(ခ)-မောင်းခမ်းစံပြကျေးရွာအထက်တန်းကျောင်း အား ၂၀၁၃- ၂၀၁၄စာသင်နှစ်တွင်စာစစ်ဌာန အဖြစ် တိုးချဲ့ဖွင့်လှစ်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

တက္ကသိုလ်ဝင်စာမေးပွဲ စာစစ်ဌာနအဖြစ် ဖွင့်လှစ်လိုသော အခြေခံပညာအထက် တန်းကျောင်းသည် သက်ဆိုင်ရာ စာရွက်စာတမ်းများနှင့်အတူ စာစစ်ဌာနဖွင့်လှစ် လိုကြောင်း သက်ဆိုင်ရာ မြို့နယ်ပညာရေးမှူးရုံးမှတစ်ဆင့် တိုင်းဒေသကြီး /ပြည်နယ် ပညာရေးမှူးရုံးသို့ တင်ပြလျှောက်ထားရန် လိုအပ်ပြီး မြန်မာနိုင်ငံ စာစစ်ဦးစီးဌာနမှ သတ်မှတ်ထားသော အချက် (၁၈) ချက်နှင့်လည်း ပြည့်စုံရန် လိုအပ်ပါကြောင်း၊ ယင်းသက်ဆိုင်ရာကျောင်းမှ တင်ပြလာသော လျှောက်လွှာကို ရရှိလျှင် သက်ဆိုင်ရာ တိုင်းဒေသကြီး/ပြည်နယ် ပညာရေးမှူးရုံးနှင့် သက်ဆိုင်ရာဦးစီးဌာနတို့မှ ကွင်းဆင်းစစ်ဆေးပြီး တွေ့ရှိချက်ကို မြန်မာနိုင်ငံစာစစ် ဦးစီးဌာနသို့ ပြန်လည်အကြောင်းကြားရပါကြောင်း၊ မြန်မာနိုင်ငံစာစစ်ဦးစီးမှ ပညာရေးဝန်ကြီးဌာန စီမံခန့်ခွဲရေးကော်မတီသို့ တင်ပြအတည်ပြုချက် ရယူပြီး မိမိတို့မှ အခြေခံပညာအထက်တန်းကျောင်းတစ်ကျောင်းကို စာစစ်ဌာနအဖြစ် ဖွင့်လှစ်ခွင့် ပြုခြင်းဖြစ်ပါကြောင်း။

စစ်ကိုင်းတိုင်းဒေသကြီး၊ ဟုမ္မလင်းမြို့နယ်၊ မောင်းခမ်းစံပြကျေးရွာအထက်တန်းကျောင်းအနေဖြင့် စာစစ်ဌာနအဖြစ် ဖွင့်လှစ်လို ကြောင်း လျှောက်လွှာကို သက်ဆိုင်ရာပညာရေးမှူးရုံးကို ၂၀၁၃ ခုနှစ် စက်တင်ဘာလ ၁၅ ရက်နေ့တွင် လျှောက်လွှာနှင့်တကွ စာရွက်စာတမ်းများကို ပေးပို့ခဲ့ပြီး ထိုစာရွက်စာတမ်းများအပေါ် အခြေခံ၍ စစ်ကိုင်းတိုင်းဒေသကြီး ပညာရေးမှူးရုံးနှင့် အခြေခံပညာဦးစီးဌာနအမှတ် (၁) တို့အား ကွင်းဆင်း စစ်ဆေး ခဲ့ပြီးနောက် စာစစ်ဌာနအဖြစ် ဖွင့်လှစ်ခွင့်ပြုခဲ့သည်ကိုလည်း ထောက်ခံတင်ပြထားပါကြောင်း၊ ထို့ကြောင့် မိမိတို့ နောက်ဆုံးကျန်ရှိသော လုပ်ငန်းမှာ မြန်မာနိုင်ငံစာစစ်ဦးစီးဌာနမှ မိမိတို့ ပညာရေးဝန်ကြီးဌာန၊ စီမံခန့်ခွဲရေးကော်မတီကို တင်ပြအတည်ပြုချက် ရယူပြီးပြီဆိုပါက ဟုမ္မလင်းမြို့နယ်၊ မောင်းခမ်း စံပြကျေးရွာ အခြေခံပညာအထက်တန်းကျောင်းကို တက္ကသိုလ်ဝင်စာမေးပွဲစာစစ်ဌာနအဖြစ် ၂၀၁၃-၁၄ ပညာသင်နှစ်တွင် ဖွင့်လှစ်ခွင့်ပြုနိုင်မည်ဖြစ်ပါကြောင်း ဖြေကြားပါသည်။