(င)-မြို့ဝင်ကြေးကောက်ယူ နေမှုများအား ပိုမိုသင့်လျော်ကောင်းမွန်သော နည်းလမ်းများဖြင့် စီမံ ဆောင်ရွက်ပေးရန် အစီအစဉ်ရှိ/မရှိနှင့် စပ်လျဉ်းသည့် မေးခွန်း

၂၀၀၈ ခုနှစ်၊ ဖွဲ့စည်းပုံအခြေခံဥပဒေပုဒ်မ ၂၅၄ ကိုရည်ညွှန်းသည့် ဇယား (၅) တွင် တိုင်းဒေသကြီး သို့မဟုတ် ပြည်နယ်များက ကောက်ခံရမည်‌့ အခွန်အခများကို ဖော်ပြထားပါကြောင်း၊ အမှတ်စဉ် (၄) ပါ တိုင်းဒေသကြီး သို့မဟုတ် ပြည်နယ်က စီမံခန့်ခွဲခွင့်ရှိသည်‌့လမ်းများ၊ တံတားများ ဖြတ်သန်းခဟု တိတိကျကျ ဖော်ပြထားပါကြောင်း၊ တိုင်းဒေသကြီးနှင့် ပြည်နယ်များ၏ တင်ပြချက်များအရ တင်ပြရမည်ဆိုလျှင် အဓိကကျသည့် အခွန်ငွေကောက်ခံရသည့်ကိစ္စသည် ဥပမာ- ရန်ကုန်တိုင်းကဆိုလျှင် အခွန်ဝင်ငွေ လျာထားချက်က ၆.၅၅ ဘီလီယံ၊ မြို့ဝင်ကြေးကောက်ခံခြင်းမှ ရငွေ ၁.၃၃ ဘီလီယံ ဖြစ်သည့်အတွက် ဝင်ငွေ၏ ၂၀၊ ၃၀ ရာခိုင်နှုန်းဖြစ်ပါကြောင်း၊ တိုင်းဒေသကြီးကိုလည်း ဘဏ္ဍာအခွန်ငွေ ပေးသွင်းရပါကြောင်း၊ အဓိကကျသည့် လမ်းမကြီးများ သန့်ရှင်းရေး၊ နေ့စဉ်ဆောင်ရွက်ပေးရသည့် အသုံးစရိတ်၊ လမ်းမီးထွန်းခြင်း၊ ရေစီးရေလာ ကောင်းမွန်အောင် ပြုပြင်ခြင်း၊ လမ်းအသစ်ဖောက်လုပ်ခြင်းများ လုပ်ရပါကြောင်း၊ ဥပဒေနှင့်အညီ ကောက်ခံခြင်း ဖြစ်သည့်အတွက် ကိုယ်စားလှယ်ကြီးတင်ပြသကဲ့သို့ ကျန်သည့်မြို့နယ်များ တိုင်းဒေသကြီးနှင့် ပြည်နယ်အစိုးရအဖွဲ့ဝင်များက ဖြေကြားထားသည်မှာ မြို့ဝင်ဘီးကောက်လိုင်စင် များကို ဖျက်သိမ်းပေးရန် အစီအစဉ်မရှိသေးပါကြောင်း၊ ပြည်ထောင်စုအစိုးရအဖွဲ့ကို အခွန်ကောက်ခံသည့် နေရာတွင် အခွန်ကောက်ခံပုံနည်းစနစ်၊ စည်းမျဉ်း၊ စည်းကမ်း တစ်ခါအခွန်ဆောင်ပြီးလျှင် ပြီးစီးခြင်းရှိ/မရှိ၊ နောက်အခွန် ကောက်ခံရာနှုန်းထား ကောက်ခံသူများနှင့် အခွန်ထမ်း ပြည်သူများ၏ ဆက်ဆံမှုများကို အကြံပေးတင်ပြသွားမည် ဖြစ်ပါကြောင်း ရှင်းလင်းဖြေကြားပါသည်။

ဦးဇော်မင်းသိန်း (လေးမျက်နှာမဲဆန္ဒနယ်) က ဆက်စပ်မေးခွန်း မေးမြန်းပါသည်။

မိမိတို့နိုင်ငံတွင် ဘဏ္ဍာငွေရရှိရေးကို တစ်ချိန်တုန်းက သယံဇာတများအလွန်အမင်း ထုတ်ယူသုံးစွဲ ရောင်းချပြီး ရှာဖွေခဲ့ရပါကြောင်း၊ ယခုအစိုးရလက်ထက်တွင် သစ်တော၊ သယံဇာတကထုတ်ယူ သုံးစွဲခြင်းများ ပြည်သူများဆီက ရသင့်ရထိုက်သည့် အခွန်များကို ပေးဆောင်စေပြီး အလေအလွင့်မရှိစေဘဲ အကျိုးရှိထိရောက်အောင် ဆောင်ရွက်နေပါတယ်။ တိုင်းဒေသကြီးနှင့် ပြည်နယ်အစိုးရအဖွဲ့ အသီးသီးကလည်း ရုပ်သိမ်းပေးနိုင်ခြင်း မရှိဘူးဆိုသည့်အခါ ပြည်သူများသည် လမ်းကြေး၊ တံတားကြေးများကို ပေးချင်ကြသော်လည်း မြို့ဝင်ကြေးနှင့် ပတ်သက်၍ အခက်အခဲနှင့် ဝန်ထုပ်ဝန်ပိုး ဖြစ်နေပါကြောင်း၊ ဆောက်လုပ်ရေးဝန်ကြီးဌာန၏ လမ်းကြေး၊ တံတားကြေးနှင့် ပတ်သက်၍ ၂၀၁၆-၁၇ ဘဏ္ဍာနှစ်၊ ၂၀၁၇-၁၈ ဘဏ္ဍာနှစ် နှစ်နှစ်အတောအတွင်း ဂိတ်ပေါင်း ၂၈၂ ဂိတ်ကို ဖြေလျော့ပေးလိုက်သည့်အခါ ကျပ်သန်းပေါင်း ၈၀၀၀ နီးပါး ဖြေလျှော့ပေးခဲ့ပါကြောင်း၊ ရန်ကုန်တိုင်းဒေသကြီးတွင် ဂိတ်များမရှိသည့်အတွက် ကားများအဆင်ပြေ ချောမွေ့ပြီး လူမှုကွန်ယက်တွင်လည်း ပြည်သူများက ကျေကျေနပ်နပ် တွေ့ရှိရပါကြောင်း၊ ပိုမိုသင့်လျော် ကောင်းမွန်သည့် နည်းလမ်းများဖြင့်ဆိုပြီး ဖော်ပြထားခြင်းဖြစ်သည့်အတွက် ယခုလိုမျိုး ခရိုင်အတွင်းရှိ မြို့နယ်များကို လက်လှမ်းမီသရွေ့ လေ့လာပြီး တွက်ချက်ထားခြင်း ဖြစ်ပါကြောင်း၊ မြို့ဝင်ကြေးရသည့် ငွေဖြင့် ၂၀၁၄ သန်းခေါင်စာရင်းအရ မြို့နယ်တစ်မြို့နယ်ထဲရှိ ကားနှင်‌့ဆိုင်ကယ် ဖော်ပြထားသည့် စာရင်းများကို ဆိုင်ကယ်တစ်စီး ၁၀၀၀၊ ကားတစ်စီး ၁၀၀၀၀ နှင့် သတ်မှတ်လိုက်မည်ဆိုပါက အပေါ် ဟင်္သာတမြို့၊ ဇလွန်မြို့၊ ကြံခင်းမြို့နယ်များသည် လိုငွေပြပြီး မြန်အောင်မြို့၊ အင်္ဂပူမြို့၊ လေးမျက်နှာမြို့ရှိ ငွေများသည် ပိုငွေပြနေသည့်အတွက် ၎င်းမြို့နယ်ပေါင်းချုပ်လိုက်သည့်အခါ သိန်း ၁၀၀ ကျော် ကွာဟပါကြောင်း၊ ထို့ကြောင့် ခြောက်မြို့နယ်ကို ယခုလိုမျိုး အခွန်ကို သက်သက်သာသာဖြင့် ပြည်သူများ ဝန်ထုပ်ဝန်ပိုးမဖြစ်စေသည့် နည်းများဖြင့် ဆောင်ရွက်နိုင်ခဲ့မည် ဆိုလျှင် ပိုမိုကောင်းမွန်နိုင်မည်ဖြစ်သောကြောင့် လက်လှမ်းမီသရွေ့ တင်ပြခြင်းဖြစ်ပါကြောင်း၊ မိမိထက်ပိုပြီး အဆင်ပြေမည့် နည်းလမ်းများနှင့် ပြည်သူများ အခက်အခဲမရှိအောင် ဆောင်ရွက်ပေးရန်၊ လက်ရှိဥပဒေနှင့်မညီသည့် ဂိတ်များကို လာမည့်ဘဏ္ဍာနှစ်မှစပြီး တိတိကျကျဖျက်သိမ်းပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။

နေပြည်တော်ကောင်စီ၊ အဖွဲ့ဝင် ဦးအောင်မြင်ထွန်း

မိမိတို့မှ အစိုးရအဖွဲ့ရုံးကို ၂၀၀၈ ခုနှစ်၊ ဖွဲ့စည်းပုံအခြေခံဥပဒေနှင့်အညီ ပြည်နယ်နှင့်တိုင်းဒေသကြီး များက စီမံခန့်ခွဲပိုင်ခွင့်ရှိသည့်လမ်းများ၊ တံတားများဆိုသည့် ကိစ္စကို အကြံပြုတင်ပြ သွားနိုင်မည်ဖြစ်ပါကြောင်း၊ ကျန်သည့်ကိစ္စများမှာ မိမိတို့ဘက်မှ ဖြေကြား၍မရသည့်အတွက် ပြည်ထောင်စုအစိုးရကို အကြံပြုတင်ပြနိုင်မည်နှင့် လွှတ်တော်၏သဘောထားကို အကြံပြုတင်ပြနိုင်မည် ဖြစ်ပါကြောင်း ရှင်းလင်းဖြေကြားပါသည်။