(ဂ)-၁၉၇၄ခုနှစ်၊ဝင်ငွေခွန်ဥပဒေပုဒ်မ-၄၃၌ ပြဋ္ဌာန်း ချက်သည် ဖွဲ့စည်းပုံ အခြေခံဥပဒေပါပြဋ္ဌာန်း ချက်များနှင့် ညီညွတ်ခြင်းရှိ/မရှိ နှင့်စပ်လျဉ်း သည့် မေးခွန်း

ဘဏ္ဍာရေးဝန်ကြီးဌာန၊ ပြည်တွင်းအခွန်များဦးစီးဌာနတွင် လက်ရှိကျင့်သုံးနေသော ၁၉၇၄ ခုနှစ် ဝင်ငွေခွန် ဥပဒေပုဒ်မ ၄၃ ပါ ပြဋ္ဌာန်းချက်မှာ ဝင်ငွေခွန်ဥပဒေအရ အခွန်ဆိုင်ရာစီမံဆောင်ရွက်မှု လုပ်ငန်းများကို ဆောင်ရွက်ရသော အခွန်အရာရှိများနှင့် ပုဒ်မ ၇ အရ ဖွဲ့စည်းတာဝန်ပေးအပ်ခြင်း ခံရသော ပုဂ္ဂိုလ်များအား လုပ်ပိုင်ခွင့်များ အပ်နှင်းသော ပြဋ္ဌာန်းချက်ဖြစ်ပါကြောင်း။

အခွန်အရာရှိများအနေနဲ့ ဝင်ငွေခွန်ဥပဒေပုဒ်မ ၄၃ ပါ တရားမကျင့်ထုံးဥပဒေအရ တရားရုံး သို့အပ်နှင်းထားသော လုပ်ပိုင်ခွင့်များကို ရရှိမှသာလျှင် အခွန်ဆိုင်ရာ စီမံခန့်ခွဲမှု လုပ်ငန်းများကို ဆောင် ရွက်နိုင်မည်ဖြစ်၍ လုပ်ပိုင်ခွင့် ပေးထားသော်လည်း ယင်းပုဂ္ဂိုလ် သို့မဟုတ် အဖွဲ့များကို လုပ်ငန်းဆိုင် ရာတရားရုံးအဖြစ် မှတ်ယူရမည်ဖြစ်ရာ ယင်းတို့၏ လုပ်ငန်းဆောင်ရွက်ချက်မှာ တရားရေး သဘော ဆောင်သည့် ဆောင်ရွက်ချက် များ ဖြစ်ပါကြောင်း၊ ဝင်ငွေခွန်ဥပဒေပုဒ်မ ၄၃ ပါ လုပ်ငန်းဆိုင်ရာတရားရုံး ဖြစ်သည်ဟု မှတ်ယူရမည် ဆိုသည့် စကားရပ်အရ ယင်းပုဂ္ဂိုလ် သို့မဟုတ် အဖွဲ့၏လုပ်ပိုင်ခွင့်နှင့် စပ်လျဉ်း၍သာ တရားရုံးဖြစ်သည်ဟု မှတ်ယူရမည့် သဘောဖြစ်ပါ ကြောင်း။

ဖွဲ့စည်းပုံအခြေခံဥပဒေ ပုဒ်မ ၂၉၃ တွင် တရားရုံးများဖြစ်ကြောင်း ဖော်ပြထားသော ပြည်ထောင်စု တရား လွှတ်တော်ချုပ် အပါအဝင် အဆင့်ဆင့်သော တရားရုံးများ၊ စစ်ဘက်ဆိုင်ရာတရား ရုံးများနှင့် ဖွဲ့စည်းပုံ အခြေခံဥပဒေဆိုင်ရာ ခုံရုံးတို့နှင့် သဘောသဘာဝမတူပဲ တရားရေးသဘော ဆောင်သောလုပ်ပိုင်ခွင့်( Quasi-Judicial Power) အပ်နှင်းဆောင်ရွက်ခြင်းဖြစ်ပါသဖြင့် ဝင်ငွေခွန် ဥပဒေပုဒ်မ ၄၃ ပါ ပြဋ္ဌာန်းချက်ဟာ ဖွဲ့စည်းပုံ အခြေခံ ဥပဒေပါ ပြဋ္ဌာန်းချက်နှင့် ဆန့်ကျင်ခြင်းမရှိပါကြောင်း။

သို့ပါ၍ ဝင်ငွေခွန်ဥပဒေမှာ လက်ရှိတည်ဆဲဥပဒေတစ်ရပ်ဖြစ်သည့်အပြင် ယင်းဥပဒေပုဒ်မ ၄၃ ပါပြဋ္ဌာန်းချက် များမှာလည်း ဖွဲ့စည်းပုံအခြေခံဥပဒေပါ ပြဋ္ဌာန်းချက်များကို ဆန့်ကျင်ခြင်းမရှိသည့် အတွက် ဝင်ငွေခွန်ဥပဒေပုဒ်မ ၄၃ ပါ ပြဋ္ဌာန်းချက်များကို ပြင်ဆင်ရန် အစီအစဉ်မရှိသေးပါကြောင်း ရှင်းလင်းဖြေကြား ပါသည်။

ဖြေကြားချက်နှင့်စပ်လျဉ်း၍ ဒဂုံမြို့သစ်မြောက်ပိုင်းမဲဆန္ဒနယ်မှ ဒေါ်တင်နွယ်ဦးက ထပ်ဆင့်မေးခွန်းမေးမြန်းရာ ဒုတိယဝန်ကြီး ဆန့်ကျင်ခြင်းမရှိကြောင်း ဖြေကြားခဲ့ရာ ဝင်ငွေခွန်ဥပဒေပါ ပြဋ္ဌာန်းချက်နှင့် ၂၀၀၈ ခုနှစ် ဖွဲ့စည်းပုံ အခြေခံဥပဒေတို့မှာ လုံးဝသဟဇာတမဖြစ်ဘဲ ဆန့်ကျင်နေပါကြောင်း။ အဘယ်ကြောင့်ဆိုသော် ဒီဥပဒေတွင် ၂၀၀၈ ခုနှစ်အခြေခံဥပဒေ ပေါ်ပေါက်ချိန်မှ စတင်အတည်ဖြစ်ခြင်း ပါကြောင်း၊ အခွန်စည်းကြပ်သော အရာရှိမှာ အယူခံရုံးကိုလည်းတာဝန်ယူသည့်အပြင် ပြီးခဲ့သည့်ကိစ္စကိုလည်း တာဝန်ယူ ကိုင်တွယ်သည့် အတွက် နှစ်ခုစလုံးကို တစ်ယောက်တည်းကိုင်တာက လုံးဝဆန့်ကျင်မှုဖြစ်ပါကြောင်း။ ထို့အပြင် ဥပဒေကိုးကား ရမည် ဆိုပါက ၁၉၇၄ ခုနှစ် ပြည်ထောင်စု ဆိုရှယ်လစ်သမ္မတမြန်မာနိုင်ငံတော် ဖွဲ့စည်းပုံ အခြေခံဥပဒေ ပုဒ်မ ၁၀၀ မှာ လုပ်ငန်းဆိုင်ရာ တရားစီရင်ရေးအဖွဲ့များကို ဥပဒေနှင့် အညီ ဖွဲ့စည်းနိုင်သည်ဟု ဖော်ပြပါရှိရာ ဝင်ငွေခွန် ဥပဒေတွင် ပါဝင်သောအဖွဲ့များ ဝင်ငွေခွန်ဆိုင်ရာအရာရှိများက လုပ်ငန်း တွေဆောင်ရွက်ရာတွင် လုပ်ငန်းဆိုင်ရာ တရားစီရင်ရေးအဖွဲ့များဖြစ်သည်ဟု မှတ်ယူရမည်ဖြစ်ကြောင်း၊ ပုဒ်မ ၄၃ တွင် ပြဋ္ဌာန်းထားခြင်းမှာ ထိုစဉ်က တည်ရှိခဲ့သော ဖွဲ့စည်းပုံအခြေခံဥပဒေနှင့် ညီညွတ်ခဲ့ပါကြောင်း၊ သို့သော်လည်း ၂၀၀၈ ခုနှစ် ပြည်ထောင်စု သမ္မတမြန်မာနိုင်ငံတော် ဖွဲ့စည်းပုံအခြေခံဥပဒေကို အတည်ပြု ပြဋ္ဌာန်းပြီးသည့် အချိန်ကာလတွင် တည်ဆဲ ဝင်ငွေခွန်ဥပဒေပုဒ်မ ၄၃ တွင် ပြဋ္ဌာန်းထားသော ဤဥပဒေပါ လုပ်ပိုင်ခွင့်များကို ကျင့်သုံးဆောင်ရွက်ရာတွင် တရားမကျင့်ထုံးဥပဒေအရ တရားရုံးသို့ အပ်နှင်းထား သော လုပ်ပိုင်ခွင့်များကို ရရှိစေရမည်ဟုလည်းကောင်း ယင်းပုဂ္ဂိုလ် သို့မဟုတ် အဖွဲ့များအား လုပ်ငန်း ဆိုင်ရာ တရားရုံးဖြစ်သည်ဟု မှတ်ယူရမည်ဟု လည်းကောင်း ပြဋ္ဌာန်းတည်ရှိနေသည့်အတွက် တည်ဆဲ အခြေခံဥပဒေနှင့် လုံးဝညီညွတ်ခြင်းမရှိကြောင်း တင်ပြပါ သည်။

ထပ်ဆင့်မေးမြန်းမှုနှင့်စပ်လျဉ်း၍ ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါက်တာလင်းအောင် က ပြန်လည်ရှင်း လင်းဖြေကြားရာတွင် ဝင်ငွေခွန်ဥပဒေပုဒ်မ ၄၃ တွင် ပြဋ္ဌာန်းချက်မှာ ဖွဲ့စည်းပုံအခြေခံ ဥပဒေပြဋ္ဌာန်းချက်နှင့် ဆန့်ကျင်နေသည်ဟု ယူဆပါက မိမိတို့ ဘဏ္ဍာရေး ဝန်ကြီးဌာနအနေနှင့် ပြည်ထောင်စုလွှတ်တော်ကို စတင်ကျင်းသော ပထမနေ့မှာပင် ဥပဒေလေးခုပြင်ဆင်ရန် တင်ပြထားရှိပါကြောင်း၊ ယင်းဥပဒေလေးခုပြင် ဆင်နိုင်ရန် အတွက် လွှတ်တော် ကော်မတီများအနေဖြင့် ပြည်တွင်းအခွန်မှ ပညာရှင်များ၊ ရှေ့နေချုပ်က ဥပဒေ ပညာရှင်များ လာရောက်ပြီး အကျေအလည်ဆွေးနွေးပြီး ကိုယ်စားလှယ်တော်ကြီး အနေဖြင့်လည်း ပါဝင်ဆွေးနွေးနိုင်ပါကြောင်း၊ ဥပဒေရေးရာကိစ္စလည်းဖြစ်သည့်အပြင် ဥပဒေပညာရှင်များလည်း ပါသည့် အတွက် ဆွေးနွေးပွဲတွင်ဝင်ရောက် ဆွေးနွေးမည်ဆိုပါက ပိုမို သင့်တော်ကြောင်း တင်ပြပါ သည်။

ပြည်သူ့လွှတ်တော် ဥက္ကဋ္ဌကြီးမှလည်း ရှင်းလင်းချက်များနှင့်စပ်လျဉ်း၍ လုံလောက်မှု မရှိပါက ဒေါ်တင်နွယ်ဦး အနေဖြင့် လွှတ်တော်တွင် ဖွဲ့စည်းထားသော ဥပဒေရေးရာနှင့် အထူး ကိစ္စရပ်များ လေ့လာ ဆန်းစစ်သုံးသပ်ရေး ကော်မရှင်မှတစ်ဆင့် ပြည်သူ့လွှတ်တော်ဥက္ကဋ္ဌထံတင်ပြပြီး လိုအပ် သည်များ ဆက်လက် ဆောင်ရွက်သွားနိုင်ပါကြောင်း ပြောကြားပါသည်။