(ဂ)-နိုင်ငံ့ဝန်ထမ်းဆရာဝန်များနှင့် ပတ်သက်၍ ပြောင်းရွှေ့ခြင်း၊ ရာထူးတိုးမြှင့်ခြင်း၊ ဘွဲ့လွန်သင်တန်းများ တက်ရောက်ခြင်းဆိုင်ရာ သတ်မှတ်ချက်မူများနှင့် စပ်လျဉ်းသည့် မေးခွန်း

ကျန်းမာရေးဝန်ကြီးဌာနအနေနဲ့ သစ်လွင်ဆရာဝန်များကို ဝန်ထမ်းသစ်ခန့်ထားရာမှာ ၎င်းတို့ဆန္ဒပြုထားတဲ့ ဦးစားပေးနေရာများမှ ရာထူး နေရာလစ်လပ်မှုအပေါ်၊ လုပ်ငန်းလိုအပ်မှုအပေါ် မူတည်ပြီးတော့ ဗဟိုအဆင့်ဆေးရုံကြီးများ၊ တိုင်းဒေသကြီး/ပြည်နယ် ဆေးရုံကြီးများနှင့် Training ရနိုင်တဲ့ အထူးကုဆရာဝန်များရှိတဲ့ ခရိုင်ဆေးရုံကြီးများမှာပဲ တာဝန်ချထားတဲ့မူကို လက်ရှိကျင့်သုံးနေပါတယ်။ ဒါလည်း သူတို့အနေနဲ့ ဆေးသင်တန်း ၆ နှစ် တက်ပြီးတော့ အလုပ်သင်ဆရာဝန် ၁ နှစ်လုပ်ခဲ့တဲ့အချိန်မှာ Scale Training ကို လိုအပ်တာဖြစ်တဲ့ အတွက်  Scale Training ပေးပြီးမှသာလျှင် Independence နေရာများကို ကျွန်တော်တို့ လွှတ်ချင်တဲ့မူအရ ဒီစနစ်ကိုကျင်‌့သုံးနေခြင်းဖြစ်ပါတယ်။ ဖော်ပြပါဆေးရုံကြီးတွေမှာ On Job Training ၂ နှစ်တာဝန် ထမ်းဆောင်ပြီးတဲ့ဆရာဝန်တွေကို မြို့နယ်အဆင့်ဆေးရုံများနှင့် တိုက်နယ်ဆေးရုံများကို လုပ်ငန်းလိုအပ်ချက်ရှိပါက ပြောင်းရွှေ့တာဝန်ချထားပေးလျက်ရှိပါတယ်။ ဘွဲ့လွန်ရရှိပြီးတဲ့ အထူးကုဆရာဝန် များနှင့် လက်ထောက်ဆရာဝန်များကိုတော့ ဒေသရဲ့လိုအပ်ချက်မှာ မူတည်ပြီး ဝေးလံခေါင်သီတဲ့ဒေသများကို တာဝန်ချထားလျက်ရှိပါတယ်။ အဲ့လိုတာဝန်ချထားပြီးပြီ ဆိုလည်း သတ်မှတ်တာဝန်ထမ်းဆောင်ချိန်ပြည့်ပြီးတဲ့အခါမှာ ၎င်းတို့ရဲ့ဆန္ဒပြုလျှောက်ထားမှု အပေါ် မှာမူတည်၍လည်းကောင်း၊ လစ်လပ်နေရာအပေါ်မှာ မူတည်၍လည်းကောင်း ပြောင်းရွှေ့တာဝန်ချ ထားလျက်ရှိပါတယ်။ ဒါကိုလည်းပဲ ကျွန်တော်တို့က သီးခြားလွှတ်လိုက်တဲ့အချိန်မှာကိုကတည်းက သူတို့ကိုခေါ်တွေ့ပြီးတဲ့အခါမှာ ၁ နှစ် နေရာသည် ၁ နှစ်ပြည့်ပြီးတဲ့အခါမှာပြန်ခေါ်မယ်။ ဒါကြောင့်  ၁၀ လမှာ လျှောက်လွှာတင်ပါ။ ဒါကို ကျွန်တော်တို့က Register ကို သီးခြားလုပ်ပြီးတော့  ဒီအချိန်မှာ ကျွန်တော်တို့အနေနဲ့ သူတို့ရဲ့အချိန်ကာလ ပိုပြီးတော့မကြာသွားအောင်အတွက် အထူးကြပ်မတ်စီမံ ဆောင်ရွက်ပေးလျက် ရှိပါတယ်။ ဒါကြောင့်မို့လို့ အခုအချိန်ကာလမှာလည်း ၁ နှစ် ဒေသသည် ၁ နှစ် ထက် ၃ လမပိုစေရန် လည်းကောင်း၊ ၁ နှစ်ခွဲသတ်မှတ်ထားတဲ့နေရာသည်  ၁ နှစ် ထက် ၉ လမပို စေရန်လည်းကောင်း၊ ၂ နှစ် သတ်မှတ်ထားတဲ့နေရာမှာ ၂ နှစ်ထက် ၃ လမပိုစေရန် ၃ လအတွင်းမှာ ဆောင်ရွက်ပေးနိုင်ရေးအတွက်ကို အလေးထားဆောင်ရွက်လျက်ရှိပါကြောင်း ပြန်လည်ဖြေကြားတင်ပြ အပ်ပါတယ်။ ဝေးလံတဲ့ နေရာကိုတစ်ခေါက်ရောက်ပြီးရင် နောက်တစ်ခေါက်ကိုတော့ ၂ နှစ်၊ ၃ နှစ် အတွင်းမှာပြန်ပို့လေ့ပို့ထ မရှိပါဘူး။ ကျွန်တော်တို့အနေနဲ့ ဝန်ထမ်းတစ်ယောက်ရဲ့ ဘဝကိုကြည်‌့လိုက် မယ်ဆိုရင် ဝန်ထမ်းလုပ်သက် ၃၀ မှာ ဝေးလံတဲ့ဒေသကိုတော့ အနည်းဆုံး တစ်ခေါက်၊ အများဆုံး နှစ်ခေါက်လောက်တော့ ရောက်လေ့ရှိပါတယ်။ ဒါဟာလည်းပဲကြားမှာ ကာလခြားပြီးရောက်တာဖြစ်ပါ ကြောင်း ကျွန်တော်‌့အနေနဲ့ တင်ပြအပ်ပါတယ်။

ကျန်းမာရေးဦးစီးဌာနအနေနဲ့ ရာထူးတိုးမြှင့်ရေးဆောင်ရွက်တဲ့နေရာမှာ ဘွဲ့လွန်ရရှိပြီးတဲ့ လက်ထောက်ဆရာဝန်များကို တစ်ဆင့်မြင့်ရာထူးဖြစ်တဲ့ အထူးကုဆရာဝန် ဒါမှမဟုတ် လက်ထောက် ညွှန်ကြားရေးမှူး၊ ဒုတိယတိုင်းဒေသကြီး/ဒုတိယပြည်နယ်ကျန်းမာရေးဦးစီးဌာနမှူး၊ ဆေးရုံအုပ်/ခရိုင် ဦးစီးမှူးရာထူးများတိုးမြှင့်ခြင်းကိုတော့ သူတို့ရဲ့ဘွဲ့လွန်နှစ်အလိုက် လုပ်သက် ၅ နှစ်မှ ၇ နှစ်အတွင်း ရှိသူများကို ရာထူးတိုးတန်းစီဇယားနဲ့ တွက်ချက်အမှတ်ပေးပါတယ်။ ရာထူးတိုးတန်းစီဇယားဆိုတာ သူတို့လုပ်သက်ရမှတ်တွေရှိပါတယ်။ ခုနက ကိုယ်စားလှယ်တော်ကြီးဆွေးနွေးသွားတဲ့ ဝန်ထမ်း အကဲဖြတ်မှတ်တမ်းခေါ်တဲ့ ဝဖ ရမှတ်တွေကိုကြည့်ပါတယ်။ နောက် သူတို့ရဲ့ဘွဲ့ရမှတ်တွေကို တွက်ပါတယ်။ ပြီးရင် Interview ရမှတ်တွေကိုပေါင်းစည်းတဲ့အခါမှာ အမှတ်ပေးဇယားအတိုင်း ထိပ်ဆုံးကနေပြီးတော့မှ တန်းစီပြီးရာထူးတိုးတဲ့လုပ်ငန်းကို စီစဉ်ဆောင်ရွက်လျက်ရှိပါတယ်။ ထိုနည်းတူစွာပဲ အထူးကုဆရာဝန်ရာထူးမှ အထူးကုဆရာဝန်ကြီးရာထူးကိုလည်းကောင်း၊ လက်ထောက်ညွှန်ကြားရေးမှူး၊ ဒုတိယတိုင်း/ပြည်နယ်ကျန်းမာရေးဦးစီးဌာနမှူးမှ ဒုတိယ ညွှန်ကြားရေးမှူးသို့လည်းကောင်း၊ တိုင်းဒေသကြီး/ပြည်နယ်ကျန်းမာရေး ဦးစီးရာထူးသို့လည်းကောင်း၊ ဆေးရုံအုပ်/ခရိုင်ဦးစီးမှူးရာထူးမှ ဆေးရုံအုပ်ကြီးရာထူးသို့လည်းကောင်း တိုးမြှင့်ခြင်းကိုလည်း တစ်ဆင့်နိမ့်ရာထူးဖြစ်တဲ့ လက်ရှိရာထူးစတင်ရရှိတဲ့နေ့မှစပြီး ၅ နှစ်မှ ၇ နှစ်အတွင်းရှိသူများကို ရာထူးတိုးတန်းစီဇယားဖြင့် အမှတ်ပေးတွက်ချက်ပြီးတော့ဆောင်ရွက်ပေးလျက်ရှိပါတယ်။  အထူးကု ဆရာဝန်ကြီး/တွဲဖက်ပါမောက္ခကို ပါမောက္ခရာထူးတိုးမြှင့်ပေးတဲ့နေရာမှာတော့ 3rd Degree ခေါ်တဲ့ ဘွဲ့ကိုရရှိပြီးမှသာ လက်ရှိရာထူးရရှိတဲ့နေ့ကစပြီး ၅ နှစ်မှ ၇ နှစ်အတွင်းရှိတဲ့အနက်မှ ရာထူးတိုးမြှင့် ပေးခြင်းကိုလည်း ဦးစီးဌာနစီမံခန့်ခွဲရေးကော်မတီမှာ ဦးစွာညှိနှိုင်းဆွေးနွေးပြီးတော့မှ ဝန်ကြီးဌာန စီမံခန့်ခွဲရေးကော်မတီကိုတင်ပြပြီး ရာထူးတိုးမြှင့်ဆောင်ရွက်ပေးလျက်ရှိပါတယ်။ ၅ နှစ်မှ ၇ နှစ်လို့ သတ်မှတ်တဲ့နေရာမှာ တချို့အထူးကုဘာသာရပ်တွေအနေနဲ့ နေရာမရှိရင်တော့ ခွင့်ပြုမိန့် နေရာ မရှိရင်တော့ ပေးလို့မရတဲ့အနေအထားဖြစ်တဲ့အတွက် ၅ နှစ်၊ ၇ နှစ်ဆိုတာ ပုံမှန်ဆိုသော်လည်းပဲ တချို့ ၇ နှစ်ကြာတာလေးတွေရှိသလို တချို့ ၅ နှစ်မပြည့်ခင်မှာ ရတာလေးတွေလည်းရှိကြောင်း၊ ဘာသာရပ် တစ်ခုနှင့် တစ်ခုမတူညီကြောင်းလည်း တစ်ပါတည်းတင်ပြအပ်ပါတယ်။

 ထို့အပြင် နိုင်ငံ့ဝန်ထမ်းဆရာဝန်များနှင့်ပတ်သက်ပြီး ဘွဲ့လွန်သင်တန်းတက်ရောက်ခြင်း ဆိုင်ရာသတ်မှတ်ချက်များ၊ မူများကို ကျန်းမာရေးဝန်ကြီးဌာန၊ ဆေးသိပ္ပံပညာဦးစီးဌာနကနေပြီးမှ သတ်မှတ်ပေးပြီးဖြစ်ပါတယ်။ ဆေးပညာဒီပလိုမာ၊ မဟာသိပ္ပံနှင့် ပါရဂူဘွဲ့သင်တန်းများကို နိုင်ငံ့ ဝန်ထမ်းဆရာဝန်များကို ဘာသာရပ်အလိုက်သတ်မှတ်ထားတဲ့ ဝင်ခွင့်အရည်အချင်းသတ်မှတ်ချက် များနှင့် ပြည့်စုံသူများကိုလျှောက်ထားရန် နှစ်စဉ်လျှောက်လွှာခေါ်ယူပြီးတော့ ကြေညာချက်မှာ သင်တန်းအလိုက်ဖြေဆိုရမည့် ဘာသာရပ်၊ စစ်ဆေးမည့်အချိန်၊ မေးခွန်းပုံစံများကိုပါထည့်သွင်းဖော်ပြ ထားရှိပါတယ်။ စာမေးပွဲဖြေဆိုရမည့် ဆရာဝန်များအနေနဲ့ မိမိတို့လျှောက်ထားတဲ့ အထူးပြု ဘာသာရပ်အလိုက် ရေးဖြေစာမေးပွဲကိုအရင်ဖြေရပါတယ်။ ရေးဖြေအောင်မြင်သူများကို လူတွေ့ နှုတ်ဖြေစာမေးပွဲများဖြေဆိုစေပြီး ဘွဲ့လွန်သင်တန်းတက်ရောက်ခွင့်ရရှိသူများရဲ့ အောင်စာရင်းကို ထုတ်ပြန်ပေးရပါတယ်။ ဘွဲ့လွန်ဆေးပညာသင်တန်း ဝင်ခွင့်လူတွေ့နှုတ်ဖြေအမှတ်ပေးရာမှာ နယ်နှင့် ခက်ခဲဒေသမှာ တာဝန်ထမ်းဆောင်သူများအတွက် မူတစ်ခုသတ်မှတ်ထားပါတယ်။ အ‌ွခေခံရမှတ်မှာ နယ်၊ ခက်ခဲဒေသ၊ အခက်အခဲဆုံးဒေသ၊ နယ်စပ်ဖွံ့ဖြိုးရေးအထူးဒေသနှင့် အထူးစီမံကိန်းဒေသများမှာ တာဝန်ထမ်းဆောင်နေတဲ့ ဝန်ထမ်းများအတွက်ပေးရတဲ့အမှတ်များကို သီးခြားသတ်မှတ်ပြီးတွက်ချက် ပေးရပါတယ်။ အဲ့လို အမှတ်ပေးရာမှာ ရန်ကုန်၊ မန္တလေးမှာပဲ တာဝန်ထမ်းဆောင်ခဲ့ဖူးသူဆိုရင် ရမှတ် ၀ ပဲဖြစ်ပါတယ်။ သို့သော် ခက်ခဲဒေသ၊ အခက်ခဲဆုံးဒေသ၊ နယ်စပ်ဖွံ့ဖြိုးရေးအထူးဒေသနှင့် အထူး စီမံကိန်းဒေသများကို တစ်နှစ်ထမ်းဆောင်လျှင် အများဆုံး ၁၅ မှတ်ထိပေးပြီးတော့ အမှတ်ပေးနိုင်ရေး အတွက်လည်း ခက်ခဲဒေသတာဝန်နှင့် ၎င်းဒေသမှာ တာဝန်ထမ်းဆောင်သူတို့ကို ကျန်းမာရေးဦးစီးဌာန နှင့် ဆေးသိပ္ပံပညာဦးစီးဌာနတို့ညှိနှိုင်းပြီး အမှတ်ပေးတာဖြစ်ပါတယ်။ သို့အတွက် နယ်၊ ခက်ခဲဒေသ၊ အခက်ခဲဆုံးဒေသ၊ နယ်စပ်ဖွံ့ဖြိုးရေးအထူးဒေသနှင့် အထူးစီမံကိန်းဒေသများအတွက် အမှတ်ပေးမူ သတ်မှတ်ဆောင်ရွက်ပေးတဲ့အတွက်လည်း  လက်ရှိဘွဲ့လွန်သင်တန်းမှာ အဆင့်ဆင့်ဖြေဆိုအောင်မြင် ပြီးတဲ့ မြို့ကြီးမှဆရာဝန်များသာမက နယ်စပ်ဒေသ၊ အခက်ခဲဆုံးဒေသ၊ နယ်စပ်ဖွံ့ဖြိုးရေး အထူး ဒေသနှင့် အထူးစီမံကိန်းဒေသများတွင် တာဝန်ထမ်းဆောင်နေတဲ့ဆရာဝန်များပါ ယခုဘွဲ့လွန် သင်တန်း တက်ရောက်သင်ကြား လျက်ရှိပါကြောင်း ဖြေကြားအပ်ပါတယ်။

နောက် ကိုယ်စားလှယ်တော်ကြီးအမိန့်ရှိသွားတဲ့ သက်ဆိုင်ရာမြို့နယ်၊ သက်ဆိုင်ရာခရိုင်တွေမှာ ဘွဲ့လွန်သင်တန်းပါသွားလို့ နေရာအစားမဖြည့်ပေးနိုင်တဲ့ကိစ္စနှင့်ပတ်သက်လို့ ဘွဲ့လွန်ကျောင်းသား Pull ကိုထောင်ပြီးဖြစ်ပါတယ်။ ဒါကြောင့်မို့ အဲ့ဒီကလေးတွေသည် ဘွဲ့လွန်သင်တန်းပါသွားရင် Pull အင်အားနဲ့ရွှေ့လိုက်ပြီးတော့မှ အဲ့ဒီသင်တန်း၊ သူတို့ရဲ့နေရာတွေမှာ လက်ထောက်ဆရာဝန်များကို ပြန်လည်ခန့်ထားပေးပြီးတော့ လုပ်ငန်းများမလစ်ဟင်းရေးအတွက်ဆောင်ရွက်လျက်ရှိပါကြောင်း ပြန်လည်ရှင်းလင်းဖြေကြားပါသည်။