(င)-လှိုင်မြစ်ကိုဖြတ်၍ လှိုင်သာယာမြို့နယ်နှင့် မရမ်းကုန်းမြို့နယ်သို့ ဆက်သွယ်ထားသည့် ဘုရင့်နောင် တံတားကဲ့သို့ အခြားတံတားတစ်စင်းထပ်မံဆောက်လုပ်ပေးရန် အစီအစဉ် ရှိ၊ မရှိနှင့် စပ်လျဉ်းသည့် မေးခွန်း

ယခုလို ဘုရင့်နောင်တံတား အသစ်တစ်စင်း ထပ်မံဆောက်လုပ်ပေးရန်အတွက် မေးခွန်းကို မေးမြန်းပေးတဲ့ လှိုင်သာယာ ပြည်သူ့လွှတ်တော်ကိုယ်စားလှယ် ဦးဉာဏ်ဝင်းအားလည်းကောင်း၊ ကျွန်တော်တို့ ဒီလွှတ်တော် အတွင်းမှာ လာရောက်မေးခွန်းများ ဖြေကြားတဲ့အခါမှာ တွေ့ဆုံတိုင်းကျွန်တော်တို့ကို အကြံဉာဏ်များ ပေးပြီးတော့ ဘုရင့်နောင်တံတားကြီး အမြန်ဆုံးတည်ဆောက်ဖို့အတွက် ဝိုင်းဝန်းအကြံပြုကြတဲ့ လွှတ်တော်ကိုယ်စားလှယ်ကြီးများ အားလုံးကိုလည်းကောင်း အထူးကျေးဇူးတင်ရှိပါကြောင်း ပဏာမ တင်ပြအပ်ပါတယ်။ ယခုလက်ရှိ ရှိနေတဲ့ ဘုရင့်နောင်တံတားနှင့် ပတ်သက်ပြီးတော့ တင်ပြရရင်  ရန်ကုန်တိုင်းဒေသကြီး၊ မရမ်းကုန်းမြို့နယ် ဘုရင့်နောင်လမ်းမကြီးနှင့် လှိုင်သာယာမြို့နယ်၊ လှိုင်သာယာ-ပုသိမ်လမ်းကိုဆက်သွယ်ထားတဲ့ ဘုရင့်နောင်တံတားကြီးကို ကျွန်တော်တို့ ၁၉၉၁ ခုနှစ် က စတင်တည်ဆောက်ခဲ့ပြီးတော့ ၁၉၉၄ ခုနှစ်မှာ ဖွင့်လှစ်ပေးခဲ့တာ ဖြစ်ပါတယ်။ တံတားရဲ့အရှည်ဟာ ၁၆၄၀ ပေရှိပြီးတော့ သံမဏိသံပေါင် အမျိုးအစားဖြစ်ပါတယ်။ ယာဉ်သွားလမ်းအကျယ် ၂၈ ပေ ရှိပြီးတော့ ဘေးမှာ လူသွားလမ်းအကျယ် တစ်ဖက် ၄ ပေစီ ရှိတဲ့အပြင် တံတားခံနိုင်ဝန်ဟာလည်းပဲ ယာဉ်တစ်စီးချင်း ၃၆ တန်ဖြစ်ပါတယ်။ အောင်ဇေယျတံတားနှင့် ရွှေပြည်သာတံတားများ မဖွင့်လှစ်မီ ၂၀၀၀ ခုနှစ်ပြည့်နှစ်အထိ ရန်ကုန်မြို့ကနေပြီးတော့ လှိုင်သာယာမြို့ကိုသွားတဲ့ ယာဉ်အားလုံးက ဘုရင့်နောင်တံတား တစ်စီးတည်းမှသာ ဖြတ်သန်းသွားလာခဲ့တဲ့အတွက် တံတားကြီးရဲ့ခံနိုင်ဝန်ထက် ပိုတဲ့ ကုန်တင်ယာဉ်ကြီးများ ဖြတ်သန်းခြင်းများလည်းရှိခဲ့ပါတယ်။ ယာဉ်ကြီးယာဉ်ငယ်များကြောင့် ယာဉ်ကြောပိတ်ဆို့မှုများကိုဖြေရှင်းနိုင်ရန် အောင်ဇေယျတံတားနှင့် ရွှေပြည်သာတံတားကို ဖွင့်လှစ် ပြီးချိန် ၂၀၀၀ ပြည့်နှစ်၊ ဇန်နဝါရီလ ၁၈ ရက်နေ့နောက်ပိုင်းမှ စတင်ပြီးတော့ ဘုရင့်နောင်တံတား ပေါ်မှာ ခရီးသည်တင်တဲ့ ယာဉ်ငယ်များကိုသာ ဖြတ်သန်းခွင့်ပြုခဲ့ပါတယ်ခင်ဗျား။ ယခုအခါမှာ လှိုင်သာယာမြို့နယ်နှင့် အခြားမြို့နယ်များမှာ ဘက်စုံဖွံ့ဖြိုးတိုးတက်လာတာနှင့်အမျှ  မော်တော်ယာဉ် များတိုးတက်များပြားလာမှုကြောင့် ဘုရင့်နောင်တံတားပေါ်မှာ တစ်ရက်လျှင် အများဆုံးယာဉ်စီးရေ ၂၇၀၀၀ ခန့် ဖြတ်သန်းနေကြောင်း စစ်ဆေးတွေ့ရှိရပါတယ်။ ဒီ့အပြင် ယာဉ်ကြောပိတ်ဆို့မှုများ ဟာလည်း နေ့စဉ်ဖြစ်ပေါ်‌လျက်ရှိပါတယ်။ ယာဉ်ကြောပိတ်ဆို့မှုများ ဖြစ်ပေါ်သည်နှင့်အမျှ တံတား ပေါ်မှာလည်း ယာဉ်ကြောနှစ်ဖက်စလုံး ယာဉ်များပြည့်ကြပ်နေပြီးတော့  မော်တော်ယာဉ်များရဲ့ အလေးချိန်စုစုပေါင်းမှာ တံတားခံနိုင်ဝန်ထက်ကျော်လွန်လာနိုင်သဖြင့် တံတားကြီးရဲ့ကြံ့ခိုင်မှုကိုပါ ရေရှည်မှာစိုးရိမ်ရတဲ့ အခြေအနေဖြစ်ပေါ်လာပါတယ်။ ဒါကြောင့်မို့လို့ ရန်ကုန်မြို့တော်အတွင်းမှာ လည်းပဲ များပြားလှတဲ့ယာဉ်များကြောင့် လမ်းဆုံလမ်းခွများမှာ ယာဉ်ကြောပိတ်ဆို့မှုများ အချိန် ကြာမြင့်စွာဖြစ်ပေါ်လျက်ရှိတာကြောင့် လမ်းပန်းဆက်သွယ်မှု လွယ်ကူချောမွေ့စေရေး ရန်ကုန်တိုင်း ဒေသကြီးအစိုးရမှလည်း လှည်းတန်းလမ်းဆုံ၊ ရွှေဂုံတိုင်လမ်းဆုံ၊ ဘုရင့်နောင်လမ်းဆုံတို့မှာ ဂုံးကျော် တံတားကြီးများ တည်ဆောက်နေပြီဖြစ်ပါတယ်။ ဘုရင့်နောင်တံတားနှင့် ဘုရင့်နောင်လမ်းဆုံတို့ဟာ နီးကပ်လျက်ရှိတာကြောင့် ယာဉ်ကြောပိတ်ဆို့မှုမှာလည်း ဆက်စပ်ဖြစ်ပေါ်လျက်ရှိပါတယ်။ လေးစား အပ်ပါသော ဥက္ကဋ္ဌကြီးခင်ဗျား။ လက်ရှိဘုရင့်နောင်တံတားပေါ်မှာ ယာဉ်ကြောပိတ်ဆို့မှုများမဖြစ်ပေါ် စေရေး၊ တံတားကြီး၏ရေရှည်တည်တံ့ခိုင်မြဲရေး၊ လမ်းပန်းဆက်သွယ်မှု လွယ်ကူချောမွေ့မြန်ဆန် စေရေးတို့အတွက် ဘုရင့်နောင်တံတားအမှတ်(၂)အား ဆောက်လုပ်နိုင်ရန် တင်ပြခဲ့ရာ ပြည်ထောင်စု အစိုးရအဖွဲ့မှ အစည်းအဝေးအမှတ်စဉ်(၃၈/၂၀၁၂) ဖြင့် ဆောင်ရွက်ခွင့်ပြုခဲ့ပြီးလည်း ဖြစ်ပါတယ်။ သို့ပါ၍ အကြိုအင်ဂျင်နီယာလုပ်ငန်းများဖြစ်တဲ့ တံတားအူကြောင်း ရွေးချယ်သတ်မှတ်ခြင်း၊ မြေ      စမ်းသပ်ခြင်း၊ ပို့ဆောင်ရေးဝန်ကြီးဌာန ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီး ဌာနများနှင့် ညှိနှိုင်းပြီးတော့ မြစ်ကြောင်းအခြေအနေ စူးစမ်းလေ့လာခြင်းလုပ်ငန်းများကိုလည်း ‌ဆောင်ရွက်ခဲ့ပြီးဖြစ်ပါတယ်။ လေးစားအပ်ပါသော  ပြည်သူ့လွှတ်တော်ဥက္ကဋ္ဌကြီးခင်ဗျား။ ဘုရင့်နောင် တံတားအသစ်တစ်စင်းအတွက် ထပ်မံတည်ဆောက်‌ရေးအတွက် ၂၀၁၂-၂၀၁၃ ဘဏ္ဍာရေးနှစ် ပြည်ထောင်စုဖြည့်စွက်ရန်ပုံငွေမှာ ကျပ်သန်း ၁၅၀၀ အားလည်း တင်ပြတောင်းခံခဲ့ပါတယ်။ ဒါ့အပြင် ၂၀၁၃-၁၄ ဘဏ္ဍာရေးနှစ်မှာလည်း တံတားကြီးအား အမြန်ဆုံးပြီးစီးနိုင်ရေးအတွက် ကျပ်သန်း ၁၀၀၀၀ လည်း တင်ပြတောင်းခံထားပါတယ်။ အဆိုပါ ရန်ပုံငွေများရရှိလာပါက ရန်ကုန်တိုင်း ဒေသကြီးအဖွဲ့နှင့် ညှိနှိုင်းပြီးအမြန်ဆုံးအကောင်အထည်ဖော် ဆောင်ရွက်သွားမှာဖြစ်ပါကြောင်း ဖြေကြားပါသည်။