(ဂ)-ကော်ဖီစိုက်ပျိုးထုတ်လုပ်သူများ နစ်နာမှုမရှိစေရေးအတွက် ကမ္ဘာ့ပေါက်ဈေးအတိုင်း ရရှိရန်အတွက် နိုင်ငံတော်မှ ဆောင်ရွက်ပေးရန် ရှိ၊ မရှိနှင့် စပ်လျဉ်းသည့်မေးခွန်း

ကော်ဖီစိုက်ပျိုး သည့်  တောင်သူများအတွက် စိုက်ပျိုးစရိတ်ချေးငွေ တိုးမြှင့်ပေးနိုင်ခြင်းရှိ၊ မရှိနှင့်စပ်လျဉ်း၍  မြန်မာ့ လယ်ယာဖွံ့ဖြိုးရေးဘဏ်မှ ကော်ဖီချေးငွေအတွက်  ၃ နှစ် ၃ ရစ်ဖြင့် ထုတ်ချေးပြီး စတုတ္ထနှစ်မှစ၍     ၃ နှစ် ၃ ရစ်ဖြင့် ပြန်လည်ကောက်ခံခြင်း ဆောင်ရွက်ပါတယ်။ ကော်ဖီ ၁ ဧကမှ ၁၀ ဧကအထိ စိုက်ပျိုးသူများကို တစ်ဧကမှာ ကျပ် ၈၀၀၀၀ နှုန်းဖြင့် အာမခံမယူဘဲ ထုတ်ချေးပေးလျက် ရှိပါတယ်။ ကော်ဖီ ၁၁ ဧကနှင့်အထက်  စိုက်ပျိုးသူများကို တစ်ဧကလျှင် ၂၀၀၀၀၀ နှုန်းဖြင့် ထုတ်ချေးပေးလျက် ရှိပါတယ်။ ၁၁ ဧကအထက် ငွေချေးသူများကို မရွှေ့မပြောင်းနိုင်တဲ့ ပစ္စည်းများကို အာမခံယူ၍ ထုတ်ချေးခြင်း ဖြစ်ပါတယ်။ ယခုအချိန်မှာ တစ်နိုင်ငံလုံးအတိုင်းအတာဖြင့် အဓိကအများဆုံးစိုက်ပျိုး နေတဲ့ စပါးသီးနှံအတွက် ချေးငွေများတိုးမြှင့်ထုတ်ချေးပေးနိုင်ဖို့အတွက် ဦးစားပေး အစီအစဉ် ဆောင်ရွက်လျက်ရှိပါသဖြင့် လောလောဆယ်အနေနဲ့ ကော်ဖီသီးနှံအတွက် တစ်ဧကချေးငွေနှုန်းထား များ တိုးမြှင့်ပေးရန် အစီအစဉ်မရှိသေးပါကြောင်း ဖြေကြားအပ်ပါတယ်။ နိုင်ငံတော်မှာ နိုင်ငံတကာ အသိအမှတ်ပြု ကော်ဖီအသင်းအဖွဲ့အစည်း ဖွဲ့စည်းပေးနိုင်ခြင်း ရှိ၊ မရှိ  နှင့်ပတ်သက်၍ နိုင်ငံတော် မှာ နိုင်ငံတကာ အသိအမှတ်ပြုကော်ဖီအသင်းဖွဲ့လိုပါက ရှေးဦးစွာ ပြည်တွင်း၌ ကော်ဖီစိုက်ပျိုး ထုတ်လုပ်ရောင်းဝယ်သူများအသင်းကို ရော်ဘာစိုက်ပျိုးထုတ်လုပ်ရောင်းဝယ်သူများအသင်း၊ ဆီအုန်း စိုက်ပျိုးထုတ်လုပ် ရောင်းဝယ်သူများအသင်းနှင့်  ဟင်းသီးဟင်းရွက်နှင့် သစ်သီးဝလံများ စိုက်ပျိုး ထုတ်လုပ်ရောင်းဝယ်သူများအသင်းကဲ့သို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ကြီးကြပ်စီစဉ်မှုဖြင့် လုပ်ထုံးလုပ်နည်းများနှင့်အညီ  UMFCCI ၏ ညီနောင်အသင်းအဖြစ် တရားဝင် ဖွဲ့စည်းပြီး အသင်းအဖွဲ့အဖြစ်  ဆောင်ရွက်သွားနိုင်ပါကြောင်း တင်ပြအပ်ပါတယ်။ အဆိုပါ ကော်ဖီ စိုက်ပျိုးထုတ်လုပ်ရောင်းဝယ်သူများအသင်းမှ ICO (International  Coffee Organization) အဖွဲ့ သို့ ဝင်ရောက်ရန် ဖြစ်ပါတယ်။ ICO ဌာနချုပ်မှာ ဗြိတိန်နိုင်ငံ လန်ဒန်မြို့ Berner  Street တွင် တည်ရှိ ပြီး ကော်ဖီတင်ပို့သောနိုင်ငံ  Export ၃၇ နိုင်ငံနှင့်  တင်သွင်းသောနိုင်ငံ  Inport ၃၂ နိုင်ငံ၊ စုစုပေါင်း အဖွဲ့ဝင် ၆၉ နိုင်ငံ ရှိပါတယ်။  ICO သို့ဝင်ရောက်လျှင် အသင်းဝင်ကြေးအဖြစ် နှစ်စဉ် Deposit ငွေ စတာလင်ပေါင် ၂၅၀၀၀ ပေးသွင်းပြီး  အသင်းအဖွဲ့ဖြစ်လာပါက ဝင်ရောက်နိုင်မည် ဖြစ်ပါတယ်။ ကော်ဖီစိုက်ပျိုးထုတ်လုပ်သူများ နစ်နာမှုမရှိစေရေးအတွက် ကမ္ဘာ့ပေါက်ဈေးအတိုင်းရရှိရန် နိုင်ငံတော် မှ ဆောင်ရွက်ပေးနိုင်ခြင်း ရှိ၊ မရှိနှင့်စပ်လျဉ်း၍  ICO သို့ဝင်ရောက်ပြီးပါက စီးပွားရေးနှင့် ကူးသန်း ရောင်းဝယ်ရေးဝန်ကြီးဌာနနှင့်  မြန်မာနိုင်ငံကော်ဖီစိုက်ပျိုး ထုတ်လုပ်ရောင်းဝယ်သူများ အသင်း အနေနဲ့  ICO နှင့်ချိတ်ဆက်ပြီး ဆက်လက်ဆောင်ရွက်သွားနိုင်မည်ဖြစ်ပါကြောင်း  ရှင်းလင်းဖြေကြားပါသည်။