(ခ)-ပြုပြင်ထိန်းသိမ်းရန်လိုအပ်နေသောကင်းတား ဘက်စုံရေလှောင်တမံကြီးအားဆည်တမံနှင့်ရေလွှဲ ဆည်၊ရေသောက်စနစ်ရေရှည်တည်တံ့ခိုင်မြဲရေးတို့ အတွက်စီမံကိန်း၊စီမံချက်များဖြင့်ပြုပြင်ထိန်းသိမ်းရန် အစီအစဉ်ရှိ/မရှိနှင့်စပ်လျဉ်းသည့် မေးခွန်း

မန္တလေးတိုင်းဒေသကြီး၊ မြစ်သားမြို့နယ်တွင်ရှိသည့် ကင်းတားဘက်စုံရေလှောင်တမံကို ဆည်မြောင်း နှင့် ရေအသုံးချမှုစီမံခန့်ခွဲရေးဦးစီးဌာနမှ တမံဆက်စပ်ရေအား အဆောက်အဦများနှင့် ကန်ရေဝပ် ဧရိယာတို့ကို ထိန်းသိမ်းစောင့်ရှောက်လျက် ရှိပြီး ရေဝေရေလဲသစ်တောဧရိယာများ ထိန်းသိမ်းခြင်း နှင့် မြေအသုံးချမှုစီမံခန့်ခွဲခြင်းလုပ်ငန်းများကို သက်ဆိုင်ရာတိုင်းဒေသကြီး/ပြည်နယ်အစိုးရနှင့် သစ်တော ဦးစီးဌာနတို့မှ တာဝန်ယူထိန်းသိမ်း ဆောင်ရွက်လျက်ရှိပါကြောင်း၊ ကင်းတားရေလှောင်တမံသည် စိုက်ပျိုးရေပေးဝေရေးနှင့် ရေအားလျှပ်စစ် ထုတ်လုပ်နိုင်ရန်အတွက် စံချိန်စံညွှန်းပြည့်မီအောင် တည်ဆောက်ခဲ့သော ဘက်စုံရေလှောင် တမံတစ်ခုဖြစ်ပြီး ပြုပြင်ထိန်းသိမ်းခြင်းလုပ်ငန်းများကို  ဆောင် ရွက်လျက်ရှိသဖြင့် ရေရည်ကြံ့ခိုင်မှုအတွက် လုံခြုံစိတ်ချရသော အခြေအနေတွင်ရှိပါကြောင်း၊ ကင်းတားရေတမံတွင် ရေအားလျှပ်စစ်ထုတ်လုပ်ရန်နှင့် ကင်းတားရေ လွှဲဆည်တွင် သိုလှောင် ထိန်းသိမ်းပြီး လက်ဝဲ/လက်ယာမြောင်းမကြီးများနှင့် ပန်းလောင် ရေသောက်စနစ်များဖြင့် စိုက်ပျိုး ရေပေးဝေလျက်ရှိပါကြောင်း၊ တည်ဆောက်ခဲ့သည့် နှစ်ကာလကြာမြင့်လာသဖြင့် ကင်းတား ရေလွှဲ ဆည် အထက်ဘက်တွင် သဲနုန်းများ ပို့ချမှုများကြောင့် ရေလွှဲဆည်၏ မူလရေလှောင် ပမာဏ ၁၈၂၄ ဧကမှ ဧက ၉၀၀ ခန့်ကိုသာ သိုလှောင်နိုင်သည့် အတွက် သဲနုန်းတူးဖော်ခြင်း လုပ်ငန်းများဆောင်ရွက် ရန် လိုအပ်လျက် ရှိပါကြောင်း၊ နှစ်အလိုက်ရန်ပုံငွေခွဲဝေရရှိမှု အခြေအနေအရ နွေစပါးစိုက်ပျိုးရေ ပေးဝေပြီး နောက်မိုးကြိုသီးနှံ ရေပေးဝေရသဖြင့် လုပ်ငန်းဆောင်ရွက်ရသည့်ကာလသည် အချိန်တို ကာလဖြစ် ပါကြောင်း၊ ရေလွှဲဆည် သဲနုန်း တူးဖော်ခြင်း လုပ်ငန်းများကို ထိရောက်စွာဆောင်ရွက်နိုင်ရန် အတွက် သက်ဆိုင်ရာစိုက်ပျိုးရေးညှိနှိုင်းအဖွဲ့များနှင့် တောင်သူလယ်သမားများ ပေါင်းစပ်ညှိနှိုင်းမှုများ စီမံဆောင်ရွက်သွားမည်ဖြစ်ပါကြောင်း၊ ကင်းတားရေသောက်စနစ်သည် လက်ဝဲ/ လက်ယာ မြောင်းမ ကြီးများနှင့် ပန်းလောင် ရေသောက်စနစ်များ ပါဝင်ပြီး တူးမြောင်းမကြီး၏အလျားသည် ၁၅၁ မိုင် နှင့် လက်တံမြောင်းနှင့် မြောင်းခွဲအလျားသည် ၄၀၆ မိုင်ရှိပါကြောင်း၊ တူးမြောင်းများသည် ရှည်လျားပြီး ရေသောက်ဧရိယာသည် ကျယ်ပြန့်သောကြောင့် ရေလှည့် ဇယားရေးဆွဲပြီး ရေပေးဝေလျက်ရှိရာ ရေပေးမြောင်းများအား ဘဏ္ဍာနှစ်အလိုက် ရန်ပုံငွေရရှိမှုအပေါ်မူတည်ပြီး ထိန်းသိမ်း ပြုပြင်လျက် ရှိ သော်လည်း ရေပေးမြောင်းများတွင် ပင်းတားများပိတ်၍ရေယူခြင်း၊ တူးမြောင်းအတွင်း သဲထုတ်ခြင်း၊ နွေသီးနှံနှင့် မိုးသီးနှံ တစ်ဆက်တည်း ရေပေးဝေရသဖြင့် တူးမြောင်းများ ပြုပြင်ရန် လုပ်ငန်းကာလ တိုတောင်းခြင်း များကြောင့် ရေပေးမြောင်း နှင့် ရေပေး အဆောက်အဦများ ပျက်စီးမှုများ ဖြစ်ပေါ်လျက် ရှိပါကြောင်း၊ ကင်းတားရေသောက် စနစ်အတွင်း ရေပေးဝေမှု ပိုမို ကောင်းမွန်စေရန် ပြုပြင်ဆောင်ရွက် သည့် လုပ်ငန်းများအနေဖြင့်  ၂၀၁၆-၁၇ ဘဏ္ဍာနှစ်တွင် လုပ်ငန်း ၈၅ ခု ဆောင်ရွက်နိုင်ရန်အတွက် ရန်ပုံငွေ ကျပ် ၅၂၂၆.၅ သန်း၊ ၂၀၁၇-၁၈ ဘဏ္ဍာနှစ်တွင် လုပ်ငန်း ၄၅ ခု ဆောင်ရွက်နိုင်ရန် အတွက် ရန်ပုံငွေ ကျပ် ၂၂၁၉.၇၄ သန်း စုစုပေါင်းလုပ်ငန်း ၁၃၀ အတွက် လိုအပ်ရန်ပုံငွေ ကျပ် ၇၄၄၆.၂၄ သန်းအား မန္တလေးတိုင်းဒေသကြီး အစိုးရအဖွဲ့မှ နိုင်ငံတော်သမ္မတ သီးသန့်ရန်ပုံငွေအဖြစ် တောင်းခံပြီး စီမံဆောင်ရွက်လျက်ရှိပါကြောင်း၊ ထို့ကြောင့် ကင်းတားရေလှောင်တမံ ၏ ရေဆင်း ဧရိယာများ၊ ရေဝေ ရေလဲ သစ်တောဧရိယာများမပြုန်းတီးအောင် ထိန်းသိမ်းစောင့်ရှောက်ခြင်း လုပ်ငန်းများကို တိုင်းဒေသ ကြီးအစိုးရနှင့် သစ်တောဦးစီးဌာနတို့မှ စီမံဆောင်ရွက် လျက်ရှိပြီး ရေလှောင်တမံ၊ ရေလွှဲဆည်နှင့် ဆည်ရေ သောက်စနစ်များကို ရေရှည်တည်တံ့ခိုင်မြဲရေးအတွက် လိုအပ်သည့်ပြုပြင်ထိန်းသိမ်းမှု လုပ်ငန်းများကို ရန်ပုံငွေရရှိမှု အပေါ်အခြေခံပြီး ဆည်မြောင်းနှင့်ရေ အသုံးချမှု စီမံခန့်ခွဲရေးဦးစီးဌာနမှ ဆက်လက်ဆောင် ရွက် ပေးသွားမည်ဖြစ်ပါကြောင်း ဖြေကြား ခဲ့ပါသည်။