(ခ) ရန်ကုန်မြို့တွင်းပြေးဆွဲလျက်ရှိသော မြို့ပတ်ရထားလမ်းကြောင်းနှင့်စပ်လျဉ်းသည့်မေးခွန်း

ကျွန်မတို့ ပြည်ထောင်စုသမ္မတမြန်မာနိုင်ငံတော်ရဲ့အကြီးဆုံးမြို့တော်ဖြစ်သော ရန်ကုန်မြို့အတွင်းမှာ ပြေးဆွဲလျက်ရှိနေတဲ့ မြို့ပတ်ရထားလမ်းကြောင်းအား အ‌ြခေခံလူတန်းစားများ အဆင်ပြေစွာသွားလာ နိုင်ရေးအတွက် ရှေးယခင်ကဖောက်လုပ်ရန်စီမံချက်ရှိခဲ့သော ဒဂုံတက္ကသိုလ်ကနေတစ်ဆင့် မြောက်ဒဂုံ မြို့နယ်ကို ဖြတ်သန်းပြီး မြောက်ဒဂုံမြို့နယ်မှာရှိတဲ့  ပြည်ထောင်စုလမ်းမကြီးကို ဖြတ်သန်းပြီးတော့ ပုလဲ-ရွှေပေါက္ကံ-ထောက်ကြန့်-လှော်ကားစသည်ဖြင့် တိုးချဲ့ဖောက်လုပ်ပေးဖို့ အစီအစဉ် ရှိ၊ မရှိ ဖြေကြားပေးစေလိုပါတယ်။ နည်းနည်းလေးပြောခွင့်ပြုပါ ဥက္ကဋ္ဌကြီးရှင့်။ မြန်မာနိုင်ငံမှာ အကြီးဆုံး မြို့တော်ဖြစ်တဲ့ ရန်ကုန်မြို့မှာ ၂၀၁၀ ခုနှစ်မှာ ခန့်မှန်းခြေအရ လူဦးရေ ၄.၄ သန်းလောက်ရှိခဲ့ပါတယ်။ မြို့တော်ရဲ့အကျယ်အဝန်းဟာ စတုရန်းကီလိုမီတာ ၅၉၈.၇၅ ရှိတဲ့အတွက်ကြောင့် လူဦးရေသိပ်သည်းမှု ဟာလည်း ၁ စတုရန်းမိုင်မှာဆိုရင် ၇၂၆၂ ဦးရှိကြောင်း သိခဲ့ရပါတယ်။ ယခုလက်ရှိ မြန်မာနိုင်ငံတော်ရဲ့ လူဦးရေအရ အာရှတိုက်မှာရှိတဲ့ လူဦးရေထူထပ်တဲ့မြို့ထဲမှာဆိုရင် တစ်ခုအပါအဝင်ဖြစ်ပြီးတော့ ကမ္ဘာ့လူဦးရေထူထပ်တဲ့မြို့ထဲမှာဆိုလည်း မြို့ကြီးတွေမှာ ဖြေရှင်းရခက်တဲ့ပြဿနာထဲမှာလည်း ဒီမြို့ပြ သယ်ယူပို့ဆောင်ရေးက အရေးကြီးတဲ့ကိစ္စတစ်ခုဖြစ်ပါတယ်။ အခု ရန်ကုန်မြို့တော်မှာ ဆိုလို့ရှိရင် လူဦးရေ ၁.၆ သန်းက ၁၉၆၀ ခုကရှိခဲ့တာပါ။ အခုဆိုရင် သုံးဆနီးပါး၊ အခု ကျွန်မတို့ ၂၀၁၁-၂၀၁၂ မှာ ဆိုရင် သုံးဆနီးပါးဆိုတော့ ငါးဆလောက်ရှိနေပါပြီ။ အဲဒီတော့ မြို့ပြသယ်ယူပို့ဆောင်ရေး ပြဿနာကို ဖြေရှင်းဖို့ အဲဒီအချိန်တုန်းကလုပ်ခဲ့တဲ့ မြို့ပတ်ရထားရဲ့အရှည်မိုင်ဟာဆိုရင် ၂၇.၅ မိုင်ပဲရှိပါတယ်။ အဲဒီအချိန်က မြို့ရဲ့အကျယ်အဝန်းဟာလည်း ၂၀၈ ကီလိုမီတာပဲရှိခဲ့ပါတယ်။ အခုဟာကျတော့ မြို့ အကျယ်အဝန်းဟာလည်း သုံးဆနီးပါးကျယ်လာပြီ။ လူဦးရေဟာလည်း သုံးဆနီးပါးတိုးတက်လာပြီ ဖြစ်ပါတယ်။ အဲဒီတော့ လွန်ခဲ့တဲ့ နှစ်ပေါင်း ၅၀ ကျော်အချိန်က မြို့တော်လူဦးရေအတွက် အခြေပြု တည်ဆောက်ခဲ့သည့် ရန်ကုန်မြို့ပတ်ရထားစနစ်ကဆိုလို့ရှိရင် လက်ရှိ ရန်ကုန်မြို့တော်ရဲ့ အကျယ်အဝန်း လူဦးရေအတွက် မလုံလောက်တာကို တွေ့နိုင်ပါတယ်။ အဲဒီတော့ အခုလက်ရှိပြေးဆွဲနေတဲ့ မြို့ပတ် ရထားနဲ့ပတ်သက်ပြီးတော့ သယ်ယူပို့ဆောင်ရေးကိစ္စများ အဆင်ပြေအောင်လို့ လက်ရှိပြေးဆွဲတဲ့ ရထားတွဲများ၊ လက်ရှိပြေးဆွဲနေတဲ့ ရထားလမ်းတွေကို အဆင့်မြှင့်တင်ပေးရန်နှင့် ရထားလမ်းပြေးဆွဲရေး အတွက်ကို စီမံခန့်ခွဲမှုများ အဆင့်မြှင်‌့စီစဉ်ဖို့အစီအစဉ်ရှိပါသလား။ တကယ်လို့မရှိခဲ့ဘူး ဆိုလို့ရှိရင် လည်း မည်သည့်အတွက်ကြောင့်မရှိသည်ကို ပြန်လည်ဖြေကြားပေးပါရန် လေးစားစွာမေးမြန်းထားပါသည်။