(ခ)-မြန်မာနိုင်ငံအပေါ် ဂမ်ဘီယာနိုင်ငံကတရားစွဲဆိုမှုကို ရင်ဆိုင်ဖြေရှင်းရာတွင်လုပ်အားအတွက်ကုန်ကျစရိတ်အဖြစ်တစ်ဦးချင်းစီအလိုက်မည်မျှကုန်ကျသည်အသေးစိတ်ရှင်းလင်းပေးရန်နှင့်ခရီးစရိတ်ကုန်ငွေကိုလည်းစိစစ်ရှင်းလင်းပေးရန် အစီအစဉ်ရှိ/မရှိတို့နှင့်စပ်လျဉ်း သည့်မေးခွန်း

အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး ဌာန ၊ ပြည်ထောင်စုဝန်ကြီး ဦးကျော်တင်

ပထမအချက်ဖြစ်သည့် ICJ တွင် တရားရင်ဆိုင်ခြင်းကိစ္စသည် နိုင်ငံတော်နှင့် ပြည်သူတစ်ရပ်လုံး၏ အကျိုးစီးပွား၊ နိုင်ငံတော်၏ပုံရိပ်တို့နှင့်သက်ဆိုင်သည့် အရေးကြီးကိစ္စဖြစ်သည့်အတွက် တရားရင်ဆိုင်ရာတွင် ကုန်ကျရသည့် ကျွမ်းကျင်ပညာရှင်ရှေ့နေများငှားရမ်းခြင်း၊ ဥပဒေအကြံပေးများခန့်အပ်ခြင်းစသည့်အသုံးစရိတ်များသည် နိုင်ငံတော်၏ ဘဏ္ဍာငွေမှ ကျခံသုံးစွဲခွင့်ရှိသည့် ကိစ္စဖြစ်ပါကြောင်း၊ ၎င်းအသုံးစရိတ်များသည် နိုင်ငံခြားရေးဝန်ကြီးဌာန၏ သာမန်အသုံးစရိတ်များဖြစ်သည့်အပြင် ရသုံးမှန်းခြေငွေစာရင်းဦးစီးဌာနမှ ညွှန်ကြားရေးမှူးချုပ်၊ စီမံကိန်း၊ ဘဏ္ဍာရေးနှင့် စက်မှု ဝန်ကြီးဌာနအောက်တွင်ရှိသည့် ကော်မတီသုံးရပ်၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန ပြည်ထောင်စုဝန်ကြီးနှင့် ဒုတိယသမ္မတအဆင့်အထိ တစ်ဆင့်ပြီးတစ်ဆင့် စိစစ်စစ်ဆေးပြီး ထိုမှတစ်ဆင့် ပြည်ထောင်စုလွှတ်တော်၊ ပြည်သူ့ငွေစာရင်းပူးပေါင်းကော်မတီတို့မှ အသေးစိတ် အဆင့်ဆင့် စိစစ်အတည်ပြုခွင့်ပြု ပေးခဲ့သည့် အသုံးစရိတ်များ ဖြစ်ပါကြောင်း၊ မြန်မာနိုင်ငံအပေါ် အပြည်ပြည်ဆိုင်ရာတရားရုံးတွင် ဂမ်ဘီယာနိုင်ငံ၏ တရားစွဲဆိုမှုကို ဖြေရှင်းရာတွင် နိုင်ငံခြားရေးဝန်ကြီးဌာန၊ နိုင်ငံခြားရေးရားဦးစီးဌာနများ လုပ်အားခအတွက် ကုန်ကျငွေအဖြစ် ၂၀၁၉-၂၀၂၀ ဘဏ္ဍာရေး နှစ် ဖြည့်စွက်ခွင့်ပြုငွေ ကျပ်သန်း ၆၈၀ တောင်းခံခဲ့သည့် ကိစ္စနှင့်စပ်လျဉ်း၍ မေလ ၂၇ ရက်နေ့တွင် ကျင်းပခဲ့သည့် ဒုတိယအကြိမ် ပြည်ထောင်စုလွှတ်တော် (၁၆)ကြိမ်မြောက် ပုံမှန်အစည်းအဝေး ပဉ္စမနေ့တွင် ယင်းသို့ဖြည့်စွက်တောင်းခံခဲ့ရခြင်း ကိစ္စသည် ဥပဒေ၊ လုပ်ထုံးလုပ်နည်းများနှင့်အညီ ဆောင်ရွက်ခြင်းဖြစ်ကြောင်းကိုလည်း အသေးစိတ် ရှင်းလင်းတင်ပြခဲ့ပြီးဖြစ်ပါကြောင်း၊ နိုင်ငံခြားရေးဝန်ကြီးဌာန၏သာမန်အသုံးစရိတ်ခေါင်းစဉ်အောက်မှ သက်ဆိုင်ရာဘဏ္ဍာရေးနှစ်အတွင်း ကျခံသုံးစွဲခဲ့သည့် အသုံးစရိတ်ဖြစ်သည့်အတွက် ဌာန၏အတွင်း စာရင်းစစ်အဖွဲ့နှင့် ပြည်ထောင်စု စာရင်းစစ်ချုပ်ရုံး၊ စာရင်းစစ်အဖွဲ့တို့မှ ဘဏ္ဍာရေးစည်းမျဉ်းဥပဒေ၊ လုပ်ထုံးလုပ်နည်းများနှင့်အညီ သုံးစွဲခြင်းရှိ/မရှိ၊ ရှေ့နေခအသေးစိတ်အပါအဝင် အသုံးစရိတ်များသည် မှန်ကန်မှုရှိ/မရှိတို့ကိုလည်း အစစ်ဆေးခံသွားမည် ဖြစ်ပါကြောင်း၊

ဒုတိယအချက်ဖြစ်သည့် ခရီးစရိတ်ကုန်ကျငွေနှင့် လေးလံပစ္စည်း သယ်ဆောင်မှုစရိတ်စကများအတွက် ကျပ် ၃၅၁.၆၀၀ သန်းကို စနစ်တကျအသေးစိတ်ရှင်းလင်းပေးရန် အစီအစဉ်ရှိ/မရှိ သိလိုခြင်းကိစ္စနှင့်ပတ်သက်ပြီး ဖြေကြားသွားမည် ဖြစ်ပါကြောင်း၊ ၎င်းကိစ္စတွင် ယခုကုန်ကျစရိတ်များသည် ICJ ကိစ္စနှင့်သက်ဆိုင်ခြင်းမရှိပါကြောင်း၊ နိုင်ငံခြားရေးဝန်ထမ်းများပြောင်းရွှေ့ခြင်း၊ တာဝန်အရခရီးထွက်ခွာခြင်း၊ လေးလံပစ္စည်းများသယ်ယူပို့ဆောင်ခြင်းအပါအဝင် ပို့ဆောင်ရေး ဆိုင်ရာအသုံးစရိတ်များနှင့် သက်ဆိုင်ခြင်းဖြစ်ပါကြောင်း၊ ၎င်းအသုံးစရိတ်များသည် နိုင်ငံခြားရေးဝန်ကြီးဌာန၏ သာမန်အသုံးစရိတ်ဖြစ်သည့်အပြင် ရသုံးမှန်းခြေငွေစာရင်းဦးစီးဌာနမှ ညွှန်ကြားရေးမှူးချုပ်၊ စီမံကိန်း၊ ဘဏ္ဍာရေးနှင့် စက်မှုဝန်ကြီး ဌာနအောက်ရှိ ကော်မတီသုံးရပ်၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန ပြည်ထောင်စုဝန်ကြီး၊ ဒုတိယသမ္မတတို့မှ ပထမအဆင့် အဆင့်ဆင့်စိစစ်စစ်ဆေးပြီး ထိုမှတစ်ဆင့် ပြည်ထောင်စုလွှတ်တော် ပြည်သူ့ငွေစာရင်းပူးပေါင်းကော်မတီတို့က အသေးစိတ်အဆင့်ဆင့်စိစစ်အတည်ပြုခွင့်ပြုခဲ့ပြီးဖြစ်သည့် အသုံးစရိတ်များ ဖြစ်ပါကြောင်း၊ နိုင်ငံခြားရေးဝန်ကြီးဌာန၏ သာမန်အသုံးစရိတ်ခေါင်းစဉ်အောက်တွင် သက်ဆိုင်ရာဘဏ္ဍာရေးနှစ်အတွင်း ကျခံသုံးစွဲခဲ့သည့် အသုံးစရိတ်များဖြစ်သည့်အတွက် ဝန်ကြီး ဌာန၏ အတွင်းစာရင်းစစ်အဖွဲ့နှင့် ပြည်ထောင်စု စာရင်းစစ်ချုပ်ရုံး၏ စာရင်းစစ်အဖွဲ့မှ ဘဏ္ဍာရေးစည်းမျဉ်းဥပဒေ၊ လုပ်ထုံးလုပ်နည်းများနှင့်အညီ သုံးစွဲခြင်းရှိ/မရှိနှင့် အသုံးစရိတ်များမှန်ကန်မှုရှိ/မရှိကို အသေးစိတ်စစ်ဆေးခံ သွားမည်ဖြစ်ပါကြောင်း၊ အဆိုပါသုံးစွဲစရိတ်များနှင့်ပတ်သက်၍ လုပ်ထုံးလုပ်နည်း၊ ဘဏ္ဍာရေး စည်းမျဉ်း၊စည်းကမ်းများနှင့်မညီညွတ်ကြောင်းတွေ့ရှိပါက ပြည်ထောင်စုစာရင်းစစ်ချုပ်ရုံးမှတဆင့် ပြည်ထောင်စုလွှတ်တော်သို့ တင်သွင်းမည့် ၎င်း၏အစီရင်ခံစာတွင် ထည့်သွင်းဖော်ပြသွားမည် ဖြစ်ပါကြောင်း၊ ထို့အပြင် ICJ တွင် ရင်ဆိုင်နေရသည့် အမှုအတွက် မိမိတို့ငှားရမ်းထားသည့် နိုင်ငံတကာရှေ့နေကြီးများ၏ အခကြေးငွေများ၊ အသုံးစရိတ်များကို အသေးစိတ်ထုတ်ဖော် ပြောကြားခြင်း မပြုရန် ကျင့်ဝတ်ကို လိုက်နာရန်တာဝန်လည်းရှိပါကြောင်း၊ ICJတွင် တရားရင်ဆိုင်ရာတွင် ကုန်ကျရသည့် အသုံးစရိတ်ရှင်းတမ်း၊ ခရီးစရိတ်ကုန်ကျငွေနှင့် လေးလံပစ္စည်း သယ်ယူစရိတ်များ၏အသေးစိတ်ရှင်းတမ်းများကို ဘဏ္ဍာရေးစည်းမျဉ်း၊ လုပ်ထုံးလုပ်နည်းနှင့်အညီ စာရင်းစစ်အဖွဲ့တွင် စစ်ဆေးခံသွားမည်ဖြစ်သည့်အတွက် ပြည်သူ့လွှတ်တော်တွင် သီးခြားရှင်းလင်းတင်ပြရန် အစီအစဉ်မရှိပါကြောင်း ပြန်လည်ဖြေကြားပါသည်။

ဒေါက်တာမောင်သင်း(မိတ္ထီလာမဲဆန္ဒနယ်)က ဆက်စပ်မေးခွန်းမေးမြန်းပါသည်။

ဝန်ကြီး၏ဖြေကြားချက်အရ မိမိတို့ငှားရမ်းထားသည့် နိုင်ငံတကာရှေ့နေကြီးများ၏ အခကြေးငွေ အသုံးစရိတ်များကို အသေးစိတ်ထုတ်ဖော်ခြင်းမပြုရန် ကျင့်ဝတ်သိက္ခာကိုလိုက်နာရမည်ကို နားလည်ပါကြောင်း၊ မိမိတို့နိုင်ငံကို တရားစွဲဆိုခံရ၍ ရှေ့နေကြီးများငှားရမ်းသည်ကို ပြည်သူများက လက်ခံပါကြောင်း၊ သို့သော် ပြည်သူ့ဘဏ္ဍာငွေဖြစ်၍ မည်မျှသုံးသည်ကို ကျင့်ဝတ်အရ ပွင့်လင်းမြင်သာစွာ သိသင့်သိထိုက်သည်ဟု မြင်ပါကြောင်းဆက်စပ်မေးခွန်းမေးမြန်းပါသည်။

အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီး ဦးကျော်တင်

နိုင်ငံခြားရေးဝန်ကြီးဌာနမှသုံးစွဲသည့် သာမန်အသုံးစရိတ်များသည် သာမန်အသုံးစရိတ်များကိုသုံးစွဲသည့် လုပ်ထုံးလုပ်နည်း၊ စည်းမျဉ်း၊စည်းကမ်းအတိုင်းသာ မိမိတို့အနေဖြင့်အတွင်းစာရင်းစစ်နှင့် ပြည်ထောင်စုစာရင်းစစ်ချုပ်ရုံး၏ စာရင်းစစ်အဖွဲ့တို့ကို အသေးစိတ်အစီရင်ခံမည် ဖြစ်ပါကြောင်း၊ ပြည်ထောင်စုစာရင်းစစ်ချုပ်ရုံး၏တင်ပြသည့် အစီရင်ခံစာကို ထုတ်ပြန်ခြင်း၊ မထုတ်ပြန်ခြင်းသည် သက်ဆိုင်ရာအဖွဲ့အစည်း၏တာဝန် ဖြစ်ပါကြောင်း၊ မိမိတို့အနေဖြင့် ဝန်ကြီးဌာန၏ သာမန်ငွေစာရင်း သုံးစွဲမှုလုပ်ထုံးလုပ်နည်း စစ်ဆေးခံယူသည့် လုပ်ထုံးလုပ်နည်းအတိုင်း လိုက်နာ ဆောင်ရွက်သွားမည် ဖြစ်ကြောင်းပြန်လည်ဖြေကြားပါသည်။