ပဲခူးတိုင်းဒေသကြီး၊ ကဝမြို့နယ်သည် မြို့နယ်ရုံးစိုက်ရာမြို့ဖြစ်ပြီး အားကစားအရာရှိများလည်းရှိပါကြောင်း၊ အားကစားနှင့်ပတ်သက်သည့် ကြက်တောင်၊ ဘောလုံး၊ လက်ဝှေ့၊ ဘော်လီဘော၊ ပိုက်ကျော်ခြင်း အစရှိသဖြင့် အားကစားများကို တစ်နှစ် လျှင် ၁၂ လ ရှိသည့်အနက် နွေကာလ(၄)လခန့်ဖြစ်သော ဇန်နဝါရီမှ ဧပြီလကုန်အထိသာ လယ်ကွင်းများတွင် ကစားရပါကြောင်း၊ ကျန်(၈)လခန့်မှာ မိုးများပြီးမြေမာမရှိသဖြင့် ကစား၍မရပါကြောင်း၊ သို့ပါ၍ ကဝမြို့နယ်အတွင်းရှိ လူဦးရေမှာ ၂၀၀၀၀၀ ကျော်ရှိပြီး အားကစားရုံတည်ဆောက်ရန်မြေကြီးမှာလည်း ၃.၉၁ ဧကရှိပါသဖြင့် အားကစားရုံတစ်ရုံနှင့် အားကစားကွင်း တစ်ကွင်း တည်ဆောက်ပေးပါရန်၊ ဆောင်ရွက်ပေးမည် ဆိုပါက မည်သည့်အချိန်တွင်ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။
ပဲခူးတိုင်းဒေသကြီး အစိုးရအဖွဲ့၏ဖြေကြားချက်မှာ ပဲခူးတိုင်းဒေသကြီးအတွင်းရှိ အားကစားကွင်း၊ အားကစားရုံများ အသစ်တည်ဆောက်ခြင်း၊ အဆင့်မြှင့်တင်ခြင်း၊ ပြုပြင်ခြင်း၊ ထိန်းသိမ်းခြင်း လုပ်ငန်းများ အတွက် တိုင်းဒေသကြီး၊ ခရိုင်၊ မြို့နယ် ဦးစားပေးအဆင့်အလိုက် ဆောင်ရွက်သွားရန် စီစဉ်သတ်မှတ်ထားပြီး တိုင်းဒေသကြီး အားကစားနှင့် ကာယပညာဦးစီးဌာနရုံး၏ ၂၅-၁၁-၂၀၁၃ ရက်စွဲပါစာအမှတ် (၃၈၈/ အခ ၁၂ ပခတ/၂၀၁၃)ဖြင့် သက်ဆိုင်ရာမြို့နယ်၊ ခရိုင်များအလိုက် အားကစားကွင်း၊ အားကစားရုံ တည်ဆောက်ခြင်း၊ အဆင့်မြှင့်တင်ခြင်း၊ ပြင်ဆင်ထိန်းသိမ်းခြင်းလုပ်ငန်းများဆောင်ရွက်လိုပါက လိုအပ်သော တွက်ချက်မှုပုံစံများ နှင့်အတူ သတ်မှတ်ဘဏ္ဍာရေးနှစ်အမီ တင်ပြသွားရန် ညွှန်ကြားထားပြီးဖြစ်၍ ကဝမြို့နယ်တွင် အားကစားရုံတစ်ရုံနှင့် အားကစားကွင်း တည်ဆောက်ပေးရန်အစီအစဉ်ရှိ/မရှိ မေးခွန်းနှင့်ပတ်သက်၍ သင့်တော်သောအဆင့် ရှိ မိုးလုံလေလုံအားကစားရုံ၊ တွက်ချက်မှုပုံစံ၊ (BQ) Size Plan များနှင့် ပြည့်စုံစွာတင်ပြလာပါက ၂၀၁၅-၁၆ ဘဏ္ဍာရေးနှစ် တိုင်းဒေသကြီး အားကစားနှင့် ကာယပညာဦးစီးဌာန ရန်ပုံငွေစာရင်းတွင် ထည့်သွင်းရေးဆွဲ ဆောင်ရွက်သွားမည်ဖြစ်ပါကြောင်း ရှင်းလင်းဖြေကြားပါသည်။