(ဂ)-ပြည်ထောင်စုဘတ်ဂျက်မှ ချထားပေးခဲ့သော နိုင်ငံတော်စီမံကိန်း လုပ်ငန်းများတွင် လုပ်ပိုင်ခွင့်ရ ကုမ္ပဏီများမှ စာချုပ်ပါအာမခံချက်များ၊ စည်းကမ်း၊ စည်းမျဉ်း၊စံသတ်မှတ်ချက်မလိုက်နာမှုအပေါ် မည် သို့ အရေးယူ မည်ကို သိလိုခြင်း နှင့်စပ်လျဉ်းသည့် မေးခွန်း

ကျန်းမာရေးနှင့်အားကစားဝန်ကြီးဌာနအနေဖြင့် စာချုပ်ပါအာမခံအချက်များ၊ စည်းကမ်း၊ စည်းမျဉ်း၊ စံသတ်မှတ်ချက် မလိုက်နာမှုအပေါ် အောက်ပါအတိုင်း ‌ဆောင်ရွက်ပါကြောင်း၊  သတ်မှတ်ချက် Specification နှင့်မပြည့်စုံခြင်း၊ မကိုက်ညီခြင်းရှိပါက လက်ခံရန်ငြင်းဆန်ခြင်း၊ စာချုပ်ပါ စံသတ်မှတ်ချက်အတိုင်း ပြည့်မီအောင် ဆောင်ရွက်စေခြင်း၊ အဆိုပါ ဆောင်ရွက်မှုအတွက် ကုန်ကျမှုကို လုပ်ငန်းလက်ခံဆောင်ရွက်သူမှ ကျခံခြင်း၊ သတ်မှတ်ရက်ထက် နောက်ကျပါက နောက်ကျကာလအတွက် သတ်မှတ်ထားသော နောက်ကျကြေးကို ပေးသွင်းစေခြင်း၊ လုပ်ငန်း ပြီးစီးမှု နောက်သတ်မှတ်စံနှုန်းမကိုက်ညီသေးပါက ပေးသွင်းထားသော လုပ်ငန်းပြီးမြောက်မှုအာမခံ (Performance Guarantee စက်ပစ္စည်းကိရိယာ ဝယ်ယူသည့်လုပ်ငန်းဖြစ်လျှင် လုပ်ငန်းပမာဏ၏ ၁၀ ရာခိုင်နှုန်း၊ အဆောက်အဦ ဆောက်လုပ်ခြင်းလုပ်ငန်းဖြစ်လျှင် လုပ်ငန်းပမာဏ၏ ၅ ရာခိုင်နှုန်းကို နိုင်ငံတော်၏ဘဏ္ဍာငွေအဖြစ် သိမ်းယူခြင်း၊ စာရင်းစစ်ဆေးပြီးနောက် စာရင်းစစ်အဖွဲ့၏ လုပ်ငန်းစစ်ဆေးမှုကွာခြားမှုရှိပါက ခြားနားငွေပမာဏကိုပြန်လည် ပေးသွင်းစေခြင်း၊ လုပ်ငန်းလက်ခံသူ၏ ဆောင်ရွက်ချက်သည် သတ်မှတ်စည်းမျဉ်း၊ စည်းကမ်းစံသတ်မှတ်ချက် အတိုင်း ဖောက်ဖျက်ကြောင်း ဌာနဆိုင်ရာစစ်ဆေးရေးအဖွဲ့မှ ဆုံးဖြတ်လျှင် ကုမ္ပဏီအားအမည်မဲစာရင်း(Black List) သတ်မှတ်၍ ဌာနအားလုံးသို့ အသိပေးခြင်း၊ စာရင်းစစ်ဆေးပြီး စာရင်းစစ်အစီရင်ခံစာပေးပို့မှုအပေါ်မူတည်၍ လုပ်ထုံးလုပ်နည်းနှင့်အညီ အရေးယူခြင်းများဆောင်ရွက်ခဲ့ပါကြောင်း၊

ဧရာဝတီတိုင်းဒေသကြီး၊ အိမ်မဲမြို့နယ် ရွာသစ်ကျေးရွာတိုက်နယ်ဆေးရုံဆောက်လုပ်ခြင်း လုပ်ငန်းသည် ဖေဖော်ဝါရီ လ ၂၁ ရက် ၂၀၁၃ ခုနှစ်တွင် Top Creative Asia Co,Ltd  ဒက္ခိဏတံခွန် နှင့် လုပ်ငန်းတန်ဖိုး ၄၃၅.၃ သန်းကျသင့်ပြီး ဧရာဝတီတိုင်းဦးစီးဌာနမှူးနှင်‌့ စာချုပ်ချုပ်ဆိုဆောင်ရွက်ခဲ့သောလုပ်ငန်းဖြစ်ပါကြောင်း၊ ဖေဖော်ဝါရီ ၂၁ ရက် ၂၀၁၃ ရက်နေတွင်စ၍ မတ်လ ၃၀ ရက်နေ့ ၂၀၁၅ ရက်နေ့အထိ စုစုပေါင်းရန်ပုံငွေ သန်း ၄၀၀ ထုတ်ပေးခဲ့ပြီး ဖြစ်ပါကြောင်း၊ ကုမ္ပဏီမှ စာချုပ်ပါကျန်ငွေများကို ယနေ့အထိ ထပ်မံတောင်းခံထားခြင်းလည်း မရှိသည့်ကိစ္စနှင့်ပတ်သက်ပြီး ကုသရေးဌာနဦးစီး၏ ဒီဇင်ဘာလ ၁၃ ရက် ၂၀၁၆ နှင့် မတ်လ ၁၅ ရက် ၂၀၁၇ အဖွဲ့များဖွဲ့၍ စုံစမ်းစစ်ဆေးပေးရန် လမ်းညွှန်ချက်အရ  အဖွဲ့ဝင်သုံးဦးပါသော ရှေးဦးကနဦးစုံစမ်းအဖွဲ့ဖွဲ့၍ စုံစမ်းမှု ပြုလုပ် ခဲ့ပါကြောင်း၊ ရှေးဦးစုံစမ်းမှုအဖွဲ့၏ အစီရင်ခံစာတင်ပြချက်နှင့်အညီ ဧရာဝတီတိုင်းဒေသကြီးဦးစီးမှူး၏ တင်ပြချက်အရ ဒီဇင်ဘာလ ၃၀ ရက် ၂၀၁၆ ရက်နေ့တွင် ရွာသီတိုက်နယ်ဆေးရုံကြီးကြပ်မှုကော်မတီ  နှင့် ကုမ္ပဏီ Project Engineer  တို့ညှိနှိုင်း၍ လွှဲပြောင်းလက်ခံဆောင်ရွက်ခဲ့ပြီး ယခုအခါဆေးရုံ လုပ်ငန်းများကို ဆောင်ရွက် နေပြီဖြစ်ပါကြောင်း၊

အိမ်မဲမြို့နယ် ရွာသစ်တိုက်နယ်ဆေးရုံ တည်ဆောက်ခဲ့သည့် Top Creative Asia Co,Ltd  ဒက္ခိဏတံခွန် အား စာရင်းစစ်ဆေးပြီး စာရင်းစစ်အစီရင်ခံစာပေါ်မူတည်၍ လုပ်ထုံးလုပ်နည်းနှင့်အညီ အရေးယူဆောင်ရွက် သွားမည် ဖြစ်ပါကြောင်း၊ ထို့အပြင် မိမိတို့အနေဖြင့် ၎င်းဆေးရုံကို တစ်ပတ်အတွင်း အင်ဂျင်နီယာနှင့်အဖွဲ့ဖွဲ့ပြီး ဆက်လက်ပြီး အရေးယူသင်‌့သည်ကို အရေးယူမည် ဖြစ်ပါကြောင်း၊ မည်ကဲ့သို့ အရေးယူကြောင်းကိုလည်း မိမိအနေဖြင့် လွှတ်တော်ကိုယ်စားလှယ်ကြီးကို တရားဝင်စာဖြင့် ပြန်လည်ပြောကြားမည် ဖြစ်ပါကြောင်း ရှင်းလင်း ဖြေကြားပါသည်။

ဒေါ်သန္တာ (အိမ်မဲမဲဆန္ဒနယ်) က ဆက်စပ် မေးခွန်းမေးမြန်းပါသည်။

ယခုကျန်းမာရေးဝန်ကြီးက ‌ဖြေသွားရာတွင် အလွန်ပြည့်စုံပါကြောင်း၊ အရေးယူမည့်အချက်များကိုလည်း တွေ့ ပါကြောင်း၊ အမှန်တကယ်တွင် အမည်မဲစာရင်းလုပ်သည်မှာ ထိရောက်မှုမရှိပါကြောင်း၊ နိုင်ငံတော်၏ ဘဏ္ဍာငွေများ အလွန်ကုန်ကျရသည်နှင့်အညီ သက်ဆိုင်ရာဌာနက ပြန်ပြီးလုပ်ရမည်ဆိုပါက နှစ်ခါထပ်ကုန်သကဲ့သို့ ဖြစ်သည့် အတွက် သက်ဆိုင်ရာကုမ္ပဏီကို အရေးယူခြင်းအပြင် ကုမ္ပဏီကပေးသွင်းထားသော အဆောက်အဦဖိုးများ၊ ဘဏ္ဍာငွေများကို သိမ်းယူခြင်းတို့သည် အလွန်ကောင်းပါကြောင်း၊ မိမိတို့အင်မတန် ကြိုဆိုပါကြောင်း၊ သက်ဆိုင်ရာ ဆေးရုံပတ်ဝန်းကျင်က ကျေးရွာများနှင့် ဆေးရုံကော်မတီများကို ပွင့်လင်းမြင်သာစွာဖြင့် ပြောပြရန် အစီအစဉ် ရှိပါသနည်းကို သိရှိလိုပါကြောင်း  ဆက်စပ်မေးခွန်း မေးမြန်းပါသည်။

ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေး

မိမိတို့က စံချိန်၊ စံညွှန်း သတ်မှတ်ချက်များနှင့်မညီပါက ပြန်လည်၍ လုံးဝလျော်ခိုင်းမည် ဖြစ်ပါကြောင်း၊ ထို့အပြင် လွှတ်တော်ကိုယ်စားလှယ်ကြီး ပြောသည့်အတိုင်း လွှတ်တော်ကိုယ်စားလှယ်ကြီးကိုသာမက ပတ်ဝန်းကျင်ရှိ လူများ၊ ကော်မတီများ အားလုံးကိုလည်း အကြောင်းကြားမည် ဖြစ်ပါကြောင်း၊ အဆိုပါကိစ္စသည် အထူးအရေးကြီးသည့် အတွက် မိမိတို့အနေဖြင့် သေသေချာချာ ဆောင်ရွက်မည်‌ဖြစ်ပါကြောင်း ဖြေကြားပါသည်။