(င)-ဒေးဒရဲမြို့နယ်၊ နှစ်သီးစား လယ်များတွင် ၂၀၁၆ ခုနှစ် နှင့် ၂၀၁၇ ခုနှစ် နှစ်နှစ် ဆက်တိုက် မိုးစပါးစိုက် လယ်ဧကများ ပျက်စီးနေခြင်းကိစ္စ နှင့် စပ်လျဉ်းသည့် မေးခွန်း

ဒေးဒရဲမြို့နယ်သည် နှစ်စဉ်ပုံမှန်မိုးရွာပါက မိုးရေချိန် ၁၁၀ နှင့် ပျမ်းမျှမိုးရေချိန် ၁၀၉ လက်မရှိပါကြောင်း၊ ဇူလိုင်လနှင့်သြဂုတ်လတို့တွင် မိုးရွာသွန်းမှုများခြင်းနှင့် ထူးကဲသည့် ဒီရေတက်ခြင်း ဖြစ်ပေါ်လေ့ ရှိပါကြောင်း၊ ဒေးဒရဲမြို့နယ်တစ်မြို့နယ်လုံး နှစ်စဉ်နီးပါး မိုးစပါး ၁၇၄၀၀၀ ခန့်စိုက်ပျိုးပါကြောင်း၊ မြေပြင် အနေအထားအရ နှစ်စဉ်ရေကြီးနစ်မြုပ်ဖြစ်ပေါ်လေ့ရှိသည့် ရေကြီးကွင်းများရှိသည့်အနေအထားမှာ လွှတ်တော်ကိုယ်စားလှယ်ကြီး၏မေးခွန်းတွင်ပါရှိသည့် မိုးစပါးစိုက်ဧက ၂၄၈၇၀  ဧကသည် ရေကြီးကွင်းဧရိယာထဲတွင် ပါဝင်ပါကြောင်း၊

ပြီးခဲ့သည့် ၂၀၁၇ ခုနှစ်၊ မိုးစပါးစိုက်ပျိုးရာသီတွင် အဆိုပါရေကြီးကွင်းများသည် အထွက်နှုန်းထိခိုက်မှုများလည်း စိစစ်သိရှိရသည့်အတွက် အဆိုပါရေကြီးကွင်းများကို ရေဆွဲဆင်းသွားမှုမြန်ဆန်စေရန်နှင့် စပါးပင်သက်တမ်းနုစဉ်ကာလတွင် ရေကြီးနစ်မြုပ်မှုရှောင်လွှဲနိုင်စေရန်အတွက် ရေနုတ်မြောင်းတူးဖော်ခြင်းနှင့် စိုက်ချိန်ကာလစောစော စိုက်ပျိုးနိုင်စေရန်အတွက် မိမိတို့ဧရာဝတီတိုင်းဒေသကြီးအစိုးရအဖွဲ့နှင့် ပူးပေါင်းညှိနှိုင်းဆောင်ရွက်ပေးသွားမည် ဖြစ်ပါကြောင်း၊

သဘာဝဘေးကြောင့်ဖြစ်သော သီးနှံပျက်စီးမှုများအတွက် တောင်သူလယ်သမားအခွင့်အရေး ကာကွယ် ရေးနှင့် အကျိုးစီးပွားမြှင့်တင်ရေးဥပဒေအရ သီးနှံအစားထိုးပြန်လည် စိုက်ပျိုးခြင်းအတွက် ထောက်ပံ့ပေးနိုင်ရေးကို ဆောင်ရွက်ရာတွင် သက်ဆိုင်ရာပြည်နယ်/တိုင်းဒေသကြီးအစိုးရအဖွဲ့အနေဖြင့် မိမိတို့ဒေသအတွင်း  သဘာဝဘေးအန္တရာယ်ဖြစ်ပေါ်ပြီး ပျက်စီးသွားသော လုပ်ကွက်ငယ်ဧရိယာများကို ဦးစားပေးပြီး ဥပဒေအရ စိစစ်တင်ပြရမှုရှိပါကြောင်း၊ ယင်းတင်ပြရမှုကိုအခြေခံ၍ စိုက်ပျိုးရေး၊ မွေးမြူရေး နှင့် ဆည်မြောင်းဝန်ကြီးဌာန အနေဖြင့် ထောက်ပံ့ကြေးများရရှိနိုင်ရန် အရေးပေါ်ရန်ပုံငွေတင်ပြတောင်းခံပြီး ခွင့်ပြုရရှိမှုအပေါ်မူတည်ပြီး သက်ဆိုင်ရာတိုင်းဒေသကြီးအစိုးရအဖွဲ့၏ အစီအမံနှင့်ထောက်ပံ့မှုများ ဆောင်ရွက်ပေး လျက်ရှိပါကြောင်း၊

ထို့ကြောင့် ၂၀၁၇ ခုနှစ်၊ မိုးစပါးရာသီတွင် ဒေးဒရဲမြို့နယ်၏ မိုးစပါးပျက်စီးမှုကြောင့် တောင်သူလယ်သမားများနစ်နာမှုကို ထောက်ပံ့ပေးနိုင်ရေးနှင့်စပ်လျဉ်းပြီး ဧရာဝတီတိုင်းဒေသကြီး အစိုးရအဖွဲ့ကို ပြန်လည် စိစစ်ပေးနိုင်ရန် ညှိနှိုင်းဆောင်ရွက်ပေးသွားမည် ဖြစ်ပါကြောင်း၊ လက်ရှိအခြေအနေတွင် မူလတင်ပြထားသည့် သီးနှံပျက်စီးဆုံးရှုံးမှုအတွက် ထောက်ပံ့ပေးရမည့် စာရင်းအပေါ် သဘောထားပြန်ကြား ပေးနိုင်ရန်အတွက် တိုင်းဒေသကြီးအစိုးရအဖွဲ့ကို ညှိနှိုင်းစာပေးပို့ထားပြီးဖြစ်ပါကြောင်း၊

၂၀၁၆ ခုနှစ် မိုးစပါးရာသီတွင် ၄၈၉၇ ဧကသည် ရွှေခရုကျရောက်မှုရှိခဲ့သော်လည်း ကာကွယ်နှိမ်နင်းခြင်း လုပ်ငန်းများဆောင်ရွက်နိုင်ခဲ့သည့်အတွက် ပျက်စီးမှု ၄၆၈ ဧကရှိခဲ့ပါကြောင်း၊ အဆိုပါဧကများကိုလည်း အစားထိုး ပြန်လည်စိုက်ပျိုးနိုင်ခဲ့ပါကြောင်း၊ ၂၀၁၇ ခုနှစ် မိုးစပါးစိုက်ပျိုးရာသီတွင် ဧက ၁၀၅၀ သည် ရွှေခရုကျရောက်ခဲ့ပြီး ပျက်စီးမှုထက်ယင်းဧကများ အထွက်နှုန်းထိခိုက်သည်ကို စိစစ်သိရှိရပါကြောင်း၊ ယင်းနှင့်စပ်လျဉ်းပြီး တောင်သူလယ်သမားများအနေနှင့်သာမက ဒေသနေလူထုလှုပ်ရှားမှုအသွင်ဖြင့် ပါဝင်လာနိုင်စေရေးအတွက် ရွှေခရု၏သွင်ပြင်လက္ခဏာ၊ အလေ့အထ၊ ကာကွယ်နှိမ်နင်းနည်းလမ်းများကို အသိပညာပေးခြင်းနှင့် စည်းရုံးဆောင်ရွက်ခြင်းဖြင့် ရွှေခရုပြန့်ပွားမှုကို ထိန်းချုပ်ဆောင်ရွက်ပေးလျက် ရှိပါကြောင်း၊ ရွှေခရုကာကွယ်နှိမ်နင်းရေးအတွက် ရှေ့ဆောင်ရွက်မည့်လုပ်ငန်း အစီအစဉ်များအနေဖြင့် (က) ဒေသရေမြေနှင့်ကိုက်ညီသော ခရုကာကွယ်နှိမ်နင်းရေးလုပ်ငန်းများနှင့် ခရုအမျိုးအစားခွဲခြားခြင်း လုပ်ငန်းများကို မိမိတို့ဌာန၏ဦးဆောင်မှုနှင့် သုတေသနစမ်းသပ်ကွက်များပြုလုပ်ပြီး ရှာဖွေဖော်ထုတ်ခြင်း၊ (ခ) ခရုအကောင်ကြီး၊ ခရုဥမြုံများ ခိုအောင်းရာနှင့် ပေါက်ဖွားရာနေရာများကို စိစစ်ရှာဖွေဖော်ထုတ်ပြီး လူထုလှုပ်ရှားမှုအသွင်ဖြင့် ဖျက်ဆီးနှိမ်နင်းခြင်း၊ ဒေသအလိုက် ကာကွယ်ရေးလုပ်ငန်းများတွင် တောင်သူများသာမက ပြည်သူတစ်ရပ်လုံး Mess Participation ဖြစ်နိုင်ရန်အတွက် ဦးတည်ပြီး ပညာပေးလုပ်ငန်းများကို ပျံ့ပျံ့နှံ့နှံ့တိုးချဲ့ဆောင်ရွက်ခြင်းလုပ်ငန်းများကိုလည်း အစီအမံချပြီး ဆောင်ရွက်ပေးသွားမည် ဖြစ်ပါကြောင်း၊

ယခုကဲ့သို့ကိစ္စရပ်များတွင် ဆေးမြီးတိုနှင့်ကုသရသည့် ကုထုံးအရဆောင်ရွက်နိုင်ခြင်း မရှိသည့်အတွက်ရေရှည်ကို မျှော်ကိုးပြီး နှစ်စဉ်ဖြစ်ပေါ်နေသော ရေကြီးကွင်းများတွင် ထိခိုက်ပျက်စီးမှုကို ကာကွယ်နိုင်ရေးအတွက် ရေနုတ်မြောင်းများဖောက်လုပ်ရန်၊ စောစောစိုက်ပျိုးနိုင်ရေးအတွက် တိုင်းဒေသကြီးအစိုးရအဖွဲ့များ၏ စိစစ်တင်ပြချက်နှင့်အတူ မိုးစပါးစိုက်ပျိုးရာသီတွင် ဒေးဒရဲမြို့နယ်၊ စပါးပျက်စီးမှုအပေါ် ထိုက်သင့်သောအထောက်အပံ့များပေးပြီး ရေရှည်ကိုမျှော်ကိုးကာ အစီအမံများချမှတ်ဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။