(ဂ)-နိုင်ငံ့ဝန်ထမ်းဆရာ/မများနှင့်ပညာရေးဝန်ထမ်း များအားလုံးအားနှစ်စဉ် ဝတ်စုံစရိတ်ချီးမြှင့်ပေးရန် အစီအစဉ်ရှိ/မရှိနှင့် စပ်လျဉ်းသည့် မေးခွန်း

ပညာရေးဝန်ကြီးဌာနအနေဖြင့် သက်ဆိုင်ရာဘဏ္ဍာရေးနှစ်အလိုက် သတ်မှတ်ထားသော သာမန်အသုံးစရိတ် ခေါင်းစဉ်အောက်မှ ဝတ်စုံစရိတ် ၀၃-၁၂ ခေါင်းစဉ်အောက်တွင် နှစ်စဉ်ထည့်သွင်းလျာထားလျက်ရှိပါကြောင်း၊ သို့သော် ဆရာ/မများဟုဆိုသော်လည်း ရုံးအကူ၊ စာပို့ဝန်ထမ်းနှင့် ရုံးလုလင်များ၏ အသုံးအဆောင်အဖြစ် အဝတ်အထည်၊ ထီး၊ မိုးကာ စသည်တို့အပါအဝင် တစ်ယောက်ကို နှစ်သောင်းနှုန်း သတ်မှတ်ခံစားခွင့်ပြုရန် ဘဏ္ဍာရေးဝန်ကြီးဌာန၏ ညွှန်ကြားချက်နှင့်အညီ ဆောင်ရွက်လျက်ရှိပါကြောင်း၊ ယခုဘဏ္ဍာရေးနှစ်တွင် နိုင်ငံတော်အတိုင်ပင်ခံ ပုဂ္ဂိုလ်မှလည်း လမ်းညွှန်ထားခြင်းရှိသဖြင့် ဆရာ/မဝန်ထမ်းများကို သင့်တင့်သော ထောက်ပံ့မှု ဆောင်ရွက်ပေးရန် ညွှန်ကြားချက် ရှိသည့်အတွက် ယခု ၂၀၁၇-၁၈ ဘဏ္ဍာရေးနှစ်တွင် စတင်ဆောင်ရွက် နေပြီဖြစ်ပါကြောင်း၊ ပညာရေးဝန်ကြီးဌာနအောက်တွင် ဦးစီးဌာနအဖွဲ့အစည်းပေါင်း ၁၂ ခု ရှိသည့်အပြင် သင်ကြားရေးဆရာ/မများရှိသည့် အခြေခံပညာဦးစီးဌာန၊ အဆင့်မြင့်ပညာဦးစီးဌာန၊ နည်းပညာနှင့် သက်မွေးပညာ ဦးစီးဌာနုအတွင်းရှိ သင်ကြားရေးဆရာ/မများအတွက်ပါ ဆောင်ရွက်ပေးလျက် ရှိပါကြောင်း၊ ၎င်း ဦးစီးဌာနအတွင်းရှိ ဆရာ/မများအနေဖြင့် စုစုပေါင်း ၃၉၆၄၄၅ ဦး ရှိသည့်အတွက် တစ်ဦးလျှင် ဝတ်စုံတစ်စုံ ငွေကျပ် ၁၀၀၀၀ နှုန်းနှင့် ထောက်ပံ့ရန်အတွက် ခွင့်ပြုရန်ပုံငွေကျပ် ၃.၉၆၄ ဘီလီယံသုံးစွဲခွင့် ပြုပါရန်နှင့် ဝတ်စုံများ ထုတ်လုပ်ခြင်းအတွက် စက်မှုဝန်ကြီးဌာနတွင် အပ်နှံ၍ ပူးပေါင်းဆောင်ရွက်ခွင့်ပြုပါရန် နိုင်ငံတော်သမ္မတရုံးသို့ ၃၀-၃-၂၀၁၇ ရက်နေ့တွင် တင်ပြခဲ့ခြင်းအပေါ် နိုင်ငံတော်သမ္မတရုံးမှလည်း ၅-၄-၂၀၁၇ ရက်နေ့တွင် စီးပွားရေးကော်မတီသို့ ဆက်လက်တင်ပြရန် ညွှန်ကြားခဲ့ပါကြောင်း၊ စီးပွားရေးကော်မတီမှလည်း ၂-၆-၂၀၁၇ ရက်နေ့တွင် အထက်တင်ပြခဲ့သည့် ဝတ်စုံစရိတ်ကိစ္စနှင့် ပတ်သက်ပြီးခွင့်ပြုခဲ့ပြီး ပြည်ထောင်စုအစိုးရအဖွဲ့ အစည်းအဝေး၏ ခွင့်ပြုချက်ရယူတင်ပြ ဆောင်ရွက်ရန် ညွှန်ကြားပြီးဖြစ်ပါကြောင်း၊ ထို့ကြောင့် ပညာရေးဝန်ကြီးဌာနအနေဖြင့် တင်ပြပါဦးစီးဌာနသုံးခုရှိ သင်ကြားရေးဝန်ထမ်း ဆရာ/မများအတွက် ဝတ်စုံစရိတ်ထောက်ပံ့ရန်ကိစ္စကို စီမံကိန်းနှင့်ဘဏ္ဍာရေး ဝန်ကြီးဌာန၏ သဘောထားမှတ်ချက်နှင့်အတူ ၂၀၁၇ ၂၈-၇-၂၀၁၇ ရက်နေ့တွင် ပြည်ထောင်စုအစိုးရအဖွဲ့ အစည်းအဝေးသို့ တင်ပြခွင့်ပြုချက် ရယူခဲ့ပါကြောင်း၊ ခွင့်ပြုမိန့်ရရှိပြီးလျှင် လုပ်ထုံးလုပ်နည်းနှင့်အညီ ဆက်လက်ဆောင်ရွက်သွားမည် ဖြစ်ပါကြောင်းနှင့် နောင်လာမည့် ဘဏ္ဍာရေးနှစ်များတွင်လည်း ဘဏ္ဍာငွေလျာထား ဆောင်ရွက်သွားမည်ဖြစ်ပါကြောင်း ရှင်းလင်းဖြေကြားပါသည်။

ဒေါက်တာမောင်သင်း (မိတ္ထီလာမဲဆန္ဒနယ်) က ဆက်စပ်မေးခွန်း မေးမြန်းပါသည်။

ကျန်းမာရေးနှင့် အားကစားဝန်ကြီးဌာနအနေဖြင့် သူနာပြုများအတွက် တစ်နှစ်ကို ကျပ် နှစ်သောင်းနှင့် စားစရိတ်များကို ထောက်ပံ့ရန် စီစဉ်လျက်ရှိသည်ကို သိရှိရပါကြောင်း၊ မိမိတို့ပညာရေး ဆရာ/မများအတွက် တစ်သောင်းဆိုသည်မှာ နည်းလွန်းသည့်အတွက် ထပ်မံတိုးမြှင့်ပေးရန် အစီအစဉ်ရှိ/မရှိ ဆက်စပ်မေးခွန်း မေးမြန်းပါသည်။

ပညာရေးဝန်ကြီးဌာန၊ ဒုတိယဝန်ကြီး ဦးဝင်းမော်ထွန်း

ပညာရေးဝန်ကြီးဌာနအနေဖြင့် ဘတ်ဂျက်ငွေများ လျာထားရာတွင် နိုင်ငံတော်မှသတ်မှတ်ထားသည့် ရငွေသုံးငွေ လုပ်ထုံးလုပ်နည်းအတိုင်း ဆောင်ရွက်ရခြင်းဖြစ်သည့်အတွက် ကိုယ်စားလှယ်တော်ကြီး တင်ပြသကဲ့သို့ ယခုဆောင်ရွက်ပေးနေသော တစ်သောင်းမှ နှစ်သောင်းသို့ တိုးမြှင့်ဆောင်ရွက်နိုင်ရန်အတွက် ရငွေသုံးငွေ ဥပဒေများနှင့်အညီ ညှိနှိုင်းဆောင်ရွက် ပါမည်ဖြစ်ပါကြောင်း ရှင်းလင်းဖြေကြားပါသည်။