(ဂ)-ကဏ္ဍအသီးသီးနှင့် နယ်ပယ်အသီးသီးတွင် စံချိန်စံညွှန်းများ ရေးဆွဲသတ်မှတ်၍ ဥပဒေပြဋ္ဌာန်း နိုင်ရန် အချိန်ကာလသတ်မှတ်ပြီး သတ်မှတ်ချိန်အတွင်း ဆောင်ရွက်ပေးနိုင်ပါရန် ပြည်ထောင်စုအစိုးရ သို့ တိုက်တွန်းကြောင်းအဆို တင်သွင်းခြင်းအပေါ် လက်ရှိဆောင်ရွက်ဆဲ ဆောင်ရွက်ပြီး

မန္တလေးတိုင်းဒေသကြီး၊ မလှိုင်မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးအေးမောက်က မေးထားတဲ့ ကဏ္ဍအသီးသီးနဲ့ နယ်ပယ်အသီးသီး အတွက် စံချိန်စံညွှန်းများ ရေးဆွဲသတ်မှတ်၍ ဥပဒေပြဋ္ဌာန်းနိုင်ရန် အချိန်ကာလသတ်မှတ်ပြီး သတ်မှတ်ချိန်အတွင်း ဆောင်ရွက်ပေးနိုင်ပါရန် ပြည်ထောင်စုအစိုးရသို့ တိုက်တွန်းကြောင်း အဆို တင်သွင်းခြင်းအပေါ် လက်ရှိဆောင်ရွက်ဆဲ ဆောင်ရွက်ပြီးစီးမှုများအား ကဏ္ဍအလိုက် ရှင်းလင်း တင်ပြပေးပါရန်ဆိုတဲ့မေးခွန်းကို သိပ္ပံနှင့် နည်းပညာဝန်ကြီးဌာနက ရှင်းလင်းဖြေကြားတင်ပြသွားမှာ ဖြစ်ပါတယ်။

သိပ္ပံနှင့်နည်းပညာဝန်ကြီးဌာနဟာ ၁၉၉၄ ခုနှစ် သိပ္ပံနှင့်နည်းပညာဖွံ့ဖြိုးရေးဥပဒေအခန်း(၆) အပိုဒ် ၉ မြန်မာ့သိပ္ပံနှင့်နည်းပညာသုတေသနဦးစီးဌာန လုပ်ငန်းတာဝန်များမှာ အပိုဒ်ခွဲ(က)ပါ အလေး၊ အတိုင်းအတာ၊ အခြင်အတွယ် စက်ကိရိယာနှင့် ကုန်ကြမ်းကုန်ချောများအတွက် စံသတ်မှတ်ရေး လုပ်ငန်းများ ဆောင်ရွက်ထားခြင်းတာဝန်အရ စံချိန်စံညွှန်းသတ်မှတ်ခြင်းဆိုင်ရာ ဥပဒေမူကြမ်းအား ဤဝန်ကြီးဌာနမှ ဦးဆောင်ရေးဆွဲလျက်ရှိပါတယ်။ ယင်းစံချိန်စံညွှန်းသတ်မှတ်ခြင်းဆိုင်ရာဥပဒေ မူကြမ်းကို အတည်ပြုပြဋ္ဌာန်းနိုင်ရေးအတွက် သိပ္ပံနှင့်နည်းပညာဝန်ကြီးဌာန၊ ပြည်ထောင်စုဝန်ကြီးရုံး မှာ အစိုးရဌာနများ၊ အစိုးရမဟုတ်သော အဖွဲ့အစည်းများ၊ တက္ကသိုလ်များမှ ပညာရှင်များ ပါဝင် သည့် အမျိုးသားအဆင့် လုပ်ငန်းညှိနှိုင်းအစည်းအဝေးများကို ၂၀၁၂ ခုနှစ် ဇူလိုင်လ ၃ ရက်၊ ၂၀၁၂ ခုနှစ်၊ အောက်တိုဘာလ ၁၆ ရက်နဲ့ ၂၀၁၃ ခုနှစ်၊ ဖေဖော်ဝါရီလ ၂၀ ရက်တို့မှာ ကျင်းပခဲ့ပြီး စံချိန်စံညွှန်း သတ်မှတ်ခြင်းဆိုင်ရာဥပဒေမူကြမ်း အတည်ပြုနိုင်ရေးအတွက်လည်းကောင်း၊ အမျိုးသားအဆင့် စံချိန်စံညွှန်းကောင်စီ(National Standards Council)၊ စံချိန်စံညွှန်းလုပ်ငန်းကော်မတီ (Standards Working Committee)နှင့် နည်းပညာကော်မတီ(Technical Committee)များ ဖွဲ့စည်းနိုင်ရန် အတွက်လည်းကောင်း ဆွေးနွေးခဲ့ကြပြီး သဘောထားမှတ်ချက်များ၊ အကြံဉာဏ်များ ရယူခဲ့ပါတယ်။ ရရှိလာတဲ့ သဘောထားမှတ်ချက်များ၊ အကြံဉာဏ်များအရ စံချိန်စံညွှန်းသတ်မှတ်ခြင်းဆိုင်ရာဥပဒေ နောက်ဆုံးမူကြမ်းကို ပြင်ဆင်ပြီး ပြည်ထောင်စုရှေ့နေချုပ်ရုံးသို့ ပေးပို့ညှိနှိုင်းခဲ့ပါတယ်။ ပြည်ထောင်စု ရှေ့နေချုပ်ရုံးရဲ့သဘောထားမှတ်ချက်များဟာလည်းပြန်လည်ရရှိခဲ့ပြီးဖြစ်တဲ့အတွက် ယင်းစံချိန်စံညွှန်း သတ်မှတ်ခြင်းဆိုင်ရာဥပဒေမူကြမ်းကို လွှတ်တော်သို့ ဆက်လက်တင်ပြနိုင်ရေးအတွက် ပြည်ထောင်စု အစိုးရအဖွဲ့ရုံးသို့ တင်ပြနိုင်ရန် ဆောင်ရွက်လျက်ရှိပါကြောင်း တင်ပြအပ်ပါတယ်။ စံချိန်စံညွှန်း သတ်မှတ်ခြင်းဆိုင်ရာဥပဒေများ အတည်ပြုပြီးပါက အမျိုးသားစံချိန်စံညွှန်းကောင်စီကို ဖွဲ့စည်းမည် ဖြစ်ပြီး ကောင်စီ၏လက်အောက်တွင် စံချိန်စံညွှန်းလုပ်ငန်းကော်မတီနှင့် လုပ်ငန်းကော်မတီအောက် တွင် နည်းပညာကော်မတီများကို ဆက်လက်ဖွဲ့စည်းရမည်ဖြစ်ပါတယ်။ အမျိုးသားစံချိန်စံညွှန်းများ သတ်မှတ်ရေးနှင့်ပတ်သက်ပြီး ထုတ်ကုန်(Product)၊ ထုတ်လုပ်မှုလုပ်ငန်းစဉ်(Process)နှင့် ဝန်ဆောင်မှု လုပ်ငန်းများ(Services)ဆိုင်ရာ စံချိန်စံညွှန်းများကို ဘာသာရပ်ကဏ္ဍများအလိုက် ရေးဆွဲနိုင်ရန် အတွက် ကျင်းပခဲ့သော လုပ်ငန်းညှိနှိုင်းအစည်းအဝေးများမှ သဘောထားမှတ်ချက်များကို ရယူပြီး နည်းပညာကော်မတီ ၁၉ ခုအား ဖွဲ့စည်းပြီး ဖြစ်ပါတယ်။ နည်းပညာကော်မတီအဖွဲ့ဝင်များမှာ သက်ဆိုင်ရာဝန်ကြီးဌာနများ၊ ပညာရေးကဏ္ဍမှ ပုဂ္ဂိုလ်များ၊ အစိုးရအဖွဲ့အစည်းများ၊ အစိုးရမဟုတ် သော အဖွဲ့အစည်းများနှင့် ကျွမ်းကျင်သူပညာရှင်များ ပါဝင်လျက်ရှိပြီး သက်ဆိုင်ရာကဏ္ဍအလိုက် ပညာရှင်များက ဒီစံချိန်စံညွှန်းများ သတ်မှတ်နိုင်ရေးအတွက် စံချိန်စံညွှန်းများကို ရေးဆွဲလျက်ရှိ ပါတယ်။

ပြည်သူ့လွှတ်တော်ဥက္ကဋ္ဌကြီးခင်ဗျား။ သိပ္ပံနှင့်နည်းပညာဝန်ကြီးဌာန၊ မြန်မာ့သိပ္ပံနှင့် နည်းပညာ သုတေသနဦးစီးဌာနသည် အပြည်ပြည်ဆိုင်ရာစံချိန်စံညွှန်းအဖွဲ့ကြီး၏ ISO (International Organization for Standardization)၏ စာပေးစာယူအဖွဲ့ဝင်(Correspondent member)နှင့် အပြည်ပြည်ဆိုင်ရာလျှပ်စစ်ကော်မရှင်( IEC International Electro technical Commission) အဖွဲ့ကြီး၏ တွဲဖက်အဖွဲ့ဝင်ဖြစ်သောကြောင့် ISO စံချိန်စံညွှန်း ၁၈၀၀၀ ကျော်နှင့် IEC စံချိန်စံညွှန်း ၂၀၀ ကျော်ကို အလွယ်တကူရရှိနိုင်ပြီး ကိုးကားရေးဆွဲနိုင်မှာဖြစ်တဲ့အတွက် နည်းပညာကော်မတီ များမှ သက်ဆိုင်ရာဝန်ကြီးဌာနများနှင့် ပူးပေါင်းပြီး ကဏ္ဍအလိုက် စံချိန်စံညွှန်းမူကြမ်းများအား နိုင်ငံတကာ စံချိန်စံညွှန်းများကို ကိုးကား၍ အမျိုးသား စံချိန်စံညွှန်းများအဖြစ် ကြိုတင်ရေးဆွဲထားမှာ ဖြစ်ပါတယ်။ အမျိုးသားစံချိန်စံညွှန်းများအား နည်းပညာကော်မတီများတွင် ပါဝင်သည့် အဖွဲ့ဝင်များ နှင့် စစ်ဆေးပေးမည့် သက်ဆိုင်ရာဝန်ကြီးဌာနရဲ့ သဘောထားများကို ညှိနှိုင်းပြီး ဆန္ဒအလျောက် လိုက်နာရမည့် စံချိန်စံညွှန်းများနှင့် မဖြစ်မနေလိုက်နာရမည့် စံချိန်စံညွှန်းများဟူ၍ ခွဲခြားရေးဆွဲသွား မည်ဖြစ်ပါတယ်။ ပြည်ထောင်စုသမ္မတမြန်မာနိုင်ငံတော်အနေနဲ့ အမျိုးသားစံချိန်စံညွှန်းများ မချမှတ် နိုင်သေးပေမယ့် ဝန်ကြီးဌာနများအနေဖြင့် အပြည်ပြည်ဆိုင်ရာ စံချိန်စံညွှန်းများကို မှီငြမ်းသုံးစွဲလျက် ရှိပါတယ်။ ဥပမာအားဖြင့် ကျန်းမာရေးဝန်ကြီးဌာန၊ အစားအသောက်နှင့် ဆေးဝါးကွပ်ကဲရေးမှ ကြိုတင်ပြင်ဆင်ထားသော အစားအသောက်ထုတ်ကုန်များအတွက် Codex Standard, GMP ဖြင့်လည်းကောင်း၊ မွေးမြူရေးနှင့် ရေလုပ်ငန်းဝန်ကြီးဌာန၊ ငါးလုပ်ငန်းဦးစီးဌာနမှ ငါးလုပ်ငန်း ထုတ်ကုန်များအတွက် EU Regulation GAP ဖြင့်လည်းကောင်း၊ ကျန်းမာရေးဝန်ကြီးဌာန၊ ဆေးဝါးထုတ်ကုန်များအတွက် ဗြိတိသျှအပြည်ပြည် ဆိုင်ရာစံဖြင့်လည်းကောင်း၊ စိုက်ပျိုးရေးဦးစီးဌာန၊ ပိုးသတ်ဆေးထုတ်ကုန်နှင့် စိုက်ပျိုးသီးနှံထုတ်ကုန်များအတွက်  Codex Standards နှင့် WHO Guideline များအရလည်းကောင်း မှီငြမ်းသုံးစွဲလျက်ရှိပါကြောင်း တင်ပြအပ်ပါတယ်။ သို့ဖြစ်ပါ၍ လက်ရှိအခြေအနေမှာ ပြည်ထောင်စုဝန်ကြီးဌာန အများစုအနေနဲ့ သက်ဆိုင်ရာနည်းဥပဒေလုပ်ထုံး လုပ်နည်းများကို ဒေသဆိုင်ရာနှင့် အပြည်ပြည်ဆိုင်ရာစံချိန်စံညွှန်းများအား မှီငြမ်းကိုးကားသုံးစွဲလျက် ရှိတဲ့အတွက်ကြောင့် စံချိန်စံညွှန်းသတ်မှတ်ခြင်းဆိုင်ရာဥပဒေပေါ်ထွက်ပြီးပါက အမျိုးသားစံချိန်စံညွှန်း များကို ပြုစုအတည်ပြုနိုင်မည်ဖြစ်ပါကြောင်း ဖြေကြားပါသည်။