ကျွန်းစုမြို့သည် ၁၉၈၂ ခုနှစ်တွင် ယခင် မြိတ်အနောက်မြို့နယ်အနေဖြင့် စတင်တည်ထောင်ခဲ့ပြီး ကမ်းကြီးကျေးရွာနှင့် ကျွန်းစုမြို့နယ်ကို ရေကြောင်းခရီး လမ်းဖြင့်သာ သွားလာခဲ့ရပါကြောင်း၊ ရေလမ်းခရီးသည်လည်း သွားလာရေး ခက်ခဲသည့် အတွက်ကြောင့် ကမ်းကြီးကျေးရွာမှ ကျွန်းစုမြို့ပေါ်သို့ အချိန်မရွေး သွားလာနိုင်ရန်အတွက်ကို ကိုယ်ထူကိုယ်ထစနစ်ဖြင့် လမ်းတစ်လမ်းဖောက် လုပ်ခဲ့ရာ ၁၉၉၃ ခုနှစ်တွင် ပြီးစီးခဲ့ပါကြောင်း၊ ရွာသူရွာသားများသည် ကျွန်းစုမြို့ပေါ်သို့ ခြေလျင်ဖြစ်စေ၊ ဆိုင်ကယ်နှင့်ဖြစ်စေ အရေးပေါ်ကိစ္စများတွင် အချိန်မရွေး လွယ်ကူစွာသွားလာနိုင်သည့်အတွက် စိတ်ချမ်းသာခဲ့ရ သော်လည်း ၁၉၉၀ ခုနှစ်မှပင် တနင်္သာရီတိုင်းဒေသကြီး ရေတပ်ဌာနချုပ်က တပ်စခန်းဆောက်လုပ်ရာ အဆိုပါ လမ်းသည် လည်း တပ်ပိုင်ဧရိယာထဲသို့ ပါသွားခဲ့ပါကြောင်း၊ ထို့ကြောင့် ကျေးရွာသူရွာသားများက သာမန်အချိန်များတွင် ၎င်းလမ်းကို ဖြတ်သန်းသွားလာခွင့်ရခဲ့ကြသော်လည်း ကျေးရွာများတွင် အရေးပေါ်ကိစ္စကြုံသည့်အချိန်နှင့် VIP လမ်းကြောင်းများ တိုက်ဆိုင်နေသည့်အချိန်မျိုးတွင် ၎င်းလမ်းကို ပိတ်ဆို့ထားခြင်းတို့ကြောင့် သွားလာရေး အခက်အခဲများ ကြုံတွေ့ရပါကြောင်း၊ ထိုကြောင့် ကမ်းကြီးကျေးရွာသားများအနေဖြင့် ကျွန်းစုမြို့ပေါ်သို့ လွတ်လပ်စွာသွားလာနိုင်ရန် သီးခြားလမ်းတစ်လမ်းကို ဖောက်လုပ်ပေးစေလိုသည့်အတွက် ကျွန်းစုမြို့နယ် ကမ်းကြီးကျေးရွာကို ကုန်းလမ်းခရီးဖြင့် ဆက်သွယ်သွားလာနိုင်မည့် သီးခြား လမ်းတစ်လမ်းကို ဖောက်လုပ်ပေးရန် အစီအစဉ်ရှိ/မရှိနှင့် ရှိပါက မည်သည့်အချိန်တွင် ဖောက်လုပ်ပေးမည် ဆိုသည်ကို သိရှိလို ပါကြောင်း မေးမြန်းပါသည်။
ကျွန်းစုမြို့နယ် ကမ်းကြီးကျေးရွာသည် အိမ်ခြေ ၂၀၆ အိမ်၊ လူဦးရေ ၁၁၀၅ ဦး နေထိုင်လျက် ကျွန်းစုမြို့နှင့် ကမ်းကြီးကျေးရွာ ဆက်သွယ်သောလမ်းမှာ ၅ မိုင် ၁ ဖာလုံရှိပြီး အဆိုပါလမ်း၏ လက်ရှိအခြေနေမှာ ကတ္တရာလမ်း ဖြစ်ပါကြောင်း၊ ကမ်းကြီးကျေးရွာမှ ရွာသူရွာသားများသည် တနင်္သာရီရေတပ်စခန်းဌာနချုပ်ပိုင် ဧရိယာအတွင်းရှိ ကျွန်းစု-ကမ်းကြီး ၁၂ ပေအကျယ် ကတ္တရာလမ်းမှ ကျွန်းစုမြို့သို့ ရာသီမရွေးသွားလာနေကြပါကြောင်း၊ ကျွန်းစုမြို့သို့ လမ်းအသစ် ဖောက်လုပ်ရန် အတွက် လမ်းကြောင်းအနေအထား အား မြေပုံအထောက်အထားများအရ တနင်္သာရီရေတပ်စခန်းဌာနချုပ် တပ်ပိုင် ဧရိယာအတွင်း ကမ်းခြေတစ်လျှောက် မှ ဖြတ်သန်းဖောက်လုပ်ရမည်ဖြစ်ပြီး တစ်ခြားရွေးချယ်ရန် လမ်းကြောင်းလည်း မရှိသည့်အပြင် အဆိုပါလမ်းအား ဖောက်လုပ်မည်ဆိုပါက အမှတ်(၁) ရပ်ကွက်ကမ်းခြေမှ ကမ်းကြီးကျေးရွာ ကမ်းခြေအထိ အရှည် ၈ မိုင်ခန့်ရှိ မည်ဖြစ်ကြောင်း၊ ကျွန်းစုမြို့မှ ကျွန်းစု-ကမ်းကြီးကျေးရွာ လမ်းဟောင်းရှိပြီး ဖြစ်သည့်အပြင် လမ်းအသစ် ဖောက်လုပ်ရာတွင်လည်း တပ်ပိုင်မြေအတွင်းမှသာ ဖောက်လုပ်ရမည်ဖြစ်သောကြောင့် လမ်းအသစ် ထပ်မံဖောက်လုပ်ရန် မသင့်ပါကြောင်းနှင့် ဖောက်လုပ်ရန်အစီအစဉ်မရှိပါကြောင်း ပြန်လည်ဖြေကြားပါသည်။