(င)-မြစ်သားမြို့ရှိ ဂိုဒေါင်ပျက်များ၊ ချုံနွယ်များဖြင့် ရှုပ်ထွေးနေသော စိုက်ပျိုးရေး ဌာနပိုင်မြေနေရာအား ရုံးမြေနေရာမရှိသော အစိုးရဌာန (၅)ဌာန ရုံးဖွင့်လှစ်နိုင်ရေးအတွက် စွန့်လွှတ်လွှဲပြောင်းပေးရန် အစီအစဉ်ရှိ၊ မရှိ နှင့် စပ်လျဉ်းသည့် မေးခွန်း

ယခုမေးခွန်းမေးမြန်းရသည့်ရည်ရွယ်ချက် လေးရပ်ရှိပါကြောင်း၊ ပထမရည်ရွယ်ချက်က မြစ်သားမြို့ ပေါ်တွင် ၂၃ ဧကကျယ်ဝန်းသောစိုက်ပျိုးရေးဌာနပိုင်မြေနေရာ၏ အချက်အခြာကျမှုကို ဝန်ကြီးဌာန သိစေရန် ရည်ရွယ်ပါကြောင်း၊ အဆိုပါနေရာသည် မြင်းခြံ-မြစ်သား-ရေဝန်း-မန္တလေးလမ်းမကြီး ဘေးတွင် တည်ရှိပြီး အားကစားကွင်းနှင့်ကပ်လျက်၊ မြစ်သားမြို့၏အထင်ကရ  မြသီတာပန်းဥယျာဉ် နှင့် မျက်နှာချင်းဆိုင် ကွက်ကွက်ကွင်းကွင်းအချက်အခြာကျသည့်နေရာတွင် တည်ရှိပါကြောင်း၊ ယခုကဲ့သို့ အဓိကကျသည့်နေရာကို အကျိုးရှိရှိအသုံးမချဘဲ ဂိုဒေါင်ပျက်များ၊ ချုံနွယ်ပိတ်ပေါင်းများက ဖုံးလွှမ်းနေပြီး မြို့၏ဖွံ့ဖြိုးမှုကို အဟန့်အတားဖြစသည့်အပြင် လူနေအိမ်များ၊ ရပ်ကွက်များ၊ ဈေးဆိုင် များကို ဘေးအပြင်သို့ တွန်းထုတ်နေသကဲ့သို့ ဖြစ်ပါကြောင်း၊

ဒုတိယရည်ရွယ်ချက်က နိုင်ငံ့ဘဏ္ဍာအလေအလွင့်မရှိစေချင်ပါကြောင်း၊ အစိုးရရုံးဌာနများအတွက် မြေနေရာမရှိသည့်အခါ ဌာနဆိုင်ရာများက မြေနေရာများ တောင်းကြပါကြောင်း၊ ပေးစရာမြေနေရာ မရှိပါက မြေနေရာဝယ်ရန်အတွက် နိုင်ငံတော်ကို ဘတ်ဂျက်တင်ပြတောင်းခံကြပါကြောင်း၊ ဘတ်ဂျက် ရရှိသည့်အခါတွင်လည်း မြေဈေးကကြီးမြင့်နေသည့်အတွက် ရုံးဖွင့်ပါကသင့်တော်သည့်နေရာနှင့် အကျယ်အဝန်းကို မရရှိကြပါကြောင်း၊ ယခုကဲ့သို့ လိုငွေပြဘတ်ဂျက်နှင့် သွားနေရသည့်အချိန်တွင် နိုင်ငံတော်ဘဏ္ဍာကို မလေလွင့်ဘဲ ခြိုးခြိုးခြံခြံသုံးစွဲစေလိုပါကြောင်း၊ တတိယရည်ရွယ်ချက်က အဆိုပါနေရာကို နိုင်ငံအတွက် အကျိုးရှိရှိအသုံးချစေလိုပါကြောင်း၊ မြေနေရာကို ယခုအချိန်ထိ အကျိုးရှိရှိအသုံးမချနိုင်ပါက အခြားမြေနေရာမရှိသည့်ဌာနများကို ခွဲဝေပေးခြင်း၊ ဝန်ထမ်းအိမ်ရာများ ဆောက်လုပ်ပေးခြင်း၊ ပုဂ္ဂလိကသို့ငှားရမ်းရောင်းချခြင်းစသဖြင့် နိုင်ငံတော်အတွက်အကျိုးရှိစေရန် အသုံးပြုစေလိုပါကြောင်း၊ နောက်ဆုံးရည်ရွယ်ချက်က  မိမိတို့မြို့၏ ရုံးနေရာအခက်အခဲကို တင်ပြ လိုခြင်း ဖြစ်ပါကြောင်း၊ မိမိယခုမေးခွန်းကို တင်စဉ်က မိမိတို့မြို့နယ်တွင် ရုံးမြေနေရာအခက်အခဲရှိနေ သည်မှာ ငါးရုံးရှိပါကြောင်း၊ ယခုအခါ ရှစ်ရုံးအထိတိုးတက်လာပြီး ဝန်ထမ်းအိမ်ရာ ဆောက်လုပ်ရန် အတွက် မြေနေရာအခက်အခဲဖြစ်နေပါကြောင်း၊ မိမိတို့မြို့တွင် ခွင့်ပြုချထားပေးနိုင်သော မြေလွတ် (State Land) ဟူ၍ မြို့နှင့် လေး၊ ငါးမိုင် ဝေးကွာသော မြို့အပြင်တွင်သာ ရှိပါကြောင်း၊ ယခုနေရာတွင် ရုံးဖွင့်မည်ဆိုပါက မြို့ထဲက မြို့ပြင်ထွက် ရုံးဖွင့်ရုံးသွားရန် မဖြစ်သင့်သည့်အပြင် ဆက်သွယ်ရေးအရ သော်လည်းကောင်း၊ လုံခြုံရေးအရသော်လည်းကောင်း မသင့်လျော်ပါကြောင်း၊ သို့ဖြစ်ပါ၍ မြစ်သားမြို့နယ်အကျိုး၊ နိုင်ငံအကျိုးကို မျှော်ကိုးပြီး  မြစ်သားမြို့ရှိ ဂိုဒေါင်ပျက်များ၊ ချုံနွယ်များဖြင့် ရှုပ်ထွေးနေသော စိုက်ပျိုးရေးဌာနပိုင်မြေနေရာအား ရုံးမြေနေရာမရှိသော အစိုးရဌာန(၅)ဌာနရုံး ဖွင့်လှစ်နိုင်ရေးအတွက် စွန့်လွှတ်လွှဲပြောင်းပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။