(ခ)-အောင်လံမြို့နယ်အတွင်းရှိနိုင်ငံပိုင်အမှတ်(၃) ဓာတ်မြေဩဇာ စက်ရုံ(ကျော်စွာ)အား ပြန်လည် ဖွင့်လှစ်ပြီးလုပ်ကိုင်ရန်အစီအစဉ်ရှိ/မရှိနှင့်စပ်လျဉ်း သည့် မေးခွန်း

လျှပ်စစ်နှင်‌့စွမ်းအင်ဝန်ကြီးဌာန၊ မြန်မာ့ရေနံဓာတုဗေဒလုပ်ငန်း ကြီးကြပ်မှုအောက်ရှိ တစ်ရက်လျှင် ယူးရီးယားဓာတ်မြေသြဇာ မက်ထရစ်တန် ၆၀၀ ထုတ်လုပ်နိုင်သော အမှတ်(၃) ဓာတ်မြေသြဇာစက်ရုံ (ကျော်စွာ) ကို Germany နိုင်ငံ UHDE ကုမ္ပဏီက တည်ဆောက်ခဲ့ပြီး ၁၉၈၅ ခုနှစ် ဇူလိုင်လတွင် စတင်လည်ပတ်ခဲ့ပါကြောင်း၊ စက်ရုံအတွက်လိုအပ်သော သဘာဝဓာတ်ငွေ့ ကုန်ကြမ်းကို ပြည်တောင်တန်း ရေနံမြေနှင့် အဖျောက် သဘာဝဓာတ်ငွေ့မြေတို့မှ ရယူပြီးဆောင် ရွက်ခဲ့ခြင်းဖြစ်ပါကြောင်း၊ ဓာတ်ငွေ့ပမာဏ တစ်ရက်လျှင် ကုဗပေ ၁၁.၅ သန်းခန့် အသုံးပြုခဲ့ရပါကြောင်း၊ ၂၀၁၀ ခုနှစ် စက်တင်ဘာလအထိ စက်ရုံလည်ပတ်ခဲ့ပြီး တစ်နေ့လျှင် ယူးရီးယားဓာတ်မြေသြဇာ မက်ထရစ်တန် ၄၅၀ ခန့် ထုတ်လုပ် နိုင်ခဲ့ပါကြောင်း၊သို့ရာတွင် ပြည်တောင်တန်းရေနံမြေနှင့် အဖျောက်သဘာဝဓာတ်ငွေ့မြေမှ ကုန်းတွင်းဓာတ်ငွေ့ထွက်ရှိမှု ကျဆင်းသွားသည့်အတွက်ကြောင့် နိုင်ငံ၏အခြားသဘာဝဓာတ်ငွေ့ လိုအပ်ချက်နှင့်ခွဲဝေသုံးစွဲရေး အစီအစဉ် အရ စက်ရုံအား ယာယီရပ်ဆိုင်းထားခဲ့ရခြင်းဖြစ်ပါကြောင်း၊

နိုင်ငံတော်၏ ဈေးကွက်စီးပွားရေးမူဝါဒနှင့် ပုဂ္ဂလိကပိုင်ပြုလုပ်ရေး လုပ်ငန်းများ အစီအစဉ်အရ နိုင်ငံပိုင် အချိုးအစားကို လျှော့ချ၍ ပုဂ္ဂလိကကဏ္ဍဖွံ့ဖြိုး တိုးတက်စေရေးကို ရည်ရွယ်ပြီး အဆိုပါစက်ရုံအား အကျိုးတူ ပူးပေါင်းဆောင်ရွက်နိုင်ရန် ယူးရီးယားဓာတ်မြေသြဇာ ထုတ်လုပ်၊ သိုလှောင်၊ ဖြန့်ဖြူးရောင်းချခြင်း လုပ်ငန်းအတွေ့အကြုံရှိသော  ပြည်တွင်း/ပြည်ပ ကုမ္ပဏီများ၏ စိတ်ဝင်စားမှု အဆိုပြုလွှာ (Letter  Of Expression Of Interest) အား ၁၇-၃ -၂၀၁၅ ရက်နေ့ နိုင်ငံပိုင် သတင်းစာများနှင့် စွမ်းအင်ဝန်ကြီးဌာန Website တို့တွင် ဖိတ်ခေါ်ခဲ့ပါကြောင်း၊ အဆိုပါဖိတ်ခေါ်မှုကို Japan နိုင်ငံမှ Chiyoda Corporation၊ ITOCHU Corporation၊  Sojitz Corporation၊ Germany နိုင်ငံမှ Eurochem Agro GmbH နှင့် Myanma Awba Group၊ Denmark နိုင်ငံမှ Haldor Topsoe နှင့် My Associates Co.,Ltd /Auspicious Millennium Trading Group Co.,Ltd၊ မြန်မာကုမ္ပဏီများဖြစ်သော Capital Diamond Star Group၊ Parami Energy Services Co.,Ltd နှင့် UMGv Co.,Ltd  စုစုပေါင်းကုမ္ပဏီ ရှစ်ခုမှ LOEI တင်သွင်းခဲ့သော်လည်း သဘာဝ ဓာတ်ငွေ့ဖြည့်ဆည်းနိုင်မှု အခြေအနေအရ LOEI ခေါ်ယူသည့် အဆင်‌့ထိသာ ခေတ္တရပ်ဆိုင်းခဲ့ရကြောင်း၊

ယခုအခါ ကျော်စွာဓတ်မြေသြဇာစက်ရုံအပါအဝင် ပြည်ဒေသတစ်ဝိုက်ရှိ စက်ရုံများသို့ ရွှေသဘာဝ ဓာတ်ငွေ့စီမံကိန်းမှ ထွက်ရှိသည့် သဘာဝဓာတ်ငွေ့ကို အရှေ့တောင်အာရှသဘာဝ ဓာတ်ငွေ့ပိုက်လိုင်းမှတစ်ဆင်‌့  ဖြန့်ဖြူးပေးနိုင်ရေးအတွက် အမေရိကန်ဒေါ်လာ ၇၉.၇၅ သန်း ကုန်ကျမည့် မကွေး-ရွှေတောင် ၁၁၉ မိုင်ရှည်လျားသည့် ၁၄ လက်မပိုက်လိုင်းအား ပြည်ထောင်စုဘတ်ဂျက် ရန်ပုံငွေဖြင့်လည်းကောင်း၊ Japan ODA Loans ဖြင့်လည်းကောင်း၊ အဆင့်မြှင်‌့အစားထိုး လဲလှယ်ရန် စီစဉ်ခဲ့ရာ မရရှိခဲ့သည့် အတွက်ကြောင့် Korea EXIM Bank (KEDCF) ထံမှ အထူးသက်သာသော အတိုးနှုန်းဖြင့် ချေးငွေရရှိရန် စီစဉ်ဆောင်ရွက်လျက်ရှိပါကြောင်း၊

အဆိုပါ ပိုက်လိုင်း ဆက်သွယ် ဆောင်ရွက်ပြီးသည့် ကာလတွင် အမှတ် (၃) ဓာတ်မြေသြဇာစက်ရုံ (ကျော်စွာ) အား ပြည်တွင်း/ပြည်ပလုပ်ငန်းရှင်များနှင့် အကျိုးတူပူးပေါင်း ဆောင်ရွက်ရန် နိုင်ငံတကာ တင်ဒါခေါ်ယူ ၍ ပြန်လည် လည်ပတ်ထုတ်လုပ်ရေးကို စီစဉ်ဆောင်ရွက် သွားမည်ဖြစ်ပါကြောင်းနှင့် ဓာတ်မြေသြဇာစက်ရုံများမှ ထုတ်လုပ်သော ယူးရီးယားဓာတ်မြေသြဇာများအား တောင်သူလယ်သမားများ လက်ဝယ်သို့ အဆင့်အနည်းဆုံးဖြင့် ဖြန့်ဖြူးပေးနိုင်ရေးအတွက် ညှိနှိုင်းအစည်းအဝေးများပြုလုပ်ကာ ဆောင်ရွက်သွားမည်ဖြစ်ပါကြောင်း ရှင်းလင်းဖြေကြားပါသည်။