(ဂ)-စက်မှုဝန်ကြီးဌာန လက်အောက်ရှိ လျှပ်စစ် စစ်ဆေးရေးဌာန(EI)နှင့်ပတ်သက်၍သိလိုသည်နှင့် စပ်လျဉ်းသည့် မေးခွန်း

စက်မှုဝန်ကြီးဌာန စက်မှုကြီးကြပ်ရေးနှင့် စစ်ဆေးရေးဦးစီးဌာနရှိ လျှပ်စစ်စစ်ဆေးရေး ဌာန EI အနေဖြင့် လျှပ်စစ်ဥပဒေ၊ လျှပ်စစ်ဥပဒေဆိုင်ရာ လုပ်ထုံး လုပ်နည်းများနှင့်အညီ ထုတ်လုပ်မှု၊ ဖြန့်ဖြူးမှုများကို စစ်ဆေးပေးပါရန် လျှောက်ထားလာခြင်း အားလုံးကို စစ်ဆေးဆောင်ရွက်ပေးလျက်ရှိပါကြောင်း၊ လျှပ်စစ် စစ်ဆေးရေးမှူးချုပ်သည် လျှပ်စစ် အန္တရာယ် မတော်တဆမှုဖြစ်ပွားကြောင်း လျှပ်စစ်စွမ်းအားဝန်ကြီးဌာနထံမှ တည်ဆဲ လျှပ်စစ်ဥပဒေပုဒ်မ ၁၅ အရ အကြောင်းကြားလာခဲ့လျှင်ဖြစ်စေ၊ စစ်ဆေးရေးမှူး တစ်ဦးဦးမှ အကြောင်းကြားလာလျှင်ဖြစ်စေ၊ အခြား တစ်နည်းနည်းဖြင့် သိရှိသော အခါဖြစ်စေ လျှပ်စစ်ဥပဒေပုဒ်မ ၁၉ ပုဒ်မခွဲ (စ) ပုဒ်မ ၂၀ တို့အရ လျှပ်စစ် စစ်ဆေးရေး ဝန်ထမ်းများအား အခင်းဖြစ်ပွားရာနေရာသို့ အမြန်ဆုံးသွားရောက်စေ၍ သက်ဆိုင်ရာ ပုဂ္ဂိုလ်များကိုစစ်ဆေးပြီး မတော်တဆဖြစ်ပွားမှုမှာ မည်သူ၌ တာဝန်ရှိသည်ကို စစ်ဆေး ဆုံးဖြတ်ပေးရပါကြောင်း၊ စစ်ဆေးပြီးနောက် အလားတူ မတော်တဆမှုများ ထပ်မံမဖြစ်ပွားစေရန် မည်ကဲ့ သို့ ဆောင် ရွက် သင့်ကြောင်းကို လျှပ်စစ်စွမ်းအားဝန်ကြီးဌာနသို့ လျှပ်စစ်ဥပဒေဆိုင်ရာလုပ်ထုံးလုပ်နည်းများ အပိုဒ် ၂၅၁ အပိုဒ်ခွဲ (ခ)အရ အကြံပြုပါကြောင်း၊ အဆိုပါ စစ်ဆေးအကြံပြုချက်များအပေါ် လျှပ်စစ်ဥပဒေ၊ လျှပ်စစ် ဥပဒေဆိုင်ရာ လုပ်ထုံးလုပ်နည်းများနဲ့အညီ လျော်ကြေးပေးခြင်းကိစ္စရပ်များ၊ မတော်တဆမှုတွင် တာဝန်ရှိသူများ ကို အရေးယူဆောင်ရွက်သည့် ကိစ္စရပ်များကို လျှပ်စစ်စွမ်းအား ဝန်ကြီးဌာနအနေဖြင့် ဆောင်ရွက်ပါကြောင်း။

လျှပ်စစ်စစ်ဆေးရေးဌာန EI အနေဖြင့် လျှပ်စစ်ဓာတ်အားထုတ်လုပ်ခြင်း လုပ်ငန်းများကို ဥပဒေအရ စစ်ဆေး ခံယူမည်ဖြစ်ကြောင်း အကြောင်းကြားလာမှသာ စစ်ဆေးပေးနိုင်မည်ဖြစ်ပြီး အကြောင်းကြားလာခြင်း မရှိသော လုပ်ငန်းများကို စစ်ဆေးပေးနိုင်ခြင်းမရှိပါကြောင်း၊ ထို့ကြောင့် အကြောင်းကြားလာသော လုပ်ငန်းများနှင့် အကြောင်းကြားလာခြင်းမရှိသော လုပ်ငန်းများကိုပါ လျှပ်စစ်စစ်ဆေး ရေးဌာန EI အနေဖြင့် အပြည့်အဝ စစ်ဆေးနိုင် ရန်အတွက် တိုင်းဒေသကြီးနှင့် ပြည်နယ်များတွင် လျှပ်စစ် စစ်ဆေးရေးခရိုင်ရုံးများကိုပါ တိုးချဲ့ဖွင့်လှစ်သွားရန် စီစဉ်ဆောင်ရွက်လျက်ရှိပါကြောင်း။

ထိုသို့စစ်ဆေးဆောင်ရွက်နိုင်ရန် လိုအပ်သော လျှပ်စစ်စစ်ဆေးရေးကိရိယာများကို နိုင်ငံတော်မှ ခွင့်ပြု ထားသော ငွေလုံးငွေရင်း အသုံးစရိတ်နှင့် လိုက်လျောညီထွေစွာ တိုင်းတာရေးကိရိယာများကို ပုံမှန်ဝယ် ယူဖြည့်တင်းလျက်ရှိပါကြောင်း၊ ပြည်သူ့လွှတ်တော် သယံဇာတနှင့် သဘာဝပတ်ဝန်းကျင်ထိန်း သိမ်းရေးဆိုင် ရာကော်မတီမှ ဦးဆောင်၍ စက်မှုဝန်ကြီးဌာနနှင့် လျှပ်စစ်စွမ်းအားဝန်ကြီးဌာနသို့ ပူးပေါင်းရေးဆွဲခဲ့သော ၂၀၁၃ ခုနှစ်၊ နိုဝင်ဘာလ ၁၉ ရက်နေ့ နိုင်ငံပိုင် သတင်းစာတွင် ဖော်ပြပါရှိပြီးဖြစ်သော လျှပ်စစ်ဥပဒေကြမ်းအရ လျှပ်စစ် စစ်ဆေးရေးဌာနအား ဦးစီးဌာနအနေဖြင့်ဖွဲ့စည်းရန် အစီအစဉ်မရှိ သေးသော်လည်း စက်မှုကြီးကြပ်ရေးနှင့် စစ်ဆေးရေးဦးစီးဌာနအား တိုင်းဒေသကြီးနှင့်ပြည်နယ်များ၌ ခရိုင်ရုံးများ တိုးချဲ့ဖွဲ့စည်းပြီးပါက လျှပ်စစ် စစ်ဆေးရေး ဌာနကိုပါ ထည့်သွင်း တိုးချဲ့နိုင်မည်ဖြစ်ပါကြောင်း၊ လျှပ်စစ်ထုတ်လုပ်မှု၊ ဖြန့်ဖြူးမှုများ အန္တရာယ် ကင်းရှင်းရေး၊ လျှပ်စစ်နှင့်ဆိုင်သော ကိရိယာများ၊ ဘေးကင်း လုံခြုံစံချိန်မီ ဟုတ်/မဟုတ် စစ်ဆေးနိုင်ရန် အတွက်လည်း ၁၉၈၄ ခုနှစ်က ပြဋ္ဌာန်းခဲ့သည့် လျှပ်စစ်ဥပဒေကို လျှပ်စစ်ဝန်ကြီးဌာနမှ ပြင်ဆင်ရေးဆွဲလျက်ရှိပါကြောင်း၊ နိုင်ငံတကာ စံချိန် စံညွှန်းများကို အခြေခံ၍ မိမိတို့နိုင်ငံ၏ အခြေအနေနှင့် ကိုက်ညီဆီလျော်သော လျှပ်စစ်နှင့် အီလက်ထရောနစ် ဆိုင်ရာ ဆိုင်ချိန်စံညွှန်းများ၊ စစ်ဆေးမှုနည်းစနစ်များ ပြဋ္ဌာန်းနိုင်ရေးအတွက် သက်ဆိုင်ရာဝန်ကြီးဌာနများနှင့် ညှိနှိုင်းဆောင်ရွက်လျက်ရှိပါကြောင်း။

လက်ရှိတွင် လျှပ်စစ်ဥပဒေ ၁၉၈၄ နှင့် လျှပ်စစ်ဥပဒေဆိုင်ရာ လုပ်ထုံးလုပ်နည်းများသည် တည်ရှိဆဲဖြစ်ပါ၍ လျှပ်စစ်လုပ်ငန်းများနှင့် လျှပ်စစ်အန္တရာယ် မကျရောက်စေရေးအတွက် သက်ဆိုင် ရာဌာန၊ အဖွဲ့အစည်းများ၊ လူပုဂ္ဂိုလ်တစ်ဦးချင်းပါ လျှပ်စစ်အန္တရာယ်ကင်းရှင်းစေရေး လိုက်နာကြရမည့် အသိရှိကြရန်နှင့် ကိုင်တွယ်သူ၊ သုံးစွဲသူများ၏ပေါ့ဆမှု၊ မသိနားမလည်မှုကြောင့် လျှပ်စစ်သွယ် တန်းမှုနှင့် လျှပ်စစ်ပစ္စည်းများ၏ ချို့ယွင်း အားနည်း ချက်များအား မှန်မှန်ကန်ကန်ဖော်ထုတ်သုံးသပ်၍ ပြုပြင်လိုက်နာရန်လိုအပ်ပါကြောင်း၊ ထို့ပြင် ဗို့အား Voltage မ တည်ငြိမ်မှုများအတွက် မှန်မှန်ကန်ကန် ပြန်လည်သုံးသပ်ပြုပြင်ရန် လိုအပ်မည်ဖြစ်ပါကြောင်း၊ သို့ဖြစ်ပါ ၍ နိုင်ငံတော်တစ်ဝန်းတွင် လျှပ်စစ်ဓာတ်အားထုတ်လုပ်ခြင်း၊ ဖြန့်ဖြူးခြင်း၊ အသုံးပြုခြင်းလုပ်ငန်းများ တိုးချဲ့မြှင့် တင် ဆောင်ရွက်လျက်ရှိသည်နှင့်အညီ စက်မှုဝန်ကြီးဌာနရှိ လျှပ်စစ်စစ်ဆေးရေးဌာနအနေဖြင့်လည်း လျှပ်စစ်အန္တ ရာယ်ကင်းရှင်းရေးကို တတ်စွမ်းသမျှ ကြိုးပမ်းဆောင်ရွက်လျက်ရှိပါကြောင်း ရှင်းလင်းဖြေကြား အပ်ပါသည်။