(က)-ရွှေတောင်မြို့၊သရက်တောရပ်ကွက်အတွက် မီးသတ်ကားတစ်စီး ချထားပေးရန် အစီအစဉ် ရှိ၊ မရှိ နှင့် စပ်လျဉ်းသည့် မေးခွန်း

ပဲခူးတိုင်းဒေသကြီး၊ ရွှေတောင်မြို့နယ်တွင် မြို့ပေါ်ရပ်ကွက် ၃ ရပ်ကွက်နှင့် အိမ်ခြေ ၂၉၅၃၀ လုံး၊ အိမ်ထောင်စု ၂၉၅၃၉ စု၊ လူဦးရေ ၁၂၈၈၃၅ ဦး၊ ကျေးရွာအုပ်စုပေါင်း ၄၈ အုပ်စု၊ ကျေးရွာပေါင်း ၂၉၇ ရွာရှိပါကြောင်း၊ ၁-၁-၂၀၀၄ ရက်နေ့မှ ၂-၇-၂၀၁၄ ရက်နေ့အထိ ၁၀ နှစ်ကျော်ကာလအတွင်း မီးလောင်မှု ၁၄ ကြိမ်ဖြစ်ပွားခဲ့ပြီး တန်ဖိုးငွေကျပ် ၁၁၈၆၇၃၈၀ ဆုံးရှုံးမှု ဖြစ်ပွားခဲ့ပါကြောင်း၊ ယခုအချိန်တွင် ဒုတိယမီးသတ်ဦးစီးမှူး ဦးစီးအင်အား ၁၄ ဦး၊ မီးငြှိမ်းသတ်ယာဉ် ၂ စီး၊ မီးသတ်ရေသယ်ယာဉ် ၁ စီး၊ မီးသတ်စက်ယာဉ် ၁ စီးနှင့် အရန်မီးသတ်တပ်ဖွဲ့ဝင် ၇၇၀ ဦးနှင့်အတူ မြို့နယ် မီးဘေးကြိုတင်ကာကွယ်ရေးနှင့် မီးငြှိမ်းသတ်ရေးလုပ်ငန်းများကို ဆောင်ရွက်လျက်ရှိပါကြောင်း၊ ရွှေတောင်မြို့နယ် သရက်တောရပ်ကွက် အရန်မီးသတ်စခန်းရှိ ဌာနပိုင် (ယာဉ်/၈၂၂၂) ဖို့ဒ်ဆန်းမီးသတ်ရေသယ်ယာဉ်သည် ပြုပြင်သုံးစွဲ၍ မရတော့သဖြင့် ၂၆-၃-၂၀၁၄ ရက်နေ့တွင် မြန်မာနိုင်ငံ မီးသတ်တပ်ဖွဲ့ဌာနချုပ်ကို ပြန်လည်အပ်နှံခဲ့ပါကြောင်း၊ နိုင်ငံတော်အတွင်း မီးဘေးလုံခြုံရေး၊ သဘာဝဘေးအန္တရာယ်ကာကွယ်ရေး၊ ရှာဖွေကယ်ဆယ်ရေးနှင့် ပြည်သူ့အကျိုးပြု လုပ်ငန်းများ ပိုမိုထိရောက်စွာဆောင်ရွက်နိုင်ရေးအတွက် မြို့နယ်တိုင်းတွင် ဦးစီးအရာရှိ ဦးစီးအင်အား ၉ ဦးပါဝင်သော မြို့နယ်မီးသတ်ဦးစီးဌာနမှူးရုံး ၁ ရုံး၊ ဒုတိယမီးသတ်ဦးစီးမှူး ဦးစီးအင်အား ၂၈ ဦး၊ မီးငြှိမ်းသတ်ယာဉ် ၂ စီး၊ မီးသတ်ရေသယ်ယာဉ် ၁ စီး၊ မီးသတ်စက်ယာဉ် ၁ စီး၊ စုစုပေါင်း ၄ စီးပါဝင်သော  မြို့နယ်မီးသတ်စခန်း ၁ စခန်းနှင့် လက်ထောက်မီးသတ်ဦးစီးမှူး ဦးစီးအင်အား ၉ ဦး၊ မီးငြှိမ်းသတ်ယာဉ် ၁ စီး၊ မီးသတ်ရေသယ်ယာဉ် ၁ စီး၊ စုစုပေါင်း မီးသတ်ယာဉ် ၂ စီး ပါဝင်သော နယ်မြေမီးသတ်စခန်းတို့ဖြင့် တာဝန်ချသွားရန် နိုင်ငံတော်မှ ခွင့်ပြုထားပြီးဖြစ်ပါကြောင်း၊ ရွှေတောင်မြို့နယ် မီးသတ်စခန်းတွင် မူလကမီးငြှိမ်းသတ်ယာဉ် ၁ စီးနှင့် မီးသတ်စက်ယာဉ် ၁ စီးရှိပြီး ၂၀၁၂-၁၃ ဘဏ္ဍာရေး နှစ်တွင် မီးသတ်ရေသယ်ယာဉ် ၁ စီး၊ ၂၀၁၃-၁၄ ဘဏ္ဍာရေးနှစ်တွင် မီးငြှိမ်းသတ်ယာဉ် ၁ စီး ထပ်မံ ထုတ်ပေးခဲ့သည့် အတွက် ယခုအချိန်တွင် မီးသတ်ယာဉ် ၄ စီးရှိသည့်အတွက် ဖွဲ့စည်းပုံသတ်ချက်နှင့် ကိုက်ညီလျက်ရှိပါကြောင်း၊ မီးသတ်ဦးစီးဌာနအနေဖြင့် မြို့နယ်အဆင့်/ခရိုင်အဆင့် မီးငြှိမ်းသတ်ရေးလုပ်ငန်းစဉ် ချမှတ်ထားပြီး နီးစပ်ရာမြို့နယ်များမှ ယာဉ်အုပ်စုစနစ်နှင့် စုဖွဲ့ပြီး မီးလောင်မှုများကို အဆင့်လိုက်ထွက်ခွာ ငြှိမ်းသတ်ရသည့်အတွက် ခရိုင်ရုံးစိုက်ရာ ပြည်မြို့မှ မီးသတ်ယာဉ်များ ရောက်ရှိမီးငြှိမ်းသတ်ခြင်းဖြစ်ပါကြောင်း၊ ရွှေတောင်မြို့၊ သရက်တော ရပ်ကွက်သည် မြို့ပေါ်ရပ်ကွက် တစ်ခုဖြစ်ပြီး ရွှေတောင်မြို့နယ် မီးသတ်တပ်ဖွဲ့စခန်းနှင့် ၁ ဖာလုံသာကွာဝေးသည့်အတွက် မီးလောင်မှုဖြစ်ပွားပါက မြို့နယ်မီးသတ်စခန်းရှိ မီးသတ် ယာဉ် ၄ စီးဖြင့် အချိန်တိုအတွင်း ရောက်ရှိငြှိမ်းသတ်နိုင်ပါကြောင်း၊ ပြည်ထဲရေးဝန်ကြီးဌာန၊ မီးသတ်ဦးစီးဌာနအနေဖြင့် မီးသတ်စခန်းနှင့် မီးသတ်ယာဉ်များ ဖြည့်တင်းရေးအတွက် ဦးစားပေးအဆင့် သတ်မှတ်ရာတွင် မြို့တော်၊ တိုင်းဒေသကြီး/ပြည်နယ်မြို့တော်၊ မြို့နယ်၊ မြို့၊ ရပ်ကွက်၊ ကျေးရွာအုပ်စု အစီအစဉ်အပြင် အိမ်ခြေနှင့် လူဦးရေထူထပ်မှု၊ အရန်မီးသတ်တပ်ဖွဲ့ဝင်အင်အား၊ နိုင်ငံပိုင်၊ ပုဂ္ဂလိကပိုင်၊ စက်ရုံ/ အလုပ်ရုံများ တည်ရှိမှု၊ ၁၀ နှစ်အတွင်း မီးလောင်မှုအကြိမ်အရေအတွက်၊ ဆုံးရှုံးမှုတန်ဖိုး၊ မီးသတ်ယာဉ် ဝင်/ထွက်နိုင်သော လမ်းများ စသည့်အချက်များအပေါ် မူတည်ပြီး ဦးစားပေးအဆင့် သတ်မှတ်ဆောင်ရွက်လျက်ရှိပါကြောင်း၊ သို့ဖြစ်ပါ၍ ပဲခူးတိုင်းဒေသကြီး၊ ရွှေတောင်မြို့၊ သရက်တောရပ်ကွက်သည် ရပ်ကွက်အဆင့်ဖြစ်သည့်အပြင် မြို့နယ်မီးသတ်စခန်းမှ အချိန်တိုအတွင်း သွားရောက်မီးငြှိမ်းသတ်နိုင်သည့်အတွက် လတ်တလောအခြေအနေတွင် မီးငြှိမ်းသတ်ယာဉ် ဖြည့်ဆည်းပေးရန် အစီအစဉ်မရှိသေးပါကြောင်း ရှင်းလင်းဖြေကြားပါသည်။