(ခ)-အဆောက်အဦဆောက်လုပ်ခြင်းများနှင့်ပတ်သက်၍ တိုင်းဒေသကြီး၊ ပြည်နယ်အလိုက် တစ်နှစ် တစ်ကြိမ်တစ်စတုရန်းပေအပေါ် ဈေးနှုန်းသတ်မှတ်ပေးခြင်းကို ဆောင်ရွက်ပေးရန်နှင့် စပ်လျဉ်းသည့် မေးခွန်း

ကော်မတီအသီးသီးအနေနဲ့ နိုင်ငံတော်ရဲ့ ဘဏ္ဍာရေးနှစ်အလိုက်ဆောင်ရွက်မယ့် စီမံကိန်းလုပ်ငန်းများနှင့် ငွေလုံးငွေရင်း အသုံးစရိတ် လျာထားချက်တွေကို စိစစ်သုံးသပ်ပြီးတော့မှ ပြင်ဆင်လျာထားချက်တွေကို အဆိုပြုတင်ပြကြရ ပါတယ်။ စီမံကိန်း လုပ်ငန်းတွေရဲ့ ငွေလုံးငွေရင်းအသုံးစရိတ်တွေမှာအများအားဖြင့် အဆောက်အဦ ဆောက်လုပ်တဲ့လုပ်ငန်းနဲ့ လမ်းဆောက်လုပ်တဲ့ လုပ်ငန်းတွေပါဝင်ပါတယ်။ အဲ့ဒီဆောက်လုပ်ရေး လုပ်ငန်းတွေရဲ့ တန်ဖိုးတွေကိုစိစစ်တဲ့အခါမှာ ကုန်ကျမယ့်ပစ္စည်းနဲ့ ပစ္စည်းပမာဏရဲ့ ဈေးနှုန်းတွေကို အမျိုးမျိုးအကွဲကွဲအပြားပြား ခြားနားနေတာကိုတွေ့ရှိရတဲ့အတွက် ကျွန်တော်တို့ကော်မတီတွေအနေနဲ့ လုပ်ငန်းတန်ဖိုးကိုစိစစ်တဲ့နေရာမှာ အချိန်ကြန့်ကြာခြင်း၊ နောက်တစ်ခါ မိမိတို့ရဲ့စိစစ်မှုဟာ ရာခိုင်နှုန်းပြည့် သေချာတယ်လို့စိတ်ထဲမှာ ယတိပြတ်မဖြစ်ခြင်းများ ဖြစ်ပေါ်ခံစားရတာကိုတွေ့ရှိရ ပါတယ်။ ဥပမာအားဖြင့်ဆိုရင် အချို့အဆောက်အဦတွေ ကျွန်တော်တို့လည်း မိမိအစီအစဉ်နဲ့မိမိ ပြင်ပမှာ ဆောက်လုပ်လှူဒါန်းနေတာတွေလည်းရှိပါတယ်။ အဲလိုအဆောက်အဦမျိုးတွေကို ဒီလျာထား ချက်မှာ သိန်း ၆၅၀ တန်တဲ့အဆောက်အဦဟာ ကျွန်တော်တို့ ပြင်ပမှာဆောက်တဲ့အခါမှာ သိန်း ၃၅၀ လောက်နဲ့ပြီးသွားတာလည်းပဲ ကျွန်တော်တို့ကိုယ်တိုင် ကြုံတွေ့ရတာမျိုးလည်းရှိပါတယ်။ ဒါကြောင့် မို့လို့ ကျွန်တော်တို့ကဒီလို စိစစ်တဲ့အခါမှာ ကိုယ့်စိစစ်ချက်ဟာတိတိကျကျနဲ့ အမှန်တကယ် ကုန်ကျမယ့်ကုန်ကျစရိတ်ကို စိစစ်မိရဲ့လားလို့စိတ်ထဲမှာ ခဏခဏသံသယဖြစ်ပါတယ်။ ဆောက်လုပ် ရေးလုပ်ငန်းတွေကို တကယ်လုပ်နေတဲ့ဆောက်လုပ်ရေးဝန်ကြီးဌာနအနေနဲ့ ဆောက်လုပ်ရေးလုပ်ငန်း တွေ အမျိုးအစားအလိုက် အရည်အသွေးအလိုက် တစ်စတုရန်းပေပေါ်မှာကုန်ကျမယ့် ပစ္စည်းပမာဏ နဲ့ ဈေးနှုန်းပေါ်မူတည်ပြီးတော့မှ နှုန်းထားတွေသတ်မှတ်ဆောင်ရွက်နေတာကို ကျွန်တော်တို့သိရှိရ ပါတယ်။ အကြမ်းဖျင်းဆိုလို့ ရှိရင် R.C အဆောက်အဦမှာဆိုလို့ရှိရင် P.A.E ဆိုတာကတော့ Plinth Area Estimate တစ်စတုရန်းပေပေါ်မှာကုန်ကျမယ့်ငွေပေါ့ခင်ဗျား။ အခုလောလောဆယ်မှာဆိုရင် ကျွန်တော်စုံစမ်းသိရှိရသလောက် P.A.E ဟာ ၂၂၀၀၀ခန့်ရှိတယ်လို့ သိရှိရပါတယ်။ ဒါပေမယ့် ပြီးခဲ့တဲ့ ဘတ်ဂျက် ၂၀၁၃-၂၀၁၄ ဘတ်ဂျက်မှာ တချို့တချို့ ကျွန်တော် စာအုပ်တွေလိုက်လေ့လာတဲ့အခါမှာ P.A.E ဟာ ၂၆၀၀၀နဲ့ တင်ပြထားတာကိုလည်းတွေ့ရှိရပါတယ်။ ဒါကြောင့်မို့လို့ ဒီ P.A.E နှုန်းထား တွေကို ကျွန်တော်တို့ကော်မတီအနေနဲ့သိရှိလို့ရှိရင် စီမံကိန်းလုပ်ငန်း ပမာဏတွေကို စိစစ်တဲ့အခါမှာ အနီးစပ်ဆုံးနဲ့ မှန်မှန်ကန်ကန် စိစစ်နိုင်မယ်လို့သုံးသပ်ရပါတယ်။ ဒါ့ကြောင့်မို့လို့ ကျွန်တော့်အနေနဲ့ မေးမြန်းလိုတာကတော့ ဘဏ္ဍာရေးနှစ်အလိုက်ဝန်ကြီးဌာနအသီးသီးရဲ့ ငွေလုံးငွေရင်း အသုံးစရိတ် မှာပါဝင်တဲ့ အဆောက်အဦဆောက်လုပ်ခြင်းများနှင့်ပတ်သက်တဲ့ လုပ်ငန်းတွေမှာ ဈေးနှုန်းဖောင်းပွမှု မရှိစေဘဲ ပြည်သူ့ဘဏ္ဍာငွေ လေလွင့်ဆုံးရှုံးမှုမရှိစေရန်အတွက် ဆောက်လုပ်မယ့် အမျိုးအစားအပေါ် မူတည်၍ တိုင်းဒေသကြီး၊ ပြည်နယ်အလိုက် တစ်နှစ်တစ်ကြိမ် တစ်စတုရန်းပေအပေါ် သတ်မှတ် ဈေးနှုန်း P.A.E ဈေးနှုန်းသတ်မှတ်ပေးခြင်းကို ဆောက်လုပ်ရေးဝန်ကြီးဌာနအနေနဲ့ ဆောင်ရွက် ပေးရန်အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။