(စ)-မိုင်းတုံမြို့နယ် (၂၅)ခုတင်ဆံ့ဆေးရုံသည် သတ်မှတ်ထားသော ခုတင်အသုံးချမှု ၁၅၀ % ထက်ကျော်လွန် နေပြီဖြစ်ပါ၍ ခုတင်(၅၀)ဆံ့ဆေးရုံအဖြစ် ၂၀၁၈-၂၀၁၉ ဘဏ္ဍာရေးနှစ်တွင် အဆင့်တိုးမြှင့်ပေးရန် အစီအစဉ်ရှိ/မရှိနှင့်စပ်လျဉ်းသည့်မေးခွန်း

မိမိတို့မှာ Criteria တွေရှိပါကြောင်း၊ ၂၅ ကနေ ၅၀။ Criteria များ ပြန်ကြည့်လိုက်သည့်အခါ ၂၀၁၇ ခုနှစ်တွင် ဆေးရုံခုတင် အသုံးချနှုန်းက ၁၆၀ ရှိသော်လည်း ပြည်သူ့ကျန်းမာရေးပညာတွင် စာရင်းဇယားကိုကြည့်ပြီး ဆုံးဖြတ်ချက်ချ၍ မရပါကြောင်း၊ ၂၀၁၃ ခုနှစ်တွင် ခုတင်အသုံးချနှုန်း ၃၃ ရာခိုင်နှုန်း၊ ၂၀၁၄ ခုနှစ်တွင် ၃၄ ရာခိုင်နှုန်း၊ ၂၀၁၅ ခုနှစ်တွင် ၂၅ ရာခိုင်နှုန်း၊ ၂၀၁၆ ခုနှစ်တွင် ၅၀ ရာခိုင်နှုန်း၊ ၂၀၁၇ ခုနှစ်တွင် ၁၆၀ ထိ တက်လာပါကြေင်း၊ ဇူလိုင်လမှ နိုဝင်ဘာလအထိ တက်သွားသည်ကို  TMO ဖြင့် ကြည့်သည့်အခါ သွေးလွန်တုပ်ကွေး (Dengue he morrhagic Fever) ဖြစ်၍ တက်ခြင်းဖြစ်ပါကြောင်း၊ အကယ်၍သာ မိုင်းတုံတွင် ဆက်လက်ပြီး နောက်ထပ်တစ်နှစ်၊ နှစ်နှစ် တက်နေမည်ဆိုပါက ၂၅ ခုတင်ကနေ ၅၀ ခုတင်ကို ပေးရန် ဝန်မလေးပါကြောင်း၊ နောက်နှစ်ကို မိမိတို့စောင့်ကြည့်ပြီး နောက်နှစ်တွင်လည်း ၎င်းကဲ့သို့ မတက်အောင် ကောင်းကောင်းပညာပေးမည်ဆိုလျှင် မဖြစ်သင့်သည့်ရောဂါ မဖြစ်အောင်စပြီး အများကြီး လုပ်ဆောင်နေပါကြောင်း၊ နောက်တစ်ချက်က ထိုဆေးရုံတွင် လိုအပ်သည့် ECG စက်အသစ်တစ်လုံး၊ Blue Photo Stand တစ်ခုတို့၊ Baby Warmer တစ်ခု၊ Baby Cot ၁၀ လုံး၊ Locker ငါးလုံးကို ၂၀၁၈ ခုနှစ် ဇွန်လတွင် ပေးသွားမည်ဖြစ်ပါကြောင်းနှင့် မွမ်းမံပြင်ဆင်ခြင်းလုပ်ငန်းကိုလည်း ပေးသွားမည် ဖြစ်ပါကြောင်း၊ ထို့ကြောင့် ဆေးရုံတွင်ရှိသည့် ခြံစည်းရိုးကာရံရန် အတွက်ကို ၉.၄ သန်း၊ အမျိုးသမီးလူနာဆောင် အမိုးပြုပြင်ရန် ၅.၃ သန်း၊ ဆေးရုံအဝင်လမ်း ကွန်ကရစ်ခင်းခြင်းကို ၄.၄ သန်း၊ လူနာဆောင် ကြွေပြားခင်းခြင်းကို ၅.၂ သန်း၊ ဝန်ထမ်းအိမ်ရာများ ပြုပြင်ရေးလုပ်ငန်းများကိုလည်း ယခုဘဏ္ဍာတွင်  ခွဲဝေချထားမည် ဖြစ်ပါကြောင်း၊ တိုးချဲ့ဆောင်အသစ်နှင့် အဟောင်း အဝင်လမ်း ကွန်ကရစ် ခင်းခြင်းကိုလည်း ၁.၂ သန်း၊ ကူးစက်လူနာဆောင် ကြွေပြားခင်းခြင်းကိုလည်း ၁.၇ သန်း၊ တိုးချဲ့ဆောင်အဟောင်းနှင့် အသစ်ကြား ကွန်ကရစ်ခင်းခြင်းကိုလည်း ၁.၆ သန်း၊ ထုံးစံအရ ၂၅ ခုတင်ဆိုလျှင်  ၁၅ သန်း၊ ၁၅ သန်းကို ပိုပြီး ၃၂.၇၂ သန်း ပေးပါကြောင်း၊ ထို့အပြင် ၂၀၁၈ ခုနှစ် ဧပြီလမှ စက်တင်ဘာလအထိ ခြောက်လဘတ်ဂျက်တွင် ဆေးရုံ၏အဓိက လိုအပ်ချက်ဖြစ်သည့် ရင်ခွဲရုံပြုပြင်ခြင်း လုပ်ငန်းကို ဆောင်ရွက်ပေးမည် ဖြစ်ပါကြောင်း၊ နောက် ဆေးရုံ၏ ပြုပြင်မွမ်းမံခြင်း လုပ်ငန်းနှင့် အခြားလိုအပ်ချက်၊ ကုသရေးလိုအပ်ချက်များကို ကုသရေးနှင့်ဆိုင်မည်ဆိုလျှင် ရန်ပုံငွေတိုးချဲ့ပြီး ပေးရန်လည်းဝန်မလေးပါကြောင်း၊ ယခုအခါ မိုင်းတုံပြည်သူ့ဆေးရုံ၏ လိုအပ်ချက်အရ ကုသရေးဝန်ဆောင်မှုဆိုင်ရာ အခြေခံအဆောက်အအုံများ ပြင်ဆင်ထိန်းသိမ်းခြင်း ဆောင်ရွက်သကဲ့သို့ ၂၀၁၈-၁၉ ခုနှစ်တွင်လည်း ငွေလုံးငွေရင်းနှင့် ခြောက်ခန်းတွဲတစ်ထပ် ဝန်ထမ်း အိမ်ရာတစ်လုံးနှင့် ခွဲစိတ်အဆောက်အဦတစ်လုံး တည်ဆောက်ခြင်းကို မိမိတို့စာရင်းထဲတွင် ထည့်ထားပြီဖြစ်ပါကြောင်း ရှင်းလင်းဖြေကြားပါသည်။

ဦးအောင်ကျော်ဦး(မိုင်းတုံမဲဆန္ဒနယ်) က ဆက်စပ်မေးခွန်း မေးမြန်းပါသည်။

၂၀၁၂ ခုနှစ်မှ ၂၀၁၅ ခုနှစ်အထိ ခုတင် အသုံးချမှုရာခိုင်နှုန်းနည်းသည့် အကြောင်းရင်းက ယခင်က မိမိတို့ဆီတွင် ဆရာဝန်များသည် များသောအားဖြင့် ဆေးကုသခြင်းမပြုဘဲ မိုင်းဆတ်ကို သွားခိုင်းခြင်း၊ တာချီလိတ်ကို သွားခိုင်းခြင်း၊ ထိုင်းကိုသွားခိုင်းခြင်း စသည့် ကိစ္စများရှိခြင်းကြောင့် မိုင်းတုံတွင် စကားတစ်ခုကြားခဲ့သည်မှာ မိမိတို့ဆီတွင် သွားဆရာဝန်သာ ရှိပါသည်ဆိုပြီး စကားတစ်ခု ကျန်ရှိခဲ့ပါကြောင်း၊ ထို့ကြောင့် ခုတင်အသုံးချမှု နည်းခဲ့ရခြင်း ဖြစ်ပါကြောင်း၊ ဝန်ကြီးပြောသွားသည့် တစ်နှစ်တည်း လူနာများလာသည့် ကိစ္စကို စောင့်ကြည့်မည်ဆိုလျှင် နဂိုကလည်း ခုတင်အသုံးချမှု ၁၅၀ အထက်ကျော်လွန်မည်ဆိုပါက အဆင့်တိုးပေးမည်ဆိုပြီး ကတိပေးထားခြင်း ရှိပါကြောင်း၊ ၎င်းကတိအတွက် အဆင့်တိုးပေးနိုင်ခြင်း ရှိ/မရှိ သိရှိလိုပါကြောင်း မေးမြန်းပါသည်။

ကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေး

အဆင့်တိုးပေးမည်ဆိုသည်မှာ ၁၆၀ တက်လာခြင်း၏ အကြောင်းရင်းက ဖြစ်ရိုးဖြစ်စဉ်တက်ခြင်း မဟုတ်ပါကြောင်း၊ ဖြစ်ရိုးဖြစ်စဉ်ဆိုသည်မှာ နှလုံးရောဂါ၊ သွေးတိုးရောဂါ၊ ဆီးချိုရောဂါ၊ ထိခိုက်ရောဂါနှင့် တက်လာသည်ဆိုလျှင် ၎င်းကို ချက်ချင်းပေးသင့်သည့် ကိစ္စဖြစ်ပါကြောင်း၊ သို့သော် ၁၆၀ တက်ခြင်းသည် ဖြစ်ရိုးဖြစ်စဉ်မဟုတ် ခေတ္တခဏဖြစ်သည့် Epidemic Disease ကြောင့် တက်ခြင်းဖြစ်သည့်အတွက် နောက်နှစ် တက်မည့်အလားအလာ အလွန်နည်းသည့်အတွက် နှစ်နှစ်၊ သုံးနှစ် စောင့်ကြည့်မည်ဟု ပြောခြင်းဖြစ်ပါကြောင်း၊ နောက်နှစ်တွင် တက်မည်ဆိုလျှင် မိမိမှပေးမည်ဖြစ်ပါကြောင်း၊ မိမိအနေဖြင့် အားလုံးကို ပေးချင်သော်လည်း ပေးသည့်အခါ ပေးသင့်ပေးထိုက်သည်ကို ပေးမည်ဖြစ်သည့်အတွက် မိမိတို့ စောင့်ကြည့်ပါမည်၊ ၁၅၀ ထက်ကျော်နေလျှင် စဉ်းစားပေးမည် ဖြစ်ပါကြောင်း ရှင်းလင်းဖြေကြားပါသည်။