

မေးခွန်းနှင့်ပတ်သက်၍ စာရေးဆရာကြီးရွှေဥဒေါင်း စာမူထိန်းသိမ်းရေး ကော်မတီမှ စာရေးဆရာ ညီပုလေးနှင့် ဆက်လက်ပြီး ဆက်သွယ်ဆောင်ရွက် ပေးပါမည် ဖြစ်ပါကြောင်းရှင်းလင်း ဖြေကြားပါသည်။