ရှမ်းပြည် (မြောက်ပိုင်း) လားရှိုးခရိုင်၊ မိုင်းရယ်မြို့နယ်အတွင်း အခြေခံပညာကျောင်းပေါင်း ၆၀ ကျောင်းရှိသည့်အနက် အထက်တန်းကျောင်းတစ်ကျောင်း၊ အလယ်တန်းကျောင်းနှစ်ကျောင်း၊ မူလတန်းကျောင်း စုစုပေါင်း ၁၉ ကျောင်းတို့တွင် ၂၀၁၇ ခုနှစ် ဇူလိုင်လကစပြီး ကျောင်းအုပ်များ လစ်လပ်လျက် ရှိသည်ကိုတွေ့ရှိပါကြောင်း၊ ပညာရေးကဏ္ဍကို အဆင့်မြှင့်တင်နိုင်ရန် ပြောင်းလဲသည့် ခေတ်စနစ်နှင့်အညီ တစ်နိုင်ငံလုံးအတိုင်းအတာဖြင့် အချိုးမျှတစွာ ဖွံ့ဖြိုးတိုးတက်ရေးအတွက် ဆောင်ရွက်ရာတွင် ဝေးလံခေါင်သီပြီး ဖွံ့ဖြိုးမှုနောက်ကျလျက်ရှိသည့် မြို့နယ်များ၏ ပညာရေး တိုးတက်မြင့်မားရေး၊ ၁၀ တန်းအောင်ချက်မြင့်မားရေးတို့ကို ဦးစိုက်ဆောင်ရွက်ရန် လိုအပ်လျက် ရှိပါကြောင်း၊ ၎င်းအခြေအနေတွင် အခြေခံပညာကျောင်းအချို့ ကျောင်းအုပ်များ ကာလတာရှည် လစ်လပ်နေခြင်းမှာ မဖြစ်သင့်ပါကြောင်း၊ မိုင်းရယ်မြို့ပေါ်တွင် အထက်တန်းကျောင်း တစ်ကျောင်းတည်းရှိပြီး ကျောင်းအုပ်လစ်လပ်နေပြီး တာဝန်ခံကျောင်းအုပ်နှင့် ယာယီကျောင်း အုပ်ချုပ်မှုတာဝန်ကို ယူထားရသော်လည်း လစ်ဟာမှုလိုအပ်ချက်များ၊ အခက်အခဲများနှင့် ကြုံတွေ့နေရပါကြောင်း၊ ယနေ့ထိ ၁၀ တန်းစာမေးပွဲများဖြေဆိုရန် အချိန်နီးကပ်လာသည်အထိ ကျောင်းအုပ် မရရှိသေးပါကြောင်း၊ ၁၀ တန်းစာမေးပွဲဖြေဆိုကြမည့် ဒေသခံကျောင်းသား/သူ များအတွက် စိတ်ပူမိပါကြောင်း၊ ဒေသခံပြည်သူများ၊ ကျောင်းသားမိဘများ၊ ဆရာ/မများ၊ မြို့နယ်အုပ်ချုပ်ရေးမှူးနှင့် မြို့နယ်ဌာနဆိုင်ရာ တာဝန်ရှိသူများက ပညာရေးဌာန ကျောင်းအုပ်များ ကာလတာရှည်လစ်လပ် နေခြင်းကို အမြန်ဆုံးခန့်ထားပေးနိုင်ရန် တင်ပြလျက်ရှိသော်လည်း ယနေ့တိုင် ဖြည့်ဆည်းခန့်ထားပေးခြင်း မရှိသေးပါကြောင်း၊
ရှမ်းပြည်နယ် (မြောက်ပိုင်း)၊ လားရှိုးခရိုင်၊ မိုင်းရယ်မြို့နယ်ရှိ အခြေခံပညာကျောင်း (၁၉) ကျောင်းတွင် ပညာသင်နှစ် တစ်နှစ်နီးပါးခန့် ကျောင်းအုပ်များ လစ်လပ်နေသည်ကို ပညာရေးဝန်ကြီးဌာနက သိရှိခြင်းရှိ/မရှိ၊ ကျောင်းအုပ်များ အမြန်ဆုံးအစားထိုး ခန့်ထားပေးရန် စီစဉ်ဆောင်ရွက်ခြင်း မရှိသည်ကို သိရသည့်အပြင် မိုင်းရယ်မြို့နယ်အတွင်း အထက်တန်းကျောင်းတစ်ကျောင်း၊ အလယ်တန်းကျောင်းနှစ်ကျောင်း၊ မူလတန်းကျောင်း ၁၆ ကျောင်းမှကျောင်းအုပ်များ တစ်နှစ်နီးပါးခန့် လစ်လပ်လျက် ရှိနေခြင်းသည် ပညာရည်တိုးတက်မြင့်မားရေးနှင့် အောင်ချက်မြင့်မားရေးကိုများစွာ ထိခိုက်စေသည့်အတွက် လစ်လပ်လျက်ရှိသော ကျောင်းအုပ်နေရာများအား ပညာသင်နှစ်မကုန်ဆုံးမီ အမြန်ဆုံးခန့်ထားပေးနိုင်ရေး မည်ကဲ့သို့စီစဉ်ဆောင်ရွက် ထားရှိသည်ကို သိရှိလိုပါကြောင်း မေးမြန်းပါသည်။
ရှမ်းပြည်နယ် (မြောက်ပိုင်း) လားရှိုးခရိုင်၊ မိုင်းရယ်မြို့တွင် ယခု ၂၀၁၇-၁၈ ပညာသင်နှစ်အထိ အခြေခံပညာကျောင်းပေါင်း ၉၂ ကျောင်းရှိပါကြောင်း၊ ၎င်းတို့အနက်မှ အခြေခံပညာကျောင်းပေါင်း (၁၉) ကျောင်း ကျောင်းအုပ်များ လစ်လပ်လျက်ရှိသည်ကို စိစစ်တွေ့ရှိရပါကြောင်း၊ လက်ရှိအခြေအနေ အရ ကျောင်းအုပ်လစ်လပ်လျက်ရှိသော အခြေခံပညာကျောင်းများတွင် တာဝန်ခံကျောင်းအုပ်များကို တာဝန်ပေးထားပြီး သင်ကြားသင်ယူမှုကိစ္စများကို အရှိန်မပျက်စီမံ ဆောင်ရွက်လျက် ရှိသည့်အပြင် မြို့နယ်ပညာရေးမှူး၏ စီမံချက်ဖြင့် အောင်ချက်မြင့်မားရေး မိုင်းရယ်မြို့နယ်အတွင်းရှိ အထက်တန်းပြ ဆရာ/မများ၏ သင်ကြားမှုအရည်အသွေး မြင့်မားလာစေရန် လားရှိုးတက္ကသိုလ်တွင် ဆရာ/မများက သင်ခန်းစာပို့ချမှုများကို တက်ရောက်လေ့လာစေခြင်း၊ ကျောင်းသား/သူများအား ညနေကျောင်းဆင်း ချိန်တွင် အချိန်ပိုခေါ်ယူ သင်ကြားပေးခြင်း၊ ကျောင်းသားမိဘနှင့် တွေ့ဆုံညှိနှိုင်း၍ ပူးပေါင်းဆောင် ရွက်ခြင်းများ ဆောင်ရွက်လျက်ရှိပါကြောင်း၊
ပညာရေးဝန်ကြီးဌာန၊ အခြေခံပညာဦးစီးဌာနအနေဖြင့် ၃-၈-၂၀၁၇ ရက်နေ့တွင် ရာထူးတိုးမြှင့် ခန့်ထားခြင်း၊ ပြောင်းရွှေ့ခန့်ထားခြင်းများကို ဆောင်ရွက်ခဲ့ရာ မိုင်းရယ်မြို့နယ်အတွင်း မူလတန်းပြ ၁၁ ဦး၊ အလယ်တန်းပြ ၄ ဦး၊ အထက်တန်းပြ ၂၃ ဦး၊ မူလတန်းပြ ၇၄ ဦး စုစုပေါင်း ၁၁၂ ဦး ဖြည့်ဆည်း ဆောင်ရွက်ပြီးစီးပါကြောင်း၊ ထို့အပြင် ဆောင်ရွက်ရန်ရှိသည့် အခြေခံပညာ အထက်တန်းကျောင်း ကျောင်းအုပ်ကြီး နေရာများကိုလည်း တစ်ပြည်လုံးအတိုင်းအတာဖြင့် ဖြည့်ဆည်းဆောင်ရွက်ပေးရန် စီစဉ်လျက်ရှိပါကြောင်း၊
အလယ်တန်းကျောင်းအုပ်နေရာများတွင် ဖြည့်ဆည်းခန့်ထားရန်အတွက် ယခုပြီးခဲ့သည့် ၂၇-၁-၂၀၁၈ ရက်နေ့တွင် သက်ဆိုင်ရာတိုင်းဒေသကြီး/ပြည်နယ်အလိုက် လုပ်ထုံးလုပ်နည်းနှင့်အညီ ရေးဖြေ စာမေးပွဲများကျင်းပခြင်း၊ လူတွေ့စစ်ဆေးခြင်းများ ဆောင်ရွက်ခြင်း၊ ရွေးချယ်နေရာချ ထားခြင်းများကို လုပ်ထုံးလုပ်နည်းနှင့်အညီ ဆက်လက်ဆောင်ရွက်လျက် ရှိပါကြောင်း၊ အထက်တန်းပြနှင့်အောက် ရာထူးများကိုလည်း ၂၀၁၈-၁၉ ပညာသင်နှစ်အတွက် ရာထူးတိုးအပြောင်း အရွှေ့များဆောင်ရွက် ချိန်တွင် ပြည်နယ်အစိုးရအဖွဲ့နှင့် ပြည်နယ်ပညာရေးမှူးတို့၏ ကြီးကြပ်မှုဖြင့် ဆန္ဒပြုလျှောက်ထား လာမှုများမှ စိစစ်ဖြည့်ဆည်း ဆောင်ရွက်မည် ဖြစ်ပါကြောင်း ရှင်းလင်းဖြေကြားပါသည်။