(စ)-တစ်နိုင်တစ်ပိုင် စိုက်ပျိုးရေးနှင့် မွေးမြူရေးလုပ်ငန်းတို့တွင် အများပြည်သူ စိတ်ပါဝင်စားပြီး လုပ်ကိုင် လိုစိတ်ရှိလာစေရန် တာဝန်ရှိသူ အဆင့်ဆင့်က ကျေးလက်ဒေသအထိ အနီးကပ်ကြီးကြပ် အသိပညာပေးရေးနှင့် ကူညီပံ့ပိုးမှုပေးရန် အစီအစဉ်ရှိ/မရှိ မေးခွန်း

မြန်မာနိုင်ငံ၏ တောင်သူလယ်သမားများ မြေယာပိုင်ဆိုင်ခွင့်သည် တစ်ဦးချင်းပိုင်ဆိုင်သည့် လယ်မြေ ဧရိယာနည်းသည့် တောင်သူလယ်သမားအရေအတွက်က ပိုမိုပါကြောင်း၊ စိုက်ပျိုးရေး၊ မွေးမြူရေးဆိုင်ရာ အသိပညာပေးလုပ်ငန်းများကို ဆောင်ရွက်သည့်အခါ တစ်နိုင်တစ်ပိုင်စိုက်ပျိုးမွေးမြူရေးဆိုင်ရာ အသိပညာ ပေးလုပ်ငန်းများကို အဓိကထားဆောင်ရွက်ပေးရသည့် အခြေအနေ ဖြစ်ပါကြောင်း၊ မိမိတို့ဝန်ကြီးဌာန အောက်ရှိ စိုက်ပျိုးရေးဦးစီးဌာနအနေဖြင့် စိုက်ပျိုးရေးပညာပေးလုပ်ငန်းများကို တာဝန်ယူဆောင်ရွက် ရသည့်ဌာန ဖြစ်ပါကြောင်း၊ အကောင်အထည်ဖော်ဆောင်ရွက်ရာတွင် ကျေးရွာအရောက် တောင်သူ များနှင့် ထိတွေ့ပညာပေးသည့်လုပ်ငန်း၊ တောင်သူများကိုယ်တိုင် ဆက်သွယ်မေးမြန်း ဖြေရှင်းစေလိုသည့် တောင်သူလယ်သမားများကိုလည်း သင်တန်းများပေးပြီး တောင်သူအချင်းချင်း နည်းပညာဖလှယ်မှု၊ ဆင့်ပွားပြန့်ပွားစေမှုတို့ကို ဆောင်ရွက်ပေးလျက်ရှိပါကြောင်း၊ ကျေးရွာအရောက် တောင်သူများထံ ပညာ ပေးလုပ်ငန်းများကိုဆောင်ရွက်ရာတွင်လည်း မိမိတို့ဌာနရှိ ဝန်ထမ်းအင်အားအရ အစီအမံများချမှတ်ပြီး လိုအပ်ချက်ရှိနေသည့်ဒေသများကို လိုအပ်ချက်နှင့်အညီ ကွင်းဆင်းသွားရောက်ပြီး လုပ်ငန်းဆောင်ရွက် ရခြင်း ရှိပါကြောင်း၊ လိုအပ်ချက်ရှိသည့်ဒေသများတွင် ရုံးချုပ်အဆင့်၊ တိုင်းဒေသကြီး/ ပြည်နယ်အဆင့်  တာဝန်ရှိသူများကိုယ်တိုင်စုဖွဲ့ပြီး ဆောင်ရွက်ရသည့် အခြေအနေများရှိပါကြောင်း၊ စိုက်ပျိုးရေးဦးစီးဌာန အနေဖြင့် စိုက်ပျိုးပညာပေးလုပ်ငန်းများကို တစ်နိုင်ငံလုံး အတိုင်းအတာဖြင့် ဆောင်ရွက်နိုင်ရန် စုစုပေါင်း ဝန်ထမ်းအင်အား ၇၃၀၀ ကျော်ရှိပါကြောင်း၊ တိုးချဲ့ပညာပေးဝန်ထမ်းတစ်ဦး၏ တာဝန်ယူဆောင်ရွက် ရသည့်ဧရိယာများလည်း ကျယ်ပြန့်ပါကြောင်း၊ လက်ရှိရာသီဥတု အခြေအနေအရ စိုက်ပျိုးရမည့်မျိုး၊ စိုက်စနစ်၊ မြေပြုပြင်ခြင်း၊ သဘာဝမြေသြဇာသုံးစွဲခြင်း၊ ပိုးမွှားရောဂါကာကွယ်နှိမ်နင်းခြင်း၊ ရိတ်သိမ်း ချိန်လွန်နည်းပညာများဖြင့် မြေပြင်စိုက်ပျိုးသည်မှစပြီး ရိတ်သိမ်းခြွေလှေ့သိုလှောင်သည်အထိ နည်းပညာ ပေးလုပ်ငန်းများကို မိမိတို့စွမ်းအားရှိသလောက် ရှိသည့်ဝန်ထမ်းအင်အားများနှင့် ပညာပေး ဆောင်ရွက် လျက်ရှိပါကြောင်း၊ စိုက်ပျိုးရေးဆိုင်ရာနည်းပညာများနှင့် တွေ့ကြုံလာသည့် အခက်အခဲများအား ဆက်သွယ်မေးမြန်းနိုင်ရန် ၂၀၁၇ ခုနှစ်တွင် Call Center ဖွင့်လှစ်ပြီး မိမိတို့ ဆက်သွယ်မေးမြန်း ဆောင်ရွက်နိုင်ရန် အသိပေးထားပြီးဖြစ်ပါကြောင်း၊ တောင်သူလယ်သမားများ စိုက်ပျိုးရေး၊ မွေးမြူရေး ဆိုင်ရာသင်တန်းပေးခြင်းလုပ်ငန်းများကို ပိုမိုကျယ်ပြန့် ဆောင်ရွက်ပေးနိုင်ရန် ကျေးရွာခေါင်းဆောင်များကို သီးခြားဖိတ်ကြားပြီး နည်းပညာသင်တန်းပေးမှုများကို ယခုအခါ နိုင်ငံတကာအဖွဲ့အစည်းများ၏ အကူအညီ ဖြင့် သင်တန်းကျောင်းများတိုးချဲ့ထူထောင်ပြီး ဆောင်ရွက်လျက်ရှိပါကြောင်း၊

တောင်သူလယ်သမား မိသားစုများမှာလည်း တစ်နိုင်တစ်ပိုင်မွေးမြူရေးလုပ်ငန်းများ ဖွံ့ဖြိုးတိုးတက်ရန် အတွက် မွေး/ကုဦးစီးဌာနအနေဖြင့် မွေးမြူထုတ်လုပ်ခြင်းဆိုင်ရာနည်းပညာများအပြင် တိရစ္ဆာန်ရောဂါ ကာကွယ်ဆေးထိုးခြင်း၊ တိရစ္ဆာန်ကျန်းမာရေး စောင့်ရှောက်မှုလုပ်ငန်းများ ကွင်းဆင်းဆောင်ရွက်ပေး လျက်ရှိပါကြောင်း၊ အသိပညာပေးခြင်းနှင့် မျိုးကောင်းမျိုးသန့်တိရစ္ဆာန်ဖြန့်ဖြူးခြင်းလုပ်ငန်းများကိုလည်း မိမိတို့စွမ်းအားရှိသလောက် ဆောင်ရွက်ပေးလျက်ရှိပါကြောင်း၊ တစ်နိုင်တစ်ပိုင် ငါးမွေးမြူရေးလုပ်ငန်း များတွင် ကျေးလက်နေပြည်သူများကိုယ်တိုင် ငါးသားပေါက်လုပ်ငန်းများ ကိုယ်တိုင်ဆောင်ရွက်နိုင်မှုနှင့်  ငါးမွေးမြူခြင်းများကို အောင်မြင်ရန် နည်းပညာပေးသင်တန်းများကိုလည်း ဆောင်ရွက်လျက်ရှိပါကြောင်း၊ ပြည်တွင်းအားနှင့်သာမက အပြည်ပြည်ဆိုင်ရာအဖွဲ့အစည်းများ၏ အကူအညီဖြင့် ကျေးလက်နေ တောင်သူ များ၏ တစ်နိုင်တစ်ပိုင် မွေးမြူစိုက်ပျိုးရေးလုပ်ငန်းများ ဆောင်ရွက်ရာတွင် အထောက်အကူဖြစ်စေမည့် နည်းလမ်းတစ်ရပ်ဖြစ်သည့် စပါးခင်းငါးထည့်စိုက်ပျိုးမှုလုပ်ငန်း အလေ့အကျင့်ကောင်းများကို ပညာပေး ဆောင်ရွက်လျက်ရှိပါကြောင်း၊

စိုက်ပျိုးရေးကိုအခြေခံသည့် မိမိတို့နိုင်ငံတွင်လည်း ကျေးလက်လူမှုစီးပွားဘဝလုံခြုံရေး၊ ဆင်းရဲမှု လျှော့ချရေး၊ အလုပ်အကိုင်အခွင့်အလမ်းများရရှိရေးအတွက် ဝန်ကြီးဌာနမှလည်း မူဝါဒနှင့်လုပ်ငန်းစဉ်များ ချမှတ်ထားသည့်အလျောက် စိုက်ပျိုး၊ မွေးမြူရေးဆိုင်ရာလိုအပ်သည့် နည်းပညာ၊ သင်တန်း အသိပညာ ပေးမှုလုပ်ငန်းများကို ကျေးလက်ဒေသများသို့အရောက် ကူညီပံ့ပိုးဆောင်ရွက်ပေးမည်ဖြစ်ပါကြောင်း ရှင်းလင်းဖြေကြားပါသည်။