(ည)-သုံးခွမြို့နယ်ရှိ ရေထိန်းတံခါး ၃ ခု ၏ ရေထိန်းတံခါးများအား လျှပ်စစ်မော်တာ ဖြင့် ခလုတ်တစ်ချက် နှိပ်ရုံမျှဖြင့် ပိုလျှံရေများကို နာရီပိုင်း အတွင်း အကုန်အစင် စီးဆင်းသွားအောင် ခေတ်မီယန္တရားများ တပ်ဆင် ပေးနိုင်ခြင်း နှင့်စပ်လျဉ်းသည့် မေးခွန်း

ပထမဦးစွာ ရေထိန်းတံခါးများ တည်ဆောက်အကောင်အထည်ဖော်ရခြင်း၏ ရည်ရွယ်ချက် ၃ ရပ်ကို ဦးစွာတင်ပြလိုပါတယ်။ ပထမရည်ရွယ်ချက်ကတော့ မိုးရာသီပင်လယ်ရေကျချိန်တွင် ကွင်းအတွင်းရှိ ပိုလျှံရေများကို ရေထိန်းတံခါးမှ ရေထုတ်ပေးခြင်းဖြင့် လယ်မြေများရေကြီးနစ်မြုပ်မှုကို ကာကွယ် စေရန် ဖြစ်ပါတယ်။ ဒုတိယရည်ရွယ်ချက်ကတော့ နွေရာသီတွင် ပင်လယ်ဆားငန်ရေနှင့် ဆားငန်နုန်း များ လယ်ယာမြေများအတွင်းသို့ ဝင်ရောက်ခြင်းမှ ကာကွယ်စေရန် ဖြစ်ပါတယ်။ တတိယ ရည်ရွယ်ချက်ကတော့ မိုးနှောင်းရာသီတွင် ချောင်းအတွင်း ရေချိုထိန်းသိမ်းသိုလှောင်ထားစေရန်စတဲ့ ရည်ရွယ်ချက်သုံးချက်နဲ့ ရေတံခါးများကို တည်ဆောက်ထားခြင်း ဖြစ်ပါတယ်။

ကျွန်တော် ပထမမေးခွန်းနဲ့ပတ်သက်ပြီးတော့ ဖြေကြားမှာဖြစ်ပါတယ်။ ရေထိန်းတံခါးများအား လျှပ်စစ်မော်တာဖြင့် ခလုတ်တစ်ချက်နှိပ်ရုံမျှဖြင့် ရေထွက်ပေါက် ၂၁ ပေါက် လုံး ၁၂ ပေအထိ ချက်ချင်းမြှင့်တင်ကာ ပိုလျှံရေများကို နာရီပိုင်းအတွင်း အကုန်အစင် စီးဆင်းသွား အောင် ခေတ်မီယန္တရားများ တပ်ဆင်ပေးနိုင်ခြင်းရှိ၊ မရှိမေးခွန်း ဖြစ်ပါတယ်။ မိုးရာသီ တစ်လျှောက် ကွင်းအတွင်းဘက်မှ ပိုလျှံရေများကို ရေထိန်းတံခါးများတွင် တပ်ဆင်ထားသည့်  ရေတံခါးရွက်၊ Flap Gate များမှတစ်ဆင့် ဒီရေကျချိန်တွင် ထုတ်နုတ်ပေးပါတယ်။ ရေတံခါးရွက်များကို ဒီရေအတက်အကျ သဘာဝဖြစ်စဉ်အပေါ်အခြေခံ၍ အတွင်းဘက်ရေအားဖြင့် အလိုအလျောက် တွန်းဖွင့်ရေထုတ်နိုင်ရန် ဒီဇိုင်းပုံစံတွက်ချက်တည်ဆောက်ထားခြင်း ဖြစ်ပါတယ်။

          ရေထိန်းတံခါးများ တည်ဆောက်ခဲ့စဉ်ကာလက ၎င်းဒေသများတွင် လျှပ်စစ်မီးမရရှိသေးပါ။ တည်ဆောက်ပြီးစီးခဲ့သည့် ယခုအချိန်တွင်လည်း လျှပ်စစ်မီးမရရှိသေးပါ။ ရေထိန်းတံခါးများကို ကာလဒေသအခြေအနေနှင့် ကျွမ်းကျင်မှုအရ အကောင်းဆုံး တည်ဆောက်ပေးခဲ့ခြင်း ဖြစ်ပါတယ်။

          သို့ပါ၍ လွှတ်တော်ကိုယ်စားလှယ်တော်ကြီး ဖြစ်စေလိုသည့် ရေထိန်းတံခါးများအား လျှပ်စစ် မော်တာဖြင့် ခလုတ်တစ်ချက်နှိပ်ရုံမျှဖြင့် ရေထွက်ပေါက် ၁၂ ပေါက်လုံး ၁၂ ပေ အထိ ချက်ချင်း မြှင့်တင်ကာ ပိုလျှံရေများကို နာရီပိုင်းအတွင်း အကုန်အစင် စီးဆင်းသွားအောင် ခေတ်မီယန္တရားများ တပ်ဆင်ခြင်းကို အဆိုပါဒေသသို့ လျှပ်စစ်ဓာတ်အား ရောက်ရှိချိန်တွင် လိုအပ်ချက်အပေါ်မူတည်၍ ပြုပြင်ဆောင်ရွက်ပေးသင့်ပါကြောင်း ရှင်းလင်းဖြေကြားအပ်ပါတယ်။

          ဒုတိယမေးခွန်းနဲ့ပတ်သက်ပြီးတော့ ကျွန်တော်တင်ပြပါမယ်။ မိုးတွင်းကာလ ရေယာဉ်များ အနေဖြင့် တင်ပြပါရေတံခါး ၃ ခုကို ဖြတ်သန်း၍ သွားလာနိုင်အောင် ရေလမ်းကြောင်း တစ်ခုစီကို ဖန်တီးဆောင်ရွက်ပေးနိုင်ခြင်းရှိ၊ မရှိ ဆိုတဲ့ မေးခွန်းဖြစ်ပါတယ်။ ရေထိန်းတံခါးများကိုတည်ဆောက် ထားသည့်ဒေသများမှာ ပင်လယ်ရေငန်နှင့် ဒီရေ အတက်အကျရှိသည့် ဒေသဖြစ်၍ မိုးတွင်း ကာလရေယာဉ်များ ရေတံခါး ၃ ခုကို ဖြတ်သန်းသွားလာနိုင်ရန် လွှတ်တော်ကိုယ်စားလှယ်ကြီး တင်ပြသည့်အတိုင်း ရေလမ်းကြောင်းတစ်ခုစီ ဖန်တီးပေးခြင်းဖြင့် ပင်လယ်ဒီရေနှင့် ဆားငန်ရေများ လယ်မြေများအတွင်းသို့ ဝင်ရောက်ခြင်း၊ ရေကြီးနစ်မြုပ်မှု ဖြစ်ပွားနိုင်ခြင်းတို့ကြောင့် စိုက်ပျိုးရေးကို ထိခိုက်နိုင်ပါတယ်။ ထို့အပြင် ရေလမ်းကြောင်းတွင် ရေယာဉ်ဝင်ထွက်တံခါး (Lock Gate) တည်ဆောက်မည်ဆိုပါက လုပ်ငန်းပမာဏကြီးမားပြီး ကုန်ကျစရိတ်များပြားသည့်အတွက် တည်ဆောက်ရန် မသင့်တော်ပါ။ အဆိုပါဒေသတွင် ယခင်ကာလက လမ်းပန်းဆက်သွယ်ရေး လမ်းကြောင်းအဖြစ် ရေလမ်းခရီးကို အဓိကအသုံးပြုခဲ့သော်လည်း ယခုအခါ ကုန်းလမ်းခရီး တွင်ကျယ်စွာသွားလာနိုင်ပြီဖြစ်သည့်အတွက် ကုန်ကျစရိတ်ကြီးမားသော ရေယာဉ်ဝင်/ထွက်တံခါး (Lock Gate) ထပ်မံတည်ဆောက်၍ ရေလမ်းကြောင်းတစ်ခုစီကို ဖန်တီးဆောင်ရွက်ပေးရန် မသင့်ပါ ကြောင်း ဖြေကြားအပ်ပါတယ်။  ဆက်လက်ပြီး ကျွန်တော်တို့ တတိယမေးခွန်းကို ဖြေကြားမှာ ဖြစ်ပါ တယ်။ ရေတံခါးများကို ဒေသခံပြည်သူ့အကျိုးအတွက် အချိန်နှင့်တပြေးညီ ဖွင့်/ပိတ် ဆောင်ရွက်နိုင်ရေးအတွက် ပြည်သူ့ကိုယ်စားလှယ်များ၊ ရပ်မိရပ်ဖများဖြင့် ဖွဲ့စည်းထားသည့် ကြီးကြပ်ရေးကော်မတီတစ်ရပ်မှ ကြီးကြပ်ဆောင်ရွက်ခွင့်ရအောင် ပြည်ထောင်စုအစိုးရမှ ဆောင်ရွက် ပေးနိုင်ခြင်းရှိ၊ မရှှိမေးခွန်းဖြစ်ပါတယ်။ မေးခွန်းနှင့် ပတ်သက်၍ ရေထိန်းတံခါးများ အချိန်နှင့် တပြေးညီ ဖွင့်/ပိတ်ခြင်းကို နှစ်စဉ်မြို့နယ် စိုက်ပျိုးရေးထုတ်လုပ်မှုကဏ္ဍတိုးတက်မြင့်မားရေးအဖွဲ့နှင့် အနီးကပ်ကြီးကြပ်ညှိနှိုင်းဆောင်ရွက်လျက်ရှိပါကြောင်း ဖြေကြားအပ်ပါတယ်။ စတုတ္ထမေးခွန်းဖြစ်တဲ့ နိုင်ငံတော်၏ ရည်မှန်းချက်နှင့် လက်တွေ့ဖြစ်ပေါ်နေမှုကို ဆန့်ကျင်ကာ ၁၀ စုနှစ် တစ်စုခန့်ကြာမြင့် ချိန်အထိ ရေထိန်းတံခါးများအတွင်းနှင့်ပြင်ပတွင် ရေငန်များသာ ဖြစ်ပေါ်နေပြီး မူလရည်မှန်းချက် အတိုင်း ရေချိုသိုလှောင်နိုင်ခြင်းမရှိခြင်း၊ တောင်သူလယ်သမားများ၏ စိုက်ပျိုးရေး၊ ကုန်စည်စီးဆင်း ရေးတို့အတွက် အနှောင့်အယှက် သဖွယ်ဖြစ်နေသော ကျန်ရေတံခါး ၃ ခုအား အထက်အပိုဒ် (၁)၊ (၂)၊ (၃) ပါအတိုင်း ဆောင်ရွက်ပေးနိုင်ခြင်းမရှိပါက ပြန်လည်ဖြုတ်သိမ်းစေရန် နယ်မြေခံလူထုမှ ဆန္ဒပြင်း ပြလျက်ရှိနေသဖြင့် ပြည်သူ့ဆန္ဒနှင့်အညီ ကျန်ရေတံခါး ၃ ခုအား ဖြုတ်သိမ်းပေးရန် အစီအစဉ်ရှိ၊ မရှိဆိုသော မေးခွန်းဖြစ်ပါတယ်။ သုံးခွမြို့နယ်တွင် ရေကြီးကွင်း၊ ရေနက်ကွင်းများကို ဖော်ထုတ်ရန်၊ ဆားငန်ရေဝင်ရောက်မှုမှ ကာကွယ်ရန်၊ ဆောင်းသီးနှံများအတွက် လယ်ယာမြေ အစိုဓာတ်ထိန်းသိမ်း စေရန် ကွင်းအတွင်းမှ မိုးရာသီတစ်လျှောက် ရေပိုရေလျှံများ ထုတ်နုတ်နိုင်ရန်တို့အတွက် မှော်ဝန်းချောင်းပေါ်တွင် ရေတံခါးကြီးတစ်လုံး တည်ဆောက်ပေးရန်  စဉ်းစားကြံဆခဲ့သော်လည်း မှော်ဝန်းချောင်းကြီးကိုပိတ်၍ ရေထိန်းတံခါးကြီးတစ်လုံး တည်ဆောက်မည်ဆိုပါက စီမံကိန်း ပမာဏနှင့် ကုန်ကျစရိတ်ကြီးမားသဖြင့် ကွင်းများအလိုက် ပိုင်းခြား၍ မှော်ဝန်းချောင်း၏လက်တက် ချောင်းများဖြစ်သော ကဒပ္ပနချောင်းပေါ်တွင် ကဒပ္ပနရေထိန်းတံခါး၊ တကောချောင်းပေါ်တွင် တကောရေထိန်းတံခါးနှင့် နန်ယော ချောင်းပေါ်တွင် သုံးခွရေထိန်းတံခါးစသည်ဖြင့် ရေထိန်းတံခါး ၃ ခုခွဲ၍ တည်ဆောက် အကောင်အထည်ဖော်ဆောင်ရွက်ခဲ့ခြင်း ဖြစ်ပါတယ်။

ထိုသို့ဆောင်ရွက်ခဲ့ခြင်းအားဖြင့် မိုးရာသီတစ်လျှောက် ပင်လယ်ဒီရေကျချိန်၌ သုံးခွမြို့နယ်၏ အရှေ့ခြမ်းနှင့် အနောက်ခြမ်းကွင်းများမှ ပိုလျှံရေများကို ရေထိန်းတံခါးများမှတစ်ဆင့် ရေထုတ် ပေးခြင်းဖြင့် လယ်ယာမြေများ ရေကြီးနစ်မြုပ်မှုမှ ကာကွယ်ပေးပြီး ရေတော်၊ မိုးတော်စိုက်ပျိုးနိုင်ခြင်း၊ နွေရာသီတွင် လယ်ယာမြေများသို့ ပင်လယ်ဆားငန်ရေနှင့်   ဆားငန်နှုန်းများ ဝင်ရောက်ခြင်းကို ကာကွယ် တားဆီးနိုင်ခြင်း၊ ရေထိန်းတံခါး၏ အတွင်းဘက်ရှိ ချောင်းများတိမ်ကောမှုကို ကာကွယ်ပေးနိုင်ခြင်း၊ မိုးနှောင်းကာလတွင် ချောင်းအတွင်း ရေချိုထိန်းသိမ်းပေးထားနိုင်သဖြင့် ဒေသခံ ပြည်သူများနှင့် ကျွဲ၊ နွား၊ တိရစ္ဆာန်များအတွက် သောက်သုံးရေများ ရရှိလာခြင်းနှင့် မီးဘေးအန္တရာယ် ကြိုတင်ကာကွယ် ရေးအတွက် ရေသိုလှောင်ထားနိုင်ခြင်း၊ ဆောင်းသီးနှံများအတွက် လယ်ယာမြေများ အစိုဓာတ်ထိန်း သိမ်းနိုင်ခြင်း၊ ရေတံခါး၏ အတွင်းဘက်တွင် ရေလမ်းခရီးအသုံးပြုနိုင်ခြင်း၊ ရန်ကုန်မြို့တော်ဝန်းကျင် မိုင် ၃၀ စိမ်းလန်းစိုပြေရေး စီမံကိန်းအရ ပဲခူး-စစ်တောင်း တူးမြောင်းမှ ထုတ်လွှတ်ပေးဝေမည့် ဖြည့်တင်းရေများကို ရေထိန်းတံခါးများဖြင့် သိုလှောင်ထိန်းသိမ်း၍ နွေစပါးနှင့် အခြားသီးနှံများ ရေတင်စိုက်ပျိုးနိုင်ခြင်း၊ ရေထိန်းတံခါးများ၏ ကုန်းတွင်းပိုင်းတွင် ရေချိုပုဇွန်နှင့် ရေချိုငါးများ ပေါများ လာခြင်း၊ မြို့၊ ရွာ၊ ကျေးလက်နှင့်နီးသဖြင့် ရေထိန်းတံခါး ပတ်ဝန်းကျင်သို့ ပြည်သူလူထု လာရောက် အပန်းဖြေအနားယူနိုင်ခြင်းစသည့် အကျိုးကျေးဇူးများကို ရရှိခံစားလျက်ရှိပါတယ်။ သို့ဖြစ်၍ နိုင်ငံတော်နှင့်ပြည်သူ အကျိုးအတွက် ရည်ရွယ်၍ နိုင်ငံ့ဘဏ္ဍာငွေ အကုန်အကျခံ တည်ဆောက် ထားသော ရေထိန်းတံခါးကို ဖြုတ်သိမ်းရန် အစီအစဉ် မရှိသကဲ့သို့ စဉ်းစားရန်ပင် မပြုသင့်ပါကြောင်း ရှင်းလင်းဖြေကြားပါသည်။