(က)-စတီးဝဲလ်(သို့)လီဒိုလမ်းမကြီးအားအဆင့်မြှင့် တင်သွားရန်အစီအစဉ်ရှိ၊မရှိ နှင့်စပ်လျဉ်းသည့်မေး ခွန်း

မြစ်ကြီးနား၊ နမ်းမတီး၊ တနိုင်း၊ ဆင်မွှေယန်၊ ပန်ဆောင်လမ်းသည် ကချင်ပြည်နယ်အတွင်း မြစ်ကြီးနားမိုင်တိုင် ဝ/၀ မှ ဆင်မွှေယန်အထိ ၁၇၇ မိုင်၊  စစ်ကိုင်းတိုင်းအတွင်း ဆင်မွှေယန်မှ ပန်ဆောင်အထိ ၅၁ မိုင် စုစုပေါင်း ၂၂၈ မိုင်ရှည်လျားပါကြောင်း၊ အဆိုပါလမ်းမကြီးနှင့် ပတ်သက်၍ ၃၁-၃-၂၀၁၄ နေ့အထိ လမ်းအခြေအနေကို ပြန်လည်သုံးသပ်ရာတွင် ကွန်ကရစ်လမ်း ၂ မိုင် ၂ ဖာလုံ၊  ကတ္တရာလမ်း ၃၂ မိုင် ၇  ဖာလုံ၊  အမာခံလမ်း ၁၅၅ မိုင် ၇ ဖာလုံနှင့် မြေလမ်း ၃၇ မိုင် ရှိသည့်အတွက် စုစုပေါင်း ၂၂၈ မိုင် ဖြစ်ပါကြောင်း။

မြစ်ကြီးနား-နမ္မတီး-တနိုင်း-ပန်ဆောင်-လီဒိုလမ်း(ကချင်ပြည်နယ်အပိုင်း)တွင် မိုင်တိုင် ဝ/၀ မှ ၁၁၉/၄ အထိ ၁၁၉ မိုင်နှင့်  ၄ ဖာလုံကို ယခင်က လီဒိုဟိုင်းဝေးကုမ္ပဏီမှ BOT စနစ်ဖြင့်တာဝန်ယူ ဆောင်ရွက်ခဲ့ခြင်း ဖြစ်ပါကြောင်း၊ ယင်းကုမ္ပဏီမှ စာချုပ်ပါ စည်းကမ်းချက်များအတိုင်း ဆောင်ရွက်နိုင်ခြင်းမရှိသည့်အတွက်  ၂၀-၈-၂၀၁၄ နေ့မှ စတင်ပြီး လုပ်ငန်းများ ပြန်လည်လွှဲပြောင်းရယူကာ လမ်း၊ တံတားပြင် ဆင် ထိန်းသိမ်းရေးများကို ဆောင်ရွက်လျက်ရှိပါကြောင်း၊ 

မြစ်ကြီးနား-နမ္မတီး-တနိုင်း-ပန်ဆောင်-လီဒိုလမ်း (ကချင်ပြည်နယ် အပိုင်း) ၁၇၇ မိုင်ကို ၂၀၁၄-၁၅ ဘဏ္ဍာရေးနှစ်တွင် ပြည်ထောင်စုငွေလုံးငွေရင်းနှင့် ပြင်ဆင် ထိန်းသိမ်းရေး ရန်ပုံငွေ နှစ်ရပ်ပေါင်းစပ်ပြီး အမာခံလမ်းခင်းခြင်း ၅၄ မိုင် ၄ ဖာလုံ၊ ကွန်ကရစ်လမ်းခင်းခြင်း ၄ ဖာလုံ၊ သံကူကွန်ကရစ် တံတား တည်ဆောက်ခြင်း ၁၇ စင်း၊ ၅၀ ပေအထက် စတီးကြမ်းခင်းဘေလီတံတား တည်ဆောက်ခြင်း ၁၄ စင်းနှင့်၁၂၀၀ ပေအရှည်ရှိ တဝမ်တံတား တည်ဆောက်ခြင်းလုပ်ငန်းများကို ဆောင်ရွက်ခဲ့ပါကြောင်း၊

မြစ်ကြီးနား-နမ္မတီး-တနိုင်း-ပန်ဆောင်-လီဒိုလမ်း(စစ်ကိုင်းတိုင်းဒေသကြီးအပိုင်း) ၅၁ မိုင်ကို ၂၀၁၄-၁၅ ဘဏ္ဍာရေးနှစ်တွင် ပြည်ထောင်စုငွေလုံးငွေရင်း ရန်ပုံငွေနှင့် တိုင်းဒေသကြီး အထူးပြင်ဆင်ထိန်းသိမ်းရေး ရန်ပုံငွေများ ပေါင်းစပ်ပြီး ၃၄ ပေအကျယ် လမ်းချဲ့ခြင်းနှင့် လျောစောက်နှိမ့်ချခြင်း ၁၁ မိုင် ၄ ဖာလုံ၊ အမာခံလမ်းခင်းခြင်း ၁၃ မိုင် ၇ ဖာလုံ၊ တံတားနှင့်ရေပြွန်များတည်ဆောက်ခြင်း ၂၄ စင်းစသည့် လုပ်ငန်းများကို ဆောင်ရွက်ခဲ့ပါကြောင်း၊

မြစ်ကြီးနား-နမ္မတီး-တနိုင်း-ပန်ဆောင်-လီဒိုလမ်းကို အဆင်‌့မြှင့်တင် တည်ဆောက်ရန်အတွက် အိန္ဒိယ အစိုးရအဖွဲ့မှ လည်းကောင်း၊ မြောက်ပိုင်းတော်ဝင် ကျောက်စိမ်းကုမ္ပဏီလီမိတက်မှ တရုတ်နိုင်ငံ ထိန်မိန်လမ်း ဖောက်လုပ်ရေးကုမ္ပဏီနှင့် ပူးပေါင်း၍လည်းကောင်း ကွင်းဆင်းစစ်ဆေးပြီး အဆင့်မြှင့်တင် ဆောင်ရွက်ရန် လေ့လာလျက်ရှိပြီး မြောက်ပိုင်းတော်ဝင် ကျောက်စိမ်း ကုမ္ပဏီလီမိတက်နှင့် တရုတ်ပြည်သူ့သမ္မတနိုင်ငံ၊ ထိန်ချုံးမြို့ရှိ ထိန်မိန်လမ်းဖောက်လုပ်ရေး ကုမ္ပဏီတို့မှ အကျိုးတူပူးပေါင်းပြီး နိုင်လွန်ကတ္တရာလမ်းအဖြစ် အဆင့်မြှင့်တင်ခြင်းလုပ်ငန်းကို စီမံကိန်းအဖြစ် ရင်းနှီးမြှုပ်နှံပြီး BOT စနစ်ဖြင့် ဆောင်ရွက်လိုကြောင်း BOT မူဝါဒ ၂၁ ချကနှင့်အညီ တင်ပြလာပါကြောင်း၊ ထို့ကြောင့် အဆိုပါတင်ပြချက်များကို အသေးစိတ်စိစစ်ပြီး မူဝါဒနှင့် ကိုက်ညီပါက ၎င်းကုမ္ပဏီကို BOT စနစ်ဖြင့် ဆောင်ရွက်ခွင့်ပြုမည် ဖြစ်ပါကြောင်း ပြန်လည်ဖြေကြားပါသည်။