(ခ)-ဥတ္တရသီရိမြို့နယ်တွင် ၂၀၁၇ ခုနှစ်၌ သစ်တောပယ်ဖျက်ထားသောကျေးရွာများ၏ ရွာမြေ၊လယ်မြေနှင့်အများပိုင်မြေများစာရင်းမှန်ကန်အောင် မည်သို့ဆောင်ရွက်ထားသည်နှင့်မြေများပြည်သူလက်ဝယ်ရောက်ရှိပြီးပုံစံ(၇)ရရှိရေးမည်သည့်အချိန်တွင်ဆောင်ရွက်ပေးမည်နှင့်စပ်လျဉ်းသည့်မေးခွန်း

ပြည်သူ့လွှတ်တော်ကိုယ်စားလှယ်ကြီး မေးမြန်းသည့် မြေနေရာများသည် သယံဇာတနှင့်သဘာဝ ပတ်ဝန်းကျင် ထိန်းသိမ်းရေးဝန်ကြီးဌာနက ပြီးခဲ့သည့် ၂၀၁၇ ခုနှစ်အတွင်းက ကြိုးဝိုင်းတောမြေ အဖြစ်မှ ပယ်ဖျက်ခဲ့သည့်နေရာများ ဖြစ်ပါကြောင်း၊ ကိုင်းကြိုးဝိုင်းမှ ၁၁၃.၈၉၃ ဧက၊ ပလွေး ကြိုးဝိုင်းမှ ၃၇.၃၀ ဧက၊ တောင်ညိုကြိုးဝိုင်းမှ ၁၀.၅၅ ဧကနှင့် ငလိုက်ကြိုးဝိုင်းမှ ၆၁၇.၆၈၃ ဧက စုစုပေါင်း ၇၇၉.၄၂၆ ဧကကို ပယ်ဖျက်ပေးခဲ့ပါကြောင်း၊ ပယ်ဖျက်ပေးခဲ့ရသည့် အကြောင်းအရင်း မှာ လယ်မြေအဖြစ် ၅၅၃ ဧကကျော်၊ ရွာမြေအဖြစ် ၁၈၁ ဧကကျော် အများပိုင်/ သာသနာမြေအဖြစ် ၄၄ ဧကကျော် အသုံးပြုနိုင်ရန်အတွက် ပယ်ဖျက်ပေးခဲ့ခြင်း ဖြစ်ပါကြောင်း၊ ကြိုးဝိုင်းတောမြေအဖြစ် က ပယ်ဖျက်ပေးခဲ့သည့် ဧရိယာများ ဥတ္တသီရိမြို့နယ် လယ်ယာမြေ စီမံခန့်ခွဲရေးနှင့် စာရင်းအင်းဦးစီးဌာန၊ သစ်တောဦးစီးဌာန၊ ကျေးရွာအုပ်ချုပ်ရေးမှူးများနှင့် ဒေသခံပြည်သူများ ပါဝင်သည့်အဖွဲ့များ ကွင်းဆင်းစစ်ဆေး ဆောင်ရွက်ခဲ့သည့်အခါ လက်ရှိမြေပြင် စစ်ဆေးပြီးသည်အထိ ကြိုးဝိုင်းများအနေအထားမှာ ကိုင်းကြိုးဝိုင်းမှ ပယ်ဖျက်သောဧက ၁၁၄ ဧကခန့်၊ တောင်ညိုကြိုးဝိုင်းမှ ပယ်ဖျက်သောဧက ၁၀ ဧကကျော်၊ ငလိုက်ကြိုးဝိုင်းမှ ပယ်ဖျက်သောဧက  ၁၉ ဧကခန့် စုစုပေါင်း ၁၄၃ ဧကကျော်သည် ကြိုးဝိုင်းတောမြေအဖြစ်မှ ပယ်ဖျက်ပေးခဲ့သော အမိန့်စာပါ မြေပုံညွှန်း၏ အပြင်ဘက် (သစ်တောဧရိယာမှ ပယ်ဖျက်ခြင်း မရှိသေးသည့်ဧရိယာ) အတွင်း ကျရောက်နေပါကြောင်း၊ ကွင်းဆင်းစစ်ဆေးရန် ကျန်ရှိနေသော ပလွေးကြိုးဝိုင်းမှ ပယ်ဖျက်ဧရိယာနှင့် ငလိုက်ကြိုးဝိုင်းမှ ပယ်ဖျက်ဧရိယာ များကိုလည်း ဆက်လက်စိစစ် ဆောင်ရွက်လျက် ရှိပါကြောင်း၊

မြေပြင်တွင် မြေယာအနေအထားများ အနည်းနှင့်အများ ရှုပ်ထွေးမှုရှိကြပါကြောင်း၊ ယခုကဲ့သို့ ကြိုးဝိုင်းတော‌မြေအဖြစ်မှ ပယ်ဖျက်ခဲ့သည့်အနေအထားမှာ မြေပြင်တည်ရှိမှုအခြေအနေ ကွဲလွဲမှုများကို သက်ဆိုင်ရာဌာန အဖွဲ့အစည်းများနှင့် ညှိနှိုင်းဆောင်ရွက်ပြီး အမှန်တည်ရှိသော ဧရိယာများကို စိစစ်ရရှိမှသာ မြေအတိုင်းအတာလုပ်ငန်း၊ မြေပုံထုတ်ခြင်း လုပ်ငန်းများကို ၂၀၁၈-၁၉ ဘဏ္ဍာရေးနှစ်အတွင်း ပြီးစီးအောင်ဆောင်ရွက်ပြီးသွားမှသာ ၂၀၁၇ ခုနှစ်၊ လယ်ယာမြေဥပဒေ၊ နည်းဥပဒေပါ ပြဋ္ဌာန်းချက်များနှင့်အညီ လယ်ယာမြေလုပ်ပိုင် ခွင့်ပြုလက်မှတ်ပုံစံ (၇) ထုတ်ပေး နိုင်ရန် သက်ဆိုင်ရာလယ်ယာမြေ စီမံခန့်ခွဲမှုအဆင့်ဆင့်မှ စိစစ်ဆောင်ရွက်သွားနိုင်သည့် အခြေအနေ ဖြစ်ကြောင်း နေပြည်တော်ကောင်စီ၏ ဖြေကြားချက်နှင့်အတူ ပေါင်းစပ်ရှင်းလင်း ဖြေကြားပါသည်။

ဦးကျော်မင်းလှိုင် (ဥတ္တရသီရိမဲဆန္ဒနယ်) က ဆက်စပ်မေးခွန်း မေးမြန်းပါသည်။

အချို့အခြေအနေများက မိမိတို့သိနေပြီးသား ဖြစ်ပါကြောင်း၊ သက်ဆိုင်ရာ အောက်ခြေဌာန အဆင်‌့ဆင့်တွင် မိမိတို့အမြဲတမ်း တွေ့ဆုံဆွေးနွေးပြီး အလွဲအမှားများကြောင်‌့ မေးမြန်းနေခဲ့ ပါကြောင်း၊ ဆိုလိုသည်မှာ မည်သူကမှားနေပြီး အဘယ်ကြောင့်လုပ်မရသနည်း၊ ဒုတိယဝန်ကြီး ဖြေကြားသွားရာတွင် သစ်တောကြိုးဝိုင်းအတွင်း တည်နေရာများလွဲနေပါကြောင်း၊ ၂၀၁၇ ကတည်း က ပယ်ဖျက်ထားပါကြောင်း၊ ယခုပယ်ဖျက်သည့် စာရင်းတွင်လည်း ဥတ္တရသီရိမြို့နယ်က အဓိက သစ်တောအတွင်း လယ်‌မြေစာရင်းက ၂၀၁၅ ကကောက်ထားပါကြောင်း၊ ၄၆၄၈ ဧကကျော် လယ်ယာမြေ ရှိပါကြောင်း၊ ၎င်းတို့ကိုဆောင်ရွကရန် လုပ်ငန်းစဉ်များ ကျန်နေသေးပါကြောင်း၊ စာရင်းများကို အမှန်ရရှိမှသာကျန်သည့် စာရင်းများကို ဆက်လက်ဆောင်ရွက် နိုင်မည်ဖြစ်သည့် အတွက် မေးမြန်းနေရခြင်း ဖြစ်ပါကြောင်း၊ လက်ရှိမြေပြင်တွင် စုစုပေါင်း ၁၃၁၃.၄၇၇ မြေစာရင်းတွင်လည်း စာရင်းရှိပါကြောင်း၊ ယခုပယ်ဖျက်လိုက်သောစာရင်း ၇၇၉.၄၂၆ ကို ၁-၆-၂၀၁၇ နောက်ဆုံးထားပြီး ပယ်ဖျက်လိုက်ပါကြောင်း၊ ပယ်ဖျက်လိုက်သည့် အနေအထားအပေါ် မည်သည့်အချိန်တွင် ပြီးစီးအောင် ဆောင်ရွက်မည်နည်း၊ အကုန်လုံးကို မှန်အောင်လုပ်နိုင်မလား၊ ယခုသက်ဆိုင်ရာ မြေစာရင်းဦးစီးဌာန၊ နေပြည်တော်ကောင်စီနှင့် စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနက ဖြေကြားပါကြောင်း၊ အဓိကက မှားနေသည်မှာ သစ်တောကစပြီး လွှဲဆိုကတည်းက မှားနေပါကြောင်း၊ အချက်အလက်များကို ဆက်လက်၍ ပြန်လည်ညှိနှိုင်းပြီး သက်ဆိုင်ရာ လွှတ်တော်ကိုယ်စားလှယ်၊ အုပ်ချုပ်ရေးနှင့် သက်ဆိုင်ရာပြည်သူလူထု ပါသည့်အတွက်၊ မှားနေသည်ကို သိနေသည့်အတွက် မေးမြန်းရခြင်း ဖြစ်ပါကြောင်း၊ ဝန်ကြီးဌာနအနေဖြင့် ၎င်းအမှားများကို တိတိကျကျဖော်ပြပြီး သက်ဆိုင်ရာသယံဇာတနှင်‌့ သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ သစ်တောဦးစီးဌာနနှင့် ညှိနှိုင်းပေါင်းစပ်ပြီး ဖြေရှင်းပေးနိုင်မှုရှိ/မရှိ သိရှိလိုပါကြောင်း မေးမြန်းပါသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ဒုတိယဝန်ကြီး ဦးလှကျော်

လွှတ်တော်ကိုယ်စားလှယ်ကြီးအနေဖြင့် လုပ်ငန်းများကို အချိန်နှင့်တစ်ပြေးညီ ပြီးပြတ်အောင် ဆောင်ရွက်ပေးနိုင်ရန်အတွက် ဆက်စပ်မေးခွန်း မေးမြန်းသည်ဟု ခံယူပါကြောင်း၊ အဆိုပါ လုပ်ငန်းတွင် အပိုင်းနှစ်ပိုင်း ပါရှိပါကြောင်း၊ အဓိကက သစ်တောဧရိယာမှ ပယ်ဖျက်လိုက်သော ဧရိယာပေါ်ထွက်လာမှ ဒုတိယအဆင်‌့အနေဖြင့် လိုအပ်သောမြေ တိုင်းတာခြင်း လုပ်ငန်းများကို ဆောင်ရွက်ပြီး ပုံစံ (၇) ထုတ်ပေးရမည့် အနေအထားဖြစ်ပါကြောင်း၊ ထို့ကဲ့သို့ ဆောင်ရွက်သည့်အခါ သစ်တောဦးစီးဌာန၏ လုပ်ငန်းတစ်ခုကို အ‌ခြေခံထားသော်လည်း သက်ဆိုင်ရာ ဒေသနေပြည်တော်ကောင်စီ အောက်ရှိ ဌာနအဖွဲ့အစည်းများ၏ ပေါင်းစပ်ညှိနှိုင်း မှုကလည်း လွှတ်တော်ကိုယ်စားလှယ်ကြီး တင်ပြသကဲ့သို့ အမှန်အရေးကြီးပါကြောင်း၊ ၎င်းလုပ်ငန်းများကို အချိန်နှင်‌့တစ်ပြေးညီ ဆောင်ရွက်သွား နိုင်ရန်အတွက် အဆိုပါအဖွဲ့များသည် ညှိနှိုင်းပေါင်းစပ်မှု ကောင်းကောင်းဖြင့် ဆောင်ရွက်သွားရန် လိုအပ်မည်ဖြစ်ပါကြောင်း၊ အဆင့်နှစ်ဆင်‌့ ရှိသည့်အလျောက် ကြိုးဝိုင်းတောမြေအဖြစ်မှ ပယ်ဖျက်ပေးခဲ့ပြီး ထွက်ပေါ်လာသော မြေများကိုရရှိမှသာ မြေစာရင်းကိုအတိအကျ သိမှသာ မိမိတို့ ပုံစံ (၇) ထုတ်ပေးနိုင်မည့် အခြေအနေဖြစ်ပါကြောင်း ပြန်လည်ရှင်းလင်းဖြေကြားပါသည်။