(စ)-ထော်လာဂျီ(ထုံကုန်းလေးလုံးထိုး) ယာဉ်မှတ်ပုံတင်ခွင့်နှင့် စပ်လျဉ်းသည့်မေးခွန်း

ကျေးလက်ဒေသများတွင် လယ်ယာစိုက်ပျိုးရေးလုပ်ငန်းများ၌ အသုံးပြုရန်ရည်ရွယ်၍ မြန်နှုန်းနိမ့် မောင်းနှင်နိုင်သော ထော်လာဂျီယာဉ်များအား လယ်ယာသုံးထရပ်ယာဉ်အဖြစ် အောက်ပါ ကန့်သတ်ချက်များဖြင့် မှတ်ပုံတင်ပေးလျက်ရှိပါတယ်။ ယာဉ်အတိုင်းအတာ ၅၄၀၀x၂၀၀၀x၂၄၅၀ မီလီမီတာ၊ ဝန်တင်အား-၂၀၀၀ ကီလိုဂရမ်၊ ဝန်ရိုး-၃၀၀၀ ကီလိုဂရမ်အောက် စက်(အင်ဂျင်)-ဆလင်ဒါ နှစ်လုံးထိုးအများဆုံး၊ တာယာအရွယ်အစား ၇.၅၀x၁၆ လက်မတို့ဖြစ်ပါတယ်။ မြန်မာ့စက်မှုလက်မှု ဖွံ့ဖြိုးတိုးတက်ရေးလုပ်ငန်းကော်မတီမှလည်း ပြည်တွင်းစက်မှုဇုန်များမှထုတ်လုပ်သော ထော်လာဂျီ ယာဉ်များအတွက် ခွင့်ပြုထားသည့်စံသတ်မှတ်ချက်များသည် အထက်ပါကန့်သတ်ချက်များ ဘောင်အတွင်း၌ပင်ဖြစ်ပါတယ်။ ယခု မေးမြန်းထားသည့် ထော်လာဂျီ(ထုံကုန်းလေးလုံးထိုး) ယာဉ်များ အားတရားဝင်ကြော်ငြာ၍ အရောင်းပြခန်းများ ဖွင့်လှစ်ရောင်းချခြင်းအား ခွင့်ပြုထားခြင်းမရှိပါ။ ခွင့်ပြုထားခြင်းမရှိကြောင်းကိုလည်း ညွှန်ကြားချက်များ ထုတ်ပြန်ထားပြီးဖြစ်ပါတယ်။ ယခုအခါ မှာလည်း ထိုသို့ ဆောင်ရွက်ခြင်းမရှိကြောင်းလည်းတင်ပြအပ်ပါတယ်။ တရုတ်နိုင်ငံထုတ် အချို့ ထော်လာဂျီအမျိုးအစားယာဉ်များသည် Light Truck မော်တော်ယာဉ်ထက် အရွယ်အစားကြီးမားပြီး တင်အားပိုမိုသယ်ဆောင်နိုင်၍ မြန်နှုန်းမြင့်မောင်းနှင်နိုင်သော စက်စွမ်းအား တပ်ဆင်ထားသည့် လယ်ယာသုံးထရပ်ထော်လာဂျီများပါရှိကြောင်းတွေ့ရှိရပါတယ်။ အဆိုပါ ထော်လာဂျီယာဉ်များသည် မော်တော်ယာဉ်တစ်စီးကဲ့သို့တည်ဆောက်ထားပြီး ထော်လာဂျီယာဉ် သတ်မှတ်ချက်များထက်များစွာ ကျော်လွန်နေပါသည်။ သို့ဖြစ်ပါ၍ မြန်နှုန်းမြင့်မောင်းနှင်နိုင်သော ဆလင်ဒါလေးလုံးထိုးအင်ဂျင်တပ် ယာဉ်များအား ထော်လာဂျီယာဉ်အဖြစ်သတ်မှတ်မှတ်ပုံတင်ခွင့် မပြုနိုင်ပါ။ အဆိုပါယာဉ်များသည် မော်တော်ယာဉ်ကဲ့သို့တည်ဆောက်ထားသဖြင့် မော်တော်ယာဉ်အဖြစ် လျှောက်ထားခြင်း၊ တင်သွင်း ခွင့်ပြုခြင်း၊ အကောက်ခွန်ပေးဆောင်ခြင်းစသည့် တရားဝင် လုပ်ငန်းအဆင့်ဆင့်ဆောင်ရွက်ပြီးမှသာ မော်တော်ယာဉ်အဖြစ် မှတ်ပုံတင်ဆောင်ရွက်ပေးနိုင်မည် ဖြစ်ပါကြောင်းနှင့် နယ်မြေဒေသအပေါ် မူတည်၍ကွဲလွဲသတ်မှတ်ချက်များ ဆောင်ရွက်ပေးခြင်းမျိုးမရှိဘဲ တစ်နိုင်ငံလုံးတစ်ပြေးညီ သတ်မှတ် ချက်များဖြင့် ဆောင်ရွက်ပေးလျက်ရှိကြောင်း ပြန်လည်ဖြေကြားပါသည်။