(င)-လစ်လပ်လျက်ရှိသော မဲဆန္ဒနယ်မြေ များအတွက် လွတ်လပ်၍ တရားမျှတသော ကြားဖြတ်ရွေးကောက်ပွဲကို ကျင်းပပြုလုပ်ပေးရန် အစီစဉ် ရှိ/မရှိ နှင့်စပ်လျဉ်းသည့် မေးခွန်း

၂၀၀၈ ခုနှစ် ဖွဲ့စည်းပုံအခြေခံဥပဒေနဲ့အညီ ပါတီစုံ ဒီမိုကရေစီရွေးကောက်ပွဲ ကို ၂၀၁၀ ပြည့်နှစ်၊ နိုဝင်ဘာလ ၇ ရက်နေ့တွင် ကျင်းပပေးခဲ့ပြီး ပြည်သူ့ လွှတ်တော်မဲဆန္ဒနယ် ၃၂၅ နယ်၊ အမျိုးသားလွှတ်တော်မဲဆန္ဒနယ် ၁၆၈ နယ်နှင့် တိုင်းဒေသကြီးနှင့် ပြည်နယ်မဲဆန္ဒနယ် ၆၆၁ နေရာတို့တွင် ရွေးကောက်ပွဲများကို ပြည်ထောင်စုရွေးကောက်ပွဲကော်မရှင် က အောင်မြင်စွာကျင်းပ ပေးခဲ့ပြီးဖြစ်ပါတယ်။ ထိုသို့ ရွေးကောက်ပွဲများကျင်းပပေးခဲ့ပြီးနောက် အကြောင်းအမျိုးမျိုးကြောင့် လစ်လပ်သွားတဲ့ ပြည်သူ့လွှတ်တော်မဲဆန္ဒနယ် ၄၀ နယ်၊ အမျိုးသား လွှတ်တော်မဲဆန္ဒနယ် ၆ နယ်နှင့် တိုင်းဒေသကြီးနှင့် ပြည်နယ်လွှတ်တော်မဲဆန္ဒနယ် ၂ နယ်တို့တွင် ကြားဖြတ်ရွေးကောက်ပွဲများကို ၂၀၁၂ ခုနှစ်၊ ဧပြီလ ၁ ရက်နေ့တွင် ကျင်းပရန်စီစဉ်ခဲ့သော်လည်း ကချင်ပြည်နယ်ရှိ ဖားကန့်မြို့နယ်၊ ဗန်းမော်မြို့နယ်နှင့် မိုးကောင်းမြို့နယ် ပြည်သူ့လွှတ်တော်မဲဆန္ဒနယ် ၃ နယ်တို့တွင် လွတ်လပ်၍ တရားမျှတသောရွေးကောက်ပွဲကျင်းပရန် အခြေအနေမရှိတဲ့အတွက် ထိုမဲဆန္ဒနယ် ၃ နယ်ကို ခေတ္တဆိုင်းငံ့ထားခဲ့ပြီး ကျန်မဲဆန္ဒနယ် ၄၅ နယ်တို့တွင် ရွေးကောက်ပွဲများကို ပြည်ထောင်စုရွေးကောက်ပွဲ ကော်မရှင်က အောင်မြင်စွာကျင်းပပေးခဲ့ပါတယ်။ ယခုအခါ သက်ဆိုင်ရာ လွှတ်တော်များက အကြောင်းအမျိုးမျိုးကြောင့် လစ်လပ်လျက်ရှိသော လွှတ်တော်မဲဆန္ဒနယ်များ စာရင်းကို ပြည်ထောင်စု ရွေးကောက်ပွဲကော်မရှင်သို့ အကြောင်းကြားပေးပို့လာပါတယ်။ ယင်းတို့မှာ ပြည်သူ့လွှတ်တော် မဲဆန္ဒနယ် ၆ နယ်၊ အမျိုးသားလွှတ်တော်မဲဆန္ဒနယ် ၄ နယ်နှင့် တိုင်းဒေသကြီးနှင့် ပြည်နယ်လွှတ်တော် မဲဆန္ဒနယ် ၅ နယ်တို့ဖြစ်ပါတယ်။ အဆိုပါလစ်လပ်လျက်ရှိသော လွှတ်တော် မဲဆန္ဒနယ်တို့ရဲ့လစ်လပ်မှု အခြေအနေတွေကို သက်ဆိုင်ရာလွှတ်တော်အလိုက်ရှိသော လွှတ်တော် ကိုယ်စားလှယ်ဦးရေဖြင့် အချိုးကျနှိုင်းယှဉ်ပါက ပြည်သူ့လွှတ်တော်တွင် ၁.၈၆ ရာခိုင်နှုန်း၊ အမျိုးသား လွှတ်တော်တွင် ၂.၃၈ ရာခိုင်နှုန်း၊ တိုင်းဒေသကြီးနှင့် ပြည်နယ်လွှတ်တော်တွင် ဝ.၇၅ ရာခိုင်နှုန်း လစ်လပ်လျက်ရှိပါတယ်။ လစ်လပ်လျက်ရှိသော တိုင်းဒေသကြီးမှာ ရေကြည်မြို့နယ် တိုင်းဒေသကြီး လွှတ်တော်မဲဆန္ဒနယ် အမှတ်(၁)ဖြစ်ပြီး ပြည်နယ်လွှတ်တော်များမှာ ဝိုင်းမော်မြို့နယ် ပြည်နယ် လွှတ်တော်မဲဆန္ဒနယ် အမှတ်(၂)၊ ဂွမြို့နယ် ပြည်နယ်လွှတ်တော်မဲဆန္ဒနယ်အမှတ်(၂)၊ မိုင်းယောင်း မြို့နယ် ပြည်နယ်လွှတ်တော်မဲဆန္ဒနယ်အမှတ်(၁)နှင့် တာချီလိတ်မြို့နယ် ပြည်နယ်လွှတ်တော် မဲဆန္ဒနယ်အမှတ်(၂)တို့ ဖြစ်ပါတယ်။ ဖွဲ့စည်းပုံအခြေခံဥပဒေပုဒ်မ ၁၃၁ တွင် ပြည်သူ့လွှတ်တော် ကိုယ်စားလှယ်နေရာအချို့ လစ်လပ်နေစေကာမူ ပြည်သူ့လွှတ်တော်လုပ်ငန်းများကို ဆောင်ရွက် ခွင့်ရှိသည်ဟု ပြဋ္ဌာန်းထားပါတယ်။ ပြည်သူ့လွှတ်တော်ရွေးကောက်ပွဲဥပဒေပုဒ်မ ၈၉ တွင် လွှတ်တော် တွင် တစ်စုံတစ်ရာသော အကြောင်းကြောင့် လွှတ်တော်ကိုယ်စားလှယ်နေရာလစ်လပ်ခဲ့လျှင် ဥပဒေနဲ့ အညီ အစားထိုးရွေးကောက်တင်မြှောက်ရမည်ဟုလည်းပြဋ္ဌာန်းပါတယ်။ ထို့အတူ နိုင်ငံရေးပါတီများ မှတ်ပုံတင်ခြင်း ဥပဒေပုဒ်မ ၂ (ဇ)တွင် ကြားဖြတ်ရွေးကောက်ပွဲဆိုသည်မှာ လွှတ်တော်ပုံမှန်သက်တမ်း တစ်ရပ်အတွင်း မဲဆန္ဒနယ်တစ်ခုခု၌ ရွေးကောက်ပွဲရွှေ့ဆိုင်းထားခြင်းကြောင့်ဖြစ်စေ၊ လွှတ်တော် ကိုယ်စားလှယ် တစ်ဦးဦးနုတ်ထွက်ခြင်း၊ ကွယ်လွန်ခြင်း၊ ဥပဒေနဲ့အညီ လွှတ်တော်ကိုယ်စားလှယ် အဖြစ်မှ ရပ်စဲခံရခြင်း သို့မဟုတ် တာဝန်မှရုပ်သိမ်းခံရခြင်းကြောင့်ဖြစ်စေ လစ်လပ်လျက်ရှိသော မဲဆန္ဒနယ်များအတွက် အခါအားလျော်စွာ ကော်မရှင်ကသတ်မှတ်ကျင်းပပေးသည့် ရွေးကောက်ပွဲကို ဆိုလိုသည်ဟုပြဋ္ဌာန်းထားပါတယ်။ သို့ဖြစ်ပါ၍ ပြည်ထောင်စုရွေးကောက်ပွဲကော်မရှင်သည် လစ်လပ်မှုရှိတိုင်း ကြားဖြတ်ရွေးကောက်ပွဲကိုကျင်းပခြင်းမပြုဘဲ သင့်လျော်သော လစ်လပ်မဲဆန္ဒနယ် အရေအတွက်အတွင်း အခါအားလျော်စွာ ကြားဖြတ်ရွေးကောက်ပွဲများကို သတ်မှတ်ကျင်းပပေးရန် စီစဉ်ထားရှိပါတယ်။ ယခုအခါ ပြည်ထောင်စုရွေးကောက်ပွဲကော်မရှင်သည် ၂၀၁၅ ခုနှစ်အတွင်း ကျင်းပမည့် ပါတီစုံဒီမိုကရေစီအထွေထွေရွေးကောက်ပွဲအား လွတ်လပ်၍တရားမျှတစွာဖြင့် ကျင်းပပြု လုပ်ပေးနိုင်ရန်အတွက် အဓိကကျသောကြိုတင်ပြင်ဆင်မှုလုပ်ငန်းများဖြစ်တဲ့ မဲစာရင်းများပြုစုခြင်း၊ မဲဆန္ဒရှင်များအား အသိပညာပေးရန်ပြုစုခြင်း၊ မဲရုံမှူးနှင့် မဲရုံအဖွဲ့ဝင်များအား လုပ်ငန်းကျွမ်းကျင်မှု ရှိစေရန် သင်တန်းများပေးရန် ကြိုတင်ပြင်ဆင်ခြင်းစသည်တို့ကို နိုင်ငံရေးပါတီအဖွဲ့အစည်းများ၊ အရပ်ဘက် လူမှုအဖွဲ့အစည်းများနှင့် ပြည်ထောင်စုဝန်ကြီးဌာနအချို့မှ ဌာနဆိုင်ရာများဖြင့်ညှိနှိုင်း၍ စတင်ဆောင်ရွက်နေပြီဖြစ်ပါတယ်။ သို့ဖြစ်ပါ၍ ပြည်ထောင်စုရွေးကောက်ပွဲကော်မရှင်အနေဖြင့် အနည်းငယ်သာလစ်လပ်လျက်ရှိသော မဲဆန္ဒနယ်မြေများအတွက် လွတ်လပ်၍တရားမျှတသော ကြားဖြတ်ရွေးကောက်ပွဲကို ကျင်းပပေးရန် လောလောဆယ်အစီအစဉ်မရှိသေးပါကြောင်း ဖြေကြား အပ်ပါတယ်။