(ဃ)-ဗန်းမောက်-အင်းတော်လမ်းပိုင်းရှိ တံတားနှင့်လမ်းများနှင့် စပ်လျဉ်းသည့်မေးခွန်း

ဆက်လက်ပြီး ဒုတိယမေးခွန်းအား ရှင်းလင်းဖြေကြားသွားမှာဖြစ်ပါတယ်။ ဒီလမ်းကတော့ စစ်ကိုင်းတိုင်းဒေသကြီး၊ ဗန်းမောက်မဲဆန္ဒနယ်၊ ပြည်သူ့လွှတ်တော်ကိုယ်စားလှယ် ဦးကျော်သန်းက နေပြီးတော့မေးမြန်းထားတဲ့ မေးခွန်းဖြစ်ပါတယ်။   ပြည်သူ့လွှတ်တော်ဥက္ကဋ္ဌကြီးခင်ဗျား။ ဗန်းမောက်- အင်းတော်လမ်းပိုင်းဟာ ၂၉ မိုင်ရှည်လျားပြီး ဆောက်လုပ်ရေးဝန်ကြီးဌာနကနေ တာဝန်ယူလျက် ရှိသော ကသာ-အင်းတော်-မံစီလမ်းပိုင်းမှာပါဝင်ပါတယ်။ ၃၁-၅-၂၀၁၁ ရက်နေ့လမ်းအခြေအနေ ကတော့ ကတ္တရာလမ်း ၂၁ မိုင်၊ ကျောက်လမ်း ၈ မိုင်၊ စုစုပေါင်း ၂၉ မိုင်သာရှိပါတယ်။ ၂၀၁၁-၂၀၁၂ ဘဏ္ဍာရေးနှစ်မှာခွဲဝေရရှိတဲ့ သာမန်ပြင်ဆင်ထိန်းသိမ်းရေးရန်ပုံငွေကနေ အောက်ပါလုပ်ငန်းများ ဆောင်ရွက်လျက်ရှိပါတယ်။ ကတ္တရာလမ်းအနိမ့်အမြင့်ဖြေခြင်းနဲ့ ရေပိတ်လွှာလောင်းခြင်း၊ ၂ မိုင် ၃ဖာလုံ၊ ကတ္တရာရေပိတ်လွှာလောင်းခြင်းက ၅ မိုင် ၂ ဖာလုံ၊ ဘေလီတံတားများ ကြမ်းခင်းဘီး လမ်းများလဲခြင်းက ၂၂ စင်း၊ သစ်သားတံတားများ တိုင်စင်၊ ယက်မ၊ ကြမ်းခင်း၊ ဘီးလမ်းသစ်များ လဲလှယ်ခြင်းဟာ ၁၂ စင်း၊ သစ်သားရေပြွန်တည်ဆောက်ခြင်းက ၃ စင်းတို့ဆောင်ရွက်လျက်ရှိပါတယ်။ ဥက္ကဋ္ဌကြီးခင်ဗျား။ စစ်ကိုင်းတိုင်းဒေသကြီးအတွင်း ကသာခရိုင်၊ ဗန်းမောက်-အင်းတော် လမ်းပိုင်းဟာ မိုးများတဲ့ဒေသဖြစ်တဲ့အပြင် အဓိကအားဖြင့် ရွှေထွက်ရာဒေသလည်းဖြစ်ပါတယ်။ ရွှေတူးဖော်တဲ့ ယန္တရားကြီးများဟာ စက်သယ်ယာဉ်များကိုအသုံးမပြုဘဲ ယန္တရားကြီးများအလိုက် လမ်းများပေါ်မှာ သွားလာတဲ့အတွက် လမ်းများဟာပျက်စီးရခြင်းဖြစ်ပါတယ်။ ဗန်းမောက် - အင်းတော်လမ်းပိုင်းမှာ တုံစီ ချောင်းတံတား၊ နံ့သာချောင်းကူးတံတား၊ လက်ပန်တံတားတို့အား ၂၀၁၂-၂၀၁၃ ဘဏ္ဍာရေးနှစ်မှာ သံကူကွန်ကရစ်တံတားများအဖြစ်ပြီးစီးရန်အတွက် ရန်ပုံငွေလည်းလျာထားပြီးဖြစ်ပါတယ်။ သို့ဖြစ်ပါ၍ ရရှိရန်ပုံငွေပေါ်မှာမူတည်ပြီး ၎င်းလမ်းအား ကောင်းမွန်အောင်ဆောင်ရွက်သွားမည်ဖြစ်ကြောင်း ဖြေကြားပါသည်။