ရေလှောင်တမံ တည်ဆောက်ခြင်းအားဖြင့် အကျိုးကျေးဇူးသုံးရပ်ကို ရရှိနိုင်မည်ဖြစ်ပါကြောင်း၊ ပထမအကျိုးကျေးဇူးက ကြီးအုပ်ကျေးရွာသူ ကျေးရွာသားများ နွေ၊ မိုး၊ ဆောင်း ရာသီသုံးခုလုံးတွင် ရေကို အလုံအလောက် ရရှိနိုင်စေမည်ဖြစ်ပါကြောင်း၊ အဆိုပါ ကြီးအုပ်ချောင်းသည် ကြီးအုပ်ကျေးရွာ၏ အရှေ့ဘက်တွင်ရှိပြီး ဗောဓိတစ်ထောင် တောင်ရိုးပေါ်မှ ရေဆင်းဧရိယာ ၃.၅ မိုင်နှင့် စီးဆင်းလာသည့် ချောင်းတစ်ခု ဖြစ်ပါကြောင်း၊ ကြီးအုပ်ကျေးရွာတွင် အိမ်ခြေ ၃၀၅ အိမ်၊ လူဦးရေ ၁၄၅၀ နေထိုင်ပြီး သောက်ရေသုံးရေအတွက် ထိုချောင်းကို အမှီသဟဲပြုနေရပါကြောင်း၊ မိုးတွင်းအခါတွင် အခက်အခဲမရှိသော်လည်း နွေကာလတွင် ရေသည်ရွှေကဲ့သို့ ရှားပါးပါကြောင်း၊ ရေအတွက် ခွဲတမ်းချရ၊ ရေအတွက် အငြင်းပွားရခြင်းများလည်း ရှိခဲ့သည့်အတွက် ဒေသခံပြည်သူများက ကြီးအုပ်ချောင်းကိုပိတ်ပြီး ဆည်ပြုလုပ်ပေးစေချင ်ကြပါကြောင်း၊
ဒုတိယအကျိုးကျေးဇူးအနေဖြင့် ၎င်းဆည်ပြုလုပ်ခြင်းအားဖြင့် စိုက်ပျိုးရေအတွက်လည်း ရေရရှိနိုင်မည် ဖြစ်ပါကြောင်း၊ ကြီးအုပ်၊ ဘန်ဆီ၊ နိဗ္ဗာန်ဝကျေးရွာများ၏ စိုက်ပျိုးမြေဧက ၁၇၇၃ ဧကရှိ တယ်လို့လည်း သိရပါတယ်။ ဒါ့အပြင် အောက်ဖက်အနိမ့်ပိုင်း ကွင်းပြင်ရွာတွေဖြစ်တဲ့ မုံရွေး၊ ကြေးမုံရွာများလည်း စိုက်ပျိုးမြေဧက ထောင်ချီပြီး ရှိပါကြောင်း၊ အဆိုပါကျေးရွာများ၏ စိုက်ပျိုးလယ်ယာမြေ များသည်လည်း ရေလိုအပ်လျက် ရှိပါကြောင်း၊ ယခင် ၁၉၈၀ နှစ် မတိုင်မီက တောပု၊ ကျပိုင်၊ မုံရွေး၊ ကြေးမုံကွင်းများသည် ချင်းတွင်းမြစ်ရေဝင်ပြီး စိုက်ပျိုးမြေကောင်းခဲ့ပါကြောင်း၊ နောက်ပိုင်းတွင် ငါးပေါက်တွဲ၊ ၁၀ ပေါက်တွဲများဖြင့် ရေတားလိုက်သည့်အတွက် မြစ်ရေလိုသလောက်မရ၊ နုန်းမကျဖြစ်ပြီး စိုက်ပျိုးမြေညံ့လာပါကြောင်း၊ ယခုတောင်သူဦးကြီးများသည် နုန်းမကျသည့်အတွက် ဓာတ်မြေသြဇာကူရ၊ မြေအောက်ရေနက် သွားသည့်အတွက် ရေစက်မောင်းဆီကူရစသည့် အပိုသွင်းအားစုများ လိုလာပါကြောင်း၊ ဆည်တည်ဆောက်ခြင်းအားဖြင့် စိုက်ပျိုးရေပိုမိုရရှိလာနိုင်မည် ဖြစ်သည့်အတွက် အထိုက် အလျောက် သက်သာလာမည် ဖြစ်ပါကြောင်း၊ တတိယအကျိုးကျေးဇူးအနေဖြင့် ဗောဓိတစ်ထောင်ဘုရားကြီး၏ နောက်ကျောဘက်တွင်ရှိသည့် ကျောက္ကာ၊ ရွှေမြင်တင်ကာကွယ်တောဧရိယာ ၁၇၉၂၀ ဧက အတွက်လည်း မြေအောက်ရေ၊ စိမ့်ရေရရှိနိုင်မည် ဖြစ်သည့်အတွက် အသုံးဝင်မည်ဖြစ်ပါကြောင်း၊ ၎င်းအတွက် မြန်မာနိုင်ငံအလယ်ပိုင်း မိုးရေချိန်လက်မ ၃၀ ခန့်သာရှိသည့် မိုးနည်းရပ်ဝန်းဒေသတွင် မိုးနည်းသော်လည်း ရေမရှားအောင်၊ ပူပြင်းသော်လည်းမခြောက်သွေ့ရအောင် ကြီးအုပ်ချောင်းကိုပိတ်၍ ရေလှောင်တမံ ပြုလုပ်ပေးရန် လိုအပ်ပါကြောင်း၊ ၎င်းအတွက် ရေလှောင်တမံပြုလုပ်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။
အဆိုပါ ဒေသသည် မိုးနည်းရေရှားပြီး ပူပြင်းခြောက်သွေ့သော စိုက်ပျိုးရေ၊ သောက်သုံးရေရှားပါးသည့် ဒေသဖြစ်ပါကြောင်း၊ ကြီးအုပ်ကျေးရွာနှင့် အနီးပတ်ဝန်းကျင် ကျေးရွာများအနေဖြင့် လက်ရှိတွင် ဗောဓိတစ်ထောင် ရေလှောင်တမံကနေပြီး သောက်သုံးရေကို ရယူသုံးစွဲလျက်ရှိပါကြောင်း၊ ဗောဓိတစ်ထောင် ရေလှောင်တမံအနေဖြင့်လည်း နှစ်စဉ်ရေဝင်ရောက်မှု နည်းပါးသည့်အတွက် သောက်သုံးရေလောက်ငှစွာ သုံးစွဲနိုင်ခြင်း မရှိသည်ကို စိစစ်တွေ့ရှိရပါကြောင်း၊ သို့ဖြစ်သည့်အတွက် ကြီးအုပ်ချောင်းပေါ်တွင် ရေလှောင်တမံတစ်ခု တည်ဆောက်ရန်အတွက် ဖြစ်မြောက်နိုင်စွမ်းရှိ/မရှိ ဇလဗေဒနှင့် ဘူမိဗေဒဆိုင်ရာ စူးစမ်းလေ့လာခြင်း၊ မြေပြင်အသေးစိတ်အခြေအနေ တိုင်းတာခြင်းစသည့် စူးစမ်းလေ့လာခြင်း လုပ်ငန်းများကို စတင်ဆောင်ရွက်ရန် စီမံလျက်ရှိပါကြောင်း၊ စူးစမ်းလေ့လာမှုများအရ ရေလှောင်တမံ တည်ဆောက်ရန် ဖြစ်မြောက်နိုင်စွမ်းရှိပြီး ကုန်ကျစရိတ်နှင့် အကျိုးအမြတ်တွက်ချေကိုက်မှု ရှိမည်ဆိုလျှင် ခန့်မှန်းကုန်ကျငွေ တွက်ချက်မှုအရ လိုအပ်ရန်ပုံငွေကို နီးစပ်ရာဘဏ္ဍာရေးနှစ်တွင် စစ်ကိုင်းတိုင်းဒေသကြီး အစိုးရအဖွဲ့အနေဖြင့် တိုင်းဒေသကြီးအတွင်း ဦးစားပေးအစီအစဉ်အရ ထည့်သွင်းလျာထား တောင်းခံသွားမည် ဖြစ်ပါကြောင်း၊ တိုင်းဒေသကြီးအစိုးရအဖွဲ့ ရန်ပုံငွေရရှိမှုအပေါ် မူတည်ပြီး ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနမှ လုပ်ငန်းများကို အကောင်အထည်ဖော် ဆောင်ရွက်ပေးသွား မည်ဖြစ်ပါကြောင်း စစ်ကိုင်းတိုင်းဒေသကြီး အစိုးရအဖွဲ့၏ ဖြေကြားချက်နှင့်အတူ ပေါင်းစပ်ရှင်းလင်း ဖြေကြားပါသည်။