(င)-ဖလမ်းမြို့နယ်၊ ရမ်တလိုရွာ ကျေးလက်ကျန်းမာရေးဌာနခွဲအား ကျေးလက်ကျန်းမာရေးဌာန(Rural Health Center)အဖြစ် တိုးမြှင့်ဖွင့်လှစ်ပေးရန် အစီအစဉ်ရှိ/ မရှိနှင့် စပ်လျဉ်းသည့်မေးခွန်း

ချင်းပြည်နယ် ဖလမ်းမြို့နယ်ကို ကြည့်သည့်အခါ Station Health Unit တစ်ခုရှိပါကြောင်း၊ ကျေးလက်ကျန်းမာရေးဌာန (Rural Health Center) ကိုးခု၊ ကျေးလက်ကျန်းမာရေးဌာနခွဲ (Sub-Center) ၃၆ ခု၊ မိခင်နှင့် ကလေးကျန်းမာရေးဌာနတစ်ခု၊ ဝန်ထမ်းအင်အားအနေဖြင့် ပြည်သူ့ကျန်းမာရေးကိစ္စများတွင် ကျန်းမာရေးမှူးတစ်ဦး၊ လက်ထောက်ကျန်းမာရေးမှူး ငါးဦး၊ မြို့နယ်သူနာပြုအဆင်‌့တစ်ဦး၊ ကျန်းမာရေးကြီးကြပ် (၁) က နှစ်ဦး၊ ကျန်းမာရေးဆရာမ ငါးဦးနှင့် သားဖွားဆရာမ ၄၅ ဦး၊ ကျန်းမာရေးကြီးကြပ် (၂) က ၄၂ ဦး တို့ဖြင့် ငါးသောင်းကျော်သော ပြည်သူများအား ပြည်သူ့ကျန်းမာရေး စောင့်ရှောက်မှုလုပ်ငန်းများ ဆောင်ရွက်ပေးပါကြောင်း၊ ရမ်တလိုကျေးရွာကို မြေပုံတွင်ကြည့်သည့်အခါ ကျေးလက်ကျန်းမာရေးဌာနက ဆယ်ပီးကျေးလက် ကျန်းမာရေးဌာနနှင့်ဆိုလျှင် ၎င်း၏ မြောက်ဘက်တွင်ရှိလျှင် ၃၈ မိုင်ဝေးပြီး ကား၊ မော်တော်ဆိုင်ကယ် တို့ဖြင့် သွားနိုင်ပါကြောင်း၊ သို့သော်လည်း ခက်ခဲပါကြောင်း၊ ရမ်တလိုကျေးလက် ကျန်းမာရေးဌာန၏ နေရာကိုကြည့်သည့်အခါ ကျေးလက်ကျန်းမာရေးဌာန ပေးမည်ဆိုလျှင် ၎င်းအနောက်တွင် ကပ်နေသည့် ထန်တလန်နှင့် ဟားခါးဘက်နေ ပြည်သူများကိုလည်း ၎င်းကဝန်ဆောင်မှု ပေးနိုင်သည်ကိုလည်း တွေ့ရှိရပါကြောင်း၊ ရမ်တလိုသည် ဟားခါး-ဖလမ်း-ကလေး လမ်းမကြီးပေါ် တည်ရှိပြီး ဖလမ်းဆေးရုံနှင့် ၂၂ မိုင်ဝေးသည်ကို တွေ့ရှိရပါကြောင်း၊ မိမိတို့ကျေးလက် ကျန်းမာရေးဌာန ပေးသင့်/မပေးသင့် ဆိုသည့်အခါ မပေးသင့်သည့်အချက်က သုံးခုရှိနေသည်ကို တွေ့သော်ငြားလည်း လမ်းပန်းဆက်သွယ်ရေး အလွန်ခက်ခဲပါကြောင်း၊ ၂၀၁၈-၁၉ ခုနှစ်တွင် ပထမဦးစားပေးအဖြစ် ထည့်သွင်းပေးပါမည်။ ခွင့်ပြုမိန့်ရရှိရန်အတွက်ကို ၂၀၁၈-၁၉ ခုနှစ်တွင် အမျိုးသားကျန်းမာရေး စီမံကိန်းနှင့်ညှိနှိုင်းပြီး စီမံကိန်းနှင့်ဖွဲ့စည်းပုံစိစစ် ရေးအဖွဲ့နှင့် သော်လည်းကောင်း၊ ရသုံးမှန်းခြေဦးစီးများနှင့်လည်းကောင်း၊ ပြည်ထောင်စုအစိုးရရုံးနှင့် ပြည်ထောင်စုအစိုးရ အဖွဲ့အစည်းအဝေးကို တင်ပြပြီး ဆောင်ရွက်ပေးမည် ဖြစ်ပါကြောင်း ရှင်းလင်းဖြေကြားပါသည်။