(ဂ)-လှည်းကူးမြို့နယ်မှ လက်ပံ လျှပ်စစ်ရေတင် စီမံကိန်း (အပိုင်း-၂၊ ကင်မွန်းချုံ) ကို ဆက်လက် အကောင်အထည်ဖော်ရန် အစီအစဉ် ရှိ၊ မရှိ နှင့် စပ်လျဉ်းသည့်မေးခွန်း

ရန်ကုန်တိုင်းဒေသကြီး၊ လှည်းကူးမြို့နယ်တွင် လက်ပံလျှပ်စစ်မြစ်ရေတင်စီမံကိန်း (အပိုင်း ၂၊ ကင်မွန်းချုံ) ကို လယ်ယာမြေ ၇၀၂၅ ဧကကို ရေပေးဝေရန် လက်ပံအပိုင်း၊ ကင်မွန်းချုံအပိုင်း၊ ရှမ်းတဲကြီးအပိုင်းဟူ၍ အပိုင်းကြီး(၃)ပိုင်းခွဲပြီး ၂၀၀၆-၂၀၀၇ ခုနှစ်က စတင်အကောင်အထည် ဖော်ခဲ့ပါကြောင်း။ ထိုကဲ့သို့ ၂၀၀၆-၀၇ ခုနှစ်မှစ၍ နှစ်စဉ်ဘတ်ဂျက် လျာထားချက်နှင့် ဆောင်ရွက်ခဲ့ရာတွင် ၂၀၁၁-၁၂ ခုနှစ်တွင် အပိုင်း(၁) လက်ပံလုပ်ငန်းပြီးစီးပြီး ဘတ်ဂျက် ငွေပိုသည့်အတွက် အပိုင်း(၂) ကင်မွန်းချုံလုပ်ငန်းကို ဆက်လက် အကောင်အထည် ဖော်ခဲ့ရာတွင် ပင်မမြောင်းကြီးဖြစ်သော ပေ ၃၆၁၈ ပေကို အကောင်အထည်ဖော်နိုင်ပြီး နောက်နှစ်များတွင် ဘတ်ဂျက်များ မရရှိသည့်အတွက် ဆက်လက်လုပ်ဆောင်ရန် ရှိသည် မြို့ပြအဆောက်အဦ ပိုင်းများ၊ လျှပ်စစ်ပိုင်းများ၊ စက်မှုပိုင်းများ၊ လက်တံတို/ လက်တံခွဲများ ဆောင်ရွက်ရန် ကျန်ရှိနေပါကြောင်း။ ထိုကဲ့သို့ လက်တံမြောင်းကြီး ဆောင်ရွက်ပြီးပါသော်လည်း ရေမရရှိ သေးသည့်အတွက် လယ်သမားကြီးများ၊ ဒေသခံများက မိမိကို ယခုနှစ်ဦးပိုင်းတွင် လာရောက်တောင်းဆို ဆွေးနွေးပါကြောင်း။ မြစ်ရေတင် စီမံကိန်းဦးစီးဌာန၊ မိမိနှင့် ဒေသခံလယ်သမားများသည် ၇-၅-၂၀၁၆ ရက်နေ့တွင် ဒေသခံအလုပ်ရုံတွင် တွေ့ဆုံပွဲပြုလုပ်ပါကြောင်း။ ယခုလိုဆွေးနွေးပွဲအပြီးတွင် လယ်သမားများက နှစ်ပေါင်းလေးနှစ်နီးပါး စောင့်ဆိုင်းခဲ့သည့်အတွက် ယခု ၂၀၁၇-၁၈ ခုနှစ်ထိ ပြီးစီးမှုမရှိပါက ၎င်းတို့သဘောတူထားသည့် မြေကြီးများကို ပြန်လည်ပေးအပ်ရန်နှင့် ယခုပြုလုပ်ထားသည့် အစီအစဉ်များကိုလည်း ဖျက်သိမ်း၍ လယ်မြေအတိုင်း ပြန်လည်ပြုလုပ်ပေးရန် တောင်းဆိုထားပါကြောင်း၊ ရေအသုံးချရေး စီမံခန့်ခွဲရေး ဦးစီးဌာနက ဝန်ထမ်းများနှင့် မိမိတို့သည် အရေးတကြီး လုပ်ငန်းအနေဖြင့်ခံယူပြီး သက်ဆိုင်ရာ ဌာနဆိုင်ရာကလည်း ဌာနဆိုင်ရာ အဆင့်ဆင့်ကို ဆွေးနွေးပွဲ မှတ်တမ်းနှင့်အတူ တင်ပြပါကြောင်း၊ လယ်သမားများနှင့် ညှိနှိုင်းပြီး ဆောင်ရွက်ခွင့်ပြုထားသည့် လယ်မြေပေါ်တွင် ဆောင်ရွက်ပြီးသည့် မူလမြောင်းမကြီး၏ ပမာဏသည် ပေပေါင်း ၃၆၁၈ ပေဖြစ်ပြီး မြေသားကျင်းအနေနှင့် ၁၅၃၃၀ ဖြစ်ပြီး လုပ်ငန်းတန်ဖိုးက ၁၅၄၇၂၁၁၅ ကျပ် တန်ဖိုး ဖြစ်ပါကြောင်း၊ ယခုတန်ဖိုးသည် အကယ်၍ ၂၀၁၇-၁၈ ဘတ်ဂျက်တွင် ပါဝင်ခြင်း မရှိပါက ထိုငွေကို နိုင်ငံတော်က ကျခံပြီးဖြစ်သည့်အတွက် ဆုံးရှုံးသွားမည် ဖြစ်ပါကြောင်း၊ ထို့အပြင် တောင်သူလယ်သမားများ တောင်းဆိုထားသည့်အတိုင်း လယ်မြေအတိုင်း ပြန်လည်ပြုလုပ်ပေးရမည် ဖြစ်သည့်အတွက် သိန်း ၅၀ ကျော် ထပ်မံကုန်ကျမည် ဖြစ်ပါကြောင်း၊ ထို့ကြောင့် လှည်းကူးမြို့နယ်မှ လက်ပံ လျှပ်စစ်မြစ်ရေတင် စီမံကိန်း (အပိုင်း ၂၊ ကင်မွန်းချုံ) ကို ဆက်လက် အကောင်အထည်ဖော်ရန် အစီအစဉ် ရှိ/မရှိ သိရှိလိုပါကြောင်း မေးမြန်းပါသည်။