ပြည်ထောင်စုသမ္မတ မြန်မာနိုင်ငံတော်တွင် (၂၇)ကြိမ်မြောက်အရှေ့တောင်အာရှ အားကစားပြိုင်ပွဲကို အိမ်ရှင် အဖြစ်ကျင်းပ ပြီးသည့်နောက်ပိုင်း နေပြည်တော်တွင် အားကစားတက္ကသိုလ်တစ်ခုဖွင့်လှစ်ရန် လွှတ်တော် က ဆွေးနွေးအတည်ပြုခဲ့ပြီးဖြစ်ပါကြောင်း၊ တက္ကသိုလ်တွင် သင်ကြားမည့့််သင်ရိုးညွှန်းတမ်းများကို နိုင်ငံတကာ အဆင့်မီရန် မြန်မာစာ၊ အင်္ဂလိပ်စာ နှစ်ဘာသာနှင့် ပြုစုသင့်ပါကြောင်း၊ အားကစားတက္ကသိုလ်က မွေးထုတ် ပေးလိုက်သော ပညာရှင်များကို အားကစားဘွဲ့၊ အားကစား မဟာဘွဲ့၊ အားကစားပါရဂူဘွဲ့များ အပ်နှင်းနိုင် သည့် အဆင့်အထိ သုတေသနပြုနိုင်ရန်၊ စာတွေ့၊ လက် တွေ့ကျွမ်းကျင် တတ်မြောက်သည့် ပညာရှင်များကို အားကစားသမား စဉ်ဆက်မပြတ် မွေးထုတ်ပေးနိုင်သည့် အဖွဲ့အစည်းများတွင် အရာထမ်းများအဖြစ် တာဝန်ပေးနိုင်ရန်၊Professional နေရာများတွင် ဆောင်ရွက်နိုင်ရန်၊ လူငယ်မျိုးဆက်သစ် အားကစားသမားများ မွေးထုတ်ရေးတို့ကို ရည်မှန်းချက်ထားဆောင်ရွက်သင့်ပါကြောင်း၊ မြန်မာ့ရိုးရာအားကစားကိုလည်း ရေရှည် ထိန်းသိမ်းရာတွင် မိမိနိုင်ငံ၏မူပိုင်အားကစားနည်းများကို ခေတ်ရေစီးကြောင်းနှင့်အညီ ဆန်းသစ် တီထွင်သော နည်းလမ်းများဖြင့်သာ ဖော်ထုတ်ထိန်းသိမ်းကာကွယ်နိုင်မည်ဖြစ်ပါကြောင်း၊ အားကစားသည် စာတွေ့၊ လက်တွေ့ ညီညွတ်စွာပေါင်းစည်းဆောင်ရွက်ရသည့် ဘာသာရပ်ဖြစ်ပြီး ပြည်ပပညာရှင်များကိုပါခေါ်ယူ၍ သင်ကြားရေးလုပ်ငန်းကို မြှင့်တင်ရန် လိုအပ်မှာဖြစ်ပါကြောင်း၊ အားကစားတက္ကသိုလ်များက ဆရာ ဆရာမများကို နိုင်ငံတကာအဆင့်မီ နိုင်ငံခြား အားကစားတက္ကသိုလ်များသို့ ပညာတော်သင်များစေလွှတ်ပြီး စာတွေ့၊ လက်တွေ့ကျွမ်းကျင်တတ်မြောက်အောင်လည်း လေ့ကျင့်ပေးသင့်ပါကြောင်း၊ ထို့ကြောင့် အားကစားတက္ကသိုလ်ဖွင့်လှစ်ရန် မည်ကဲ့သို့ စီမံ ဆောင်ရွက်ထားသည်၊ အားကစားတက္ကသိုလ်ကို မည်သည့်အချိန်တွင် စတင်ဖွင့်လှစ်မည်ဆိုသည်ကို သိရှိလိုပါကြောင်းမေးမြန်းပါသည်။
အားကစားဝန်ကြီးဌာနအနေဖြင့် အားကစားတက္ကသိုလ်ဖွင့်လှစ်ရန်အတွက် ၂၀၁၄-၂၀၁၅ ဘဏ္ဍာနှစ်တွင် ငွေကျပ်သန်း ၁၂၀၀ ခွင့်ပြုရန်ပုံငွေပါရှိပါသဖြင့် ၂၀၁၄ ခုနှစ်၊ ဒီဇင်ဘာလ ၅ ရက်နေ့၌ နေပြည်တော်၊ ဇမ္ဗူသီရိမြို့နယ်၊ ဝဏ္ဏသိဒ္ဓိရပ်ကွက်တွင် အားကစား တက္ကသိုလ်တည်ဆောက်ခြင်းလုပ်ငန်းစီမံကိန်း ရတနာ ပန္နက်တင်မင်္ဂလာအခမ်းအနားကို ဒုတိယသမ္မတ ဦးဉာဏ်ထွန်းတက်ရောက်ပြီး ပန္နက်တင် ဆောင်ရွက်ပေး ခဲ့ပြီးဖြစ်ပါကြောင်း၊ ၂၀၁၅-၁၆ ဘဏ္ဍာရေးနှစ်တွင်လည်း လုပ်ငန်းများဆောင်ရွက်ရန်အတွက် ငွေကျပ်သန်း ၃၅၀၀ ခွင့်ပြုရန်ပုံငွေတင်ပြထားပြီး ခွင့်ပြုချက်ရရှိပါက တင်ဒါခေါ်ယူပြီးဆောင်ရွက်သွားမှာဖြစ်ပါကြောင်း၊ အားကစားတက္ကသိုလ်ဖွင့်လှစ်နိုင် ရေးအတွက် သင်ရိုးညွှန်းတမ်းရေးဆွဲပြုစုခြင်းနှင့် အားကစားလေ့ကျင့်ရေးပိုင်းဆိုင်ရာကိစ္စရပ်များကို လည်း စီစဉ်ဆောင်ရွက်လျက်ရှိပြီး ၂၀၁၆-၁၇ ပညာသင်နှစ်တွင် အားကစားတက္ကသိုလ်အား စတင် ဖွင့်လှစ်သင်ကြားနိုင်ရေးအတွက် စီစဉ်ဆောင်ရွက်ထားရှိပါကြောင်း ပြန်လည်ဖြေကြားပါသည်။