(စ)-ကျန်းမာရေးကဏ္ဍ၊ ဘဏ္ဍာငွေသုံးစွဲရေးနှင့်စပ်လျဉ်းသည့်မေးခွန်း

ကျန်းမာရေးမေးခွန်းကတော့ မြန်မာနိုင်ငံမှာလွန်ခဲ့သော ၅ နှစ်အတွင်း အသုံးပြုခဲ့သော ဘဏ္ဍာငွေများအနက်မှ ကျန်းမာရေးကဏ္ဍအတွက် မည်သို့မည်ပုံခွဲဝေသုံးစွဲခဲ့သည်ကို ရှင်းလင်းဖြေကြားပေးနိုင်ပါမည်လော။ နံပါတ်(၂)မေးခွန်း ယခု ၂၀၁၁-၂၀၁၂  ဘဏ္ဍာရေးနှစ်ရှိ ဘဏ္ဍာငွေ အရအသုံးဆိုင်ရာဥပဒေအရ ကျန်းမာရေးကဏ္ဍ၊ ဘဏ္ဍာငွေအသုံးစရိတ်အတွက် အစိုးရ အဖွဲ့တစ်ခုလုံး၏ အသုံးစရိတ်အချိုးအစား၊ Percent of Government Expenditure အရ မည်မျှရှိသည်ကို ရှင်းလင်းပြနိုင်ပါသလား။ နံပါတ်(၃) ကရေရှည်မှာ ကျန်းမာရေးကဏ္ဍနဲ့ပတ်သက်လို့ အခြားနိုင်ငံများနည်းတူ မြန်မာပြည်မှာတိုးတက်သုံးစွဲရန် မည်သို့အစီအမံများရှိသည်ကို ရှင်းလင်း ပြနိုင်ပါမည်လားဆိုတဲ့ မေးခွန်းသုံးခုဖြစ်ပါတယ်။ မေးခွန်းသုံးခုနဲ့ပတ်သက်ပြီးမရှင်းပြခင် ကျွန်မ ပြီးခဲ့တဲ့အင်္ဂါနေ့က ပညာရေးကဏ္ဍမေးတဲ့အခါမှာ ပထမဦးဆုံးအရေးကြီးတဲ့မေးခွန်းဖြစ်တဲ့ ဒီဘဏ္ဍာငွေ ထဲကနေပြီးတော့ ကျန်းမာရေးကဏ္ဍကဲ့သို့ပဲ ပညာရေးကဏ္ဍမှာလွန်ခဲ့တဲ့ ၅ နှစ်ကဘယ်လိုသုံးခဲ့သလဲ လို့မေးတဲ့မေးခွန်းကို ပညာရေးဝန်ကြီးဌာန၊ ပြည်ထောင်စုဝန်ကြီးဖြေကြားတဲ့အထဲမှာမပါခဲ့ပါဘူး။ နောက်တစ်ခါ ဒီလွှတ်တော်ရဲ့ ဇယားလေးထည့်တဲ့အခါမှာလည်း အဲ့ဒီ ၅ နှစ်စာအသုံးစရိတ်မေးတဲ့ မေးခွန်းလေးကကျန်ရစ်ခဲ့ပါတယ်။ တစ်ပါတည်းတင်ပြပါတယ်။ အဲ့တော့ အခုကျွန်မ ကျန်းမာရေးနဲ့ ပတ်သက်လို့ လေးမိနစ်ခန့်ရှင်းလင်းပြောကြားလိုပါတယ်။ မြန်မာနိုင်ငံမှာ CSO ဗဟိုစာရင်းအင်းအဖွဲ့ ကနေထုတ်ဝေတဲ့ Statistical Year Book 2008 ကနေပြီးတော့ ပြည်သူ့ဘဏ္ဍာငွေရှင်းတမ်းမှာ ကဏ္ဍအလိုက်အသုံးစရိတ်ကိုပြန်ကြည့်မယ်ဆိုရင် ကျန်းမာရေးနဲ့ ပညာရေးအသုံးစရိတ်ကိုဖော်ပြထား တာမတွေ့ခဲ့ရပါဘူး။ နောက်အစိုးရအဖွဲ့ကလည်း ဘဏ္ဍာငွေခွဲဝေချထားရေးနဲ့ ပတ်သက်ပြီးတော့ ကမ္ဘာ့နိုင်ငံအများစုကျင့်သုံးနေတာကို လေ့လာကြည့်ရှုလို့ရှိရင်လည်း ကျန်းမာရေးနဲ့ ပညာရေး  ကဏ္ဍမှာ ကျွန်မတို့မြန်မာပြည်က ဦးစားပေးမှုနည်းနေတာကိုတွေ့ရပါတယ်။ အဲ့တော့ ကျွန်မက အုပ်စုခွဲပြီးတော့တင်ပြမှာပါ။ အုပ်စုခွဲပြီးတင်ပြတဲ့အကြောင်းရင်းက တူတဲ့အုပ်စု၊ မတူတဲ့အုပ်စု Compare and Contract ဖြစ်ချင်လို့၊ နှိုင်းယှဉ်ချင်လို့ ခွဲခြားပြီးတင်ပြခြင်းဖြစ်ပါတယ်။ ကျွန်မ အုပ်စုသုံးစုကို ပြန်ပြီးတော့ရှင်းပြပါမယ်။ ပထမအုပ်စုကကျတော့ ဝင်ငွေအနိမ့်ဆုံးနိုင်ငံဖြစ်ပြီး‌တော့ တစ်ဦးချင်းပျမ်းမျှတစ်နှစ်ဝင်ငွေ အမေရိကန်ဒေါ်လာ ၂၀၀၀ အောက်ရှိပါတယ်။ ဒုတိယအလယ် အလတ်အုပ်စုကကျတော့ ဝင်ငွေအမေရိကန်ဒေါ်လာ ၃၀၀၀ ကနေ ၉၀၀၀ ကြားရှိပြီးတော့ တတိယအမြင့်ဆုံးအုပ်စုကတော့ အမေရိကန်ဒေါ်လာ ၁၇၀၀၀ အထက်ရှိနိုင်ငံများ ဖြစ်ပါတယ်။ အဲဒီတော့ ကျွန်မက တူတဲ့အုပ်စု၊ မတူတဲ့အုပ်စုမှာ ကျွန်မတို့မြန်မာပြည်က ဝင်ငွေအနိမ့်ဆုံးနိုင်ငံထဲမှာပါ ပါတယ်။ အဲ့ဒီတော့ နိုင်ငံအသီးသီးရဲ့ အစိုးရအသုံးစရိတ်စုစုပေါင်းမှာ ကျန်းမာရေးကဏ္ဍအတွက် ဘယ်လိုသုံးစွဲထားလဲကြည့်မယ်ဆိုရင် ကျွန်မတို့ကအနည်းဆုံး ၃ ရာခိုင်နှုန်းကနေပြီးတော့ အများဆုံးက ၁၅ ရာခိုင်နှုန်းအထိ သုံးစွဲထားတာတွေ့ရပါတယ်။ နောက်နမူနာအနေနဲ့ကြည့်မယ်ဆိုရင် ဝင်ငွေ အနိမ့်ဆုံးနိုင်ငံအုပ်စုမှာ လူတစ်ဦးချင်းအတွက် ကျန်းမာရေးအသုံးစရိတ်က အမေရိကန်ဒေါ်လာ        ၅ ဒေါ်လာကနေ ၁၅ ဒေါ်လာရှိပါတယ်။ ဒုတိယအုပ်စုနိုင်ငံကကျတော့ အမေရိကန်ဒေါ်လာ ၄၀ ကနေ ၃၆၀ နဲ့အထက်ရှိတယ်။ နောက် အဆင့်သုံးနိုင်ငံများမှာကျတော့ အမေရိကန်ဒေါ်လာ ၁၈၀ ကနေ ပြီးတော့ ၂၅၀၀ အထိသုံးစွဲတာကိုတွေ့ရပါတယ်။ အဲ့တော့မြန်မာနိုင်ငံရဲ့ ၂၀၁၀-၂၀၁၁ ဘဏ္ဍာရေးနှစ် အတွက် နိုင်ငံတော်ဘဏ္ဍာငွေအရအသုံးဆိုင်ရာဥပဒေကို ၂၀၁၁ ခုနှစ်၊ ဇန်နဝါရီ ၂၇ ရက်နေ့နဲ့ ထုတ်ပြန်ထားပြီး ဖြစ်ပါတယ်။ အဲ့ဒီဥပဒေ (၉/၂၀၁၁) အရဆိုရင် မြန်မာနိုင်ငံရဲ့ကျန်းမာရေး ကဏ္ဍအတွက် လူတစ်ဦးကျအသုံးစရိတ်ကကျပ်ငွေ ၁၅၈၆ ကျပ်၊ အတိအကျအားဖြင့် ၁၅၈၆ ကျပ်ပဲ ရှိတာကိုတွေ့ရပါတယ်။ အဲ့တော့ ခုန ကျွန်မနှိုင်းယှဉ်ပြခဲ့တဲ့ ဝင်ငွေအနိမ့်ဆုံးနိုင်ငံမှာ လူတစ်ဦးချင်း အတွက် ကျန်းမာရေးအသုံးစရိတ်က ၅ ဒေါ်လာ ကနေ ၁၅ ဒေါ်လာရှိတယ်။ မြန်မာပြည်က ၁၅၈၆ ကျပ်ရှိတော့ အများကြီးကွာခြားနေပါတယ်။ Market Price နဲ့ပြန်တွက်ကြည့်မယ်ဆိုလို့ရှိရင် ၅၀၀၀ နဲ့ ၁၅၈၆ ကျပ်ကွာခြားတာတွေ့ရပါတယ်။ အဲ့ဒီတော့ အဆိုပါအသုံးစရိတ်က တစ်ဦးချင်းဝင်ငွေ ခုန ဒေါ်လာ ၂၀၀၀ ရှိတဲ့ပထမအုပ်စုနိုင်ငံတွေရဲ့ အနိမ့်ဆုံးအသုံးစရိတ် ၅ ဒေါ်လာအောက်တောင်မှ အများကြီးနိမ့်ကျနေတာတွေ့ရပါတယ်။ အဲ့ဒီတော့ပြန်ပြီးကြည့်မယ်ဆိုလို့ရှိရင် မြန်မာနိုင်ငံမှာဆိုရင် ကျန်းမာရေးနဲ့ပတ်သက်တဲ့စာရင်းအရ အမျိုးသားကျန်းမာရေးအတွက် အရေးကြီးတဲ့ညွှန်းကိန်းတွေကို ပြန်ကြည့်မယ်ဆိုရင် မွေးကင်းစကလေးတစ်သိန်းမှာ သေဆုံးသူဦးရေဟာ မြောက်ကိုရီးယားမှာ ၂၄.၈၄၊ အရှေ့တီမောမှာ ၄၇.၈၆၊ ဘင်္ဂလားဒေ့ရှ်မှာ ၆၄.၃၂၊ မြန်မာနိုင်ငံမှာကျတော့ ၆၈.၇၈ ဖြစ် နေပါတယ်။ တစ်ခါအရေးကြီးတဲ့ သားဖွားမိခင်ဦးရေတစ်သိန်းမှာဆိုရင် သေဆုံးသူဦးရေဟာ ထိုင်းမှာ ၄၄ ဦး၊ သီရိလင်္ကာမှာ ၆၀ ဦး၊ ဗီယက်နမ်မှာ ၉၅ ဦး၊ မြန်မာပြည်မှာကျတော့ ၂၀၃ ဦး တောင်ရှိပါတယ်။ အဲ့ဒီတော့ ကျန်းမာရေးရဲ့ ဒီလိုအခြေအနေများကို ကြည့်ခြင်းအားဖြင့် ကျွန်မမေးတဲ့ မေးခွန်းလေးကို ပြည့်စုံအောင် ဖြေကြားပေးပါရန် မေးမြန်းပါသည်။