(က)-ဒေးဒရဲမြို့နှင့်တော်ကမယ်၊ကြုံကြပ်၊သာယာ ကုန်း၊သံဒိဇီးဖြူကုန်းဆက်သွယ်သောလမ်းအရှည် ၁၄ မိုင် ၆ ဖာလုံအား ပိုမိုမြန်ဆန်စွာ အကောင်အ ထည်ဖော်ဆောင်ရွက်ပေးရန်အစီအစဉ် ရှိ/မရှိနှင့် စပ်လျဉ်းသည့် မေးခွန်း

ဒေးဒရဲမြို့သည် ရန်ကုန်မြို့မှ ၄၅ မိုင်ကွာဝေးပြီး တစ်နာရီခွဲခရီးသွားရပါကြောင်း၊ ရန်ကုန်တိုင်းဒေသကြီး၊ ကွမ်းခြံကုန်းမြို့နှင့်ဒေးဒရဲမြို့ကို ဧရာဝတီမြစ်ကူးတံတား (ဒေးဒရဲ) နှင့် ဆက်သွယ်ပေးထားပါကြောင်း၊ ဒေးဒရဲမြို့ကနေ ဖျာပုံလမ်းမှတစ်ဆင်‌့ ဖျာပုံ-ဘိုကလေးမြို့ကို လည်းကောင်း၊ ကျိုက်လတ်လမ်းကတစ်ဆင့် ကျိုက်လတ်မြို့ကိုလည်းကောင်း သွားလာနိုင်ပြီး ယခုတောင်းဆိုလိုသည့် လမ်းမှာ ဒေးဒရဲမြို့မှ မုတ္တမပင်လယ်ကွေ့ ပင်လယ်ဝကို ဆက်သွယ် ပေးထားသည့် လမ်း ၁၄ မိုင် ၆ ဖာလုံလမ်း ဖြစ်ပါကြောင်း၊

၎င်းလမ်းကို ၁၉၉၀ ခုနှစ်ကစတင်၍ လူထုလုပ်အားပေးဖြင့် ဖောက်လုပ်ခဲ့ခြင်း ဖြစ်ပါကြောင်း၊ ၁၉၉၇-၉၈ ခုနှစ်တွင် စည်ပင်သာယာက တာဝန်ယူပြီး‌ မြေသားအဆင့်မြှင့်ပေးရာတွင် ဘတ်ဂျက်အခြေအနေအရ ၁၃ မိုင်သာ မြေသားအဆင့်မြှင့်ပြီး ကျန်သည့် ၃ မိုင် ၃ ဖာလုံက ရိုးရိုးမြေသားလမ်းအဖြစ် ကျန်ရှိနေခဲ့ပါကြောင်း၊ ၂၀၁၆-၁၇ ခုနှစ်တွင် ကျေးလက် ဦးစီးဌာနကနေပြီး တော်ကူမယ်တိုက်နယ်အထိ ၃ မိုင် ၃ ဖာလုံ ကျောက်ချောလမ်းခင်းထားပေးခဲ့ပြီး ၎င်းလမ်းပေါ်တွင် ၂၀၁၆-၁၇ ခုနှစ် ကျေးလက်ဦးစီးက ၆.၆ ဖာလုံ ကွန်ကရစ်လမ်း ခင်းထားပေးခဲ့ပါကြောင်း၊ ယခုနှစ် ၂၀၁၇-၁၈ ခုနှစ်တွင် နောက်ထပ် ၁ မိုင် ၁.၈ ဖာလုံ ကွန်ကရစ်လမ်းခင်းရန် ဘတ်ဂျက်လျာထားပြီးသည့် အတွက်ကြောင့် ကွန်ကရစ်လမ်းက စုစုပေါင်း ၂ မိုင် ဝ.၄ ဖာလုံ ခင်းပြီးဖြစ်ပါကြောင်း၊ ထိုလမ်းကို ၁၉၉၀ ခုနှစ်ကစဖောက်ခဲ့ရာ ၂၇ နှစ်ရှိပြီဖြစ်ပါကြောင်း၊ ကျန်ရှိသော ကျောက်ချောလမ်း ၁ မိုင်ကျော်နှင့် မြေသားအဆင့်မြှင့်ပြီး ၈ မိုင်၊ ရိုးရိုးမြေသားလမ်း ၃ မိုင် ၃ ဖာလုံ စုစုပေါင်း ၁၂ မိုင် ၆ ဖာလုံခန့်ကို ကျန်ရှိနေသည့် အတွက်ကြောင့် ၎င်းနှုန်းအတိုင်း ဆက်ခင်းမည်ဆိုပါက နောက်ထပ်တစ်နှစ် ၁ မိုင်နှုန်းဖြင့်ဆိုလျှင် ၁၀ နှစ်ကျော်ကြာဦးမည် ဖြစ်ပါကြောင်း၊

ယခုလမ်းသည် ဒေးဒရဲမြို့နယ်အတွက် အရေးပါသည့် အဓိကလမ်းဖြစ်ပါကြောင်း၊ ဒေးဒရဲမြို့နှင့်တကွ အခြားမြို့များကို မုတ္တမပင်လယ်ကွေ့နှင့် ဆက်သွယ်ပေးထားသောလမ်း ဖြစ်ပါကြောင်း၊ ၎င်းလမ်းဖြတ်သွားရာ တစ်လျောက်ရှိ လမ်းဘေးဘယ်ညာကရွာများ၊ တခြားဘက်မှ ကျွန်းရွာများ၊ ပင်လယ်ကွေ့ကရွာများ၊ ပင်လယ်ကမ်းစပ်ကရွာများ အားလုံးက ထိုလမ်းသည် ကုန်းလမ်းဖြစ်သောကြောင့် မြန်သည့်အတွက် ထိုလမ်းကိုအသုံးပြုကြပါကြောင်း၊ မြစ်ချောင်းများခြားသည့် ရွာများကလည်း မြစ်ချောင်းကိုဖြတ်ပြီး ကုန်းလမ်းကိုအသုံးပြုကြပါကြောင်း၊ စုစုပေါင်းအကျိုး ပြုမည့်ရွာက ၈၀ ခန့်၊ လူဦးရေ ၄၅၀၀၀ ခန့်ကို အကျိုးပြုမည် ဖြစ်ပါကြောင်း၊ ထိုလမ်းကို အသုံးပြုလိုကြသည့်အတွက် ရွာသားများက လမ်းကိုတောင်းဆိုပေးရန် အဆိုပြုကြပါကြောင်း၊ လမ်းကိုအသုံးပြုလိုသည့်အတွက်ကြောင့် အကယ်၍ လမ်းခင်းပေးမည်ဆိုပါက ပညာရေးအရ ပြောမည်ဆိုလျှင် တော်ကမယ် အ.ထ.က၊ ဒေးဒရဲ အ.ထ.က ကို အိမ်မှနေ့ချင်းပြန် သွားလာပြီး ကျောင်းတက်နိုင်မည် ဖြစ်ပါကြောင်း၊ ရေလမ်းက သွားရေးလာရေး ရေတက်/ရေကျ စောင့်လျှင် အခက်အခဲရှိနေသည့် အတွက်ကြောင့် ဤလမ်းပြီးစီးရန် ဒေးဒရဲမြို့နယ်အတွက် အရေးကြီးသည့် အတွက်ကြောင့် ၎င်းလမ်းကို မြန်မြန်ဆန်ဆန် ဖောက်ပေးနိုင်ခြင်း ရှိ/မရှိသိရှိ လိုပါကြောင်း မေးမြန်းပါသည်။