(င)-ခေါင်လန်ဖူးမြို့နယ်အတွင်း ဆောက်လုပ်ရေး ဝန်ကြီးဌာနပိုင် လမ်းကြောင်းပေါ်ရှိကြားစခန်းများ တွင် တာဝန်ထမ်းဆောင်နေသည့် ကြားစခန်း အ စောင့်များအား အမြဲတမ်းဝန်ထမ်းခန့်ထားပေးရန် နှင့် ဝန်ထမ်းလစာအတိုင်းပေးရန် အစီအစဉ် ရှိ/မ ရှိ နှင့်စပ်လျဉ်းသည့် မေးခွန်း

ရပ်ဘော့- ငါ့လုံဒမ်- ခေါင်လန်ဖူးလမ်းသည် အရှည် ၆၅ မိုင် ၄ ဖာလုံရှိပြီး ၎င်းလမ်းပေါ်တွင် ကြားစခန်းများအနေဖြင့် မိုင်တိုင်အမှတ် ၂၆ မှာ ငါ့လုံဒမ်စခန်း၊ မိုင်တိုင်အမှတ် ၃၈ မိုင် ၄ ဖာလုံတွင် နုဝမ်ကောင်စခန်း၊ မိုင်တိုင်အမှတ် ၄၄ မိုင် ၄ ဖာလုံတွင် ရီဒန်းစခန်းနှင့်  မိုင်တိုင်အမှတ် ၅၄ မှာ ထလားလော်စခန်း စုစုပေါင်း လမ်းစခန်း ၄ ခုရှိပါကြောင်း၊ ၎င်းစခန်း ၄ ခုလုံးက လမ်းဖောက်လုပ်သည့် အင်ဂျင်နီယာများ၊ လမ်းလုပ်သားများ လမ်းပြင်ဆင်ထိန်းသိမ်းခြင်း လုပ်ငန်းများ ဆောင်ရွက်လျက် ရှိသည့် လိုအပ်သည့်အချိန်တွင် အသုံးပြုနိုင်ရန်အတွက် ထားရှိသည့်  ယာယီစခန်း ၄ ခုသာ ဖြစ်ပါကြောင်း၊

ကချင်ပြည်နယ်သာမကဘဲ ကျန်တိုင်းဒေသကြီး/ပြည်နယ်ရှိ လမ်းများအားလုံးတွင် လမ်းစခန်းများ ရှိပါကြောင်း၊ ၎င်းလမ်းစခန်းများ လမ်းဖောက်လုပ်သည့် အချိန်တွင် လမ်းလုပ်သားများ၏ ပစ္စည်များ ဖြစ်သည့် တောင်း၊ ဝါး၊ ပေါက်တူး၊ ပေါက်ချွန်းများ၊ ကတ္တရာပုံးများ စသဖြင့် ၎င်းပစ္စည်းများကို ယာယီသိမ်းဆည်းထားသည့် စခန်းများဖြစ်ပြီး ၎င်း လမ်းလုပ်ငန်းများပြီးသွားလျှင် မိမိတို့ အစောင့်များ ထားရှိမည်မဟုတ်ပါကြောင်း၊ ကချင်ပြည်နယ်၊ ချင်းပြည်နယ်နှင့် အလားတူ မိုးတွင်းကာလတွင် မြေပြိုနိုင်သည့် နေရာတွင် အစောင့်များ ထားရှိရပါကြောင်း၊ ၎င်းတို့အားလုံးသည် ယာယီစခန်းများသာ ဖြစ်ပါကြောင်း၊ လမ်းလုပ်ငန်းခွင် ကြားစခန်းများသည် ယာယီစခန်းများသာဖြစ်ပြီး အမြဲတမ်းဝန်ထမ်း ခန့်အပ်ရန် ဖွဲ့စည်းပုံပါဝင်ခြင်း မရှိပါသဖြင့် လုပ်ငန်းလိုအပ်ချက်အပေါ် မူတည်ပြီး ယာယီနေ့စားဝန်ထမ်းအဖြစ်သာ ခန့်ထားဆောင်ရွက် လျက်ရှိပြီး အဆိုပါ ကြားစခန်းအစောင့်များအား အမြဲတမ်းဝန်ထမ်းခန့်ထားပေးရန် အစီအစဉ် မရှိပါကြောင်း ရှင်းလင်း‌ဖြေကြားပါသည်။

ဦးအာမိုးဆီ (ခေါင်လန်ဖူးမဲဆန္ဒနယ်) က ဆက်စပ်မေးခွန်း မေးမြန်းပါသည်။

သို့သော် တချို့ကြားစခန်းအစောင့်များက မိမိတို့မကြာခင် ပင်စင်ရတော့မည် ဟုပြောကြားပါကြောင်း၊ နှစ်ပေါင်း ၂၀ ကျော် ၃၀ နီးပါး ယာယီနေ့စားနှင့် ခန့်ထားပေးသည်ဆိုသည်မှာ ဌာနများတွင် တွေ့ရှိခြင်းမရှိပါကြောင်း၊ ထို့ကြောင့် နေ့စားဖြင့် ခန့်မည်ဆိုပါက စခန့်ကတည်းက ကာယကံရှင်များ သိရှိခြင်းရှိ/မရှိ ကာယကံရှင်များ ကျေနပ်ခြင်းရှိ/မရှိ စသည့် သူတို့၏ အခွင့်အရေးများ မဆုံးရှုံးစေရန် ဝန်ကြီးဌာနအနေဖြင့် မည်ကဲ့သို့စီစဉ်ဆောင်ရွက် ပေးမည်ကိုလည်း သိရှိလိုပါကြောင်း မေးမြန်းဆက်စပ်မေးခွန်း မေးမြန်းပါသည်။

ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးကျော်လင်း

ကချင်ပြည်နယ်သာမက ချင်းပြည်နယ်တွင် မြေပြိုနိုင်သည့် နေရာများကို ပိုပြီးဂရုစိုက်ရပါကြောင်း၊ မြေပြိုလျှင် ချက်ချင်းသတင်းပို့ပါ စသဖြင့် ၎င်းကိစ္စမျိုးတွင် မိမိတို့က လစာပေးထားရပါကြောင်း၊ လစာဆိုသည်မှာ နေ့စားလစာဖြစ်ပါကြောင်း၊  မိုးတွင်းကာလကုန်သွားလျှင် သူတို့၏တာဝန် မရှိတော့ပါကြောင်း၊ အလားတူ ရေကျော်နိုင်သည့် နေရာများကိုလည်း စောင့်ကြည့်ရန် ဒေသခံများကို ကျွန်တော်တို့က တာဝန်ပေးရပါကြောင်း၊ ယခုလို ယာယီစခန်းများသည် တစ်နိုင်ငံလုံးအနှံ့ ရှိသည့်အတွက် ယာယီအဖြစ်သာ အသုံးပြုခြင်းဖြစ်သည့်အတွက် လောလောဆယ် အမြဲတမ်းဝန်ထမ်း အဖြစ်ခန့်ထားပေးနိုင်ခြင်း မရှိပါကြောင်း ရှင်းလင်းဖြေကြားပါသည်။