(ခ)-ရှမ်းပြည်နယ်(အရှေ့ပိုင်း)၊မိုင်းဖြတ်မြို့နယ်၊ မခန်းကျေးရွာမှ ဟိုပေါ့ရွာအထိ (၁၃) မိုင် ရှည် လျားသောမြေသားလမ်းဖောက်လုပ်ပေးရန်အစီ အစဉ် ရှိ/မရှိနှင့် ရှိပါက မည်သည့် အချိန်တွင် တည်ဆောက်ပေး မည်ကိုသိလိုခြင်းနှင့်စပ်လျဉ်း သည့်မေးခွန်း

ရှမ်းပြည်နယ်(အရှေ့ပိုင်း)၊ မိုင်းမြတ်မြို့နယ်၊ မွန်ကာကျောင်းကျေးရွာအုပ်စု၊ မခန်းရွာမှ ဟိုပေါ့ရွာအထိ ကျေးရွာချင်းဆက်လမ်းအရှည် ၁၅ မိုင်၏ လက်ရှိအခြေအနေတွင် ဆိုင်ကယ်များ သွားလာနိုင်သည့် တောင်ပတ်လမ်းဖြစ်ပြီး ကျေးရွာ(၆)ရွာ၊ အိမ်ခြေ ၁၂၂ အိမ်ရှိပြီး လူဦးရေပေါင်း ၅၈၂ ဦးတို့ကို အကျိုးပြုပါကြောင်း သိရှိရပါသည်။ အဆိုပါလမ်းကို ၁၈ ပေအကျယ် မြေသားလမ်းအဆင့်မြှင့်တင် ဆောင်ရွက်မည်ဆိုပါက စုစုပေါင်း ငွေကျပ် ၃၃၃.၇၅ သန်း ကုန်ကျမည်ဖြစ်ပါကြောင်း၊ ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနအနေဖြင့် ဘတ်ဂျက်လျာထား ဆောင်ရွက်သည့်နေရာတွင် ပြည်နယ်/တိုင်းဒေသကြီးများ အတွင်းရှိ လူဦးရေအချိုးအစားအရ လျာထားပေးသည့်အပြင် ပြည်နယ်/တိုင်းဒေသကြီးများ အတွင်းမှာရှိသော မြို့နယ်များအားလုံးကို ပါဝင်လျာထားပေးရပါကြောင်း၊ ထို့အပြင် ကျေးရွာများ၏ လိုအပ်ချက်များအားမြို့နယ်၊ ခရိုင်နှင့် ပြည်နယ်/ တိုင်းဒေသကြီးများမှတစ်ဆင့် ထောက်ခံတင်ပြလာမှုများအပေါ် ဦးစားပေးအစီအစဉ်အတိုင်း ရွေးချယ်လျာထား ပေးပါကြောင်း၊

ရှမ်းပြည်နယ်အတွင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ကျေးလက် ဒေသဖွံ့ဖြိုးတိုးတက်ရေး ဦးစီးဌာန၏ ၂၀၁၆-၁၇ ဘဏ္ဍာရေးနှစ် ခွင့်ပြုရန်ပုံငွေကျပ် သန်းပေါင်း ၇၈၂၀.၂၈၁ သန်းနှင့် ကတ္တရာလမ်း ၁၀ မိုင် ၂ ဖာလုံ၊ ကျောက်ချောလမ်း ၆၄ မိုင် ၂ ဖာလုံ၊ မြေသားလမ်း ၅၄ မိုင် ၆ ဖာလုံ၊ ကွန်ကရစ်တံတား ၈၄၄ ပေ၊ သစ်သားတံတား ၈၁၀ ပေနှင့် ရေပြွန် ၂၀၀ ပေ တို့အား ဆောင်ရွက်ပေးရန် လျာထားလျက်ရှိပါကြောင်း၊ မိုင်းဖြတ်မြို့နယ်အတွက်လည်း ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန၏ ၂၀၁၆-၁၇ ဘဏ္ဍာရေးနှစ် ခွင့်ပြုရန်ပုံငွေမှ ကျပ်သန်းပေါင်း ၂၀၁.၅ သန်းနှင့် ဝမ်မိုင်-ပါပူးလမ်း၊ မိုင်းဖြတ်-ပါထွန်လမ်းနှင့် ယောင်ဟင်-နမ့်ကုန်းလမ်း စုစုပေါင်း ကျောက်ချောလမ်း ၂ မိုင် ၄ ဖာလုံကို ဆောင်ရွက်ပေးနိုင်ရန် လျာထားပါကြောင်း၊ ကျေးလက်ဒေသဖွံ့ဖြိုး တိုးတက်ရေးလုပ်ငန်းများကို ၂၀၁၃ ခုနှစ်မှစပြီး ဆောင်ရွက်ခဲ့သော်လည်း ကျေးလက်ဒေသများတွင် လိုအပ်ချက်များစွာရှိပါကြောင်း၊ မြို့နယ်များမှအဆင့်ဆင့် တင်ပြလာသည့် လုပ်ငန်းများကို ဦးစားပေးရွေးချယ်သည့်နေရာတွင် သက်ဆိုင်ရာအစိုးရအဖွဲ့အစည်းများ၊ ဒေသခံကိုယ်စားလှယ်များ၊ အထောက်အကူပြုကော်မတီများ၊ ဒေသခံပြည်သူများ၏ အမှန်တကယ် လိုအပ်ချက်များ ရှိသော်လည်း မတူကွဲပြားမှုများကို တွေ့ကြုံရပါကြောင်း၊ ထို့အပြင် စီမံကိန်းများ ရေးဆွဲအကောင် အထည်ဖော်သည့် နေရာတွင် သက်ဆိုင်သူအဖွဲ့အစည်းများအားလုံး ပါဝင်ဆွေးနွေးရန် ခက်ခဲမည်ဖြစ်သကဲ့သို့ ဦးစားပေး သတ်မှတ်သည့် နေရာတွင်လည်း အခက်အခဲရှိသည်ကို တွေ့ရှိရပါကြောင်း၊ မိမိတို့အစိုးရလက်ထက်တွင် အဆိုပါ အခက်အခဲများကို နည်းနိုင်သမျှနည်းအောင် စီမံကိန်းများရေးဆွဲပြီး သက်ဆိုင်သူအဖွဲ့အစည်းများအားလုံး ပါဝင်ဆွေးနွေး ရွေးချယ်နိုင်ရေး တတ်နိုင်သမျှ ညှိနှိုင်းစီစဉ် ဆောင်ရွက်ပေးသွားမည်ဖြစ်ပါကြောင်း၊ နိုင်ငံတော်အစိုးရ၏ ခွင့်ပြုရန်ပုံငွေဘောင်အတွင်း ဦးစားပေးလုပ်ငန်းများကို လျာထားဆောင်ရွက်ရခြင်း ဖြစ်သည့်အတွက် တစ်နှစ်အတွင်း ဆောင်ရွက်ပေးနိုင်ခြင်းမရှိသော်လည်း နှစ်အလိုက် ဦးစားပေးလျာထား ဆောင်ရွက်ပေးသွားမည်ဟု ယုံကြည်ပါကြောင်း၊

ပြည်သူ့လွှတ်တော်ကိုယ်စားလှယ်မှ မေးမြန်းလာသည့် ရှမ်းပြည်နယ်(အရှေ့ပိုင်း)၊ မိုင်းဖြတ်မြို့နယ်၊ မွန်ကာကျောင်း ကျေးရွာအုပ်စု မခန်းရွာမှဟိုပေါ့ရွာအထိ ကျေးရွာချင်းဆက်လမ်း ၁၅ မိုင် မြေသားလမ်းအဆင့် မြှင့်တင်ရေး လုပ်ငန်းများတွင် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန၏ ၂၀၁၆-၁၇ ဘဏ္ဍာရေးနှစ်တွင် ပါဝင်ခြင်းမရှိသည့် အတွက် လတ်တလော ဆောင်ရွက်ပေးနိုင်ခြင်းမရှိသော်လည်း ၂၀၁၇-၁၈ ဘဏ္ဍာရေးနှစ်တွင် ခွင့်ပြုချက်ရရှိရေး လျာထား တင်ပြပေးသွားမည်ဖြစ်ပါကြောင်း ရှင်းလင်းဖြေကြားပါသည်။