(ဂ)-၂၀၁၄ ခုနှစ် မကုန်ဆုံးမီ တစ်နိုင်ငံလုံးရှိသစ်များ အပြောင်ရှင်းမည်‌့အနေအထားဖြင့် ထုတ်လုပ်နေခြင်း နှင့်ပတ်သက်၍ မည်သို့တားဆီးကာကွယ်ဆောင်ရွက်နေသည်ကို သိလိုခြင်းနှင့်စပ်လျဉ်းသည့်မေးခွန်း

 ရန်ကုန်တိုင်းဒေသကြီး၊ ရွှေပြည်သာမဲဆန္ဒနယ် ပြည်သူ့လွှတ်တော်ကိုယ်စားလှယ် ဦးတင်မောင်ဦး၏ အဓိကမေးခွန်းကိုပဲ အချိန်ကိုငဲ့ညှာစွာဖြင့် ပြန်လည်ဖြေကြားသွားမှာဖြစ်ပါတယ်။ ကျန်သောအချက်များသည် လွှတ်တော်အသီးသီးမှာ ကျွန်တော် တို့ဝန်ကြီးဌာနအနေနဲ့ အကြိမ်ကြိမ်ဖြေဆိုခဲ့တဲ့အကြောင်းအရာများဖြစ်တဲ့အတွက် ကျွန်တော် မတင်ပြ တော့ပါဘူး။ အဲ့ဒီတော့ လွှတ်တော်ကိုယ်စားလှယ်ကြီးရဲ့ အဓိကမေးခွန်းကတော့ နိုင်ငံတော်ရဲ့ သစ်ထုတ်လုပ်ရေးအခန်းကဏ္ဍမှာ သစ်လုံးများထုတ်လုပ်ရောင်းချခြင်းကို ၂၀၁၄ ခုနှစ်အထိသာ ခွင့်ပြု တော့မည်ဖြစ်ကြောင်း မူတစ်ရပ်အနေဖြင့် သိရှိနေရပါသော်လည်း ယနေ့အခြေအနေမှာ ၂၀၁၄ ခုနှစ် မကုန်ဆုံးမီ တစ်နိုင်ငံလုံးရှိသစ်များ အပြောင်ရှင်းမည့်အနေအထားဖြင့် ထုတ်လုပ်နေခြင်းနှင့်ပတ်သက် ၍ နိုင်ငံတော်အကျိုးစီးပွား များစွာထိခိုက်နစ်နာသည်ဖြစ်၍ ထိထိရောက်ရောက်ဖြင့် မည်သို့တားဆီး ကာကွယ်ဆောင်ရွက်နေသည်ကို သိရှိလိုခြင်းနှင့်ပတ်သက်လို့ ကျွန်တော် ပြန်လည်တင်ပြသွားပါ့မယ်။ ကျွန်တော်တို့ဝန်ကြီးဌာနအနေနဲ့ သဘာဝသစ်တောသယံဇာတအရင်းအမြစ်များကို ရေရှည်တည်တံ့ တိုးပွားစေရေးနှင့် သဘာဝပတ်ဝန်းကျင်ထိန်းသိမ်းကာကွယ်ရေးကို အထောက်အကူဖြစ်စေဖို့အတွက် သစ်ထုတ်လုပ်မှု ပမာဏတွေကို နှစ်စဉ်လျှော့ချထုတ်လုပ်သွားရန် ရည်မှန်းချက်ထားပြီး ဆောင်ရွက်ခဲ့ ပါတယ်။ အဲ့လိုဆောင်ရွက်တဲ့အခါမှာ ၂၀၁၁-၂၀၁၂ ဘဏ္ဍာနှစ်မှာ ကျွန်း ၃၀၆၃၂၉ တန်၊ သစ်မာ ၁၅၄၈၀၇၅ တန်ကိုလည်းကောင်း၊ ၂၀၁၂-၂၀၁၃ ဘဏ္ဍာနှစ်မှာ ကျွန်း၂၆၉၅၁၆ တန်နှင့် သစ်မာ ၁၅၉၇၇၉၈ တန်ကိုလည်းကောင်း ထုတ်လုပ်ခဲ့ပါတယ်။ ၂၀၁၃-၂၀၁၄ ဘဏ္ဍာနှစ်မှာ ကျွန်း ၉၃၁၇၈ တန်နှင့် သစ်မာ ၆၁၀၅၉၂ တန်တို့ကို ထုတ်လုပ်ခဲ့ပါတယ်။ တစ်နည်းတင်ပြရရင် ဒါဟာ ကျွန်တော်တို့ နိုင်ငံတော်ကို သစ်ထုတ်မယ့် စီမံကိန်းရေးဆွဲသလို ကျွန်တော်တို့ရဲ့ ဆောင်ရွက်မယ်‌့လုပ်ငန်းစဉ်တွေနဲ့ ပတ်သက်လို့ လွှတ်တော်အသီးသီးမှာရှိတဲ့ ကျွန်တော်တို့ရဲ့ သဘာဝပတ်ဝန်းကျင်ထိန်းသိမ်းရေး ကော်မတီအသီးသီးကိုလည်း တင်ပြခဲ့ပြီးဖြစ်ပါတယ်။ ကျွန်တော်တို့ရဲ့ ပြည်တွင်းသစ်ထုတ်လုပ်မှုကို သိသိသာသာလျှော့ချခဲ့တဲ့အပြင် ၂၀၁၄ ခုနှစ်၊ ဧပြီလ ၁ ရက်နေ့မှစတင်ပြီး ပြည်ပသို့ သစ်အလုံးလိုက် တင်ပို့ခြင်းကို ရပ်ဆိုင်းခဲ့ပြီးဖြစ်ပါတယ်။ သစ်ထုတ်လုပ်ခြင်း ရပ်ဆိုင်းခြင်းမဟုတ်ပါဘူး။ ပတ်ဝန်းကျင် ထိန်းသိမ်းရေးနှင့် သစ်တောရေးရာဝန်ကြီးဌာနဟာ သဘာဝပတ်ဝန်းကျင်ထိန်းသိမ်းရေးနဲ့ သစ်တော ပြုန်းတီးမှု တားဆီးကာကွယ်ရေး၊ သယံဇာတများ ရေရှည်တည်တံ့ရေးကို ဆောင်ရွက်ရန်လိုအပ်လာတဲ့ အတွက် သဘာဝတောမှ သစ်ထုတ်ခြင်းကို လုံးဝပိတ်ပင်တဲ့ Logging Ban အဲ့ဒီစနစ်အစား ဒုတိယ အကောင်းဆုံးနည်းလမ်းဖြစ်တဲ့ Log Export Ban-LEB ကျွန်တော်တို့ ချမှတ်အကောင်အထည်ဖော် ဆောင်ရွက်ခဲ့ရခြင်းဖြစ်ပါတယ်။ သစ်အလုံးလိုက်တင်ပို့ခြင်းကို ရပ်ဆိုင်းခဲ့ပြီးဖြစ်သော်လည်း သစ်ထုတ် လုပ်ခြင်းကိုတော့ ကျွန်တော်တို့ရဲ့ နိုင်ငံတော်ရဲ့ အထူးသဖြင့် သဘာဝဘေးအန္တရာယ်တွေကျရောက်တဲ့ အခါမှာ လိုအပ်တဲ့လိုအပ်ချက်၊ နောက် အခုနက လွှတ်တော်ကိုယ်စားလှယ်ကြီး ဆွေးနွေးသွားတဲ့ ဒေသခံပြည်သူများအတွက် လိုအပ်ချက်၊ နိုင်ငံတော်ရဲ့ဖွံ့ဖြိုးတိုးတက်မှု အစိတ်အပိုင်းတွေမှာ လိုအပ် ချက်၊ ဒီ့အပြင် ပြည်တွင်းသစ် အခြေခံစက်မှုလုပ်ငန်းဖွံ့ဖြိုးတိုးတက်ရေးလိုအပ်ချက်တွေအပေါ်မှာ ဖြည့်ဆည်းနိုင်ဖို့အတွက် ကျွန်တော်တို့ ကျွန်းနဲ့ သစ်မာထုတ်လုပ်မှုများကိုတော့ ဆက်လက်ဆောင်ရွက် သွားမှာဖြစ်ပါတယ်။ ဒီနေရာမှာလည်း ကျွန်တော်တို့ သိသိသာသာလျှော့ချပြီး ထုတ်လုပ်သွားမယ်ဆို တာကိုလည်း တင်ပြလိုပါတယ်။ ၂၀၁၄-၂၀၁၅ မှာ ကျွန်းသစ်တန် ၆၀၀၀၀ ပဲထုတ်ဖို့ လျာထားပါတယ်။ သစ်မာတန် ၆၇၀၀၀၀ ကိုသာ ထုတ်လုပ်ဖို့လျာထားပါတယ်။ တစ်နည်းပြောရရင် ၂၀၁၃-၂၀၁၄ မှာတုန်းက ကျွန်းက ၉၃၀၀၀ ဖြစ်ပါတယ်။ သစ်မာက ၆၁၀၅၀၀ ဖြစ်ပါတယ်။ သို့သော် ကျွန်တော်တို့က သစ်မာကို ဘာကြောင့်ပိုပြီးတော့ ပေးနေတာလဲဆိုတော့ ဒေသခံပြည်သူတွေနဲ့ နောက်တစ်ခုက ကျွန်တော်တို့ ဒေသဖွံ့ဖြိုးတိုးတက်ရေးလိုအပ်ချက်တွေကို သစ်မာကို အများဆုံး ထုတ်လုပ်ပေးရတာ ဖြစ်ပါတယ်။ ဒါကြောင့်မို့လို့ ကျွန်တော်တို့ ဒီလျာထားချက်တွေအတိုင်း လျှော့ချပြီး ထုတ်လုပ်သွားမှာ ဖြစ်ပါတယ်။ ထုတ်လုပ်ရရှိတဲ့သစ်များကိုလည်း အခုနက ကျွန်တော်တင်ပြခဲ့တဲ့ လုပ်ငန်းစဉ်များမှာ စနစ်တကျ ကျွန်တော်တို့ စီမံဖြည့်ဆည်းဆောင်ရွက်ပေးသွားမှာဖြစ်ပါတယ်။ ဒါ့ကြောင့် လွှတ်တော် ကိုယ်စားလှယ်ကြီးရဲ့ မေးမြန်းထားချက်မှာပါရှိသကဲ့သို့ ယနေ့အခြေအနေမှာ ၂၀၁၄ ခုနှစ်မတိုင်မီ တစ်နိုင်ငံလုံးရှိ သစ်များကို အပြောင်ရှင်းသစ်ထုတ်သည့်အခြေအနေမျိုးမဟုတ်ပါ ကြောင်း၊ ဒီ့အပြင် ပြည်ပသို့ သစ်အလုံးလိုက် တင်ပို့မှုရပ်ဆိုင်းခြင်းသာဖြစ်ပြီး ပြည်တွင်းသစ်အခြေခံစက်ရုံ၊ အလုပ်ရုံများ နှင့် ကုန်ကြမ်းလိုအပ်ချက်၊ ဒေသခံပြည်သူများရဲ့လိုအပ်ချက်၊ ဖွံ့ဖြိုးတိုးတက်ရေး ဆိုင်ရာလိုအပ်ချက်၊ မမျှော်မှန်းနိုင်တဲ့ သဘာဝဘေးအန္တရာယ်အတွက် လိုအပ်ချက်များကို တွက်ချက်ပြီးတော့မှသာ အနည်းဆုံးသဘာဝတောကို ထိခိုက်မှုအနည်းဆုံးနဲ့ သစ်ထုတ်လုပ်ခြင်းသာဖြစ်ပါကြောင်း တင်ပြအပ် ပါတယ်။

          သစ်ထုတ်လုပ်မှုနဲ့ပတ်သက်လို့ အကျဉ်းချုပ်ရှင်းလင်းဖြည့်စွက်တင်ပြလိုပါတယ်။ ကျွန်တော်တို့ နိုင်ငံရဲ့ သဘာဝတောများကို အခုနက လွှတ်တော်ကိုယ်စားလှယ်ကြီး ရှင်းပြသွားတဲ့ Myanmar Selection System ရွေးချယ်ခုတ်လှဲတဲ့စနစ်နဲ့ စနစ်တကျစီမံအုပ်ချုပ်လုပ်ကိုင်ခဲ့ရာမှာ တစ်နည်းအား ဖြင့် ထာဝစဉ်တည်တံ့စေတဲ့ သစ်တောအုပ်ချုပ်လုပ်ကိုင်မှုစီမံကိန်း (Sustainable Forest Management) စနစ်နဲ့ အလေးထားဆောင်ရွက်ပါတယ်။ ဒီစနစ်ရဲ့ အဓိကအနှစ်သာရမှာတော့ နှစ်စဉ်သစ်ထုတ်လုပ်မယ့် တောထွက်ပမာဏသတ်မှတ်ထားရှိခြင်း၊ ခုတ်လဲှရမယ့်သစ်ပင်ရဲ့အရွယ် အစား၊ လုံးပတ်ကန့်သတ်ချက် သတ်မှတ်ထားရှိခြင်း၊ ခုတ်လှဲပြီးဧရိယာ နောက်တစ်ချိန် ပြန်လည် ဝင်ရောက်ခုတ်လှဲရန် အချိန်ကာလသတ်မှတ်ထားရှိခြင်းတို့ပဲ ဖြစ်ပါတယ်။ ဒါ့အပြင် ကျွန်တော်တို့ ဆောင်ရွက်နေတာကို ကမ္ဘာ့နိုင်ငံတကာ မိသားစုဝင်နိုင်ငံဖြစ်တဲ့အတွက် ကမ္ဘာ့စားနပ်ရိက္ခာအဖွဲ့ ထိုနည်းအတူပဲ ITTO ဒီလိုအဖွဲ့အစည်းတွေက ဒါတွေကို အမြဲလေ့လာပြီးတော့မှ ကျွန်တော်တို့နိုင်ငံနဲ့ ပတ်သက်တဲ့ နိုင်ငံအသီးသီးရဲ့ဆောင်ရွက်ချက်တွေအပေါ်မှာ ထောက်ပြကြီးကြပ်တာလည်းရှိပါတယ်။ ထိုနည်းတူပဲ အခုနကတင်ပြခဲ့တဲ့ သစ်တောသယံဇာတစာရင်း ကောက်ယူခြင်း၊ ဒါဟာ နှစ်စဉ် ဆောင်ရွက်သလို ငါးနှစ်တစ်ကြိမ် Forest Resource Assessment - FRA ခေါ်ပါတယ်။ ဒါက ကမ္ဘာ့စားနပ်ရိက္ခာအဖွဲ့က ထုတ်ပြန်ပါတယ်။ ငါးနှစ်တစ်ကြိမ် ထုတ်ပြန်တဲ့အခါမှာ ကျွန်တော်တို့ အဲ့ဒီ အချိန်မှာလည်း ကမ္ဘာ့စားနပ်ရိက္ခာအဖွဲ့နဲ့ရော၊ နိုင်ငံတကာအဖွဲ့အစည်းတွေနဲ့ပါ ပူးပေါင်းပြီး သစ်တောသယံဇာတတွေရဲ့တည်ရှိမှုကို အကဲဖြတ်ခံယူရတာဖြစ်ပါတယ်။ နောက် နိုင်ငံအတွင်းမှာ လည်း ကျွန်တော်တို့ သစ်တောခရိုင် ၆၃ ခရိုင်ကို သတ်မှတ်ပြီးတော့မှ ခရိုင်သစ်တောအုပ်ချုပ် လုပ်ကိုင်မှုနဲ့ ဒါတွေပေါ်မှာလည်း ဆယ်နှစ်တစ်ကြိမ်၊ နောက်ထိုနည်းတူပဲ ငါးနှစ်တစ်ကြိမ်  ကျွန်တော် တို့ ပြန်လည် Review လုပ်ပြီးတော့မှ လက်တွေ့ ခုနက ကဏ္ဍအသီးသီးက ကျွန်တော်တို့အပေါ် ဝေဖန်အကြံပြုတဲ့အချက်တွေကိုပါ ထည့်သွင်းစဉ်းစားပြီး သုံးသပ်ဆောင်ရွက် လျက်ရှိပါတယ်။ ခုနက ကျွန်တော်တင်ပြခဲ့တဲ့ FAO၊ ITTO၊ EITI စတဲ့ဒီအဖွဲ့အစည်းတွေက ဒါစဉ်ဆက် မပြတ် ကျွန်တော်တို့ကို ကြပ်မတ်ပေးပြီး၊ တစ်ဖက်ကလည်း ကျွန်တော်တို့ Global Witness ဆိုတဲ့အဖွဲ့ အစည်းလိုဟာမျိုးက တစ်ကမ္ဘာလုံးမှာ တရားမဝင်တဲ့လုပ်ဆောင်ချက်တွေ၊ နောက်တစ်ခုက ကျွန်တော်တို့ ဒီလိုသယံဇာတ တွေကို အလွန်အကျွံသုံးစွဲတာတွေနဲ့ပတ်သက်ပြီး အမြဲတမ်းဝေဖန်ထောက်ပြလျက်ရှိပါတယ်။ ဒီအဖွဲ့ အစည်းကလည်း ကျွန်တော်တို့နဲ့ နှစ်ကြိမ်တိတိလာရောက်တွေ့ဆုံပြီးတော့မှ မြေပြင်မှာ သူတို့ရရှိထား တဲ့အတိအကျအချက်အလက်တွေနဲ့ ကျွန်တော်တို့နဲ့ ဆွေးနွေးတာမျိုးတွေလည်းရှိပါတယ်။ ဒါကြောင့်မို့ လို့ ကျွန်တော်တင်ပြလိုတာကတော့  ကျွန်တော်တို့အနေနဲ့ ခုနလို ၂၀၁၄ မတိုင်မီ တစ်နိုင်ငံလုံးရှိတဲ့ သစ်တောတွေကို အပြောင်ရှင်းတယ်ဆိုတဲ့ဟာကတော့ ဒီကျွန်တော်တင်ပြသွားတဲ့ အဖြေတွေနဲ့ဆန်းစစ် ပြီး နောက်လက်တွေ့မျက်မြင် ဒါလေးတွေကို သုံးသပ်ရင် အဖြေထွက်နိုင်ပါတယ်။ သို့သော်လည်း အချို့အရာတွေဟာ အားနည်းချက်ရှိနေတာတော့ မှန်ပါတယ်။ ကျွန်တော်တို့လည်း ပြုပြင်ဆောင်ရွက်ဖို့ လုပ်ကိုင်လျက်ရှိပါတယ်။

          ဒီ့အပြင် ကျွန်တော်တို့ ပြင်ပကို သစ်အလုံးလိုက်တင်ပို့ခြင်းကို ရပ်ဆိုင်းပြီးတဲ့နောက်မှာ ကျွန်တော်တို့ ကုမ္ပဏီလုပ်ငန်းရှင်များကိုရောင်းချထားတဲ့ လက်ကျန်သစ်လုံးများ၊ ထုတ်လုပ်ပြီး ရောင်းချ ရန်ကျန်ရှိနေတဲ့သစ်လုံးများနဲ့ပတ်သက်လို့ နိုင်ငံတော်ရဲ့အကျိုးစီးပွား ထိခိုက်နစ်နာမှုမရှိစေရေး အတွက်လည်း ကျွန်တော်တို့ အောက်ပါအတိုင်း ဆောင်ရွက်သွားဖို့ စီစဉ်ထားရှိပါတယ်။ ပထမ တစ်ချက်အနေနဲ့ကတော့ ကုမ္ပဏီ/လုပ်ငန်းရှင်များကို ရောင်းချပြီးဖြစ်တဲ့ လက်ကျန်သစ်လုံးများကို စာရင်းကောက်ယူ၍ သစ်လုံးများကို သစ်အခြေခံ သစ်အချောထည်လုပ်ငန်းများ သစ်ခွဲသားများ အဖြစ် ခွဲစိတ်ရောင်းချရာမှာ အသုံးချဖို့။ နောက်တစ်ချက်ကတော့ ထုတ်လုပ်ပြီး ရောင်းချရန် ကျန်ရှိနေ တဲ့သစ်လုံးများကို စာရင်းပြုစုမယ်။ မြေပြင်စာရင်းကောက်ယူပြီး စာရင်းပြုစုပါမယ်။ ကျွန်တော်တို့ နောင်လျှော့ချထုတ်လုပ်ခြင်းမှ ထွက်ရှိလာမယ့်သစ်လုံးများနဲ့ တစ်ပါတည်း အိတ်ဖွင့်တင်ဒါစနစ်နဲ့ လွတ်လပ်ပွင့်လင်းစွာရောင်းချခြင်း၊ ရောင်းချတဲ့သစ်လုံးများကို သစ်အချောထည်လုပ်ငန်းနှင့် သစ်ခွဲ သားအဖြစ် ခွဲစိတ်ရောင်းချသည့်လုပ်ငန်းများမှာ သုံးစွဲရန် ဒီလုပ်ငန်းစဉ်နှစ်ရပ်နဲ့ ကျွန်တော်တို့     ဆောင်ရွက်သွားမှာ ဖြစ်ပါတယ်။

          ယခုအခါမှာ ပြည်ပပို့သစ်အလုံးလိုက်တင်ပို့ခြင်းကို ရပ်ဆိုင်းပြီးတဲ့အပြင် သစ်ထုတ်လုပ်မှုကို လည်း နှစ်စဉ်လျှော့ချထုတ်လုပ်လျက်ရှိပါတယ်။ နိုင်ငံတော်မှ သစ်တောသယံဇာတအပေါ် မှီခိုမှုနှင့် လိုအပ်မှုများ လျှော့နည်းလာတာနဲ့အမျှ သစ်ထုတ်လုပ်မှုလုပ်ငန်းစဉ်များဟာလည်း တဖြည်းဖြည်း လျော့နည်း ရပ်ဆိုင်းသွားမည်ဖြစ်ပါကြောင်း ဖြေကြားပါသည်။