(က)-အမေရိကန်ပြည်ထောင်စု၊ အနောက်ဖက်ကမ်းခြေ၊ ကယ်လီဖိုးနီးယားပြည်နယ်တွင် မြန်မာ ကောင်စစ်ဝန်ချုပ်ရုံးတစ်ရုံး ဖွင့်လှစ်ပေးရန် ရှိ/မရှိနှင့် စပ်လျဉ်းသည့် မေးခွန်း

ပြည်ထောင်စုသမ္မတမြန်မာနိုင်ငံတော်အနေဖြင့် နိုင်ငံခြားရေးမူဝါဒနှင့်အညီ နိုင်ငံတကာဆက်ဆံရေး များကို တိုးမြှင့်ဆောင်ရွက်လျက်ရှိပါတယ်။ ပြည်ပနိုင်ငံများတွင် မြန်မာသံရုံး၊ မြန်မာအမြဲတမ်း ကိုယ်စားလှယ်အဖွဲ့ရုံးနှင့် မြန်မာကောင်စစ်ဝန်ချုပ်ရုံးများ စုစုပေါင်း ၄၀ ရုံးဖွင်‌့လှစ်ထားရှိပြီး အောက်ဖော်ပြပါ လုပ်ငန်းတာဝန်များကို အကောင်အထည်ဖော်ဆောင်ရွက်လျက် ရှိပါတယ် -

(က)    လက်ခံသည့်နိုင်ငံတွင် မိမိနိုင်ငံကို ကိုယ်စားပြုခြင်း။

(ခ)     လက်ခံသည့်နိုင်ငံတွင် မိမိနိုင်ငံနှင့် မိမိနိုင်ငံသားတို့၏ အကျိုးသက်ဆိုင်ခွင့်များကို အပြည်ပြည်ဆိုင်ရာ ဥပဒေက ခွင့်ပြုထားသည့်အကန့်အသတ်အတွင်း ကာကွယ် စောင့်ရှောက်ခြင်း။

(ဂ)     လက်ခံသည့်နိုင်ငံ၊ အစိုးရနှင့် စေ့စပ်ဆွေးနွေးခြင်း။

(ဃ)    လက်ခံသည့်နိုင်ငံရှိ အခြေအနေများနှင့် အဖြစ်အပျက်များကို သိရှိအောင် တရား သောနည်းလမ်းများဖြင့် လေ့လာစုံစမ်းခြင်းနှင့် ယင်းတို့နှင့် စပ်လျဉ်း၍ မိမိနိုင်ငံ အစိုးရထံ အစီရင်ခံတင်ပြခြင်း။

(င)     မိမိနိုင်ငံနှင့် လက်ခံသည့်နိုင်ငံအချင်းချင်း ချစ်ကြည်စွာ ဆက်ဆံရေးကို တိုးတက် ကောင်းမွန်စေရန် ဆောင်ရွက်ခြင်းနှင့် ယင်းတို့၏ စီးပွားရေး၊ ယဉ်ကျေးမှုနှင့် သိပ္ပံ နည်းပညာတို့ဆိုင်ရာ ဆက်ဆံရေးများကိုလည်း ဖွံ့ဖြိုးထွန်းကားစေရန် ဆောင်ရွက်ခြင်း တို့ပဲဖြစ်ပါတယ်။

အမေရိကန်နိုင်ငံ ဝါရှင်တန်ဒီစီမြို့၌ မြန်မာသံရုံးနှင့် နယူးယောက်မြို့၌ မြန်မာအမြဲတမ်း ကိုယ်စားလှယ်အဖွဲ့ရုံးတို့ ဖွင်‌့လှစ်ထားရှိပြီး အမေရိကန်နိုင်ငံအပြင် ကမ္ဘာ့ကုလသမဂ္ဂအဖွဲ့ချုပ် ကျူးဘားသမ္မတနိုင်ငံနှင့် မက္ကစီကို ပြည်ထောင်စုနိုင်ငံများကိုပါ ပူးတွဲတာဝန်ယူဆောင်ရွက်လျက် ရှိပါ တယ်။ သမိုင်းကြောင်းကိုလေ့လာကြည့်မယ်ဆိုပါက အမေရိကန်ပြည်ထောင်စုကို ပထမဆုံး သွား ရောက်ခဲ့တဲ့ မြန်မာနိုင်ငံသားဟာ မောင်ချောလူးဖြစ်ပြီး ၁၈၅၈ ခုနှစ်မှာ ပင်ဆဲလ်ဗေးနီးယားမြို့ လီဝစ်စ်ဗတ်ဂ်တက္ကသိုလ် (ယခု ဘတ်က်နေးလ်တက္ကသိုလ်) သို့ တက်ရောက်ခဲ့ပြီး ၁၈၆၇ ခုနှစ်မှာ ဆေးပညာဘွဲ့ရရှိပြီးနောက် မြန်မာနိုင်ငံသို့ ပြန်လည်ထွက်ခွာခဲ့ကြောင်း သိရှိရပါတယ်။ ၁၉၆၂ ခုနှစ် နောက်ပိုင်းမှာတော့ မြန်မာလူမျိုးများ အမေရိကန်နိုင်ငံကို ပိုမိုရောက်ရှိလာခဲ့ ပြီး ၁၉၇၇ ခုနှစ်မှ ၂၀၀၀ ပြည့်နှစ်အတွင်း မြန်မာလူမျိုး ၂၅၂၂၉ ဦးရောက်ရှိနေထိုင်ခဲ့ကြောင်း သိရှိရပါတယ်။ အမေရိကန် နိုင်ငံရောက် မြန်မာလူမျိုးများ၏ အရေအတွက်ဟာ တဖြည်းဖြည်းမြင့်တက်လာခဲ့ပြီး ၂၀၁၀ ပြည့်နှစ် မှာတော့ ယခင်မှတ်တမ်းများထက် ၄၉၉ ရာခိုင်နှုန်းကျော် မြင့်တက်ခဲ့ကြောင်း သိရှိရပါတယ်။ အမေရိကန်ပြည်ထောင်စု၏ ၂၀၁၀ ပြည့်နှစ်သန်းခေါင်စာရင်းအရ တစ်နိုင်ငံလုံးရှိ လူဦးရေ စုစုပေါင်း မှာ ၃၀၈၇၄၅၅၃၈ ဦး ဖြစ်ပြီး ယင်းအနက် အာရှနွယ်ဖွားအမေရိကန် ဦးရေမှာ ၁၇၃၂၀၈၅၆ ဖြင့် လူဦးရေစုစုပေါင်း၏ ၆ ရာခိုင်နှုန်းဖြစ်ပါတယ်။ မြန်မာနွယ်ဖွားအမေရိကန်ဦးရေမှာ ၁၀၀၂၀၀ ဖြင့် လူဦးရေ စုစုပေါင်း၏ ဝ.၀၃၂ ရာခိုင်နှုန်းရှိကြောင်း သိရှိရပါတယ်။

အမေရိကန်ပြည်ထောင်စု အနောက်ဘက်ကမ်းခြေ ကယ်လီဖိုးနီးယား ပြည်နယ်တွင် နေထိုင် သည့်မြန်မာနွယ်ဖွား အမေရိကန်ဦးရေဟာ ၁၇၉၇၈ ဦးရှိပြီး၊ အမေရိကန် ပြည်ထောင်စုရှိ မြန်မာ နွယ်ဖွားအမေရိကန်ဦးရေစုစုပေါင်း၏ ၁၈ ရာခိုင်နှုန်းဖြင့် မြန်မာနွယ်ဖွားအမေရိကန် အများဆုံး နေထိုင်သည့်ပြည်နယ်ဖြစ်ကြောင်း သိရှိရပါတယ်။ အလားတူ အမေရိကန်ပြည်ထောင်စုတွင် မြန်မာနွယ်ဖွားအမေရိကန်အများစုဟာ အင်ဒီရားနား၊ ဗာဂျီးနီးယား၊ မေရီလင်း၊ အီလီနွိုက်စ်နှင့် အိုဟိုင်းယိုးပြည်နယ်များတွင် နေထိုင်ကြပြီး မြို့ကြီးများအနေဖြင်‌့ လော့စ်အိန်ဂျလိစ်၊ ဆန်ဖရန်စစ္စကို၊ နယူးယောက်နှင့် ဝါရှင်တန် ဒီစီမြို့ကြီးများမှာ နေထိုင်ကြကြောင်း သိရှိရပါတယ်။ လက်ရှိအားဖြင့် အမေရိကန်ပြည်ထောင်စုတွင် မြန်မာနိုင်ငံသားများသည် Machine Readable Passport (MRP) နိုင်ငံကူးလက်မှတ်များ ပြောင်းလဲကိုင်ဆောင်လာရေးအတွက် လျှောက်ထားလျက်ရှိရာ မြန်မာသံရုံး၊ ဝါရှင်တန်ဒီစီမြို့မှ ၂၀၁၀ ပြည့်နှစ် ဇွန်လ ၇ ရက်နေ့မှ ယနေ့အထိ မြန်မာနိုင်ငံသား ၃၃၆၆ ဦးအား (MRP) နိုင်ငံကူးလက်မှတ်များထုတ်ပေးခဲ့ပြီး ယင်းထုတ်ပေးခဲ့သူများ အနက် ၁၂၀၀ ဦးခန့်မှာ ကယ်လီဖိုးနီးယားပြည်နယ်တွင် နေထိုင်သည့် မြန်မာနိုင်ငံသားများဖြစ်ကြောင်း တွေ့ရှိရပါသည်။ သို့ဖြစ်ပါ၍ အမေရိကန်ပြည်ထောင်စု ကယ်လီဖိုးနီးယားပြည်နယ်ရှိ မြန်မာနိုင်ငံကူးလက်မှတ်ကိုင်ဆောင် သည့် မြန်မာနိုင်ငံသားများ၏အကျိုးကို အပြည်ပြည်ဆိုင်ရာ ဥပဒေကခွင့်ပြုထားသည့် အကန့်အသတ် အတွင်း ကာကွယ်စောင့်ရှောက်ပေးနိုင်ရေးနှင့် မြန်မာနွယ်ဖွားအမေရိကန်များ၏ အကျိုးကိစ္စများနှင့် ပတ်သက်ပြီး လိုအပ်သည်များ ကူညီဆောင်ရွက်ပေးနိုင်ရေးအတွက် အမေရိကန်ပြည်ထောင်စု ကယ်လီဖိုးနီးယားပြည်နယ်တွင် မြန်မာကောင်စစ်ဝန်ချုပ်ရုံးတစ်ရုံး ဖွင်‌့လှစ်သွားနိုင်ရေးအား နှစ်နိုင်ငံ ဆက်ဆံရေး ပိုမိုတိုးတက်လာမှုနှင့် မိမိနိုင်ငံတော်၏ ဘဏ္ဍာရေး အခြေအနေအပေါ်မူတည်ပြီး တင်ပြ ဆောင်ရွက်သွားမည်ဖြစ်ပါကြောင်း ဖြေကြားပါသည်။