မိုင်းပြင်းမြို့နယ်သည် ရှမ်းပြည်နယ်အရှေ့ပိုင်း မိုင်းဆတ်ခရိုင်အတွင်း၌ တည်ရှိ ပြီး တောင်ကုန်းတောင်တန်း ထူထပ်များပြားသောမြို့ ငယ်ဖြစ် ကာ တောင်ကြီး၊ ကျိုင်းတုံ၊ တာချီလိတ်မြို့သို့ သွားရာ ပြည်ထောင်စုလမ်းမကြီးနှင့် မိုင်းပြင်း-မိုင်းဆတ်၊ မိုင်းပြင်း-မက်မန်းသို့သွားရာ နွေရာသီသုံးကားလမ်းများဖြင့် ဖြတ်သန်း အသုံးပြုကြရပါကြောင်း၊ ရပ်ကွက်နှင့် ကျေးရွာအုပ်စုအနည်းငယ်၌သာ မြေပြန့် လွင်ပြင်များတည်ရှိပြီး ကျန်သောမြို့နယ်ဧရိယာ၏ ၇၅ ရာခိုင်နှုန်းကျော် သည် တောင်ပေါ်ဒေသ ကားလမ်းမပေါက်သေးသော အရပ်များဖြစ်ကြ၍ ကုန်ပစ္စည်းများသယ်ယူရန်နှင့် သွားလာအသုံးပြုရန် အတွက် လား၊ မြင်း၊ ဆိုင်ကယ်များဖြင့် ထမ်းပိုးသယ်ယူရခြင်းကြောင့် ခက်ခဲပင်ပန်းစွာ သွားလာကြရ သည့်အပြင် ကုန်ပစ္စည်းကို ဈေးနှုန်းခေါက်ချိုးမျှ မြင့်မားစွာဝယ်ယူကြရပါကြောင်း၊ မိုင်းပြင်းမြို့သည် တောင်ကြီး-ကျိုင်းတုံ ပြည်ထောင်စု လမ်းမကြီးပေါ်တွင် ကျရောက်နေသော်လည်း တောင်ကြီး- မိုင်းပြင်းကားဂိတ်မရှိခြင်း၊ ပြည်တွင်း၊ ပြည်ပကုန်ပစ္စည်း အများစုကို ကျိုင်းတုံမှ တစ်ဆင့်သယ်ယူရောင်းချခြင်းဖြင့် ယာဉ်အသုံးပြုခများ၊ နှုန်းထားများမှာ အခြားဒေသများနှင့် နှိုင်းယှဉ် ပါက ဈေးအလွန်မြင့်မားနေသည့်အတွက် မိုင်းပြင်းမြို့သည် နယ်စွန်နယ်ဖျား နယ်စပ်မြို့လေးပမာ ကုန်ပစ္စည်း ရှားပါးမှု၊ ကုန်းဈေးနှုန်း ကြီးမြင့်မှုတို့ဖြင့် ဝယ်ယူစားသုံးသူများအတွက် ဒုက္ခများစွာ ကြုံတွေ့လျက်ရှိနေ ပါကြောင်း၊ နိုင်ငံတော် အစိုးရအမှုထမ်း၊ အရာထမ်းများအနေဖြင့် တာဝန်ပေးရာဒေသများသို့ ခက်ခဲပင်ပန်းစွာ တာဝန်ထမ်းဆောင်ရာ၌ နိုင်ငံတော်မှ ထောက်ပံ့ပေးသောလုပ်ခ၊ လစာငွေများကို ဝမ်းရေးအတွက် လောက် ငှအောင် ချိုးခြံချွေတာနေရသည့်အပြင် ပြည်နယ်ရုံး၊ မြို့နယ်ရုံးများသို့ ရုံးကိစ္စ၊ အစည်းအဝေးကိစ္စ၊ သင်တန်းနှင့် လစာထုတ်ကိစ္စများဖြင့် သွားရပါက ခရီးစရိတ်များ အလွန်ကုန်ကျ၍ လောက်ငှမှု မရှိကြောင်းကိုလည်း တွေ့ရှိ ရပါကြောင်း၊ ထို့ကြောင့် ရှမ်းပြည်နယ်အရှေ့ပိုင်း မိုင်းပြင်းမြို့နယ် အတွင်း တာဝန်ထမ်းဆောင်လျက် ရှိသော နိုင်ငံတော်အစိုးရဌာနအသီးသီးမှ အစိုးရအမှုထမ်း၊ အရာထမ်း တို့အား နယ်စပ်မြို့နယ်များ နည်း တူ ဒေသတွင်းရှားပါးစရိတ်၊ လုပ်ခ၊ လစာငွေများတိုးမြှင့်ထောက်ပံ့ပေးရန် နိုင်ငံတော်မှအစီအစဉ် ရှိ/မရှိမေးမြန်း ပါသည်။
ယခင် ပြည်ထောင်စုဆိုရှယ်လစ်သမ္မတမြန်မာနိုင်ငံတော် နိုင်ငံတော်ကောင်စီ၏ ၉-၅-၁၉၇၉ ရက်စွဲပါ အမိန့် ကြော်ငြာစာ အမှတ်၊ ၂၂/၇၉ နှင့် ယခင် ဘဏ္ဍာရေးနှင့် အခွန်ဝန်ကြီးဌာန၏ ၁၅-၃-၂၀၁၂ ရက်စွဲပါအမိန့်ကြော်ငြာစာအမှတ်၊ ၁၀၁/၂၀၁၂ တို့ဖြင့် ဒေသစရိတ် ခံစားခွင့်ရှိသောမြို့နယ် ၈၇ မြို့နယ်ကိုသတ်မှတ်ခဲ့ရာတွင် ရှမ်းပြည်နယ်၊ မိုင်းပြင်းမြို့နယ်သည် လူမှုရေး ခက်ခဲသောအဆင့်တွင် ပါဝင်ခဲ့ခြင်း မရှိပါကြောင်း၊ ၂၀၁၂ ခုနှစ်၊ စက်တင်ဘာလတွင် တိုင်းဒေသကြီး/ပြည်နယ်များ အတွင်း ဝေးလံခေါင်သီပြီး လူမှုရေးခက်ခဲသော မြို့နယ်/မြို့နယ်ခွဲ ၈၇ ခု အပြင် လုံခြုံရေး၊ စီးပွားရေး၊ လမ်းပန်းဆက်သွယ်ရေး ခက်ခဲသည့်ဒေသများ ထပ်မံကျန်ရှိခြင်းရှိ/မရှိကို စိစစ်တင်ပြစေခဲ့ရာ တိုင်းဒေသကြီး/ ပြည်နယ်များမှ စုစုပေါင်းဒေသ ၂၂ ခု ကို ဝေးလံခေါင်သီသော ဒေသအဖြစ် ထပ်မံသတ်မှတ် သင့်ကြောင်း တင်ပြခဲ့သော်လည်း ရှမ်းပြည်နယ်၏ တင်ပြချက်တွင် မိုင်းပြင်းမြို့နယ်ကို ဝေးလံခေါင်သီသောဒေသအဖြစ် ထပ်မံ ထည့်သွင်းတင်ပြခဲ့ခြင်း မရှိသည်ကိုတွေ့ရှိရပါကြောင်း၊ ထပ်မံဖြည့်စွက်တင်ပြလာသော ဒေသ ၂၂ ခုကို ဝေးလံခေါင်သီပြီး လူမှုရေးခက်ခဲသော ဒေသများအဖြစ် ထပ်မံ ဖြည့်စွက်ပြီး စုစုပေါင်းဒေသ ၁၀၉ ခု၌ တာဝန်ထမ်းဆောင်နေသောဝန်ထမ်းများအတွက် ဒေသစရိတ် ခံစားခွင့်တွေကို ယခင် ဘဏ္ဍာရေးနှင့် အခွန်ဝန်ကြီးဌာန၏ ၁၅-၂-၂၀၁၃ရက်စွဲပါ အမိန့်ကြော်ငြာစာအမှတ်၊ ၂၈၆/၂၀၁၃ ထုတ်ပြန်ပြီး ခွင့်ပြုပေးခဲ့ပါကြောင်း၊ ပြည်ထဲရေးဝန်ကြီးဌာနကလည်း မိုင်းပြင်းမြို့နယ်သည် တောင်ကြီး-ကျိုင်းတုံ ပြည်ထောင်စုလမ်းမကြီးပေါ်တွင် တည်ရှိနေသောကြောင့် လမ်းပန်းဆက်သွယ်ရေး ခက်ခဲပြီး ဝေးလံခေါင် သီသော ဒေသတွင် ပါဝင်ခြင်း မရှိသည့်အတွက် ယင်းမြို့နယ်တွင်ရှိသော အစိုးရဌာနများမှ ဝန်ထမ်းများကို ရှားပါးစရိတ်၊ လုပ်ခလစာ/လစာ ၂ ဆ တိုးမြှင့် ခံစားခွင့်ပြုရန် အစီအစဉ်မရှိသေးပါကြောင်းကို သိရှိရပါကြောင်း၊ သို့ပါ၍ မိုင်းပြင်းမြို့နယ်အတွင်း တာဝန်ထမ်းဆောင် နေသည့် ဝန်ထမ်းများကို နယ်စပ်မြို့နယ်များ နည်း တူ ဒေသတွင်း ရှားပါးစရိတ်၊ လုပ်ခလစာများ တိုးမြှင့်ထောက်ပံ့ရန် အစီအစဉ် မရှိသေး ပါကြောင်း ဖြေကြားပါသည်။