(ဃ)-ရပ်ကွက် သို့မဟုတ် ကျေးရွာ အုပ်စု အုပ်ချုပ်ရေးဥပဒေကို အကောင်အထည်ဖော်ဆောင်ရွက် ပေးရန် နှင့် စပ်လျဉ်းသည့်မေးခွန်း

နိုင်ငံတော် ဖွဲ့စည်းပုံအခြေခံဥပဒေပုဒ်မ ၂၈၉ တွင် ရပ်ကွက် သို့မဟုတ် ကျေးရွာအုပ်စု၏အုပ်ချုပ်ရေးကို ရပ်ရွာ ကကြည်ညိုလေးစားပြီး သိက္ခာသမာဓိရှိသည့် ပုဂ္ဂိုလ်တစ်ဦးဦးကို ဥပဒေနှင့်အညီ ခန့်အပ်တာဝန် ပေးဆောင်ရွက်စေရမည်ဟု ပြဋ္ဌာန်းထားတဲ့အလျောက် ရပ်ကွက် သို့မဟုတ် ကျေးရွာအုပ်စု အုပ်ချုပ် ရေးမှူးများကိုခန့်အပ်တာဝန်ပေးအပ်ပြီး ရပ်ကွက် သို့မဟုတ် ကျေးရွာအုပ်စုရဲ့ အုပ်ချုပ်ရေးဆိုင်ရာ လုပ်ငန်းတွေကို ထိရောက်စွာအကောင်အထည်ဖော်ဆောင်ရွက်ရန်အလို့ငှာ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေ ၂၀၁၂ ခုနှစ် ပြည်ထောင်စုလွှတ်တော်ဥပဒေ အမှတ် ၁ ကို နိုင်ငံတော်သမ္မတက ၂၀၁၂ ခုနှစ်၊ ဖေဖော်ဝါရီလ ၂၄ ရက်တွင်လည်းကောင်း၊ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေကို ပြင်ဆင်သည့်ဥပဒေ ၂၀၁၂ ခုနှစ် ပြည်ထောင်စုလွှတ်တော် ဥပဒေအမှတ် ၇ ကို နိုင်ငံတော်သမ္မတက ၂၀၁၂ ခုနှစ်၊ မတ်လ ၂၈ ရက်နေ့တွင်လည်းကောင်း ထုတ်ပြန်ခဲ့ပြီး ဖြစ်ပါတယ်။ အဲဒီ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဆိုင်ရာနည်းဥပဒေ တွေကို ၂၀၁၂ ခုနှစ်၊ ဇွန်လ ၂၈ ရက်နေ့မှာ ကျင်းပပြုလုပ်တဲ့ ပြည်ထောင်စုအစိုးရအဖွဲ့ အစည်းအဝေး အမှတ်စဉ် (၂၄/၂၀၁၂) က သဘောတူခဲ့တဲ့အတွက် ရပ်ကွက် သို့မဟုတ် ကျေးရွာအုပ်စုအုပ်ချုပ်ရေး ဆိုင်ရာနည်းဥပဒေကို ဖွဲ့စည်းပုံအခြေခံဥပဒေပုဒ်မ ၉၇ ပုဒ်မခွဲ (က) ပုဒ်မခွဲငယ် (၂) နှင့်အညီ ပြည်ထဲရေးဝန်ကြီးဌာန၊ ပြည်ထောင်စုဝန်ကြီးက ၂၀၁၂ ခုနှစ်၊ ဇူလိုင်လ ၆ ရက်နေ့မှာ လက်မှတ် ရေးထိုးထုတ်ပြန်ခဲ့ပြီး ဖြစ်ပါတယ်။ အထက်ကတင်ပြခဲ့တဲ့ ထုတ်ပြန်ပြီး နည်းဥပဒေကို နိုင်ငံတော် ဖွဲ့စည်းပုံအခြေခံဥပဒေပုဒ်မ ၁၃၇ ပုဒ်မခွဲ(က) နှင့် ပုဒ်မ ၁၅၇ ပုဒ်မခွဲ(က) တို့အရ အနီးကပ်ဆုံး ကျင်းပတဲ့ ပြည်သူ့လွှတ်တော်နှင့် အမျိုးသားလွှတ်တော် ပုံမှန်အစည်းအဝေးကာလမှာ သက်ဆိုင်ရာ လွှတ်တော်ဥက္ကဋ္ဌကခွင့်ပြုတဲ့ အစီအစဉ်နှင့် လွှတ်တော်ကိုယ်စားလှယ်များထံ ဖြန့်ဝေတင်ပြရန် အတွက်လည်း ၂၀၁၂ ခုနှစ်၊ ဇူလိုင်လ ၆ ရက်နေ့မှာ လွှတ်တော်ရုံးသို့ ပေးပို့တင်ပြခဲ့ပြီး ဖြစ်ပါတယ်။ ဒါ့အပြင် ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေ အခန်း(၁၂) ပါ ချီးမြှင့်ထောက်ပံ့ငွေ နှင့် အခန်း(၁၃)ပါ ရုံးသုံးစရိတ်ဆိုင်ရာပြဋ္ဌာန်းချက်များကို လုပ်ငန်းအကောင်အထည်ဖော်နိုင်ရန် အတွက် ပြည်ထဲရေးဝန်ကြီးဌာနက နိုင်ငံတော်သမ္မတရုံးကို တင်ပြခဲ့ရာ ၂၀၁၂ ခုနှစ်၊ ဇွန်လ ၃၀ ရက် နေ့မှာ နိုင်ငံတော်သမ္မတရုံးက ပြည်ထောင်စုအစိုးရအဖွဲ့အစည်းအဝေးသို့တင်ပြပြီး ဘတ်ဂျက်မှာ ထည့်သွင်းတောင်းခံသွားဖို့ လမ်းညွှန်တဲ့အတွက် ၂၀၁၂ ခုနှစ်၊ ဇူလိုင်လ ၁၂ ရက်နေ့မှာ ပြုလုပ်တဲ့ ပြည်ထောင်စုအစိုးရအဖွဲ့အစည်းအဝေး အမှတ်စဉ် (၂၆/၂၀၁၂) မှာ တင်ပြထားပြီး လုပ်ထုံးလုပ်နည်း နှင့်အညီ ဆက်လက်ဆောင်ရွက်လျက်ရှိပါတယ်။ ဒါ့ကြောင့် ပြည်ထဲရေးဝန်ကြီးဌာနအနေနဲ့ ထုတ်ပြန် ခဲ့ပြီးဖြစ်တဲ့ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေနှင့် ရပ်ကွက် သို့မဟုတ် ကျေးရွာ အုပ်စုအုပ်ချုပ်ရေးဆိုင်ရာနည်းဥပဒေများအရ တိုင်းဒေသကြီးနှင့် ပြည်နယ်အသီးသီးမှာရှိတဲ့ အထွေထွေအုပ်ချုပ်ရေးဦးစီးဌာနက မြို့နယ်အုပ်ချုပ်ရေးမှူးများကို ရပ်ကွက် သို့မဟုတ် ကျေးရွာ အုပ်စုအုပ်ချုပ်ရေးမှူးများ ရွေးချယ်တာဝန်ပေးအပ်ရာမှာ လုပ်ထုံးလုပ်နည်းများနှင့်အညီ စနစ်တကျ ဆောင်ရွက်နိုင်ရေးအတွက်သင်တန်းများ ဖွင့်လှစ်ဆောင်ရွက်လျက်ရှိပါကြောင်းနှင့် ချီးမြှင့် ထောက်ပံ့ငွေ နှင့်ရုံးသုံးစရိတ်ကိစ္စရပ်များဆိုင်ရာ ဘဏ္ဍာရေးအတည်ပြုချက်များရရှိတာနဲ့ တစ်ဆက်တည်းမှာပဲ နည်းဥပဒေလုပ်ထုံးလုပ်နည်းနှင့်အညီ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးမှူးများကို ရွေးချယ်တာဝန်ပေးအပ်၍ ဆက်လက်ဆောင်ရွက်သွားမှာဖြစ်ပါကြောင်း ရှင်းလင်းဖြေကြားပါသည်။