အမှတ်(၁၁) ကျွန်းစုမြို့နယ်၊ ရေမြစ်ကြီးကျေးရွာအုပ်စု၊ မကျီးကျွန်း အ.မ.က ကျောင်းသည် လွန်ခဲ့သည့် ၁၉၈၇ ခုနှစ်မှစ၍ နှစ်ပေါင်း ၃၀ နီးပါး ကိုယ်ထူကိုယ်ထစနစ်ဖြင့် ဆောက်လုပ်၍ ပညာသင်ကြားနေခဲ့ရာမှ ယခုနှစ်မှစ၍ အ.မ.က ကျောင်းအဖြစ် Sanction တောင်းခံရာမှ တိုးမြှင့်ပေး ခဲ့ပြီးဖြစ်ရာ ယခင်ကျောင်းအနေအထားမှာ အန္တရာယ်ရှိကျောင်းဆောင်အဖြစ် တည်ရှိနေပါသဖြင့် ကျောင်းသား/သူများ ပညာသင်ကြားရေးတွင် အခက်အခဲများစွာ ကြုံတွေ့နေရပါကြောင်း၊
ကျွန်းစုမြို့နယ်၊ ကမ်းဘကျေးရွာအုပ်စု၊ ကဒဲကဒွတ်ကျေးရွာကျောင်းမှာလည်း ယခင်နှစ်ကစ၍ မူလွန် အ.မ.က အဖြစ် Sanction တောင်းခံရာမှ တိုးမြှင့်ပေးခဲ့ပြီးဖြစ်၍ လက်ရှိကျောင်းဆောင်သည် ကိုယ်ထူကိုယ်ထ ဆောက်လုပ်ထားသည့် ကျောင်းဖြစ်၍ ပေ ၂၀ x ပေ ၄၀ သာရှိပြီး အလွန်တရာ ကျဉ်းမြောင်းလှသည်ဖြစ်၍ အဆိုပါကျောင်းဆောင်တွင် မြေနှစ်ဧကရှိသည့်အပြင် ကျောင်းဆောင် အသစ်ဆောက်လုပ်ရန် အမှုတွဲလည်း တင်ပြတောင်းခံထားပြီးဖြစ်ပါကြောင်း၊ ၎င်းတို့မှာ ကဒဲ၊ ကဒွတ် ကျောင်း၏ အနေအထားဖြစ်ပါကြောင်း၊ သို့ပါ၍ အဆိုပါ မကျီးကျွန်း အ.မ.ကနှင့် ကဒဲကဒွတ် မူလွန်ကျောင်းတို့အား အသစ်ထပ်မံဆောက်လုပ်ပေးရန် အစီအစဉ်ရှိ/မရှိ၊ ရှိမည်ဆိုပါက မည်သည့် အချိန်တွင် ဆောက်လုပ်ပေးပါမည်နည်း၊ အစီအစဉ်မှရိပါကလည်း အဘယ်ကြောင့်နည်းဆိုသည်ကို ဒေသခံများ၏ တောင်းဆိုချက်အရ သိရှိလိုပါကြောင်း မေးမြန်းပါသည်။
ယခုဘဏ္ဍာရေးနှစ်အတွင်း ကျွန်းစုမြို့နယ်အတွက် တည်ဆောက်ရေးလုပ်ငန်းများ ဆောင်ရွက်ရန် ငွေလုံးငွေရင်းရန်ပုံငွေ ကျပ်သိန်းပေါင်း ၅၄၆၀ ခွဲဝေလျာထားပြီး လုပ်ငန်းများ ဆောက်လုပ်ရေး ဝန်ကြီးဌာနမှ ဆောင်ရွက်နေပြီဖြစ်ပါကြောင်း၊ တနင်္သာရီတိုင်းဒေသကြီး၊ ကျွန်းစုမြို့နယ်၊ ရေမြစ်ကြီးကျေးရွာအုပ်စု၊ မကျီးကျွန်းကျေးရွာ အခြေခံမူလတန်းကျောင်းကို စိစစ်ရာတွင် ၂၀၁၇-၁၈ ပညာသင်နှစ်တွင် ကိုယ့်အားကိုယ်ကိုးမူလတန်းကျောင်း အဆင့်မှ အခြေခံပညာမူလတန်းကျောင်း အဆင့်သို့ တိုးမြှင့်ဖွင့်လှစ်ရရှိခဲ့သည့်ကျောင်း ဖြစ်ပါကြောင်း၊ ၎င်းကျောင်းတွင် ၃၆ ပေ x ၂၄ ပေ ဓနိမိုး၊ ထရံကာတစ်ထပ်ဆောင်တစ်ဆောင်၊ ကျောင်းသား/သူ ဦးရေအနေဖြင့် စုစုပေါင်း ၁၀၇ ဦးရှိပါကြောင်း၊ ကဒဲကဒွတ်ကျေးရွာ အခြေခံပညာမူလတန်းလွန်ကျောင်းမှာ ၆၀ ပေ x ၃၀ ပေ သွပ်မိုး၊ အုတ်ညှပ် တစ်ထပ်ဆောင် တစ်ဆောင်၊ ၃၀ ပေ x ၂၀ ပေ သွပ်မိုး၊ အုတ်ညှပ်တစ်ထပ်ဆောင် တစ်ဆောင်နှင့် ၁၈ ပေ x ပေ ၂၀ သွပ်မိုး၊ အုတ်ညှပ်တစ်ထပ်ဆောင် တစ်ဆောင် စုစုပေါင်းစာသင်ဆောင် သုံးဆောင်ရှိပြီး ကျောင်းသား/သူဦးရေအနေဖြင့် မူလတန်းအဆင့် ၇၁ ဦး၊ အလယ်တန်းအဆင့် ၃၆ ဦး စုစုပေါင်း ၁၀၇ ဦးသာရှိသည့်အတွက် လက်ရှိအခြေအနေတွင် စာသင်ခန်းဧရိယာနှင့် အခြားကျောင်းများနှင့် နှိုင်းယှဉ်ပါက လုံလောက်မျှတမှုရှိသည်ကို တွေ့ရှိရပါကြောင်း၊ သို့သော် ဒေသခံပြည်သူများ တင်ပြအချက်အပေါ် ဖြည့်ဆည်းပေးသောအားဖြင့် ကျွန်းစုမြို့နယ်၊ မကျီးကျွန်းကျေးရွာ အခြေခံမူလတန်းကျောင်း အတွက် ၂၀၁၇-၁၈ ငွေလုံးငွေရင်းတွင် ဦးစားပေးမဖြစ်သော်လည်း သာမန်အသုံးစရိတ်ငွေ ခေါင်းစဉ်အောက်မှ ပေ ၆၀ x ပေ ၃၀ Type-C တစ်ဆောင် ဖြည့်ဆည်း ဆောင်ရွက်ပေးမည်ဖြစ်ပါကြောင်း၊ ကဒဲကဒွတ်ကျေးရွာအနေဖြင့် ကျောင်းသားနှင့် စာသင်ခန်း လုံလောက်မျှတမှု ရှိနေသေးသည့်အတွက် ၂၀၁၈-၁၉ ဘဏ္ဍာရေးနှစ်တွင် ငွေလုံးငွေရင်းရန်ပုံငွေ လျာထားခြင်း မရှိသေးပါကြောင်း ရှင်းလင်းဖြေကြားပါသည်။