(ဇ)-တောင်သူလယ်သမားများ အတိုးကြွေးနွံနစ်ပြီး ဆင်းရဲမှုတိုးပွားရေးကို ရှေးရှုနေခြင်းမှ ကာကွယ်တားဆီး ရေးနှင့်စပ်လျဉ်းသည့်မေးခွန်း

လယ်ယာစိုက်ပျိုးရေးနှင့်ဆည်‌ြမောင်းဝန်ကြီးဌာနသည် တောင်သူလယ်သမားများဘဝ ဝင်ငွေ နှစ်ဆတိုးတက်ရေးဦးတည်ချက်နှင့်အညီ စိုက်ပျိုးရေးထွက်ကုန်များကို တိုးတက်မြင့်မားရေးအတွက် စိုက်ပျိုးထွက်ရှိလာသည့် သီးနှံများပေါ် စိုက်ပျိုးရေးအရ တွက်ခြေကိုက်မှုရှိပြီး ခိုင်မာသော ဈေးကွက် ရရှိအောင် ဆောင်ရွက်ပေးခြင်း၊ ဈေးကောင်းရမည့် မျိုးကောင်းမျိုးသန့်များအသုံးပြုခြင်း၊ ခေတ်မီ သိပ္ပံနည်းကျစိုက်နည်းစနစ်များ အသုံးပြုခြင်း၊ အခြေခံသော့ချက်ကြီး ငါးချက်နှင့်အညီ ဆောင်ရွက် သွားနိုင်ကြရေးအတွက် စဉ်ဆက်မပြတ် ပညာပေးခြင်း၊ စည်းရုံးခြင်း၊ လှုံ့ဆော်ခြင်း၊ တောင်သူ လယ်သမားများနှင့် လယ်ကွင်းထဲတွင် အတူပူးပေါင်း၍ စံနမူနာပြ စိုက်ခင်းများထူထောင်ခြင်းဖြင့် ဈေးကွက်တွင် တွက်ခြေကိုက်သော ဈေးနှုန်းများရရှိရေးအတွက် ဆက်စပ်ညှိနှိုင်းဆောင်ရွက်ပေးခြင်း အားဖြင့် အစွမ်းကုန်ကူညီဆောင်ရွက်ပေးလျက်ရှိကြောင်း ဦးစွာရှင်းလင်းဖြေကြား အပ်ပါတယ်။ 
    မိမိတို့အစိုးရသစ်ကာလတွင် ကိုယ်တိုင်ဆန္ဒပြင်းပြစွာဖြင့် ပူးပေါင်းပါဝင်ဆောင်ရွက်သော တောင်သူလယ်သမားများကိုယ်တိုင် အကျိုးကျေးဇူးခံစားကြရပြီး ကြွေးတင်ခြင်း၊ ဆင်းရဲခြင်းမှ ကင်းဝေးလျက် လှူနိုင်တန်းနိုင်ကြပြီး လူနေမှုအဆင့်အတန်းများ အထိုက်အလျောက် မြင့်တက်လာ နိုင်ကြပြီ ဖြစ်ပါတယ်။ သို့ရာတွင် ထိုကဲ့သို့သော တောင်သူပမာဏမှာ နိုင်ငံတော် လူဦးရေနှင့် နှိုင်းယှဉ် ပါက အလွန်ပင်နည်းပါးလျက်ရှိကြောင်း အရှိန်အဟုန်မြှင့်တင်ရန် လိုအပ်လျက်ရှိကြောင်း တင်ပြလို ပါတယ်။ အဓိကသော့ချက်လိုအပ်ချက်မှာ ကာယကံရှင်တောင်သူလယ်သမားတစ်ဦးချင်းကိုယ်တိုင် တိုးတက်ကြီးပွားလိုစိတ်၊ အောင်မြင်လိုစိတ်နှင့် ကိုယ်တိုင်ကာယကံမြောက် ဝီရိယရှိရှိဖြင့် ကိုယ်တိုင် ပါဝင် ကြိုးစားအကောင်အထည်ဖော်ဆောင်ရွက်ကြရန် အလွန်အရေးကြီးပါတယ်။ မိမိကိုယ်တိုင် ကြံစည်ကြိုးစားအားထုတ်မှုမရှိပါက မည်မျှပင်တိုက်တွန်းစေကာမူ ဆင်းရဲတွင်းနက်နေကြမည် ဖြစ်ပါ တယ်။ တောင်သူလယ်သမားများအတွက် အရင်းအနှီးလိုအပ်ချက်ကို ကူညီဖြေရှင်းပေးနိုင်ရန် အလို့ငှာ လွှတ်တော်အဆင့်ဆင့်မှ အတည်ပြုပြဋ္ဌာန်း ပေးခဲ့ပြီးဖြစ်သော လယ်ယာ‌ြမေဥပဒေ၊ နည်းဥပဒေများနှင့် ညီညွတ်စွာဖြင်‌့ လယ်ယာစိုက်ပျိုးရေးလုပ်ငန်းများအတွက် လယ်ယာလုပ်ငန်းခွင် တွင် အရင်းအနှီးလိုအပ်ချက်ကို မိမိတို့လုပ်ကိုင်ခွင့်ရရှိထားကြသော လယ်ယာမြေများကို ရောင်းခြင်း၊ ပေါင်ခြင်း၊ ငှားခြင်းနည်းလမ်းများဖြင့် အရင်းအနှီးများရရှိပြီး အကျိုးရှိစွာဆောင်ရွက်နိုင်မည် ဖြစ်ပါ တယ်။ 
    မြန်မာ့လယ်ယာဖွံ့ဖြိုးရေးဘဏ်အနေဖြင့် တောင်သူလယ်သမားများ၏ စိုက်ပျိုးစရိတ် အရင်းအနှီးလိုအပ်ချက်များကို ထိထိရောက်ရောက် ဖြည့်ဆည်းပေးနိုင်ရေးအတွက် စိုက်ပျိုး စရိတ်ချေးငွေများကို ထုတ်ချေးပေးလျက်ရှိရာတွင် စပါးသီးနှံတစ်ဧက ယခင်ကျပ် ၈၀၀၀၀ နှုန်းမှ  ကျပ် ၁၀၀၀၀၀ နှုန်းသို့ ၂၀၁၃-၂၀၁၄ မိုးစပါးသီးနှံရာသီမှစ၍လည်းကောင်း၊ ကြံသီးနှံတစ်ဧကလျှင် ယခင် ၁၀၀၀၀ နှုန်းမှ ကျပ် ၁၀၀၀၀၀ နှုန်းသို့၂၀၁၂-၂၀၁၃ ကြံစိုက်ရာသီမှစတင်၍လည်းကောင်း တိုးမြှင့်ထုတ်ချေးပေးရန် စီစဉ်ဆောင်ရွက်လျက်ရှိပါတယ်။ ရရှိလာမည့်အရင်းအနှီးများကို လယ်ယာ လုပ်ငန်းခွင်တွင် အမှန်တကယ်ရင်းနှီးမြှုပ်နှံကြရန်လည်း အရေးကြီးပါတယ်။ တောင်သူလယ်သမား များ ဈေးကွက်တွက်ခြေကိုက်မည့် မျိုးကောင်းမျိုးသန့် မျိုးစေ့များကို လုံလောက်စွာ ထုတ်လုပ် ဖြန့်ဖြူးနိုင်ရေးအတွက် ကြိုးစားဆောင်ရွက်လျက်ရှိပါတယ်။ လက်တွေ့တောင်သူလယ်သမားများ စိုက်ပျိုးရာတွင် တစ်ဧက တင်း ၂၀၀ ကျော်ထွက်ရှိပြီး စီးပွားရေးအရ တွက်ခြေကိုက်သည့် ပုလဲသွယ် စပ်မျိုးစပါးများကို စိုက်ပျိုးရေးသုတေသန ပညာရှင်များအနေဖြင့် လက်တွေ့အောင်မြင်စွာ ထုတ်လုပ် နိုင်ခဲ့ကြပြီး ကိုယ်တိုင်တိုးတက် ကြီးပွားလိုကြသည့် ကိုယ်တိုင်ဆန္ဒဖြင့် စိုက်ပျိုးလိုကြသော ပြည်နယ်/ တိုင်းဒေသကြီးအသီးသီးရှိ တောင်သူများထံသို့ ၂၀၁၁-၂၀၁၂ ခုနှစ် နွေစပါးရာသီတွင် ၇၅၂၇ ဧကနှင့်    ၂၀၁၂-၂၀၁၃ ခုနှစ် မိုးစပါးရာသီတွင် ၃၁၁၇၉ ဧက စိုက်ပျိုးရန်အတွက် မျိုးစေ့များ ဖြန့်ဖြူးပေး နိုင်ခဲ့ပြီးဖြစ်ပါတယ်။ 
    ၂၀၁၁-၂၀၁၂ ခုနှစ် မိုးစပါးရာသီနှင့် နွေစပါးရာသီတို့တွင် ပုလဲသွယ်စပ်မျိုးစပါးများနှင့် အခြားစပ်မျိုးစပါးများကို ရှမ်းပြည်နယ်မြောက်ပိုင်းတွင် ၁၈၁၆၂၁ ဧက၊ ရှမ်းပြည်နယ်တောင်ပိုင်းတွင် ၅၇၈ ဧက၊ ရှမ်းပြည်နယ်အရှေ့ပိုင်းတွင် ၇၀၇၀ ဧက၊ ကချင်ပြည်နယ်တွင် ၅၈၇၈ ဧကနှင့် ကျန်ပြည်နယ်နှင့်တိုင်းဒေသကြီးများတွင် ၈၇၂၆ ဧက၊ စုစုပေါင်း ၂၀၄၁၇၃ ဧက စိုက်ပျိုးထုတ်လုပ် နိုင်ခဲ့ပါကြောင်းကိုလည်း တင်ပြအပ်ပါတယ်။ တစ်နိုင်ငံလုံး စိုက်ပျိုးဧကနှင့် နှိုင်းယှဉ်ပါက ပမာဏအား ဖြင့် လွန်စွာနည်းပါးနေသေးသော်လည်း တောင်သူလယ်သမားများ၏ လိုအင်ဆန္ဒအပြည့်အဝကို ပြည်နယ်/တိုင်းဒေသကြီးများအလိုက် ဖြည့်ဆည်းပေးနိုင်ရေးအတွက် မိမိပြည်နယ်/တိုင်းဒေသ အသီးသီး၏ ရာသီဥတုအခြေခံနှင့်ကိုက်ညီသော ရာသီဥတုဒဏ်၊ ပိုးမွှားရောဂါဒဏ်ခံနိုင်သည့် မိဘလိုင်းများ ပွားများနိုင်ရေးအတွက် သုတေသနလုပ်ငန်းများအား ပြည်တွင်းပညာရှင်များ၊ တရုတ်ပညာရှင်များ၊ ဘယ်လ်ဂျီယံပညာရှင်များ၊ အိန္ဒိယပညာရှင်များ၊ ဖိလစ်ပိုင်ပညာရှင်များဖြင့် စဉ်ဆက်မပြတ် သုတေသနလုပ်ငန်းအဆင့်နှင့် စီးပွားဖြစ် မျိုးစေ့ထုတ်ခြင်းအဆင့် ပူးပေါင်းဆောင်ရွက် လျက်ရှိပါတယ်။ 
    ပုဂ္ဂလိကအခန်းကဏ္ဍမှ မျိုးကောင်းမျိုးသန့်မျိုးစေ့ထုတ်ကုမ္ပဏီများ ပေါ်ထွန်းလာရေးအတွက် လည်း ပူးပေါင်းကူညီဆောင်ရွက်ပေးလျက်ရှိပါကြောင်း တင်ပြအပ်ပါတယ်။ စပါးသီးနှံအပြင် ကြံသီးနှံ တွင် ယခင်က တစ်ဧကတန် ၂၀ ထွက်ရှိရာမှ ယခုတစ်ဧက တန် ၆၀ ထွက်ရှိလာသောကြောင့် သုံးဆခန့် ပိုမိုထွက်ရှိလာခဲ့ပါတယ်။ တစ်သျူးမျိုးပွားနည်းဖြင့် ပွားများထုတ်လုပ်သော ကြံမျိုးများကို တိုးတက်ဖြန့်ဖြူးနိုင်ရေး ကြိုးပမ်းဆောင်ရွက်နိုင်ခဲ့ခြင်းကြောင့် ဖြစ်ပါတယ်။ အစိုးရသစ်ကာလတွင် ကြံတောင်သူများ၏ တစ်ဦးချင်းဝင်ငွေများ တိုးတက်လာခြင်းမှာ ကြံဈေးနှုန်းနှင့် ကြံအထွက်နှုန်း တိုးတက်လာခြင်းကြောင့် ယခင်ကထက် သုံးဆကျော်တိုးတက်လာခြင်း ဖြစ်ပါကြောင်း တင်ပြအပ်ပါ တယ်။ တောင်သူများတွက်ခြေကိုက်မှုကြောင့်  ကြံစိုက်ဧကများ တိုးတက်လာပြီး ယခင်က ပြည်ထောင်စုချုပ် စုစုပေါင်းအထွက်တန်ချိန် ၉.၂ သိန်းသာလျှင် ထွက်ရှိခဲ့ရာမှ ယခုနှစ်တွင် ကြံတန်ချိန် ၂၂.၃ သိန်းအထိ သုံးဆခန့် ပိုမိုတိုးတက် စိုက်ပျိုးထွက်ရှိလာကြောင်း တင်ပြအပ်ပါတယ်။ ယနေ့ ကြံတစ်တန်လျှင် အခြေခံအနိမ့်ဆုံး ကျပ် ၃၀၀၀၀ ဈေးဖြင့် တွက်ချက်ပါက ကြံတန်ချိန် ၂၂.၃  သိန်းအတွက် တန်ဖိုး ငွေကျပ် ၆၆.၉ ဘီလီယံအထိ တိုးတက်ရရှိပါတယ်။
    အလားတူ အစေ့ထုတ်ပြောင်းသီးနှံတွင်လည်း ယခင်က ပျမ်းမျှ ၅၈ တင်းထွက်ရာမှ ယခုအခါ တွင် တစ်ဧကလျှင် ၁၀၀ တင်းကျော်ထွက်ရှိသော စပ်မျိုးများကို တပ်ကုန်းစိုက်ပျိုးရေး သုတေသနခြံ တွင် စိုက်ပျိုးရေးပညာရှင်များဖြင့် အောင်မြင်စွာ စိုက်ပျိုးထုတ်လုပ်နေပြီဖြစ်ပါတယ်။ မြေပဲသီးနှံတွင် လည်း ယခင်က ပျမ်းမျှတစ်ဧကလျှင် ၅၆ တင်းထွက်ရှိရာမှ ယခုအခါ တစ်ဧက တင်း ၁၀၀ ကျော် ထွက်ရှိသည့်မြေပဲမျိုးများကို ကိုရီးယားသမ္မတနိုင်ငံနှင့် တရုတ်နိုင်ငံ၊ ဟိုင်နန်ကျွန်းတို့မှ တင်သွင်းခဲ့၍ နေပြည်တော်ကောင်စီနယ်မြေတွင် မျိုးသန့်မျိုးပွား ၂၇ ဧက စိုက်ပျိုးထုတ်လုပ်လျက်ရှိပြီး ယခုနှစ် ဆောင်းရာသီတွင် ဆက်လက်မျိုးသန့်မျိုးပွားစိုက်ပျိုး၍ တောင်သူများလက်ဝယ်သို့ အသီးသီးဖြန့်ဝေ နိုင်ရန် စီမံဆောင်ရွက်လျက်ရှိပါတယ်။ အလားတူ စီးပွားရေးအရတွက်ခြေကိုက်မည့် နေကြာ၊ ပဲပုပ်၊ ပဲတီစိမ်း၊ မတ်ပဲသီးနှံများကို သုတေသနပြုလုပ်ပြီး မျိုးသန့်မျိုးပွားထုတ်လုပ်ပေးလျက်ရှိပါတယ်။
    သွင်းအားစုဓာတ်မြေသြဇာ ထုတ်လုပ်ဖြန့်ဖြူးရေးလိုအပ်ချက်ကို နိုင်ငံပိုင်အခန်းကဏ္ဍမှ လုံလောက်မှုမရှိ၍ ပုဂ္ဂလိကအခန်းကဏ္ဍမှ တင်သွင်းနိုင်ရေးအတွက် စီးပွားရေးနှင့် ကူးသန်း ရောင်းဝယ်ရေးဝန်ကြီးဌာနနှင့်လည်းကောင်း နိုင်ငံပိုင်စက်ရုံများမှ စွမ်းအားပြည့် တိုးတက်ထုတ်လုပ် နိုင်ရေးအတွက် စွမ်းအင်ဝန်ကြီးဌာနနှင့်လည်းကောင်း နီးကပ်စွာအကြိမ်ကြိမ် ပေါင်းစပ်ညှိနှိုင်း ဆောင်ရွက်လျက်ရှိနေပါတယ်။ သွင်းအားစုလိုအပ်ချက်မှာ အလွန်အရေးပါသော လိုအပ်ချက် ဖြစ်ပါ တယ်။ သွင်းအားစုကို ထိရောက်စွာအသုံးပြုနိုင်ပါက လယ်ယာထွက်ကုန်များ အရှိန်အဟုန်ဖြင့် နှစ်ဆ၊ သုံးဆတိုးတက်ထွက်ရှိပြီး တောင်သူတစ်ဦးချင်းသာမက နိုင်ငံတော်၏ စိုက်ပျိုးရေးကဏ္ဍကို အရှိန်အဟုန်မြင့်မားစွာဖြင့်တိုးတက်စေနိုင်မည် ဖြစ်ပါသောကြောင့် သက်ဆိုင်ရာဝန်ကြီးဌာနများနှင့် ညှိနှိုင်းဆောင်ရွက်ဆဲဖြစ်ပါကြောင်းလည်း တင်ပြအပ်ပါတယ်။ 
    ကိန်းဂဏန်းများနှင့်နှိုင်းယှဉ်တင်ပြရပါက မြန်မာနိုင်ငံသည် အဓိကစိုက်ပျိုးရေး အခြေခံနိုင်ငံ ဖြစ်သော်လည်း လယ်တစ်ဧကလျှင် နိုက်ထရိုဂျင်၊ ဖော့စ်ဖရတ်၊ ပိုတက်ရှ်ဓာတ်‌ြမေသြဇာ ပျမ်းမျှ သုံးစွဲနိုင်မှုမှာ ၅၀ ကီလိုဂရမ်ဝင်အိတ် ဝ.၂၈ အိတ်သာ သုံးစွဲနိုင်ပြီး တစ်နှစ်လျှင် မက်ထရစ်တန် ဝ.၅၇ သန်းသာလျှင် သုံးစွဲနိုင်မှုရှိနေပါတယ်။ အိမ်နီးချင်းနိုင်ငံများဖြစ်သည့် မိမိတို့နိုင်ငံထက် စိုက်ဧက လျော့နည်းသော ထိုင်းနိုင်ငံတွင် တစ်နှစ်လျှင် မက်ထရစ်တန် ၁.၉၉ သန်း သုံးစွဲ၍ မြန်မာနိုင်ငံထက် ၃.၄၉ ဆ ပိုမိုသုံးစွဲလျက်ရှိပြီး ဗီယက်နမ်နိုင်ငံတွင် တစ်နှစ်လျှင် မက်ထရစ်တန် ၁.၈၁ သန်းဖြင့် ၃.၁၆ ဆပိုမိုသုံးစွဲလျက်ရှိသည်ဖြစ်၍ နိုင်ငံတော်၏ လယ်ယာကဏ္ဍဖွံ့ဖြိုးရေးအတွက် သွင်းအားစု လိုအပ်ချက် လွန်စွာအားနည်းနေသေးသဖြင့် လွှတ်တော်ကိုယ်စားလှယ်တော်ကြီး၏ တင်ပြချက်မှာ အမှန်ပင်ဖြစ်ပါတယ်။ 
    စိုက်ပျိုးရေးနည်းပညာ ပြန့်ပွားရေးအတွက် ဆန်စပါးအပါအဝင် သီးနှံအလိုက် သိပ္ပံနည်းကျ စိုက်ပျိုးနည်းစနစ်များကို တောင်သူလယ်သမားများအတွက် ပညာရှင်များကို လေ့ကျင့်ပညာပေး၍ သင်တန်းခန်းမဓာတ်ခွဲခန်းများမှ လယ်ကွင်းထဲကိုအရောက်နည်းပညာပေး ဆောင်ရွက်လျက်ရှိပါ တယ်။ စိုက်ပျိုးရေးတက္ကသိုလ်၊ စိုက်ပျိုးရေးသိပ္ပံ၊ စိုက်ပျိုးရေးသုတေသနဌာနနှင့် စိုက်ပျိုးရေးခြံများ တွင် မြေလွတ်၊ မြေလပ်မကျန် သုတေသန စိုက်ကွင်းများထူထောင်ပြီး ဆရာ ဆရာမများ၊ ကျောင်းသား ကျောင်းသူများ၊ စိုက်ပျိုးရေးပညာရှင်များ ကိုယ်တိုင်လက်တွေ့ပါဝင်လျက် လေ့ကျင့်ပညာပေး ဆောင်ရွက်နေခြင်း၊ အောင်မြင်လျက်ရှိသော တောင်သူစိုက်ကွင်းများကို  တည်ထောင်လျက် ပိုမို တိုးတက်လာအောင် လေ့ကျင့်ပေးလျက်ရှိခြင်း နည်းလမ်းများအပါအဝင် မြို့နယ်တစ်မြို့နယ်တွင် အဓိကစားသုံးသီးနှံ ဆန်စပါးအပါအဝင် ဒေသနှင့်ကိုက်ညီသော စီးပွားဖြစ်သီးနှံများရွေးချယ်၍ စံနမူနာပြ စိုက်ခင်းများထူထောင်ခြင်းအားဖြင့် ဒေသအလိုက် ဟန်ချက်ညီညီတိုးတက်လာစေရန် စိုက်ပျိုးရေးနည်းပညာများကို သီးနှံအမယ်အလိုက်ထိရောက်သော နည်းပညာပေးလုပ်ငန်းများ တိုးတက်ဆောင်ရွက်လျက်ရှိနေပြီဖြစ်ပါကြောင်းလည်း ရှင်းလင်းတင်ပြအပ်ပါတယ်။
    ထိုမျှသာမက မိမိတို့နိုင်ငံတွင် တောင်သူလယ်သမား မိသားစုဝင်များအနေဖြင့် မိဘဘိုးဘွား တို့၏ အမွေကိုဆက်ခံ၍ လယ်ယာလုပ်ငန်းခွင်အတွင်း အသက်မွေးဝမ်းကျောင်း ပြုလျက်ရှိရာ သားသမီးငယ်များအား စိုက်ပျိုးရေးနည်းပညာများ ခိုင်မာစွာ ရရှိစေရေးအတွက် သူငယ်တန်းမှ ဒသမတန်းထိ အတန်းအလိုက် မူလတန်းအဆင့်၊ အလယ်တန်းအဆင့်၊ အထက်တန်းအဆင့် အခြေခံပညာကျောင်းများတွင် စိုက်ပျိုးရေးဘာသာရပ်ကို အဓိကပြဋ္ဌာန်း ဘာသာရပ်အဖြစ် ယခုပညာသင်နှစ်မှစ၍ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနနှင့် ပညာရေးဝန်ကြီးဌာန တို့ ပူးပေါင်းလျက် ပြဋ္ဌာန်းသင်ခန်းစာ စာစောင်များရေးသားပြုစုနိုင်ခဲ့ပြီး စိုက်ပျိုးရေးဘာသာရပ် လေ့ကျင့်ပညာပေးရေးလုပ်ငန်းများကို အခြေခံပညာကျောင်းမှပင်လျှင် နက်ရှိုင်းစွာစတင်ဆောင်ရွက် နေပြီဖြစ်ကြောင်း ရှင်းလင်းတင်ပြအပ်ပါတယ်။
    ရေသောက်စနစ်များကိုထူထောင်ရာတွင် လက်ရှိစုစုပေါင်းစိုက်ဧက ၃၄.၅၈ သန်းတွင် ၁၆.၇ ရာခိုင်နှုန်းနှင့် ညီမျှသောစုစုပေါင်းဧက ၅.၇၇ သန်းအတွက်သာ ဆည်ရေသောက်စနစ်များ ထူထောင် ပေးထားနိုင်ပြီး ဆည်ရေသောက်စနစ် တိုးတက်ဆောင်ရွက်နိုင်ရန် လိုအပ်မည်ဖြစ်ပါကြောင်း တင်ပြ လိုပါတယ်။ နိုင်ငံတော် ဘဏ္ဍာရေးသုံးစွဲမှု ခွင့်ပြုပေးနိုင်သည့်အပေါ်မူတည်၍ ဆည်ရေသောက်စနစ် များ ဖွံ့ဖြိုးတိုးတက်စေခြင်းဖြင့် စိုက်ပျိုးရေးကဏ္ဍကို ရေရှည်တည်တံံ့ဖွံ့ဖြိုးတိုးတက်စေမည်ဖြစ်ပြီး တစ်သီး၊ နှစ်သီး၊ သုံးသီး၊ သီးထပ်၊ သီးညှပ်များစိုက်ပျိုးနိုင်ပြီး သီးနှံထုတ်လုပ်မှုစွမ်းအားမြင့်မား တိုးတက်အောင် ဆောင်ရွက်သွားမည်ဖြစ်ပါကြောင်းလည်း ရှင်းလင်းတင်ပြအပ်ပါတယ်။ 
    လေးစားအပ်သော  ပြည်သူ့လွှတ်တော်ဥက္ကဋ္ဌကြီးနှင့် လွှတ်တော်ကိုယ်စားလှယ်တော်ကြီးများ ခင်ဗျား။ တောင်သူလယ်သမားများ ဝင်ငွေတိုးစေရေးနှင့် လယ်ယာကဏ္ဍ ဖွံ့ဖြိုးတိုးတက်စေရေး အတွက် ဈေးကွက်ခိုင်မာမှုနှင့် ဈေးကွက်၏ အဓိကအရေးပါမှုကို အကျဉ်းမျှ ရှင်းလင်းတင်ပြလိုပါ တယ်။ ယနေ့ကာလအထိ မြန်မာ့ဆန်စပါးအပါအဝင် လယ်ယာကဏ္ဍထွက်ကုန်များ ဈေးနှိမ်ခံရခြင်းမှာ လယ်ယာသီးနှံများကို ကုန်ကြမ်းအဖြစ်သာတင်ပို့နိုင်ခြင်းကြောင့် မူလလယ်ယာထွက်ကုန်များ ဈေးနှုန်း ကောင်းမွန်စွာ မရရှိခြင်းမှာ ဆင်းရဲနေရခြင်း၏ အဓိကအကြောင်းရင်းဖြစ်ပါတယ်။ နိုင်ငံတကာ ဈေးကွက်တွင် ယှဉ်ပြိုင်ရောင်းချနိုင်မည့် ကုန်ချောနှင့် အဆင့်ဆင့်ကုန်ချောများထုတ်လုပ်ပြီး ခေတ်မီ ကုန်ချောထုတ်စက်ရုံများ အပြည့်အဝပေါ်ထွန်းလာရေးစည်းရုံး ဆောင်ရွက်လျက်ရှိပါတယ်။ 
    ဥပမာ-ဆန်စပါးသီးနှံတွင် ကျောက်ပြားဝိုင်းနှင့် ကြိတ်သည့်စက် (Stone Roller) ဆန်စက် စနစ် ဖြင့် ဆန်ကြိတ်ခွဲရာမှာ စပါးတင်း ၁၀၀ လျှင် အကျိုးအကြေများ ပါဝင်နေသည့် ၂၅ မှတ်ဆန် ၄၀ တင်း အောက်သာထွက်ရှိနိုင်ပြီး၊ ခေတ်မီ Satake ဆန်စက်၊ Roller ဆန်စက်ကဲ့သို့ အဆင့်မြင့် Rubber Roller စက်များဖြင့် ပြောင်းလဲအသုံးပြုကြိတ်ခွဲပါက စပါးတင်း ၁၀၀ လျှင် အကျိုးအကြေ ၅ ရာခိုင်နှုန်း ခန့်သာပါဝင်သည့် ၅ မှတ်ဆန် ၆၀ တင်းအထက်ထွက်ရှိနိုင်ပြီး နိုင်ငံတော်၏ ဆန်တင်ပို့မှု ကမ္ဘာ့ ဈေးကွက်တွင် နေ့ချင်းညချင်း တိုးတက်ယှဉ်ပြိုင်လာနိုင်မည်ဖြစ်ပါတယ်။ နိုင်ငံတော်၏ ဆန်စပါးကဏ္ဍ အရှိန်အဟုန်ဖြင့် တိုးတက်လာစေရန် မဖြစ်မနေဆောင်ရွက်ကြရမည့် ခေတ်မီဆန်စက်များသည် အခြေခံလိုအပ်ချက်ဖြစ်ကြောင်း တင်ပြအပ်ပါတယ်။ ဆန်မှထွက်သည့် ဘေးထွက်ပစ္စည်းဖြစ်သည့် ဖွဲနုဆီ အသုံးပြုနိုင်ခြင်း၊ အကျိုးအကြေဆန်များကို ဆန်ကြာဆံ၊ ဆန်ခေါက်ဆွဲအဖြစ် ထုတ်လုပ်နိုင်ခြင်း၊ စပါးခွံကို လျှပ်စစ်ဓာတ်အား အသုံးပြုနိုင်ခြင်းတို့ကြောင့် နိုင်ငံတော်တွင် ဘေးထွက်ပစ္စည်းများမှ လွန်စွာအကျိုးရှိစေမည်ဖြစ်ပါတယ်။ 
    သို့ဖြစ်ပါ၍ နေပြည်တော်ကောင်စီနယ်မြေတွင် ၂၀၁၂ ခုနှစ် ဒီဇင်ဘာလမှ ၂၀၁၃ ခုနှစ် အတွင်း ပုဂ္ဂလိကများမှ ခေတ်မီအဆင့်မြင့်ဆန်စက် တန် ၂၀၀ ဆန်စက်များ အလျင်အမြန် ပေါ်ထွက် လာရေးကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနတို့ပူးပေါင်း၍ မြန်မာ့စီးပွားရေးလုပ်ငန်းရှင်များ ပါဝင်ရင်းနှီးမြှုပ်နှံလာရေးကို စည်းရုံးဆောင်ရွက်လျက်ရှိနေပါကြောင်းလည်း တင်ပြအပ်ပါတယ်။ အလားတူပင် ဆန်စပါးသီးနှံ အပါအဝင် ကြံသီးနှံ၊ သစ်သီးဝလံ၊ ဆီထွက်သီးနှံများစသည်‌့ မြန်မာ့စိုက်ပျိုးရေးထွက်ကုန်များကို တန်ဖိုးမြင့် ကုန်ချောထုတ်လုပ်နိုင်ရေးကိုလည်း ကြိုးပမ်းဆောင်ရွက်ကြရန် လိုအပ်လျက်ရှိနေပါ ကြောင်း တင်ပြအပ်ပါတယ်။ 
    လေးစားအပ်ပါသော ဥက္ကဋ္ဌကြီးခင်ဗျား။ နိုင်ငံတော်အစိုးရသစ်ကာလတွင် လယ်ယာ စိုက်ပျိုးရေးနှင့်ဆည်မြောင်းဝန်ကြီးဌာနအနေဖြင့် လယ်ယာကဏ္ဍဖွံ့ဖြိုးရေးအတွက် တောင်သူ လယ်သမားများ ဝင်ငွေတိုးတက်စေရေးကို ကိုယ်စွမ်းဉာဏ်စွမ်းအပြည့်အဝဖြင့် နိုင်ငံတကာဈေးကွက် တွင် မြန်မာ့ဆန်စပါးအပါအဝင် မြန်မာ့လယ်ယာထွက်ကုန်များ ဈေးကွက်နေရာရရှိစေရေးအတွက် နိုင်ငံတကာအစိုးရအဖွဲ့အစည်းများနှင့် ပုဂ္ဂလိကများ၏ ရင်းနှီးမြှုပ်နှံမှုများဖြစ်ပေါ်လာရေးအတွက် စဉ်ဆက်မပြတ် ညှိနှိုင်းပူးပေါင်းဆောင်ရွက် လျက်ရှိပါတယ်။ 
    သို့ဖြစ်ပါ၍ ကာယကံရှင်တောင်သူလယ်သမားများကိုယ်တိုင် ကာယကံမြောက်ပါဝင်ကြပြီး ပုဂ္ဂလိကပိုင်အခန်းကဏ္ဍ၊ လွှတ်တော်အဆင့်ဆင့်၏အခန်းကဏ္ဍ၊ နိုင်ငံတော်အစိုးရ အခန်းကဏ္ဍ၊ ပြည်နယ်/တိုင်းဒေသအစိုးရအဖွဲ့ဝင်များ၏ အခန်းကဏ္ဍအားလုံး ကဏ္ဍအလိုက် တက်ညီလက်ညီပါဝင် ကူညီရိုင်းပင်းဆောင်ရွက်ကြခြင်းအားဖြင့် မြေသယံဇာတ၊ ရေသယံဇာတ၊ လူသယံဇာတ၊ ရာသီဥတု အခြေအနေ၊ အခြေခံကောင်းများနှင့် ပြည့်စုံကြွယ်ဝသော နိုင်ငံတော်၏ လယ်ယာကဏ္ဍ ဖွံ့ဖြိုးတိုးတက် စေရေးလုပ်ငန်းများကို အရှိန်အဟုန်မြှင့်တင် ဆောင်ရွက်နိုင်မည်ဟု ယုံကြည်ပါကြောင်းနှင့် ပဲခူးတိုင်းဒေသကြီး၊ သနပ်ပင်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးမြင့်ဦး၏ မေးမြန်းချက် ကို ရှင်းလင်းဖြေကြားအပ်ပါတယ်ခင်ဗျား။